فرحان عالم قیصرکی پیدائش 12 اگست 1998 کو گورکھپور میں ہوئی۔ انہوں نے بایوٹیکنالوجی میں بی ٹیک کی تعلیم حاصل کی ہے اور پیشے کے اعتبار سے ایک اسپتال میں کوالٹی مینیجر اور ایڈمن کے طور پر خدمات انجام دے رہے ہیں۔ پیشہ ورانہ مصروفیات کے ساتھ ساتھ ادب سے ان کا گہرا تعلق قائم رہا اور انہوں نے شاعری کو اپنے جذبات کے اظہار کا وسیلہ بنایا۔
قیصراپنی شاعری میں انسانی احساسات، سماجی مسائل اور زندگی کے مختلف پہلوؤں کو سادہ مگر مؤثر انداز میں پیش کرتے ہیں۔ ان کی غزلوں اور اشعار میں فکر، جذبے اور حساسیت کا خوبصورت امتزاج دکھائی دیتا ہے۔ اپنی ادبی خدمات کے اعتراف میں انہیں اٹل بہاری واجپئی سمان اور یووا ساہتیہ رتن پرسکار جیسے اعزازات سے بھی نوازا جا چکا ہے۔