muntazir huuñ tirī āvāz se tasvīr talak

ek vaqfa hī to darkār thā milne ke liye

muntazir hun teri aawaz se taswir talak

ek waqfa hi to darkar tha milne ke liye

ḳhat-e-shikasta meñ kyā jaane kab kashīd aa jaa.e

ki saañs rok ke kariyo miyāñ kitābat-e-‘ishq

KHat-e-shikasta mein kya jaane kab kashid aa jae

ki sans rok ke kariyo miyan kitabat-e-‘ishq

us ek lamhe kī rā.egānī kā dukh hai saarā

vo terī qurbat meñ jo guzarne se rah gayā thā

us ek lamhe ki raegani ka dukh hai sara

wo teri qurbat mein jo guzarne se rah gaya tha

aa jaatī haiñ kuchh ḳhushiyāñ andeshoñ meñ

kuchh andeshe ḳhushiyoñ meñ aa jaate haiñ

aa jati hain kuchh KHushiyan andeshon mein

kuchh andeshe KHushiyon mein aa jate hain

dil dhaḌakne kā sabab zindagī ho saktī hai

ye zarūrī to nahīñ hai ki tirī yaad hī ho

dil dhaDakne ka sabab zindagi ho sakti hai

ye zaruri to nahin hai ki teri yaad hi ho