'ajīb Dhang se mujh ko milī hai āzādī

parinda piñjre meñ piñjra havā meñ rakkhā gayā

'ajib Dhang se mujh ko mili hai aazadi

parinda pinjre mein pinjra hawa mein rakkha gaya

ham haiñ zanjīroñ kī khan-khan ke bigāḌe hue log

terī pāzeb kī chhan-chhan meñ nahīñ aa sakte

hum hain zanjiron ki khan-khan ke bigaDe hue log

teri pazeb ki chhan-chhan mein nahin aa sakte

tire kūche kī miTTī bā-vafā hai

mire pairoñ se lipTī jā rahī hai

tere kuche ki miTTi ba-wafa hai

mere pairon se lipTi ja rahi hai

log kahte haiñ mujhe is liye tanhā.ī-pasand

mujh se pāgal ko kahīñ paas biThānā na paḌe

log kahte hain mujhe is liye tanhai-pasand

mujh se pagal ko kahin pas biThana na paDe

pahle filmeñ bhī haqīqat kī tarah hotī thiiñ

ab haqīqat meñ bhī filmoñ kī tarah hotā hai

pahle filmen bhi haqiqat ki tarah hoti thin

ab haqiqat mein bhi filmon ki tarah hota hai

aap ke haath meñ hai mujh se ta'alluq kā remote

aap chāheñ to ye channel bhī badal sakte haiñ

aap ke hath mein hai mujh se ta'alluq ka remote

aap chahen to ye channel bhi badal sakte hain

vo hijr-zāde shab-e-vasl ye bhī bhuul ga.e

charāġh un ko jalāne nahīñ bujhāne the

wo hijr-zade shab-e-wasl ye bhi bhul gae

charagh un ko jalane nahin bujhane the

faqat ye lakḌī nahīñ hai tumhārī baisākhī

shajar ke haath kaTe haiñ ise banāne meñ

faqat ye lakDi nahin hai tumhaari baisakhi

shajar ke hath kaTe hain ise banane mein

phir us ke baa'd maiñ ḳhud ko talāsh kartā huuñ

yahī ḳharābī hai us ko gale lagāne meñ

phir us ke ba'd main KHud ko talash karta hun

yahi KHarabi hai us ko gale lagane mein

jiye ham raushnī ban kar hamesha

mare to mar ke bhī taare baneñge

jiye hum raushni ban kar hamesha

mare to mar ke bhi tare banenge

manāyā jā rahā hai ġham tumhārā

purānī film dekhī jā rahī hai

manaya ja raha hai gham tumhaara

purani film dekhi ja rahi hai

ḳhuun se mazlūm ke ho to ga.e raushan charāġh

raushnī aisī huī phir shahr andhā ho gayā

KHun se mazlum ke ho to gae raushan charagh

raushni aisi hui phir shahr andha ho gaya

hamāre khel kī guḌiyā tumhī ho

tumhāre khel kā guDDā nayā hai

hamare khel ki guDiya tumhi ho

tumhaare khel ka guDDa naya hai

kisī bhī darja ri'āyat nahīñ hai vahshat meñ

bichhaḌ ke us se tumheñ qahqahe lagāne the

kisi bhi darja ri'ayat nahin hai wahshat mein

bichhaD ke us se tumhein qahqahe lagane the

us ne ḳhat meñ banā.eñ haiñ aañsū

maiñ bhī ab siskiyāñ banā.ūñgā

us ne KHat mein banaen hain aansu

main bhi ab siskiyan banaunga