be-uzr vo kar lete haiñ va.ada ye samajh kar

ye ahl-e-muravvat haiñ taqāzā na kareñge

be-uzr wo kar lete hain wada ye samajh kar

ye ahl-e-murawwat hain taqaza na karenge

dil-e-bad-ḳhū kī kisī tarah ra.ūnat kam ho

chāhtā huuñ vo sanam jis meñ mohabbat kam ho

dil-e-bad-KHu ki kisi tarah raunat kam ho

chahta hun wo sanam jis mein mohabbat kam ho

hazār daam se niklā huuñ ek jumbish meñ

jise ġhurūr ho aa.e kare shikār mujhe

hazar dam se nikla hun ek jumbish mein

jise ghurur ho aae kare shikar mujhe

iz.hār-e-ishq us se na karnā thā 'sheftā'

ye kyā kiyā ki dost ko dushman banā diyā

izhaar-e-ishq us se na karna tha 'shefta'

ye kya kiya ki dost ko dushman bana diya

shāyad isī kā naam mohabbat hai 'sheftā'

ik aag sī hai siine ke andar lagī huī

shayad isi ka nam mohabbat hai 'shefta'

ek aag si hai sine ke andar lagi hui