ابو جی

اتنا کیوں ناراض ہو مجھ پر یوں مت ڈانٹو ابو جی

میں ہوں ننھا منا بچہ اتنا جانو ابو جی

یوں مت ڈانٹو ابو جی

تم بھی پہلے بچے ہی تھے یہ مت بھولو ابو جی

نٹکھٹ بھی مجھ جیسے ہی تھے یہ مت بھولو ابو جی

جس دن ضد فرمائی ہوگی دادا سے اور دادی سے

اس دن مار بھی کھائی ہوگی دادا سے اور دادی سے

بچپن نام شرارت کا ہے تم بھی سمجھو ابو جی

یوں مت ڈانٹو ابو جی

شیطانی بھی کرتے ہوں گے سچ بتلاؤ ابو جی

من مانی بھی کرتے ہوں گے سچ بتلاؤ ابو جی

توڑ بھی ڈالیں ہوں گے تم نے کھیل کھلونے چاچا کے

اور کبھی کر ڈالے ہوں گے کپڑے گندے دادا کے

ساری باتیں یاد کرو پھر مجھ کو دیکھو ابو جی

یوں مت ڈانٹو ابو جی

ناغہ بھی ہو جاتی ہوگی ہفتے میں اسکول کبھی

پڑھتے پڑھتے روز سبق کو بیٹھے ہوں گے بھول کبھی

ٹیچر جی نے غصہ ہو کر تم کو مرغ بنایا ہوگا

ہنستے ہوں گے سب ہمجولی خوب مزہ پھر آیا ہوگا

جو کچھ مجھ سے بھول ہوئی ہے معاف بھی کر دو ابو جی

یوں مت ڈانٹو ابو جی