میں جب بھی اس کی اداسی سے اوب جاؤں گی

تو یوں ہنسے گا کہ مجھ کو اداس کر دے گا

شہر خوابوں کا سلگتا رہا اور شہر کے لوگ

بے خبر سوئے ہوئے اپنے مکانوں میں ملے

ورق الٹ دیا کرتا ہے بے خیالی میں

وہ شخص جب مرا چہرہ کتاب ہوتا ہے

مرے اندر ڈھنڈورا پیٹتا ہے کوئی رہ رہ کے

جو اپنی خیریت چاہے وہ بستی سے نکل جائے

زمین موم کی ہوتی ہے میرے قدموں میں

مرا شریک سفر آفتاب ہوتا ہے

میں اس کے سامنے عریاں لگوں گی دنیا کو

وہ میرے جسم کو میرا لباس کر دے گا

وہ مرا سایہ مرے پیچھے لگا کر کھو گیا

جب کبھی دیکھا ہے اس نے بھیڑ میں شامل مجھے

کہنے والا خود تو سر تکیے پہ رکھ کر سو گیا

میری بے چاری کہانی رات بھر روتی رہی

جب کسی رات کبھی بیٹھ کے مے خانے میں

خود کو بانٹے گا تو دے گا مرا حصہ مجھ کو

گئے موسم میں میں نے کیوں نہ کاٹی فصل خوابوں کی

میں اب جاگی ہوں جب پھل کھو چکے ہیں ذائقہ اپنا

آئینہ خانے میں کھینچے لئے جاتا ہے مجھے

کون میری ہی عدالت میں بلاتا ہے مجھے

یہ حوصلہ بھی کسی روز کر کے دیکھوں گی

اگر میں زخم ہوں اس کا تو بھر کے دیکھوں گی

میرے حالات نے یوں کر دیا پتھر مجھ کو

دیکھنے والوں نے دیکھا بھی نہ چھو کر مجھ کو

اس گھر کے چپے چپے پر چھاپ ہے رہنے والے کی

میرے جسم میں مجھ سے پہلے شاید کوئی رہتا تھا

وفا کے نام پر پیرا کئے کچے گھڑے لے کر

ڈبویا زندگی کو داستاں در داستاں ہم نے

کریدتا ہے بہت راکھ میرے ماضی کی

میں چوک جاؤں تو وہ انگلیاں جلا لے گا

میری خلوت میں جہاں گرد جمی پائی گئی

انگلیوں سے تری تصویر بنی پائی گئی

چراغ بن کے جلی تھی میں جس کی محفل میں

اسے رلا تو گیا کم سے کم دھواں میرا

اک وہی کھول سکا ساتواں در مجھ پہ مگر

ایک شب بھول گیا پھیرنا جادو وہ بھی

میرے اندر ایک دستک سی کہیں ہوتی رہی

زندگی اوڑھے ہوئے میں بے خبر سوتی رہی

ہم متاع دل و جاں لے کے بھلا کیا جائیں

ایسی بستی میں جہاں کوئی لٹیرا بھی نہیں

ہم نے سارا جیون بانٹی پیار کی دولت لوگوں میں

ہم ہی سارا جیون ترسے پیار کی پائی پائی کو

ہم ایسے سورما ہیں لڑ کے جب حالات سے پلٹے

تو بڑھ کے زندگی نے پیش کیں بیساکھیاں ہم کو

میں کس زبان میں اس کو کہاں تلاش کروں

جو میری گونج کا لفظوں سے ترجمہ کر دے

تمام عمر کسی اور نام سے مجھ کو

پکارتا رہا اک اجنبی زبان میں وہ

زندگی بھر میں کھلی چھت پہ کھڑی بھیگا کی

صرف اک لمحہ برستا رہا ساون بن کے

ایک مدت سے خیالوں میں بسا ہے جو شخص

غور کرتے ہیں تو اس کا کوئی چہرہ بھی نہیں

چمن پہ بس نہ چلا ورنہ یہ چمن والے

ہوائیں بیچتے نیلام رنگ و بو کرتے

بچھڑ کے بھیڑ میں خود سے حواسوں کا وہ عالم تھا

کہ منہ کھولے ہوئے تکتی رہیں پرچھائیاں ہم کو

پکڑنے والے ہیں سب خیمے آگ اور بے ہوش

پڑے ہیں قافلہ سالار مشعلوں کے قریب

سننے والے مرا قصہ تجھے کیا لگتا ہے

چور دروازہ کہانی کا کھلا لگتا ہے

بجھا کے رکھ گیا ہے کون مجھ کو طاق نسیاں پر

مجھے اندر سے پھونکے دے رہی ہے روشنی میری

اپنی ہستی کا کچھ احساس تو ہو جائے مجھے

اور نہیں کچھ تو کوئی مار ہی ڈالے مجھ کو

ہماری بے بسی شہروں کی دیواروں پہ چپکی ہے

ہمیں ڈھونڈے گی کل دنیا پرانے اشتہاروں میں

مرے اندر سے یوں پھینکی کسی نے روشنی مجھ پر

کہ پل بھر میں مری ساری حقیقت کھل گئی مجھ پر

کوئی موسم میری امیدوں کو راس آیا نہیں

فصل اندھیاروں کی کاٹی اور دیئے بوتی رہی

میں اپنے جسم میں رہتی ہوں اس تکلف سے

کہ جیسے اور کسی دوسرے کے گھر میں ہوں

مجھے کہاں مرے اندر سے وہ نکالے گا

پرائی آگ میں کوئی نہ ہاتھ ڈالے گا

میں شاخ سبز ہوں مجھ کو اتار کاغذ پر

مری تمام بہاروں کو بے خزاں کر دے

اب بھی کھڑی ہے سوچ میں ڈوبی اجیالوں کا دان لئے

آج بھی ریکھا پار ہے راون سیتا کو سمجھائے کون

زرد چہروں کی کتابیں بھی ہیں کتنی مقبول

ترجمے ان کے جہاں بھر کی زبانوں میں ملے

فسانہ در فسانہ پھر رہی ہے زندگی جب سے

کسی نے لکھ دیا ہے طاق نسیاں پر پتہ اپنا

میری تصویر بنانے کو جو ہاتھ اٹھتا ہے

اک شکن اور مرے ماتھے پہ بنا دیتا ہے

میں نے یے سوچ کے بوئے نہیں خوابوں کے درخت

کون جنگل میں اگے پیڑ کو پانی دے گا

میں بھی ساحل کی طرح ٹوٹ کے بہہ جاتی ہوں

جب صدا دے کے بلاتا ہے سمندر مجھ کو

وہ یہ کہہ کہہ کے جلاتا تھا ہمیشہ مجھ کو

اور ڈھونڈے گا کہیں میرے علاوہ مجھ کو

میں اس کی دھوپ ہوں جو میرا آفتاب نہیں

یہ بات خود پہ میں کس طرح آشکار کروں

کسی جنم میں جو میرا نشاں ملا تھا اسے

پتا نہیں کہ وہ کب اس نشان تک پہنچا

دھوپ میری ساری رنگینی اڑا لے جائے گی

شام تک میں داستاں سے واقعہ ہو جاؤں گی

ٹٹولتا ہوا کچھ جسم و جان تک پہنچا

وہ آدمی جو مری داستان تک پہنچا