بلا ہو گئے تھے وہ آنے کے بعد
مگر یاد آتے ہیں جانے کے بعد
یہاں آمد و رفت رکتی نہیں
نیا آ رہا ہے پرانے کے بعد
مری آپ بیتی کے صفحات میں
فسانہ پڑھو گے فسانے کے بعد
تماشائی تھے سننے والے نہ تھے
میں چپ ہو گیا گنگنانے کے بعد
کسی شخص کا دل دکھاؤ گے تم
تو پچھتاؤ گے دل دکھانے کے بعد
جو کہہ کر گئے تھے کہ کل آئیں گے
وہ کل آ گئے اک زمانہ کے بعد
عجب فرق ہوتا ہے اس شخص میں
منانے سے پہلے منانے کے بعد
محبت کی قاطع ہے قربت شعورؔ
اسے کھو دیا ہم نے پانے کے بعد
مأخذ :
- کتاب : اب میں اکثر میں نہیں رہتا (Pg. 100)
- Author : انور شعور
- مطبع : ریختہ پبلی کیشنز (2024)
- اشاعت : 3rd
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
