بے گھری کا اسے انجام نظر آ گیا تھا

بے گھری کا اسے انجام نظر آ گیا تھا

صبح کا بھولا ہوا شام کو گھر آ گیا تھا

کیوں نہ اتری مری آنکھوں میں ترے نام کی نیند

میرے حصے میں ترا خواب اگر آ گیا تھا

یوں کمر بستہ ہوا اگلی منازل کے لیے

میں مسافر تھا مرا رخت سفر آ گیا تھا

کیوں مجھے خاک اڑانے کی اجازت نہیں تھی

جب مجھے خاک اڑانے کا ہنر آ گیا تھا

تو نے کچھ پڑھ کے تو پھونکا تھا سبھی لوگوں پر

شہر کا شہر ترے زیر اثر آ گیا تھا

میں نے دتکار دیا تھا جسے نادانی میں

خاک چھانی تو اسی خاک میں زر آ گیا تھا

اس لیے راہ میں رکنا پڑا آزرؔ مجھ کو

میرے رستے میں وہ بے سایہ شجر آ گیا تھا