مجھ کو اکثر اداس کرتی ہے

ایک تصویر مسکراتی ہوئی

ارادہ تو نہیں ہے خودکشی کا

مگر میں زندگی سے خوش نہیں ہوں

ایک برس اور بیت گیا

کب تک خاک اڑانی ہے

مدتیں ہو گئیں حساب کئے

کیا پتا کتنے رہ گئے ہیں ہم

کون تحلیل ہوا ہے مجھ میں

منتشر کیوں ہیں عناصر میرے

ایسی پیاس اور ایسا صبر

دریا پانی پانی ہے

رفتہ رفتہ قبول ہوں گے اسے

روشنی کے لیے نئے ہیں ہم

یہ صدا کاش اسی نے دی ہو

اس طرح وہ ہی بلاتا ہے مجھے

تو بھی ناراض بہت ہے مجھ سے

زندگی تجھ سے خفا ہوں میں بھی

میری کوشش تو یہی ہے کہ یہ معصوم رہے

اور دل ہے کہ سمجھ دار ہوا جاتا ہے

محبت کے آداب سیکھو ذرا

اسے جان کہہ کر پکارا کرو

فقط زنجیر بدلی جا رہی تھی

میں سمجھا تھا رہائی ہو گئی ہے

یہاں تک کر لیا مصروف خود کو

اکیلی ہو گئی تنہائی میری

دیکھنا چاہتا ہوں گم ہو کر

کیا کوئی ڈھونڈ کے لاتا ہے مجھے

جن کا سوجھا نہ کچھ جواب ہمیں

ان سوالوں پہ ہنس دیئے ہم لوگ

تنہا ہوتا ہوں تو مر جاتا ہوں میں

میرے اندر تو زندہ ہو جاتا ہے

مری عروج کی لکھی تھی داستاں جس میں

مرے زوال کا قصہ بھی اس کتاب میں تھا

عشق بینائی بڑھا دیتا ہے

جانے کیا کیا نظر آتا ہے مجھے

میں تو کسی جلوس میں گیا نہیں

مرا مکان کیوں جلا دیا گیا

اثر ہے یہ ہماری دستکوں کا

جہاں دیوار تھی در ہو گیا ہے

ہمارے درمیاں جو اٹھ رہی تھی

وہ اک دیوار پوری ہو گئی ہے

اسے چھوا ہی نہیں جو مری کتاب میں تھا

وہی پڑھایا گیا مجھ کو جو نصاب میں تھا

جسے دیکھو غزل پہنے ہوئے ہے

بہت سستا یہ زیور گیا ہے

زندگی کی ہنسی اڑاتی ہوئی

خواہش مرگ سر اٹھاتی ہوئی

گھر سے نکلا تھا خودکشی کرنے

ریل کے ڈبے گن رہا ہوں میں

لفظ کی قید و رہائی کا ہنر

کام آ ہی گیا آخر میرے

دشت کی خاک بھی چھانی ہے

گھر سی کہاں ویرانی ہے

میری کوشش تو یہی ہے کہ یہ معصوم رہے

اور دل ہے کہ سمجھ دار ہوا جاتا ہے

ایک کرن پھر مجھ کو واپس کھینچ گئی

میں بس جسم سے باہر آنے والا تھا

گھر میں وہی پیلی تنہائی رہتی ہے

دیواروں کے رنگ بدلتے رہتے ہیں

روز یہ خواب ڈراتا ہے مجھے

کوئی سایہ لیے جاتا ہے مجھے

میں عدم کی پناہ گاہ میں ہوں

چھو بھی سکتی نہیں حیات مجھے

زمین بیچ کے خوش ہو رہے ہو تم جس کو

وہ سارے گاؤں کو بازار کرنے والا ہے

ہوا کے وار پر اب وار کرنے والا ہے

چراغ بجھنے سے انکار کرنے والا ہے

بلا کا حبس تھا پر نیند ٹوٹتی ہی نہ تھی

نہ کوئی در نہ دریچہ فصیل خواب میں تھا

ذرا سا دھیان کیا بھٹکا ہمارا

ہمیں پر آ گرا ملبہ ہمارا

بچھڑنے کا ہمیں امکان تو تھا

مگر اب دن مقرر ہو گیا ہے

سبھی کو راستہ بتا دیا گیا

یوں منزلوں کا قد گھٹا دیا گیا

پجاری ہیں ازل سے میرؔ جی کے

وہی ہم ہیں وہی قشقہ ہمارا

میں تو کسی جلوس میں گیا نہیں

مرا مکان کیوں جلا دیا گیا

کوئی اس کے برابر ہو گیا ہے

یہ سنتے ہی وہ پتھر ہو گیا ہے