maiñ tujh se apnā ta'alluq chhupā nahīñ saktā

jabīñ se kaise miTā duuñ tire nishān ko maiñ

main tujh se apna ta'alluq chhupa nahin sakta

jabin se kaise miTa dun tere nishan ko main

tum kabhī daam lagāte hue us ko dekho

ik ra'ūnat sī ḳharīdār meñ rakkhī huī hai

tum kabhi dam lagate hue us ko dekho

ek ra'unat si KHaridar mein rakkhi hui hai

tirī taqsīm ke ādāb ne hairān kar Daalā

tire hisse meñ puurā hai mire hisse meñ aadhā hai

teri taqsim ke aadab ne hairan kar Dala

tere hisse mein pura hai mere hisse mein aadha hai

aa.e ho abhī Thiik se baiThe bhī nahīñ ho

ye kyā ki abhī se tumheñ jaane kī paḌī hai

aae ho abhi Thik se baiThe bhi nahin ho

ye kya ki abhi se tumhein jaane ki paDi hai

jo bhī miltā hai baġhāvat pe utar aatā hai

kuchh kajī shahr kī dīvār meñ rakkhī huī hai

jo bhi milta hai baghawat pe utar aata hai

kuchh kaji shahr ki diwar mein rakkhi hui hai

milne vāloñ ke paas vaqt nahīñ

sar jhaTak kar guzār tanhā.ī

milne walon ke pas waqt nahin

sar jhaTak kar guzar tanhai

us ne hadīs-e-dil ko havā meñ uḌā diyā

maiñ chuTkiyoñ meñ maslī huī āgahī thā bas

us ne hadis-e-dil ko hawa mein uDa diya

main chuTkiyon mein masli hui aagahi tha bas

qafas kī chār-dīvārī meñ ab maiñ mutma.in huuñ

havādis sāhib-e-aulād bhī ho jaa.eñ to kyā

qafas ki chaar-diwari mein ab main mutmain hun

hawadis sahib-e-aulad bhi ho jaen to kya