shā'irī karbalā hai jis par se

har payambar guzar ke aatā hai

sha'iri karbala hai jis par se

har payambar guzar ke aata hai

koī sāhil-mizāj hai jis ne

mujh samundar kā e'tibār kiyā

koi sahil-mizaj hai jis ne

mujh samundar ka e'tibar kiya

is tajassus meñ hī sāhil pe khaḌā rahtā huuñ

ye samundar bhī kisī aañkh kā paanī to nahīñ

is tajassus mein hi sahil pe khaDa rahta hun

ye samundar bhi kisi aankh ka pani to nahin

ye vo nidā hai jo sab tak ḳhudā se aatī hai

ki naa't fan se nahīñ iltijā se aatī hai

ye wo nida hai jo sab tak KHuda se aati hai

ki na't fan se nahin iltija se aati hai

vo paañv rakhne lagī hai nadī ke paanī meñ

hujūm gaañv kā mashkīze le ke baiThā hai

wo panw rakhne lagi hai nadi ke pani mein

hujum ganw ka mashkize le ke baiTha hai

tire badan kī tanābeñ to maiñ ne khīñchī thiiñ

magar ye ḳhema kisī aur ko nasīb huā

tere badan ki tanaben to main ne khinchi thin

magar ye KHema kisi aur ko nasib hua

dikhā.ī dūñgā qalandar magar ye dekhnā hai

koī talāsh mirī justujū meñ kitnī hai

dikhai dunga qalandar magar ye dekhna hai

koi talash meri justuju mein kitni hai

havā se pūchh ke hujjat tamām kar ḳhud pur

fazā meñ naqsh haiñ qisse ye kin phareroñ ke

hawa se puchh ke hujjat tamam kar KHud pur

faza mein naqsh hain qisse ye kin phareron ke

ye bhī e'zāz hai mujh ko ki maiñ tujh se kam huuñ

ye to taqsīm hai tabrez ki maiñ ruumī huuñ

ye bhi e'zaz hai mujh ko ki main tujh se kam hun

ye to taqsim hai tabrez ki main rumi hun

mujh sā dariyā simaT gayā jin meñ

un kināroñ kī ḳhair ho jaa.e

mujh sa dariya simaT gaya jin mein

un kinaron ki KHair ho jae

jo na hotā thā chamatkār kiyā hai us ne

ek mulhid ko 'azādār kiyā hai us ne

jo na hota tha chamatkar kiya hai us ne

ek mulhid ko 'azadar kiya hai us ne

jise jise bhī lage vo pighal nahīñ saktā

use kaho mirī kirnoñ ke sāmne aa.e

jise jise bhi lage wo pighal nahin sakta

use kaho meri kirnon ke samne aae