abhī phir rahā huuñ maiñ āp-apnī talāsh meñ

abhī mujh se merā mizāj hī nahīñ mil rahā

abhi phir raha hun main aap-apni talash mein

abhi mujh se mera mizaj hi nahin mil raha

khol dete haiñ palaT aane pe darvāza-e-dil

aane vaale kā irāda nahīñ dekhā jaatā

khol dete hain palaT aane pe darwaza-e-dil

aane wale ka irada nahin dekha jata

kināra kar na ai duniyā mirī hast-e-zabūnī se

koī din meñ mirā raushan sitāra hone vaalā hai

kinara kar na ai duniya meri hast-e-zabuni se

koi din mein mera raushan sitara hone wala hai

raat ro ro ke guzārī hai charāġhoñ kī tarah

tab kahīñ harf meñ tāsīr nazar aa.ī hai

raat ro ro ke guzari hai charaghon ki tarah

tab kahin harf mein tasir nazar aai hai

ye vīrānī sī yūñhī to nahīñ rahtī hai āñkhoñ meñ

mire dil hī se koī jāda-e-vahshat nikaltā hai

ye virani si yunhi to nahin rahti hai aankhon mein

mere dil hi se koi jada-e-wahshat nikalta hai