ham pe ye raaz khulā bhī to bahut der ke baa'd

asl kirdār kahānī meñ kisī aur kā hai

hum pe ye raaz khula bhi to bahut der ke ba'd

asl kirdar kahani mein kisi aur ka hai

paḌe haiñ phīke ye chāñd taare bhī is ke aage

kahāñ se laa.ī ho tum ye husn-o-jamāl laḌkī

paDe hain phike ye chand tare bhi is ke aage

kahan se lai ho tum ye husn-o-jamal laDki

us kā ham se baat karnā yaad karnā pyaar karnā

ik ġhalat-fahmī thī jo ab duur hotī jā rahī hai

us ka hum se baat karna yaad karna pyar karna

ek ghalat-fahmi thi jo ab dur hoti ja rahi hai

bulandiyoñ par zarā takabbur se duur rahnā

vagarna ye hī banegā vaj.h-e-zavāl laḌkī

bulandiyon par zara takabbur se dur rahna

wagarna ye hi banega wajh-e-zawal laDki

dāstāñ apnī sunā kar so ga.e ham chain se

khiḌkiyāñ rotī rahīñ jaltā rahā shab bhar charāġh

dastan apni suna kar so gae hum chain se

khiDkiyan roti rahin jalta raha shab bhar charagh

milā hai husn to is par ġhurūr itnā nahīñ achchhā

milā detā hai miTTī meñ ḳhudā maġhrūr chehroñ ko

mila hai husn to is par ghurur itna nahin achchha

mila deta hai miTTi mein KHuda maghrur chehron ko

rahe haiñ chāñd-rātoñ meñ bhī tanhā

hameñ ḳhuddāriyāñ mahñgī paḌī haiñ

rahe hain chand-raaton mein bhi tanha

hamein KHuddariyan mahngi paDi hain

jis bulandī se tū bhī na aa.e nazar

aisī shohrat kī ai maañ du'ā.eñ na de

jis bulandi se tu bhi na aae nazar

aisi shohrat ki ai man du'aen na de

sar qalam karnā thā siine se lagāne vaale

ek haare hue lashkar ke sipāhī the ham

sar qalam karna tha sine se lagane wale

ek haare hue lashkar ke sipahi the hum

mirī yādoñ meñ taḌpoge ye vā'da maiñ nahīñ kartā

magar mahsūs to hogā tumheñ merā na honā bhī

meri yaadon mein taDpoge ye wa'da main nahin karta

magar mahsus to hoga tumhein mera na hona bhi

rahe jo saath to rakkhā sajā ke palkoñ pe

hue judā to kisī se na pūchhā haal us kā

rahe jo sath to rakkha saja ke palkon pe

hue juda to kisi se na puchha haal us ka