phone to duur vahāñ ḳhat bhī nahīñ pahuñcheñge

ab ke ye log tumheñ aisī jagah bhejeñge

phone to dur wahan KHat bhi nahin pahunchenge

ab ke ye log tumhein aisi jagah bhejenge

havā chalī to us kī shaal merī chhat pe aa girī

ye us badan ke saath merā pahlā rābta huā

hawa chali to us ki shaal meri chhat pe aa giri

ye us badan ke sath mera pahla rabta hua

kabhī kabhī to dil kartā hai chaltī rail se kuud paḌūñ

phir kahtā huuñ pāgal ab to thoḌā rasta baaqī hai

kabhi kabhi to dil karta hai chalti rail se kud paDun

phir kahta hun pagal ab to thoDa rasta baqi hai

daulat shohrat biivī bachche achchhā ghar aur achchhe dost

kuchh to hai jo in ke baa'd bhī hāsil karnā baaqī hai

daulat shohrat biwi bachche achchha ghar aur achchhe dost

kuchh to hai jo in ke ba'd bhi hasil karna baqi hai

boriyat se tang aa kar ḳhud-kushī karne se qabl

zindagī kī film thoḌī aage kar ke dekh le

boriyat se tang aa kar KHud-kushi karne se qabl

zindagi ki film thoDi aage kar ke dekh le

Dartā huuñ kisī din vo mujhe chhoḌ na jaa.e

us ko mirī daulat se sarokār nahīñ hai

Darta hun kisi din wo mujhe chhoD na jae

us ko meri daulat se sarokar nahin hai

kis ne kitnā fāsla rakkhā gale milte hue

mere kapḌe dekh le aur apne kapḌe dekh le

kis ne kitna fasla rakkha gale milte hue

mere kapDe dekh le aur apne kapDe dekh le

kis tarah īmān lā.ūñ ḳhvāb kī tā'bīr par

chhipkalī chaḌhte hue dekhī hai us tasvīr par

kis tarah iman laun KHwab ki ta'bir par

chhipkali chaDhte hue dekhi hai us taswir par

ab bas us ke dil ke andar dāḳhil honā baaqī hai

chhe darvāze toḌ chukā huuñ ik darvāza baaqī hai

ab bas us ke dil ke andar daKHil hona baqi hai

chhe darwaze toD chuka hun ek darwaza baqi hai

maa.eñ beToñ se ḳhafā haiñ aur beTe maaoñ se

'ishq ġhālib aa gayā hai duudh kī tāsīr par

maen beTon se KHafa hain aur beTe maon se

'ishq ghaalib aa gaya hai dudh ki tasir par

rulā chukā huuñ maiñ jitnā tumheñ rulānā thā

ab is ke baa'd kā ronā tumhārā apnā hai

rula chuka hun main jitna tumhein rulana tha

ab is ke ba'd ka rona tumhaara apna hai

sāmne baiThī huī thī aur merā dil na thā

phone par hī us se itnā pyaar kar baiThā thā maiñ

samne baiThi hui thi aur mera dil na tha

phone par hi us se itna pyar kar baiTha tha main

maiñ is liye bhī use ḳhud-kushī se roktā huuñ

likhā huā hai mirā naam jism par us ne

main is liye bhi use KHud-kushi se rokta hun

likha hua hai mera nam jism par us ne

maiñ us hathelī pe raushan huā aur us ke baa'd

vahī huā jo charāġhoñ ke saath hotā hai

main us hatheli pe raushan hua aur us ke ba'd

wahi hua jo charaghon ke sath hota hai

vo jism barahna ho magar 'aks ho malbūs

ye aa.ina itnā bhī hayā-dār nahīñ hai

wo jism barahna ho magar 'aks ho malbus

ye aaina itna bhi haya-dar nahin hai

aaj kal māyūs vāpas aa rahe haiñ qāfile

aaj kal us dar se bhī inkār ho jaatā hai kyā

aaj kal mayus wapas aa rahe hain qafile

aaj kal us dar se bhi inkar ho jata hai kya

'ālam-e-tanhā.ī meñ bhī us kā aisā ḳhauf hai

zehn meñ hotā hai kyā iz.hār ho jaatā hai kyā

'alam-e-tanhai mein bhi us ka aisa KHauf hai

zehn mein hota hai kya izhaar ho jata hai kya