خنجر نہ کمر میں ہے نہ تلوار رکھے ہے

آنکھوں ہی میں چاہے ہے جسے مار رکھے ہے

تھا جنہیں حسن پرستی سے ہمیشہ انکار

وہ بھی اب طالب دیدار ہیں کن کے ان کے

مجھ میں اور ان میں سبب کیا جو لڑائی ہوگی

یہ ہوائی کسی دشمن نے اڑائی ہوگی

آ جائے کہیں باد کا جھونکا تو مزا ہو

ظالم ترے مکھڑے سے دوپٹہ جو الٹ جائے

کس جفا کار سے ہم عہد وفا کر بیٹھے

آخر اس بات نے اک روز پشیمان کیا

مت منہ سے نثارؔ اپنے کو اے جان برا کہہ

ہے صاحب غیرت کہیں کچھ کھا کے نہ مر جائے

کیا فسوں تو نے خدا جانے یہ ہم پر مارا

تجھ سے پھرتا نہیں دل ہم نے بہت سر مارا

جوں جوں نہیں دیکھے ہے نثارؔ اپنے صنم کو

توں توں یہی کہتا ہے خدا جانیے کیا ہے

دیکھے کہیں رستے میں کھڑا مجھ کو تو ضد سے

آتا ہو ادھر کو تو ادھر ہی کو پلٹ جائے