ġharīb-e-shahr to faaqe se mar gayā 'ārif'

amīr-e-shahr ne hiire se ḳhud-kushī kar lī

gharib-e-shahr to faqe se mar gaya 'arif'

amir-e-shahr ne hire se KHud-kushi kar li

jo mere gaañv ke khetoñ meñ bhuuk ugne lagī

mire kisānoñ ne shahroñ meñ naukrī kar lī

jo mere ganw ke kheton mein bhuk ugne lagi

mere kisanon ne shahron mein naukri kar li

apne darvāze pe ḳhud hī dastakeñ detā hai vo

ajnabī lahje meñ phir vo pūchhtā hai kaun hai

apne darwaze pe KHud hi dastaken deta hai wo

ajnabi lahje mein phir wo puchhta hai kaun hai

kaisā mātam kaisā ronā miTTī kā

TuuT gayā hai ek khilaunā miTTī kā

kaisa matam kaisa rona miTTi ka

TuT gaya hai ek khilauna miTTi ka

tujhe maiñ zindagī apnī samajh rahā thā magar

tire baġhair basar maiñ ne zindagī kar lī

tujhe main zindagi apni samajh raha tha magar

tere baghair basar main ne zindagi kar li

andhe adam vajūd ke girdāb se nikal

ye zindagī bhī ḳhvāb hai tū ḳhvāb se nikal

andhe adam wajud ke girdab se nikal

ye zindagi bhi KHwab hai tu KHwab se nikal

mujh ko vaisā ḳhudā milā bilkul

maiñ ne 'ārif' kiyā gumāñ jaisā

mujh ko waisa KHuda mila bilkul

main ne 'arif' kiya guman jaisa

'ārif'-husain dhokā sahī apnī zindagī

is zindagī ke ba.ad kī hālat bhī hai fareb

'arif'-husain dhoka sahi apni zindagi

is zindagi ke baad ki haalat bhi hai fareb

aksar sab ko rasta dene vaale log

merī tarah se ḳhud pīchhe rah jaate haiñ

aksar sab ko rasta dene wale log

meri tarah se KHud pichhe rah jate hain

koī lashkar yahāñ se guzrā hai

itnī ujḌī ye rah-guzar kyoñ hai

koi lashkar yahan se guzra hai

itni ujDi ye rah-guzar kyon hai

'ārif-shafīq' virse meñ aulād ke liye

maiñ jā rahā huuñ jur.at-e-iz.hār chhoḌ kar

'arif-shafiq' wirse mein aulad ke liye

main ja raha hun jurat-e-izhaar chhoD kar

kyā kabhī tū ne sach nahīñ bolā

tere shānoñ pe phir ye sar kyoñ hai

kya kabhi tu ne sach nahin bola

tere shanon pe phir ye sar kyon hai

'ārif-shafīq' koī na aage nikal sakā

maiñ ne har aane vaale ko ḳhud rāsta diyā

'arif-shafiq' koi na aage nikal saka

main ne har aane wale ko KHud rasta diya

āñkhoñ meñ jaag uTThe haiñ tanhā shajar ke dukh

guldān meñ jo phuul saje dekhtā huuñ maiñ

aankhon mein jag uTThe hain tanha shajar ke dukh

guldan mein jo phul saje dekhta hun main

us shaḳhs par bhī shahr ke kutte jhapaT paḌe

roTī uThā rahā thā jo kachre ke Dher se

us shaKHs par bhi shahr ke kutte jhapaT paDe

roTi uTha raha tha jo kachre ke Dher se

kisī kī aañkh se aañsū bhī poñchh letā kabhī

ġhurūr kartā hai jo shaḳhs apne sajdoñ par

kisi ki aankh se aansu bhi ponchh leta kabhi

ghurur karta hai jo shaKHs apne sajdon par

vahī haiñ lafz purāne jo likh rahe haiñ sab

ma'ānī in meñ mirī shā'irī utārtī hai

wahi hain lafz purane jo likh rahe hain sab

ma'ani in mein meri sha'iri utarti hai

vahāñ har chiiz thī ik jins-e-vafā thī nāyāb

ḳhaak Daal aayā tire shahr ke bāzāroñ par

wahan har chiz thi ek jins-e-wafa thi nayab

KHak Dal aaya tere shahr ke bazaron par

mujhe ḳhudā ne vo baḳhshā hai shā'irī kā hunar

jo ḳhvāb dekhtā huuñ vo dikhā bhī saktā huuñ

mujhe KHuda ne wo baKHsha hai sha'iri ka hunar

jo KHwab dekhta hun wo dikha bhi sakta hun

saarī duniyā hai āshnā mujh se

ajnabī apne ḳhāndān meñ huuñ

sari duniya hai aashna mujh se

ajnabi apne KHandan mein hun

aañsū poñchhe dukh bāñTe insānoñ ke

maiñ ne bhī to saarī 'umr 'ibādat kī

aansu ponchhe dukh banTe insanon ke

main ne bhi to sari 'umr 'ibaadat ki

maiñ ne sīkhā hai apne bachchoñ se

sach kā iz.hār barmalā karnā

main ne sikha hai apne bachchon se

sach ka izhaar barmala karna

har ek haath meñ hathyār hoñ jahāñ 'ārif'

mujhe qalam se vahāñ inqalāb laanā hai

har ek hath mein hathyar hon jahan 'arif'

mujhe qalam se wahan inqalab lana hai

'ārif vo faisle kī ghaḌī bhī 'ajīb thī

dil ko sañbhālnā paḌā mīzān kī tarah

'arif wo faisle ki ghaDi bhi 'ajib thi

dil ko sanbhaalna paDa mizan ki tarah

ik fatvā phir aayā hai ye ġhāroñ se

kāfir keh kar mujh ko maarā jā saktā hai

ek fatwa phir aaya hai ye ghaaron se

kafir keh kar mujh ko mara ja sakta hai

chand sikke na de ham ko ḳhairāt meñ

apnī mehnat kā puurā sila chāhiye

chand sikke na de hum ko KHairaat mein

apni mehnat ka pura sila chahiye

yaqīñ ab ho gayā maiñ sach huuñ 'ārif

jabhī duniyā mujhe jhuTlā rahī hai

yaqin ab ho gaya main sach hun 'arif

jabhi duniya mujhe jhuTla rahi hai

pūchhte haiñ log mujh se kyoñ mirā nām-o-nasab

soch leñ paiġhambaroñ se silsila mil jā.egā

puchhte hain log mujh se kyon mera nam-o-nasab

soch len paighambaron se silsila mil jaega

jab koī ahm faisla karnā

apne bachchoñ se mashvara karnā

jab koi ahm faisla karna

apne bachchon se mashwara karna

aisā na ho vo ḳhud ko samajhne lage ḳhudā

itnā bhī jhuknā Thiik nahīñ iltimās meñ

aisa na ho wo KHud ko samajhne lage KHuda

itna bhi jhukna Thik nahin iltimas mein