jab bigaḌte haiñ baat baat pe vo

vasl ke din qarīb hote haiñ

jab bigaDte hain baat baat pe wo

wasl ke din qarib hote hain

ham ko aġhyār kā gilā kyā hai

zaḳhm khā.eñ haiñ ham ne yāroñ se

hum ko aghyar ka gila kya hai

zaKHm khaen hain hum ne yaron se

kaun kahtā hai mohabbat kī zabāñ hotī hai

ye haqīqat to nigāhoñ se bayāñ hotī hai

kaun kahta hai mohabbat ki zaban hoti hai

ye haqiqat to nigahon se bayan hoti hai

phir kisī bevafā kī yaad aa.ī

phir kisī ne liyā vafā kā naam

phir kisi bewafa ki yaad aai

phir kisi ne liya wafa ka nam

tum na tauba karo jafāoñ se

ham vafāoñ se tauba karte haiñ

tum na tauba karo jafaon se

hum wafaon se tauba karte hain

āḳhir taḌap taḌap ke ye ḳhāmosh ho gayā

dil ko sukūn mil hī gayā iztirāb meñ

aaKHir taDap taDap ke ye KHamosh ho gaya

dil ko sukun mil hi gaya iztirab mein

ham qarīb aa kar aur duur hue

apne apne nasīb hote haiñ

hum qarib aa kar aur dur hue

apne apne nasib hote hain

huī thī ḳhvāb meñ ḳhushbū sī mahsūs

tum aa.e ḳhvāb kī ta.abīr dekhī

hui thi KHwab mein KHushbu si mahsus

tum aae KHwab ki tabir dekhi

ab to ehsās-e-tamannā bhī nahīñ

qāfila dil kā luTā ho jaise

ab to ehsas-e-tamanna bhi nahin

qafila dil ka luTa ho jaise

ahl-e-kashtī ne ḳhud-kushī kī thī

huā badnām nāḳhudā kā naam

ahl-e-kashti ne KHud-kushi ki thi

hua badnam naKHuda ka nam

vo aur hoñge pī ke jo sarshār ho ga.e

har jaam se hameñ to na.ī tishnagī milī

wo aur honge pi ke jo sarshaar ho gae

har jam se hamein to nai tishnagi mili

dil vo sahrā hai ki jis meñ raat din

phuul khilte haiñ bahār aatī nahīñ

dil wo sahra hai ki jis mein raat din

phul khilte hain bahaar aati nahin

apnī apnī zaat meñ gum haiñ ahl-e-dil bhī ahl-e-nazar bhī

mahfil meñ dil kyūñkar bahle mahfil meñ tanhā.ī bahut hai

apni apni zat mein gum hain ahl-e-dil bhi ahl-e-nazar bhi

mahfil mein dil kyunkar bahle mahfil mein tanhai bahut hai