امان الحق بالا پوری بنیادی طور پر بچوں کے معروف شاعر ہیں۔ وہ یکم جولائی 1958 کو مہاراشٹر کے شہر بالا پور میں پیدا ہوئے۔ درس و تدریس سے وابستگی نے انہیں طفلی شاعری سے جوڑ دیا۔ ان کی تخلیقات میں معصوم ذہنوں کی نفسیات اور دلچسپیوں کو پیش نظر رکھا گیا ہے۔ ان کی تین کتابیں "رنگ ترنگ"، "منورنجن" اور "گل کاریاں" منظر عام پر آ چکی ہیں، جنہیں بالترتیب مہاراشٹر، بہار اور اتر پردیش اردو اکادمیوں کے انعامات سے نوازا جا چکا ہے۔ ان کی دو نظمیں صوبہ کرناٹک اور مہاراشٹر کے نصاب میں شامل کی گئی ہیں، جو ان کے فن کی پذیرائی کا ثبوت ہیں۔