جواز کچھ نہیں ہوتا ہماری خوشیوں کا

اداس رہنے کا کوئی سبب نہیں ہوتا

وہ اک جگہ نہ کہیں رہ سکا اور اس کے ساتھ

کرایہ دار تھے ہم بھی مکاں بدلتے رہے

ہر شے کو زمیں اپنی طرف کھینچ رہی ہے

کب آتا ہے دھرتی پہ گگن دیکھتے رہنا

اگر جہاں میں کوئی آئنا نہیں تیرا

تو پھر تجھی کو ترے رو بہ رو کروں گا میں

وہ خفا ہیں تو رہیں ہم کو منانا بھی نہیں

ان کو آنا بھی نہیں ہم کو بلانا بھی نہیں

شاعری کیا ہے مری جاں تجھے معلوم نہیں

ایک تہمت ہے جو مجھ پر بھی لگا دی گئی ہے

ملی نہ ہم کو شہادت تو کیا یہ کیا کم ہے

کہ ساری عمر رہ کربلا پہ چلتے رہے

بند ہوں آنکھیں تو دنیا صاف آتی ہے نظر

ہم یونہی آنکھوں پہ پردہ تو نہ تھے ڈالے ہوئے

مری نظر میں کوئی شے نہیں ٹھہرتی ہے

تمہارا حسن مگر جم رہا ہے آنکھوں میں

بس میں جو کچھ تھا وہ میں نے کر دیا

اب وہ عزت دے کہ ذلت دے مجھے

ترے جمال کی دیکھی جو سادگی ہم نے

بنا لیا اسے اسلوب شاعری ہم نے

عجب قاتل ہو تم تھکتے نہیں ہو قتل کرنے سے

کبھی خنجر تمہارا خون سے بے دم نہیں ہوتا

تری تلاش میں نکلا جو بوئے گل کی طرح

پلٹ کے پھر وہ کبھی اپنے گھر نہیں جاتا

زمانے سے میں ناقدری کا شکوہ کیا کروں نجمیؔ

خود اپنی ہی نظر سے عمر بھر اوجھل رہا ہوں میں

اس شہر میں کسی کو میسر نہ تھا سکوں

رونا کسی کو دل کا کسی کو انا کا تھا

ترے غم نے عطا کی ہے عجب پاکیزگی مجھ کو

میں روتا ہوں تو آنکھوں سے مری زمزم نکلتا ہے

ہے دیدہ ور تو ایک نظر میں پرکھ مجھے

لازم نہیں کسی کو کئی بار دیکھنا

بھلا وہ خاک سمجھیں گے خدا کیا ہے خودی کیا ہے

جو اب تک یہ نہیں سمجھے مقام آدمی کیا ہے

بساط خاک پر بے حد قد آور لگ رہے تھے جو

بلندی پر پہنچ کر وہ بہت چھوٹے نظر آئے

جب سے گھر والے زیادہ ہم کو سمجھانے لگے

بھول بیٹھے تھے جنہیں ہم وہ بھی یاد آنے لگے

کیجیے کیا ان سے اخلاق‌ و مروت کی امید

یہ ہیں سب کے سب نئی تہذیب کے پالے ہوئے

کمی کچھ اپنے ہی ذوق طلب میں ہے ورنہ

دعا کا حرف کبھی بے اثر نہیں جاتا

جب پہلی بار گاؤں سے وہ شہر کو گیا

حیرت سے اونچے اونچے بھون دیکھتا رہا

عشق میں جل جل کے کندن بن گیا ہوں سربسر

اب بھی کیا میرا خدا دوزخ میں ڈالے گا مجھے

بزم میں آتے ہی اس کے بجھ گئیں آنکھیں تمام

سب کے سب دیدار کی حسرت لیے بیٹھے رہے

مرے قبیلے کا ہر شخص مجھ سے بد ظن ہے

مری خطا ہے بس اتنی کہ سوچتا ہوں میں

الجھنا لفظوں سے شیوہ ہے کم نگاہوں کا

جو دیدہ ور ہیں وہ بین السطور دیکھتے ہیں

تبصرہ کرتے رہے ہم ظلمتوں پر

کھو گیا سارا اثاثہ روشنی میں

شکست کر نہ سکا کوئی غزنوی اس کو

وہ ایک بت جو مرے دل کے سومنات میں ہے

نشہ وجود کا جب تک اتر نہیں جاتا

دلوں سے کھوٹ نگاہوں سے شر نہیں جاتا

یہ وصل کی خواہش بھی میاں بو الہوسی ہے

جس دل میں محبت ہو تمنا نہیں ہوتی

نقطہ نہ تھا لکیر نہ تھا دائرہ نہ تھا

وہ حرف تھا میں جس کو کسی نے لکھا نہ تھا

تو میرے حق میں کوئی فیصلہ ابھی سے نہ کر

کہ لمحہ لمحہ میں خود کو نیا بناتا ہوں

سورج کو جانے کس کے تقدس کا ہے خیال

مغرب کی سمت جب بھی گیا سر کے بل گیا

کسی کا وصل تو جنت کا خوان ہے نجمیؔ

یہ من و سلویٰ ہمیشہ نہیں اترتا ہے

ہر حال میں خوش رہنا ہر روز غزل کہنا

ہم نے یہی جینے کی اک راہ نکالی ہے

رکھتا تھا وہ بھی میری روش پر کڑی نگاہ

اور میں بھی اس کا چال چلن دیکھتا رہا

میں سادہ لوح کرتا بھی کیا تیرے شہر میں

چپ چاپ یار لوگوں کا فن دیکھتا رہا

کھل اٹھا میرے دل کا چمن بھی پس وصال

خطے ترے بدن کے بھی شاداب ہو گئے

ہے دھوپ بھی اس کے لیے تھوڑی سی ضروری

یہ نخل گھنی چھاؤں میں مرجھانے لگا ہے

کافور ہوئی جب سے مرے دل کی سیاہی

ہر چہرہ مجھے صاف نظر آنے لگا ہے

گلشن میں یہ بہار رکی ہی رہے گی کیا

یہ چاندنی بدن کی کھلی ہی رہے گی کیا

سفر ہو ختم تو شاید یہ فاصلہ مٹ جائے

ابھی تو میں ہوں زمیں پر وہ آسمان پہ ہے

تو پرانے پن پہ میرے اتنا افسردہ نہ ہو

آنے والے کل کو میں پھر سے نیا ہو جاؤں گا

مرے مولا یہ کیسا وسوسہ آیا مرے دل میں

اب اس کے سامنے جاتے ہوئے بھی ڈر رہا ہوں میں

آگ ایسی ہے کچھ اس میں کہ بجھانا ہے محال

برف ایسی ہے کہ پگھلا نہیں سکتا کوئی

اس میں جو کچھ ہے علاوہ حسن کے

چھانٹ دیتا ہے مرا تار نظر

مرے پیکر میں لاکھوں سورجوں کی آگ پنہاں ہے

غریق آب ہوں پھر بھی مسلسل جل رہا ہوں میں

یہ الگ بات کہ سایہ ہے سلامت اس کا

ورنہ دیوار تو چاہت کی گرا دی گئی ہے