nurse ko dekh ke aa jaatī hai muñh pe raunaq

vo samajhte haiñ ki bīmār kā haal achchhā hai

nurse ko dekh ke aa jati hai munh pe raunaq

wo samajhte hain ki bimar ka haal achchha hai

millat kī aabrū ko milātā hai ḳhaak meñ

leader hamārā kitnā baḌā ḳhāksār hai

millat ki aabru ko milata hai KHak mein

leader hamara kitna baDa KHaksar hai

apne ustād ke sheroñ kā tiyā pāñcha kiyā

ai rahīm aap ke fan meñ ye kamāl achchhā hai

apne ustad ke sheron ka tiya pancha kiya

ai rahim aap ke fan mein ye kamal achchha hai

nahīñ hai bahr meñ be-vazn hai 'rahīm' magar

hamārī shā.irī sur meñ hai aur taal meñ hai

nahin hai bahr mein be-wazn hai 'rahim' magar

hamari shairi sur mein hai aur tal mein hai

saare ahbāb meñ bad-nām tumheñ kar degī

apne ahvāl paḌosan se chhupā kar rakhnā

sare ahbab mein bad-nam tumhein kar degi

apne ahwal paDosan se chhupa kar rakhna

jab se ruḳhsat huā shabāb 'rahīm'

tab se maiñ mā.il-e-ḳhizāb huā

jab se ruKHsat hua shabab 'rahim'

tab se main mail-e-KHizab hua

na harām achchhā hai yaaro na halāl achchhā hai

khā ke pach jaa.e jo ham ko vahī maal achchhā hai

na haram achchha hai yaro na halal achchha hai

kha ke pach jae jo hum ko wahi mal achchha hai

agar tū kaanā raaja hai to andhoñ kā banā halqa

tū apnī shā.irī ke vāste maidān paidā kar

agar tu kana raja hai to andhon ka bana halqa

tu apni shairi ke waste maidan paida kar

qaa.il haiñ zā.iqe ke ġharaz kyā hai rang se

dastar pe dekhte hī nahīñ ham mutton kā rang

qail hain zaiqe ke gharaz kya hai rang se

dastar pe dekhte hi nahin hum mutton ka rang

saare asātiza se churāo suḳhan kā rang

gar kuchh nikhārnā ho tumheñ apne fan kā rang

sare asatiza se churao suKHan ka rang

gar kuchh nikhaarna ho tumhein apne fan ka rang

chāñd sūraj zamīñ se ugte haiñ

shā.irī jab jadīd hotī hai

chand suraj zamin se ugte hain

shairi jab jadid hoti hai

duur tak naam kī tash.hīr agar hai manzūr

jaarī tanqīd adīboñ pe barābar rakhnā

dur tak nam ki tashhir agar hai manzur

jari tanqid adibon pe barabar rakhna

hai himāqat 'rahīm' shādī bhī

is se miTTī palīd hotī hai

hai himaqat 'rahim' shadi bhi

is se miTTi palid hoti hai

hūroñ pe hai nigāh go marqad meñ paañv haiñ

vaa.iz aḳhīr-e-umr meñ kyā terā Dhang hai

huron pe hai nigah go marqad mein panw hain

waiz aKHir-e-umr mein kya tera Dhang hai

tarannum meñ gavayye kī tarah se taan paidā kar

na.e andāz se sheroñ meñ apne jaan paidā kar

tarannum mein gawayye ki tarah se tan paida kar

nae andaz se sheron mein apne jaan paida kar

saarī ġhazleñ sunā ke chhoḌā hai

is se milnā to ik azaab huā

sari ghazlen suna ke chhoDa hai

is se milna to ek azab hua

schōl kī ta.alīm ne gul aisā khilāyā

ab āñkheñ dikhātā hai bhatījā mire aage

school ki talim ne gul aisa khilaya

ab aankhen dikhata hai bhatija mere aage

sūkhe peḌoñ kī tarah ye leader

ham pe saaya zarā nahīñ karte

sukhe peDon ki tarah ye leader

hum pe saya zara nahin karte