mujhe apnī biivī pe faḳhr hai mujhe apne saale pe naaz hai

nahīñ dosh donoñ kā is meñ kuchh mujhe DāñTtā koī aur hai

mujhe apni biwi pe faKHr hai mujhe apne sale pe naz hai

nahin dosh donon ka is mein kuchh mujhe DanTta koi aur hai

vo bharī bazm meñ kahtī hai mujhe uncle-jī

diplomacy hai ye kaisī mirī ham-sā.ī kī

wo bhari bazm mein kahti hai mujhe uncle-ji

diplomacy hai ye kaisi meri ham-sai ki

maiñ jise hiir samajhtā thā vo rāñjhā niklā

baat niyyat kī nahīñ baat hai bīnā.ī kī

main jise hir samajhta tha wo ranjha nikla

baat niyyat ki nahin baat hai binai ki

tum ne to kahā thā ki chalo Duub mareñ ham

ab sāhil-e-dariyā pe khaḌe karte ho Tā-Tā

tum ne to kaha tha ki chalo Dub maren hum

ab sahil-e-dariya pe khaDe karte ho Ta-Ta

kabhī likhne likhāne kī to naubat hī nahīñ aatī

maiñ naaḌā Daal letā huuñ zarūrat jab bhī paḌtī hai

kabhi likhne likhane ki to naubat hi nahin aati

main naDa Dal leta hun zarurat jab bhi paDti hai

kahte haiñ ki lailā kā ta'alluq thā arab se

ye rang to africa o makrān meñ dekhā

kahte hain ki laila ka ta'alluq tha arab se

ye rang to africa o makran mein dekha

baap kī tambīh par beTā baḌe ġhusse meñ thā

us ne Dail-phone se phir nau-sau-gyārah kar diyā

bap ki tambih par beTa baDe ghusse mein tha

us ne Dail-phone se phir nau-sau-gyarah kar diya

ḳhush hote haiñ ham log agar koī hasīna

is umr ham par koī tohmat hī lagā.e

KHush hote hain hum log agar koi hasina

is umr hum par koi tohmat hi lagae

mire rob meñ to vo aa gayā mire sāmne to vo jhuk gayā

mujhe laat khā ke huī ḳhabar mujhe pīTtā koī aur hai

mere rob mein to wo aa gaya mere samne to wo jhuk gaya

mujhe lat kha ke hui KHabar mujhe piTta koi aur hai

kaalā na sahī laal sahī til to banā hai

achchhā huā machchhar ne tire gaal pe kaaTā

kala na sahi lal sahi til to bana hai

achchha hua machchhar ne tere gal pe kaTa

mehmān-navāzī to bahut hotī hai lekin

cigarette kī jo hājat ho to garage meñ jaa.eñ

mehman-nawazi to bahut hoti hai lekin

cigarette ki jo hajat ho to garage mein jaen

doctor se maiñ ilāj-e-dil karāne jab gayā

mashvara us ne diyā tū sher kahnā chhoḌ de

doctor se main ilaj-e-dil karane jab gaya

mashwara us ne diya tu sher kahna chhoD de

aa ke Tik jaanā yahāñ mushkil nahīñ bilkul nahīñ

car bañgla aur biivī bhī yahāñ qistoñ meñ haiñ

aa ke Tik jaana yahan mushkil nahin bilkul nahin

car bangla aur biwi bhi yahan qiston mein hain

mere taayā se vo haiñ umr meñ das saal baḌī

ghar ke har fard pe dahshat hai mirī taa.ī kī

mere taya se wo hain umr mein das sal baDi

ghar ke har fard pe dahshat hai meri tai ki

apne ham-sāyoñ ke kutte bhūñkte haiñ raat meñ

apne ghar meñ bhauñk lete haiñ sabhī mil-jul ke ham

apne ham-sayon ke kutte bhunkte hain raat mein

apne ghar mein bhaunk lete hain sabhi mil-jul ke hum

un ko lailā kī sadārat kī judā.ī kā hai ġham

ghar se bāhar kaise nikleñ vo abhī iddat meñ haiñ

un ko laila ki sadarat ki judai ka hai gham

ghar se bahar kaise niklen wo abhi iddat mein hain

nikālīñ Taañg se aur joḌ dī haiñ dil ke pahlū meñ

lagā hai ḳhuub kyā kam-ḳhvāb meñ ye Taañg kā paivand

nikalin Tang se aur joD di hain dil ke pahlu mein

laga hai KHub kya kam-KHwab mein ye Tang ka paiwand

jaane kā naam hī nahīñ letā vo nek-baḳht

''muddat huī hai yaar ko mehmāñ kiye hue''

jaane ka nam hi nahin leta wo nek-baKHt

muddat hui hai yar ko mehman kiye hue

hai ajab nizām zakāt kā mire mulk meñ mire des meñ

ise kāTtā koī aur hai ise bāñTtā koī aur hai

hai ajab nizam zakat ka mere mulk mein mere des mein

ise kaTta koi aur hai ise banTta koi aur hai

jo bhī dastar-ḳhvān par thā khā ke fāriġh ham hue

phir hameñ dīvān us kā sub.h tak sunñā paḌā

jo bhi dastar-KHwan par tha kha ke farigh hum hue

phir hamein diwan us ka subh tak sunna paDa

ek gāhak ko zarūrat toilet paper kī thī

maiñ ne us ko de diyā hai is ke badle reg-māl

ek gahak ko zarurat toilet paper ki thi

main ne us ko de diya hai is ke badle reg-mal

sar-e-bazm mujh ko uThā diyā mujhe maar maar liTā diyā

mujhe mārtā koī aur hai vale hāñptā koī aur hai

sar-e-bazm mujh ko uTha diya mujhe mar mar liTa diya

mujhe marta koi aur hai wale hanpta koi aur hai