jaan se baḌh ke huā kartī hai 'izzat pyāre

sar diyā jaatā hai dastār bachāne ke liye

jaan se baDh ke hua karti hai 'izzat pyare

sar diya jata hai dastar bachane ke liye

hālāt chāhe jo bhī hoñ dil to baḌā rakho

ye vaqt kaT hī jā.egā tum hausla rakho

haalat chahe jo bhi hon dil to baDa rakho

ye waqt kaT hi jaega tum hausla rakho

talab nahīñ hai hameñ dūsrī mohabbat kī

'amān' chaa.e dubāra zarūr chāhte haiñ

talab nahin hai hamein dusri mohabbat ki

'aman' chae dubara zarur chahte hain

ai māhtābo ujāloñ kī bhiik le jaao

hamāre paañv ke chhāloñ kī āftābī se

ai mahtabo ujalon ki bhik le jao

hamare panw ke chhaalon ki aaftabi se

kuchh hameñ paañv ke chhāloñ se bhī imdād huī

aur kuchh rāsta zanjīr ne āsān kiyā

kuchh hamein panw ke chhaalon se bhi imdad hui

aur kuchh rasta zanjir ne aasan kiya

qasam uThā.ī hai siina hī noch Dāleñge

kabhī jo 'ishq kī mahsūs kī chubhan ham ne

qasam uThai hai sina hi noch Dalenge

kabhi jo 'ishq ki mahsus ki chubhan hum ne

hamesha she'r kahne kī mashaqqat karnī paḌtī hai

asīrān-e-suḳhan kis ne kahā āzād hote haiñ

hamesha she'r kahne ki mashaqqat karni paDti hai

asiran-e-suKHan kis ne kaha aazad hote hain

ye ashk palkoñ pe Thahreñ to aisā lagtā hai

kisī makān kī dahlīz par diye rakhe haiñ

ye ashk palkon pe Thahren to aisa lagta hai

kisi makan ki dahliz par diye rakhe hain

ai parindo aan kar baiTho sar-e-shāḳh-e-'azā

ham daraḳhtoñ ko shu'ūr-e-marsiya-ḳhvānī bhī hai

ai parindo aan kar baiTho sar-e-shaKH-e-'aza

hum daraKHton ko shu'ur-e-marsiya-KHwani bhi hai