تم چاہو کہ دنیا میں رہے نام کسی کا

تم چاہو کہ دنیا میں رہے نام کسی کا

کر سکتی ہے کیا گردش ایام کسی کا

ہے عشق جو مجھ کو رخ و گیسو سے کسی کے

پڑھتا ہوں وظیفہ سحر و شام کسی کا

کس کی شب عشرت سحر غم سے نہ بدلی

دیکھا نہ گیا چرخ سے آرام کسی کا

کہنے کو فقط بات ہی رہ جاتی ہے باقی

رکنے کو تو رکتا ہی نہیں کام کسی کا

ق

جا کر مری جانب سے جو درباں نے یہ کی عرض

آیا ہے کوئی سن کے بڑا نام کسی کا

کہنے لگا جا بھی مجھے کیا بحث کسی سے

کوئی ہو مری بزم میں کیا کام کسی کا

پھر دیکھے کوئی اشکؔ ستارے کی بلندی

جلوہ نظر آئے جو لب بام کسی کا