Sher of Baharunnisa Bahar
munjamid ho zindagī meñ jab kabhī shahr-e-ḳhayāl
phir charāġh-e-dil se us ko jagmagānā chāhiye
munjamid ho zindagi mein jab kabhi shahr-e-KHayal
phir charagh-e-dil se us ko jagmagana chahiye
ashk ke abr-e-ravāñ meñ DhūñDhtī huuñ maiñ tujhe
aas kī in titliyoñ ko bhī Thikānā chāhiye
ashk ke abr-e-rawan mein DhunDhti hun main tujhe
aas ki in titliyon ko bhi Thikana chahiye
ye zaḳhm-e-anā kaafī hai ai yūsuf-e-daurāñ
is chashm-e-zuleḳhā ko tū ġhamnāk na karnā
ye zaKHm-e-ana kafi hai ai yusuf-e-dauran
is chashm-e-zuleKHa ko tu ghamnak na karna
harf saare bol uTTheñ jab bhī maiñ likhne lagūñ
ab koī jazba mirā mahv-e-duā lagtā nahīñ
harf sare bol uTThen jab bhi main likhne lagun
ab koi jazba mera mahw-e-dua lagta nahin
havā hai ret hai dasht-e-vafā hai
rutoñ ko aatā jaatā dekhtī huuñ
hawa hai ret hai dasht-e-wafa hai
ruton ko aata jata dekhti hun
vīrān zindagī ke ye lamhe ajiib haiñ
bazm-e-tarab meñ dhuum hai furqat dhamāl se
viran zindagi ke ye lamhe ajib hain
bazm-e-tarab mein dhum hai furqat dhamal se
ghāyal vajūd soch kī baisākhiyāñ liye
milne chalā hai guzre hue māh-o-sāl se
ghayal wajud soch ki baisakhiyan liye
milne chala hai guzre hue mah-o-sal se