saaqī tirī mahfil kā ye dastūr bhī dekhā

chhalkā.e koī jaam koī buuñd ko tarse

saqi teri mahfil ka ye dastur bhi dekha

chhalkae koi jam koi bund ko tarse

jo musāfir hai use kyā dhuup kī shiddat kā ġham

sar pe saa.e ke liye maañ kī du'ā le jā.egā

jo musafir hai use kya dhup ki shiddat ka gham

sar pe sae ke liye man ki du'a le jaega

naam un ke chamakte haiñ tārīḳh ke safhoñ par

jo log zamāne kī taqdīr badalte haiñ

nam un ke chamakte hain tariKH ke safhon par

jo log zamane ki taqdir badalte hain

pūchhe koī un se dil-e-betāb kī hālat

ik lamha sukūñ jin ko mayassar nahīñ hotā

puchhe koi un se dil-e-betab ki haalat

ek lamha sukun jin ko mayassar nahin hota

mirī tarah ye kahāñ apne ghar meñ rahtā hai

mirā ḳhayāl musalsal safar meñ rahtā hai

meri tarah ye kahan apne ghar mein rahta hai

mera KHayal musalsal safar mein rahta hai

jo hausloñ se samundar khañgāl Dālegā

yaqīñ hai gauhar-e-maqsad zarūr pā legā

jo hauslon se samundar khangal Dalega

yaqin hai gauhar-e-maqsad zarur pa lega

jurm kis kā hai kaun mujrim hai

aur hotā hai sar qalam kis kā

jurm kis ka hai kaun mujrim hai

aur hota hai sar qalam kis ka

mafhūm-e-dostī se agar āshnā haiñ aap

dushman ko bhī ba-chashm-e-hiqārat na dekhiye

mafhum-e-dosti se agar aashna hain aap

dushman ko bhi ba-chashm-e-hiqarat na dekhiye

hotā hai hādsa bhī kabhī bā’is-e-hayāt

maiñ yuuñ girā ki dekhne vaale sañbhal gaye

hota hai hadsa bhi kabhi ba’is-e-hayat

main yun gira ki dekhne wale sanbhal gaye

be-hunar log haiñ manzar-e-'ām par

aur gosha-nashīñ bā-hunar aadmī

be-hunar log hain manzar-e-'am par

aur gosha-nashin ba-hunar aadmi

kuchh aise log bhī apne qarīb rahte haiñ

ki jin se dil na milā haath baar baar mile

kuchh aise log bhi apne qarib rahte hain

ki jin se dil na mila hath bar bar mile

hamīñ ne ḳhuuñ charāġhoñ ko diyā hai

ujālā hai tirī mahfil meñ ham se

hamin ne KHun charaghon ko diya hai

ujala hai teri mahfil mein hum se

khelte haiñ shahr ke nādān bachche aag se

bach nahīñ saktā hai ab koī makāñ is shahr meñ

khelte hain shahr ke nadan bachche aag se

bach nahin sakta hai ab koi makan is shahr mein

hamārā hausla to dekh ai barq-e-sitam-pesha

nasheman phir isī ujḌe gulistāñ meñ banāte haiñ

hamara hausla to dekh ai barq-e-sitam-pesha

nasheman phir isi ujDe gulistan mein banate hain