میرؔ غالبؔ یہیں تو رہتے تھے

ہم بھی دلی سے دل لگا لیں کیا

میں نے آواز بعد میں کھوئی

پہلے میں نے اسے پکارا تھا

ہجر میں جلتے ہوئے اس کو کہاں دیکھ سکا

اتنی تاخیر ہوئی صرف دھواں دیکھ سکا

آپ کا تو شوق ہے جلتے گھروں کو دیکھنا

آپ آنکھیں نم کریں گے آپ رہنے دیجیے

دن دن بھر آئینہ دیکھا جاتا ہے

تب جا کر دو چار اشارے بنتے ہیں

اچھا عمل سمجھ کے جو دریا میں ڈال دیں

دل کرتا ہے وہ نیکیاں پانی سے کھینچ لوں

بچھڑے تھے جس کی وجہ سے سیتا سے رام جی

میں اس ہرن کو رام کہانی سے کھینچ لوں

مجھ سے باہر نکل رہے تھے سب

میں بھی حیران سا نکل آیا

روٹھ جائیں گے مجھ سے اک دن سب

اس قدر روٹھتا ہوں میں سب سے

آنکھوں سے اک دریا نکلا

دریا سے کچھ لاشیں نکلیں

درد چہرہ پہن کے آیا تھا

تیرا چہرہ تھا سو قبول کیا

آنسو بتا رہے ہیں کہ مجھ میں ہے زندگی

یعنی میں انتظار میں پتھر نہیں ہوا

جواب ہنس کے دیا اس نے اور رونے لگا

سوال پوچھ کے شرمندگی بڑھی میری

میں سن رہا ہوں فون پہ خاموشیاں تری

میں جانتا ہوں آج سے کیا کیا تمام ہے

دھوپ میں دیکھ کر پرندوں کو

اگنے لگتا ہے اک شجر مجھ میں

پہلے اس کی آنکھیں سوچی جاتی ہیں

پھر آنکھوں میں رات بتائی جاتی ہے

ہنسی ان کے لبوں تک آ گئی ہے

مکمل ہو گیا رونا ہمارا

مسلسل ساتھ سورج کے چلی تو

کسی دن ڈوب جائے گی نظر بھی

کچھ سزا اور بڑھ گئی اس پر

زخم کھائے تو مسکرائے کیوں

قبر پر پھول رکھنے آیا تھا

پھر یہیں گھر بنا لیا میں نے

سب کو کانٹوں پہ شک ہوا تھا مگر

زخم کے آس پاس پھول ملے

اسی پانی میں لاشیں تیرتی ہیں

اسی پانی میں پتھر بیٹھتے ہیں

ایک پردا ہے صرف سانسوں کا

سانس ٹھہرے تو کائنات کھلے

ڈھونڈ رہا ہے دریا کس کو

روز کنارے ٹوٹ رہے ہیں

آنکھوں سے کیا ریت گرے گی

دریا تو اب سوکھ چکا ہے

ہوتا نہیں اداس کسی دکھ سے میں کبھی

اتنے حسین لوگ مرے آس پاس ہیں