رہتی ہے ساتھ ساتھ کوئی خوش گوار یاد

تجھ سے بچھڑ کے تیری رفاقت گئی نہیں

لگتا ہے زندہ رہنے کی حسرت گئی نہیں

مر کے بھی سانس لینے کی عادت گئی نہیں

ہاں یہ ممکن ہے مگر اتنا ضروری بھی نہیں

جو کوئی پیار میں ہارا وہی فن کار ہوا

بھول جانا تھا جسے ثبت ہے دل پر میرے

یاد رکھنا تھا جسے اس کو بھلا بیٹھا ہوں

خود اپنی شکل دیکھے ایک مدت ہو گئی مجھ کو

اٹھا لیتا ہے پتھر ٹوٹے آئینے نہیں دیتا

زمانے کے دربار میں دست بستہ ہوا ہے

یہ دل اس پہ مائل مگر رفتہ رفتہ ہوا ہے

پلٹ کے آئے نہ آئے کوئی سنے نہ سنے

صدا کا کام فضاؤں میں گونجتے تک ہے

جیسی نگاہ تھی تری ویسا فسوں ہوا

جو کچھ ترے خیال میں تھا جوں کا توں ہوا

یہی بہت ہے کسی طرح سے بھرم ہی رہ جائے پیش دنیا

اگر میسر نہیں ہے بادہ خیال بادہ بھی کم نہیں ہے

آباد بستیاں تھیں فصیلوں کے سائے میں

آپس میں بستیوں کو ملاتا ہوا حصار

برا بھلا واسطہ بہر طور اس سے کچھ دیر تو رہا ہے

کہیں سر راہ سامنا ہو تو اتنی شدت سے منہ نہ موڑوں

انہیں در خواب گاہ سے کس لیے ہٹایا

محافظوں کی وفا شعاری میں کیا کمی تھی