پوجتا ہوں کبھی بت کو کبھی پڑھتا ہوں نماز

میرا مذہب کوئی ہندو نہ مسلماں سمجھا

جہاں سے ہوں یہاں آیا وہاں جاؤں گا آخر کو

مرا یہ حال ہے یارو نہ مستقبل نہ ماضی ہوں

خط دیکھ کر مرا مرے قاصد سے یوں کہا

کیا گل نہیں ہوا وہ چراغ سحر ہنوز

کوئی آزاد ہو تو ہو یارو

ہم تو ہیں عشق کے اسیروں میں

رخسار کا دے شرط نہیں بوسۂ لب سے

جو جی میں ترے آئے سو دے یار مگر دے

دیکھ کر ہاتھ میں تسبیح گلے میں زنار

مجھ سے بیزار ہوئے کافر و دیں دار جدا

آتش کا شعر پڑھتا ہوں اکثر بحسب حال

دل صید ہے وہ بحر سخن کے نہنگ کا

اگر سمجھو نماز زاہد مغرور یارو

ہزاروں بار بہتر تر ہماری بے نمازی ہے

عمر دو چار روز مہماں ہے

خدمت مہماں کروں نہ کروں

دیتا ہے روز روز دلاسے نئے نئے

کس طرح اعتبار ہو حافظؔ کے فال پر

کیا کہوں دن کو کس قدر رویا

رات دلبر کو دیکھ کر رویا میں

آج مسجد میں نظر آتا تو ہے میکش مگر

مطلب اس کا بیچنا ہے شیخ کی دستار کا

جاں بلب دم بھر کا ہوں مہمان یار

ایک بوسہ میری مہمانی کرو

ہاتھ کا بازو کا گردن کا کمر کا کس کے

ہم کو تعویذوں میں یہی چار ہی بھائے تعویذ

تخم ریحاں کھلا طبیب مجھے

یعنی ہوں میں مریض حضرت خال

اپنے بھی عشق کو زوال نہ ہو

نہ تمہارے جمال کو ہے کمال

چھوٹتا ہے ایک تو پھنستے ہیں آ کر اس میں دو

آج کل ہے گرم تر کیا خوب بازار قفس

ہندو بچہ نے چھین کے دل مجھ سے یوں کہا

ہندوستاں بھی کشور ترکاں سے کم نہیں

لا ولد کہتے ہیں ہم کو لا ولد

شعر سے از بس کہ اولادی ہیں ہم

مرجع گبر و مسلماں ہے وہ بت نام خدا

بھیجتے ہیں اسے ہندو و مسلماں کاغذ

رحم کر ہم پر بھی دل بر ہیں ترے

عشق کے ہاتھوں سے آواروں کے بیچ

دریا میں وہ دھویا تھا کبھی دست حنائی

حسرت سے وہیں پنجۂ مرجاں میں لگی آگ

عشق خوباں نہیں ہے ایسی شے

باندھ کر رکھئے جس کو پڑیا میں

آج کل جو کثرت شوریدگان عشق ہے

روز ہوتے جاتے ہیں حداد نوکر سیکڑوں