maiñ apne hijr meñ thā mubtalā azal se magar

tire visāl ne mujh se milā diyā hai mujhe

main apne hijr mein tha mubtala azal se magar

tere visal ne mujh se mila diya hai mujhe

zaḳhm-e-talāsh meñ hai nihāñ marham-e-dalīl

tū apnā dil na haar mohabbat bahāl rakh

zaKHm-e-talash mein hai nihan marham-e-dalil

tu apna dil na haar mohabbat bahaal rakh

kuchh is tarah se kahā mujh se baiThne ke liye

ki jaise bazm se us ne uThā diyā hai mujhe

kuchh is tarah se kaha mujh se baiThne ke liye

ki jaise bazm se us ne uTha diya hai mujhe

charāġh-hā-e-takalluf bujhā diye ga.e haiñ

uThāo jaam ki parde uThā diye ga.e haiñ

charagh-ha-e-takalluf bujha diye gae hain

uThao jam ki parde uTha diye gae hain

jo mil ga.e to tavañgar na mil sake to gadā

ham apnī zaat ke andar chhupā diye ga.e haiñ

jo mil gae to tawangar na mil sake to gada

hum apni zat ke andar chhupa diye gae hain

pesh-e-zamīñ rahūñ ki pas-e-āsmāñ rahūñ

rahtā huuñ apne saath maiñ chāhe jahāñ rahūñ

pesh-e-zamin rahun ki pas-e-asman rahun

rahta hun apne sath main chahe jahan rahun

ai ḳhalish bol kyā yahī hai ḳhudā

ye jo dil meñ ḳhalā sā rahtā hai

ai KHalish bol kya yahi hai KHuda

ye jo dil mein KHala sa rahta hai

ḳhud se guzre to qayāmat se guzar jā.eñge ham

ya.anī har haal kī hālat se guzar jā.eñge ham

KHud se guzre to qayamat se guzar jaenge hum

yani har haal ki haalat se guzar jaenge hum

mumkin nahīñ hai shāyad donoñ kā saath rahnā

terī ḳhabar jab aa.ī apnī ḳhabar ga.ī hai

mumkin nahin hai shayad donon ka sath rahna

teri KHabar jab aai apni KHabar gai hai

raat us bazm meñ tasvīr ke mānind the ham

ham se pūchhe to koī sham.a kā jalnā kyā thā

raat us bazm mein taswir ke manind the hum

hum se puchhe to koi shama ka jalna kya tha

maiñ kahīñ aa.uuñ maiñ kahīñ jā.ūñ

vaqt jaise rukā sā rahtā hai

main kahin aaun main kahin jaun

waqt jaise ruka sa rahta hai

dabā sakā na sadā us kī terī bazm kā shor

ḳhamosh rah ke bhī koī sadā banā huā hai

daba saka na sada us ki teri bazm ka shor

KHamosh rah ke bhi koi sada bana hua hai

ai vaqt tū kahīñ bhī kisī kā huā hai kyā

kyā tujh ko dekhnā tirī saa.at ko dekhnā

ai waqt tu kahin bhi kisi ka hua hai kya

kya tujh ko dekhna teri saat ko dekhna