جرم محبت کی ملی ہم کو یہ پاداش

اپنے کاندھے پر چلے لے کر اپنی لاش

آنگن کے اک پیڑ کی ٹھنڈی میٹھی چھاؤں

شہر میں جیسے آ گیا چل کر میرا گاؤں

میرے چاروں اور تھے طرح طرح کے لوگ

پھر بھی مجھ کو لگ گیا تنہائی کا روگ

راتیں جنگل کی طرح اور دن ریگستان

میری جیون یاترا کیسے ہو آسان

اس سے بڑھ کر اور کیا رشتوں پر دشنام

بھائی آیا پوچھنے مجھ سے میرا نام

خوش فہمی کی دھوپ میں روشن جھوٹی آس

اندھیارے میں رینگتا ہر سچ کا وشواس

میں نے جس کی آنکھ سے دیکھے اپنے خواب

اب اس کا احساس بھی میرے لیے عذاب

مندر مسجد توڑیئے لیکن رہے خیال

شیشے میں وشواس کے پڑ جائے نہ بال

رفتہ رفتہ گھل گئی میری سوچ کی برف

یعنی میں خود ہو گیا اپنے ہاتھوں صرف

یادوں کے سرمائے پر خود سے مانگوں بیاج

یوں اپنی تنہائی کا جشن مناؤں آج

سورج ڈوبا اور پھر اترے کالے سائے

پیڑوں کی آواز پر پنچھی واپس آئے