نصیر احمد ناصر کی شاعری

لوگ پھرتے ہیں بھرے شہر کی تنہائی میں

سرد جسموں کی صلیبوں پہ اٹھا کر چہرے

جب پکارا کسی مسافر نے

راستے کھائیوں میں چیخ اٹھے

رات بھر خواب دیکھنے والے

دن کی سچائیوں میں چیخ اٹھے

خموشی جھانکتی ہے کھڑکیوں سے

گلی میں شور سا پھیلا ہوا ہے

ابھی وہ آنکھ بھی سوئی نہیں ہے

ابھی وہ خواب بھی جاگا ہوا ہے

ہوا گم صم کھڑی ہے راستے میں

مسافر سوچ میں ڈوبا ہوا ہے

محبت کے ٹھکانے ڈھونڈھتی ہے

بدن کی لا مکانی موسموں میں

فلسفے سارے کتابوں میں الجھ کر رہ گئے

درس گاہوں میں نصابوں کی تھکن باقی رہی

نصیر احمد ناصر