رازی ابوذر، تخلص راؔزی، 17 اگست 1987 کو ہزاری باغ، جھارکھنڈ میں پیدا ہوئے۔ ان کے والد ڈاکٹر شمیم ہاشمی ایک ممتاز علمی و ادبی شخصیت ہیں، اسی نسبت سے رازی ابوذر کو شعری ذوق اور ادبی شعور وراثت میں ملا۔ رازی ابوذر نے کمپیوٹر سائنس میں بی۔ٹیک کی ڈگری حاصل کی اور اس وقت نئی دہلی کے علاقے ذاکر نگر، اوکھلا میں مقیم ہیں۔
رازی ابوذر کا شمار عہدِ حاضر کے ان نوجوان شعرا میں ہوتا ہے جو روایت اور جدت کے سنگم پر کھڑے نظر آتے ہیں۔ ان کی شاعری میں ایک طرف کلاسیکی رکھ رکھاؤ، زبان کی شائستگی اور بیان کی لطافت موجود ہے تو دوسری طرف عصری حسیت، فکری تازگی اور سماجی شعور بھی پوری شدت کے ساتھ جلوہ گر ہے۔ ان کا پہلا شعری مجموعہ "کاغذی نقوش" 2022 میں شائع ہوا، جسے ادبی حلقوں میں خاصی پذیرائی حاصل ہوئی۔
رازی ابوذر کی ایک نمایاں خصوصیت ان کی لسانی مہارت بھی ہے۔ وہ اردو، عربی اور فارسی کے ساتھ ساتھ انگریزی زبان پر بھی عبور رکھتے ہیں، جس کی بدولت انہوں نے ترجمہ نگاری میں بھی اپنی صلاحیتوں کا لوہا منوایا ہے۔ خصوصاً رباعیات کے انگریزی قالب میں ان کا کام فنی مہارت اور شعری حس کا عمدہ نمونہ ہے۔
رازی ابوذر ایک ادبی رسالہ "افہام" کے مدیر بھی ہیں اور اردو ادب کی ترویج و اشاعت میں سرگرم کردار ادا کر رہے ہیں۔ کم عمری میں فکری پختگی، زبان پر گرفت اور اظہار کی توانائی انہیں اپنے عہد کے نمایاں شعرا کی صف میں ممتاز کرتی ہے۔