میں اپنے ہجر میں تھا مبتلا ازل سے مگر

ترے وصال نے مجھ سے ملا دیا ہے مجھے

زخم تلاش میں ہے نہاں مرہم دلیل

تو اپنا دل نہ ہار محبت بحال رکھ

کچھ اس طرح سے کہا مجھ سے بیٹھنے کے لیے

کہ جیسے بزم سے اس نے اٹھا دیا ہے مجھے

چراغ ہائے تکلف بجھا دیے گئے ہیں

اٹھاؤ جام کہ پردے اٹھا دیے گئے ہیں

جو مل گئے تو تونگر نہ مل سکے تو گدا

ہم اپنی ذات کے اندر چھپا دیے گئے ہیں

پیش زمیں رہوں کہ پس آسماں رہوں

رہتا ہوں اپنے ساتھ میں چاہے جہاں رہوں

اے خلش بول کیا یہی ہے خدا

یہ جو دل میں خلا سا رہتا ہے

خود سے گزرے تو قیامت سے گزر جائیں گے ہم

یعنی ہر حال کی حالت سے گزر جائیں گے ہم

ممکن نہیں ہے شاید دونوں کا ساتھ رہنا

تیری خبر جب آئی اپنی خبر گئی ہے

رات اس بزم میں تصویر کے مانند تھے ہم

ہم سے پوچھے تو کوئی شمع کا جلنا کیا تھا

میں کہیں آؤں میں کہیں جاؤں

وقت جیسے رکا سا رہتا ہے

دبا سکا نہ صدا اس کی تیری بزم کا شور

خموش رہ کے بھی کوئی صدا بنا ہوا ہے

اے وقت تو کہیں بھی کسی کا ہوا ہے کیا

کیا تجھ کو دیکھنا تری ساعت کو دیکھنا