yaaro hudūd-e-ġham se guzarne lagā huuñ maiñ

mujh ko sameT lo ki bikharne lagā huuñ maiñ

yaro hudud-e-gham se guzarne laga hun main

mujh ko sameT lo ki bikharne laga hun main

mirī mailī hathelī par to bachpan se

ġharībī kā kharā sonā chamaktā hai

meri maili hatheli par to bachpan se

gharibi ka khara sona chamakta hai

ḳhuub nibhegī ham donoñ meñ mere jaisā tū bhī hai

thoḌā jhūTā maiñ bhī Thahrā thoḌā jhūTā tū bhī hai

KHub nibhegi hum donon mein mere jaisa tu bhi hai

thoDa jhuTa main bhi Thahra thoDa jhuTa tu bhi hai

zarā sī baat pe kyā kyā na kho diyā maiñ ne

jo tum ne khoyā hai us kā shumār tum bhī karo

zara si baat pe kya kya na kho diya main ne

jo tum ne khoya hai us ka shumar tum bhi karo

tumhārā chehra tumheñ hū-ba-hū dikhā.ūñgā

maiñ aa.ina huuñ mirā e'tibār tum bhī karo

tumhaara chehra tumhein hu-ba-hu dikhaunga

main aaina hun mera e'tibar tum bhi karo

ik din vo mere aib gināne lagā 'farāġh'

jab ḳhud hī thak gayā to mujhe sochnā paḌā

ek din wo mere aib ginane laga 'faragh'

jab KHud hi thak gaya to mujhe sochna paDa

ham se tahzīb kā dāman nahīñ chhoḌā jaatā

dasht-e-vahshat meñ bhī ādāb liye phirte haiñ

hum se tahzib ka daman nahin chhoDa jata

dasht-e-wahshat mein bhi aadab liye phirte hain

khulī na mujh pe bhī dīvāngī mirī barsoñ

mire junūn kī shohrat tire bayāñ se huī

khuli na mujh pe bhi diwangi meri barson

mere junun ki shohrat tere bayan se hui

dimāġh ahl-e-mohabbat kā saath detā nahīñ

use kaho ki vo dil ke kahe meñ aa jaa.e

dimagh ahl-e-mohabbat ka sath deta nahin

use kaho ki wo dil ke kahe mein aa jae

sunā hai amn-parastoñ kā vo ilāqa hai

vahīñ shikār kabūtar huā to kaise huā

suna hai amn-paraston ka wo ilaqa hai

wahin shikar kabutar hua to kaise hua

na chāñd ne kiyā raushan mujhe na sūraj ne

to maiñ jahāñ meñ munavvar huā to kaise huā

na chand ne kiya raushan mujhe na suraj ne

to main jahan mein munawwar hua to kaise hua

hamāre tan pe koī qīmtī qabā na sahī

ġhazal ko apnī magar ḳhush-libās rakhte haiñ

hamare tan pe koi qimti qaba na sahi

ghazal ko apni magar KHush-libas rakhte hain

kabhī na sochā thā maiñ ne uḌaan bharte hue

ki ranj hogā zamīñ par mujhe utarte hue

kabhi na socha tha main ne uDan bharte hue

ki ranj hoga zamin par mujhe utarte hue

na jaane kaisā samundar hai ishq kā jis meñ

kisī ko dekhā nahīñ Duub ke ubharte hue

na jaane kaisa samundar hai ishq ka jis mein

kisi ko dekha nahin Dub ke ubharte hue

usī taraf hai zamāna bhī aaj mahv-e-safar

'farāġh' maiñ ne jidhar se guzarnā chāhā thā

usi taraf hai zamana bhi aaj mahw-e-safar

'faragh' main ne jidhar se guzarna chaha tha

mujh meñ hai yahī aib ki auroñ kī tarah maiñ

chehre pe kabhī dūsrā chehrā nahīñ rakhtā

mujh mein hai yahi aib ki auron ki tarah main

chehre pe kabhi dusra chehra nahin rakhta

kaun aatā hai ayādat ke liye dekheñ 'farāġh'

apne jī ko zarā nā-sāz kiye dete haiñ

kaun aata hai ayaadat ke liye dekhen 'faragh'

apne ji ko zara na-saz kiye dete hain

kisī ne raah kā patthar hamīñ ko Thahrāyā

ye aur baat ki phir ā.īna hamīñ Thahre

kisi ne rah ka patthar hamin ko Thahraya

ye aur baat ki phir aaina hamin Thahre