زمانے بھر سے الجھتے ہیں جس کی جانب سے

اکیلے پن میں اسے ہم بھی کیا نہیں کہتے

ہے ایک عمر سے خواہش کہ دور جا کے کہیں

میں خود کو اجنبی لوگوں کے درمیاں دیکھوں

ضرورت اس کی ہمیں ہے مگر یہ دھیان رہے

کہاں وہ غیر ضروری کہاں ضروری ہے

تعجب ان کو ہے کیوں میری خود کلامی پر

ہر آدمی کا کوئی راز داں ضروری ہے

ان سے بچنا کہ بچھاتے ہیں پناہیں پہلے

پھر یہی لوگ کہیں کا نہیں رہنے دیتے

روشنی ہے کسی کے ہونے سے

ورنہ بنیاد تو اندھیرا تھا

گھر کے بارے میں یہی جان سکا ہوں اب تک

جب بھی لوٹو کوئی دروازہ کھلا ہوتا ہے

تیرے بارے میں اگر خاموش ہوں میں آج تک

پھر ترے حق میں کسی کا فیصلہ کیسے ہوا

بس اس خیال سے دیکھا تمام لوگوں کو

جو آج ایسے ہیں کیسے وہ کل رہے ہوں گے

میرے بارے میں جو سنا تو نے

میری باتوں کا ایک حصہ ہے

تمام وہم و گماں ہے تو ہم بھی دھوکہ ہیں

اسی خیال سے دنیا کو میں نے پیار کیا

سمجھتا ہوں میں اگر سب علامتیں اس کی

تو پھر وہ میری طرح سے ہی سوچتا ہوگا

شکستہ پائی سے ہوتی ہیں بستیاں آباد

جو اب قبیلہ ہوا پہلے قافلہ ہوگا

سب سوالوں کے جواب ایک سے ہو سکتے ہیں

ہو تو سکتے ہیں مگر ایسا کہاں ہوتا ہے

ایک لمحے میں زمانہ ہوا تخلیق ملالؔ

وہی لمحہ ہے یہاں اور زمانہ ہے وہی

ایک رہنے سے یہاں وہ ماورا کیسے ہوا

سب سے پہلا آدمی خود سے جدا کیسے ہوا