حضور آپ تکلف میں کیوں پڑے ہوئے ہیں

مرے ہوؤں کے جنم دن نہیں مناتا کوئی

لاکھ میٹھے ہوں ترے شہر کے چشمے لیکن

ہم ترے شہر کو خوش آب نہیں کہہ سکتے

قسم ہے تیرے تغافل کی تجھ سے پہلے مجھے

نہیں پتہ تھا کہ احساس کمتری کیا ہے

تمہارے حسن کا صدقہ اترنا لازمی ہے

سو یوں کرو کسی بچے کو ماتھا چومنے دو

پاگل کیا ہے عشق نے آدھا جو رہ گیا

اب آدھے سر کے درد کا پورا مریض ہوں

تجھے پتہ تھا میں تیرے بغیر کچھ بھی نہیں

ذرا ترس بھی نہ آیا تجھے بچھڑتے ہوئے

میں کئی کام تو دانستہ غلط کرتا تھا

تاکہ وہ نقص نکالے کہ نہیں ایسے کر

ہمارے دل سے نکلتے ہوؤں کو سات سلام

وہ اس لیے کہ وہ اس حبس میں مکین رہے

تمہارے جانے کے بعد ہم نے سکون ڈھونڈا کچھ اس طرح سے

بچھڑنے والوں کے پاؤں پڑنا انہیں جدائی سے باز رکھنا

ہمارے بعد کوئی سر پرست مل نہ سکا

یتیم خانے میں رکھا گیا محبت کو

پہلے بھی میرے گاؤں میں گھائل ہیں تین شخص

آزار آگہی کا میں چوتھا مریض ہوں

ہم ایسے لوگ ضائع ہو رہے ہیں

خدا چپ چاپ دیکھے جا رہا ہے

ستارے دیکھنے والے ہمیں بتاتے ہیں

ہمارے ہونٹ تمہاری جبیں کو ترسیں گے

اس کے معیار پر خدا لائے

اس نظر تک تو آ گئے ہیں ہم

پچھلے جنم کا کوئی تعلق تھا اس کے ساتھ

دیکھے بغیر مجھ کو خد و خال یاد تھے

خوف اس درجہ مسلط تھا ترے بعد حسنؔ

دل دھڑکتا تھا تو ہم خود سے لپٹ جاتے تھے

تمہاری آنکھوں پہ نظم کہنے سے پہلے ہم نے بھگوئی آنکھیں

سنا ہوا تھا زمین نم ہو تو اچھی ہوتی ہے کاشتکاری

میں بہت سوچ کے بچھڑا تھا محرم میں حسیبؔ

میں نے اس شخص کو رونے کی سہولت دی تھی

داد کب پاتے ہیں اس میرؔ کی دیوانی سے

زنگ آلود تخیل سے کھرونچے ہوئے شعر

ہمی پریم چند کی کہانیوں کے لوگ ہیں

وہ لوگ جن کی عمر کو ادھار نے نگل لیا

نہ میرے پاس تسلی نہ اس کے پاس آنسو

خدا کے سامنے بے بس کھڑے ہیں ہم دونوں

ہماری خیر ہے لیکن بس اک گزارش ہے

ہمارے بعد کسی سے بھی یوں نہیں کرنا

اسے بتانا پرندے اسے بلاتے ہیں

اسے بتانا کہ شاعر اداس ہے اس کا

یہ ساتھ گاؤں میں ایک چھوٹا سا کام ہے بس

مری اداسی اداس مت ہو میں آ رہا ہوں

اب اس کی مرضی مسافر کہے کہ گرد پا

میں اس کے ساتھ مسلسل سفر میں رہتا ہوں

تیرے خوابوں کے پیچھے بھاگی تھیں

میری آنکھوں میں پڑ گئے چھالے

خدا کے بعد اسے مجھ پہ مان تھا کیونکہ

خدا کے بعد اسے میں ہی پیار کرتا تھا

ہماری وحشت کسی پرانے کھنڈر کے آسیب کی امانت

ہماری غزلیں ہماری دیوی کی ایک ترچھی نظر کا صدقہ

زمانے بھر کی دعائیں مرے لئے تھیں مگر

میں چاہتا ہی نہیں تھا کہ صبر آ جائے

ہمارے آنسو کسی ٹھکانے تو لگ رہے ہیں

فرات کے بد نصیب پانی کا کیا بنے گا

شاہزادی کی مرضی ہے لیکن

مجھ سے اچھا غلام کوئی نہیں

ابھی سے سوچ لو پھر واپسی نہیں ہوگی

طلسم بڑھتا ہی جائے گا دن بہ دن اس کا

تمہارا حسن یہ کھلتا ہے جیسے دھیرے سے

ہمارے شعر بھی ایسے ہی دیر پا ہوں گے