عجیب خوف ہے کچھ بات ہونے والی ہے

عجیب خوف ہے کچھ بات ہونے والی ہے

گھروں کو لوٹ چلو رات ہونے والی ہے

عجیب طرح کی اک کھلبلی ہے سانسوں میں

نہ جانے کس سے ملاقات ہونے والی ہے

ہمارا کام ہے چلنا ہمیں یے کب معلوم

کہاں ہے صبح کہاں رات ہونے والی ہے

نہ مجھ سے کوئی کرامات ہو سکی اب تک

نہ مجھ سے کوئی کرامات ہونے والی ہے

یہ سارا کھیل تو پہلے ہی ہو چکا ہے طے

سو یہ بھی طے ہے کسے مات ہونے والی ہے

تجھے خبر ہی نہیں ہے تجھے پتہ ہی نہیں

جو واردات ترے ساتھ ہونے والی ہے