ḳhvāb Thahre the to āñkheñ bhīgne se bach ga.iiñ

varna chehre par to ġham kī bārishoñ kā aks hai

KHwab Thahre the to aankhen bhigne se bach gain

warna chehre par to gham ki barishon ka aks hai

maiñ kisī aur ko dekhūñ bhī to dekhūñ kaise

us ke ḳhvāboñ kī in āñkhoñ pe nigahbānī hai

main kisi aur ko dekhun bhi to dekhun kaise

us ke KHwabon ki in aankhon pe nigahbani hai

umr guzrī ik nigāh-e-lutf kī ummīd meñ

ham ko apne hausloñ kī ye adā achchhī lagī

umr guzri ek nigah-e-lutf ki ummid mein

hum ko apne hauslon ki ye ada achchhi lagi

har daur kā jo aks hai vo aa.ina haiñ ham

taḳhlīq-e-kā.enāt kā ik silsila haiñ ham

har daur ka jo aks hai wo aaina hain hum

taKHliq-e-kaenat ka ek silsila hain hum

na paḌh le koī tahrīreñ tumhāre zard chehre kī

dar-o-dīvār ghar ke shoḳh rangoñ se sajā rakhnā

na paDh le koi tahriren tumhaare zard chehre ki

dar-o-diwar ghar ke shoKH rangon se saja rakhna

vo laḌkiyāñ ki jo lagtī thiiñ saada tahrīreñ

paḌhī ga.iiñ to anokhī paheliyāñ niklīñ

wo laDkiyan ki jo lagti thin sada tahriren

paDhi gain to anokhi paheliyan niklin

shiddat-e-tishna-labī aaj kahāñ laa.ī hai

pyaas sahrā kī samundar meñ utar aa.ī hai

shiddat-e-tishna-labi aaj kahan lai hai

pyas sahra ki samundar mein utar aai hai

nazar meñ yādoñ ke manzar sameT kar rakhnā

maiñ jaisā chhoḌ ke aa.ī huuñ vaisā ghar rakhnā

nazar mein yaadon ke manzar sameT kar rakhna

main jaisa chhoD ke aai hun waisa ghar rakhna

kar ga.iiñ maujeñ sharārat jab bhī likkhā terā naam

ret par jitnī lakīreñ thiiñ vo sab mil-jul ga.iiñ

kar gain maujen shararat jab bhi likkha tera nam

ret par jitni lakiren thin wo sab mil-jul gain

ham ne ye soch ke chheḌā thā fasāna gul kā

is bahāne hī tire zikr kā pahlū nikle

hum ne ye soch ke chheDa tha fasana gul ka

is bahane hi tere zikr ka pahlu nikle

havā.eñ kartī haiñ sargoshiyāñ sī āñgan meñ

na jaane ā.eñge kis ke qadam charāġh jale

hawaen karti hain sargoshiyan si aangan mein

na jaane aaenge kis ke qadam charagh jale