Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ ",Ar0d"

نظم کے متعلقہ نتیجہ ",ar0d"

نظم

اے مجاز اے ترانہ بار مجاز
زندہ پیغمبر بہار مجاز
اے بروۓ سمن وشاں گل پوش
اے بہ کوۓ مغاں تمام خروش
اے پرستار مہ رخان جہاں
اے کماں دار شاعران جواں
تجھ سے تاباں جبین مستقبل
اے مرے سینۂ امید کے دل
اے مجاز اے مبصر خد و خال
اے شعور جمال و شمع خیال
اے ثریا فریب و زہرہ نواز
شاعر مست و رند شاہد باز
ناقد عشوۂ شباب ہے تو
صبح فردا کا آفتاب ہے تو
تجھ کو آیا ہوں آج سمجھانے
حیف ہے تو اگر برا مانے
خود کو غرق شراب ناب نہ کر
دیکھ اپنے کو یوں خراب نہ کر
شاعری کو تری ضرورت ہے
دور فردا کی تو امانت ہے
صرف تیری بھلائی کو اے جاں
بن کے آیا ہوں ناصح ناداں
ایک ٹھہراؤ اک تکان ہے تو
دیکھ کس درجہ دھان پان ہے تو
ننگ ہے محض استخواں ہونا
سخت اہانت ہے ناتواں ہونا
استخوانی بدن دخانی پوست
ایک سنگین جرم ہے اے دوست
شرم کی بات ہے وجود سقیم
ناتوانی ہے اک گناہ عظیم
جسم اور علم طرفہ طاقت ہے
یہی انسان کی نبوت ہے
جو ضعیف و علیل ہوتا ہے
عشق میں بھی ذلیل ہوتا ہے
ہر ہنر کو جو ایک دولت ہے
علم اور جسم کی ضرورت ہے
کثرت بادہ رنگ لاتی ہے
آدمی کو لہو رلاتی ہے
خوش دلوں کو رلا کے ہنستی ہے
شمع اختر بجھا کے ہنستی ہے
اور جب آفت جگر پہ لاتی ہے
رند کو مولوی بناتی ہے
مے سے ہوتا ہے مقصد دل فوت
مے ہے بنیاد مولویت و موت
کان میں سن یہ بات ہے نشتر
مولویت ہے موت سے بد تر
اس سے ہوتا ہے کار عمر تمام
اس سے ہوتا ہے عقل کو سرسام
اس میں انساں کی جان جاتی ہے
اس میں شاعر کی آن جاتی ہے
یہ زمین آسمان کیا شے ہے
آن جائے تو جان کیا شے ہے
گوہر شاہ وار چن پیارے
مجھ سے اک گر کی بات سن پیارے
غم تو بنتا ہے چار دن میں نشاط
شادمانی سے رہ بہت محتاط
غم کے مارے تو جی رہے ہیں ہزار
نہیں بچتے ہیں عیش کے بیمار
آن میں دل کے پار ہوتی ہے
پنکھڑی میں وہ دھار ہوتی ہے
جوئے عشرت میں غم کے دھارے ہیں
یخ و شبنم میں بھی شرارے ہیں
ہاں سنبھل کر لطافتوں کو برت
ٹوٹ جائے کہیں نہ کوئی پرت
دیکھ کر شیشۂ نشاط اٹھا
یہ ورق ہے ورق ہے سونے کا
کاغذ باد یہ نگینہ ہے
بلکہ اے دوست آبگینہ ہے
ساغر شبنم خوش آب ہے یہ
آبگینہ نہیں حباب ہے یہ
روک لے سانس جو قریب آئے
ٹھیس اس کو کہیں نہ لگ جائے
تیغ مستی کو احتیاط سے چھو
ورنہ ٹپکے گا انگلیوں سے لہو
مستیوں میں ہے تاب جلوۂ ماہ
اور سیہ مستیاں خدا کی پناہ
خوب ہے ایک حد پہ قائم نشہ
ہلکا پھلکا سبک ملائم نشہ
ہاں ادب سے اٹھا ادب سے جام
تاکہ آب حلال ہو نہ حرام
جام پر جام جو چڑھاتے ہیں
اونٹ کی طرح بلبلاتے ہیں
زندگی کی ہوس میں مرتے ہیں
مے کو رسوائے دہر کرتے ہیں
یاد ہے جب جگرؔ چڑھاتے تھے
کیا الف ہو کے ہن ہناتے تھے
میری گردن میں بھر کے چند آہیں
پاؤں سے ڈالتے تھے وہ بانہیں
عقل کی موت علم کی پستی
الاماں لعنت سیہ مستی
اف گھٹا ٹوپ نشے کا طوفان
بھوت عفریت دیو جن شیطان
لات گھونسہ چھڑی چھری چاقو
لب لباہٹ لعاب کف بدبو
طنز آوازہ برہمی افساد
طعن تشنیع مضحکہ ایراد
شور ہو حق ابے تبے ہے ہے
اوکھیاں گالیاں دھماکے قے
مس مساہٹ غشی تپش چکر
سوز سیلاب سنسنی صرصر
چل چخے چیخ چناں چنیں چنگھاڑ
چخ چخے چاؤں چاؤں چیل چلھاڑ
لپا ڈکی لتام لام لڑائی
ہول ہیجان ہانک ہاتھا پائی
کھلبلی کاؤں کاؤں کھٹ منڈل
ہونک ہنگامہ ہمہمہ ہلچل
الجھن آوارگی ادھم اینٹھن
بھونک بھوں بھوں بھنن بھنن بھن بھن
دھول دھپا دھکڑ پکڑ دھتکار
تہلکہ تو تڑاق تف تکرار
بو بھبھک بھیے بکس برر بھونچال
دبدبے دندناہٹیں دھمال
گاہ نرمی و لطف و مہر و سلام
گاہ تلخی و ترشی و دشنام
عقل کی موت علم کی پستی
الاماں لعنت سیہ مستی
صرف نشے کی بھیگنے دے مسیں
ان کو بننے نہ دے کبھی مونچھیں
الاماں خوفناک کالا نشہ
اوہ ریش و بروت والا نشہ
اژدر مرگ او دیو خوں خواری
الاماں نشۂ ''جٹادھاری''
نشے کا جھٹ پٹا ہے نور حیات
جھٹپٹے کو بنا نہ کالی رات
نشے کی تیز روشنی بھی غلط
چودھویں کی سی چاندنی بھی غلط
ذہن انساں کو بخشتا ہے جمال
نشہ ہو جب یہ قدر نور ہلال
غرفۂ عقل بھیڑ تو اکثر
پر اسے کچ کچا کے بند نہ کر
رات کو لطف جام ہے پیارے
دن کا پینا حرام ہے پیارے
دن ہے عفریت آز کی کھنکا
رات پازیب نازکی جھنکار
دن ہے خاشاک خاک دھول دھواں
رات آئینہ انجمن افشاں
دن مسلح دواں کمر بستہ
رات طاق و رواق و گلدستہ
دن ہے فولاد سنگ تیغ علم
رات کمخواب پنکھڑی شبنم
دن ہے شیون دہائیاں دکھڑے
رات مست انکھڑیاں جواں مکھڑے
دن کڑی دھوپ کی بد آہنگی
رات پچھلے پہر کی سارنگی
دن بہادر کا بان بیر کی رتھ
رات چمپاکلی انگوٹھی نتھ
دن ہے طوفان جنبش و رفتار
رات میزان کاکل و رخسار
آفتاب و شراب ہیں بیری
بوتلیں دن کو ہیں پچھل پیری
کر نہ پامال حرمت اوقات
رات کو دن بنا نہ دن کو رات
پی مگر صرف شام کے ہنگام
اور وہ بھی بہ قدر یک دو جام
وہی انساں ہے خرم و خورسند
جو ہے مقدار و وقت کا پابند
میرے پینے ہی پر نہ جا مری جاں
مجھ سے جینا بھی سیکھ ہیں قرباں
اس کے پینے میں رنگ آتا ہے
جس کو جینے کا ڈھنگ آتا ہے
یہ نصائح بہت ہیں بیش بہا
جلد سو جلد جاگ جلد نہا
باغ میں جا طلوع سے پہلے
تا نگار سحر سے دل بہلے
سرو و شمشاد کو گلے سے لگا
ہر چمن زاد کو گلے سے لگا
منہ اندھیرے فضائے گلشن دیکھ
ساحل و سبزہ زار و سوسن دیکھ
گاہ آوارہ ابر پارے دیکھ
ان کی رفتار میں ستارے دیکھ
جیسے کہرے میں تاب روئے نکو
جیسے جنگل میں رات کو جگنو
گل کا منہ چوم اک ترنم سے
نہر کو گدگدا تبسم سے
جسم کو کر عرق سے نم آلود
تاکہ شبنم پڑھے لہک کے درود
پھینک سنجیدگی کا سر سے بار
ناچ اچھل دندنا چھلانگیں مار
دیکھ آب رواں کا آئینہ
دوڑ ساحل پہ تان کر سینہ
مست چڑیوں کا چہچہانا سن
موج نو مشق کا ترانہ سن
بوستاں میں صبا کا چلنا دیکھ
سبزہ و سرو کا مچلنا دیکھ
شبنم آلود کر سخن کا لباس
چکھ دھندلکے میں بوئے گل کی مٹھاس
شاعری کو کھلا ہوائے سحر
اس کا نفقہ ہے تیری گردن پر
رقص کی لہر میں ہو گم لب نہر
یوں ادا کر عروس شعر کا مہر
جذب کر بوستاں کے نقش و نگار
ذہن میں کھول مصر کا بازار
نرم جھونکوں کا آب حیواں پی
بوئے گل رنگ شبنمستاں پی
گن گنا کر نظر اٹھا کر پی
صبح کا شیر دغدغہ کر پی
تاکہ مجرے کو آئیں کل برکات
دولت جسم و علم و عقل و حیات
یہ نہ طعنہ نہ یہ الہنا ہے
ایک نکتہ بس اور کہنا ہے
غیبت نور ہو کہ کثرت نور
ظلمت تام ہو کہ شعلۂ طور
ایک سا ہے وبال دونوں کا
تیرگی ہے مآل دونوں کا
درخور صاحب مآل نہیں
ہر وہ شے جس میں اعتدال نہیں
شادمانی سے پی نہیں سکتا
جس کو ہوکا ہو جی نہیں سکتا
اے پسر اے برادر اے ہم راز
بن نہ اس طرح دور کی آواز
کوئی بیمار تن نہیں سکتا
خادم خلق بن نہیں سکتا
خدمت خلق فرض ہے تجھ پر
دور ماضی کا قرض ہے تجھ پر
عصر حاضر کے شاعر خوددار
قرض داری کی موت سے ہشیار
ذہن انسانیت ابھار کے جا
زندگانی کا قرض اتار کے جا
تجھ پہ ہندوستان ناز کرے
عمر تیری خدا دراز کرے

جوش ملیح آبادی
نظم

ان کے اندر تنہائی کا زہر اترتا چلا گیا
(اور زمانہ
ارد گرد سے
پرچھائیں کی طرح گزرتا چلا گیا)
سوگ میں ہیں،
تریاق مانگتی ہیں۔۔۔
ایک جنم تک
اندھی گونگی بہری بن کے
اپنے ہی گھر میں بے دخل،
بے قدری کے سخی حسن میں دفن رہیں
آج نئے آفاق مانگتی ہیں
دادی اماں طلاق مانگتی ہیں

ساقی فاروقی
نظم

سن اے ہوائے بے دلی
ابھی تو چشم تر میں ان کی صورتیں
رواں دواں ہیں جن کے سانس کی مہک
میں جا چکی بہار کا نکھار ہے
کہ جن کے خواب کی چمک پلک پلک
بکھرتی آرزو میں پائیدار ہے
ابھی تو ان کی خاک کو زمین بھی نہیں ملی
سن اے ہوائے بے دلی
اگرچہ اس دیار میں ہر ایک سو
کئی رتوں کی گم شدہ بہار کا فشار ہے
غبار انتظار ہے
مگر یہ زرد گھاٹیاں یہ کاروان بے نشاں
سفر کی انتہا نہیں
دھواں دھواں ہیں جسم و جاں مگر زباں ہے گل فشاں
کہ دل ابھی مرا نہیں
نظر میں ہے وہ فصل گل جو اب تلک نہیں کھلی
سن اے ہوائے بے دلی
ہمیں اسی زمین سے رفاقت یقین ہے
ملے گی کشت آرزو
کہ روشنی کی جستجو میں روشنی کا راز ہے
ہمارے ارد گرد کی ہر ایک شے سوال ہے
ان انگلیوں کی پور پور صاحب کمال ہے
الوداع الوداع اے بے دلی
کہ یہ ہماری دوستی کا نقطۂ زوال ہے

امجد اسلام امجد
نظم

خدائے برتر
تیری وحدانیت کی قسم
جب بھی تیرے آگے سر بہ سجود ہوئی
تو نیت کی
کہ زمین کے ان تمام خداؤں کو رد کرتی ہوں
جو اپنے عہدوں کے آگے
مجھے جھکانے پر بضد رہے
اے ہمیشہ رہنے والی ذات
جب کوئی جسم خاکی طاقت کے نشے میں
کسی کمزور کو کچلتا ہے
تب گزرتا وقت اس پر بہت ہنستا ہے
اے رازق رحیم
ہم ایسے نظام کو بھوگ رہے ہیں
جہاں ایک کی بقا دوسرے کی بھوک پر قابض ہونے میں ہے
تو کہ واقف ہے دلوں کے بھید سے
ایسے حالات آ جاتے ہیں کہ
سچ گوشہ‌ نشین ہو جاتا ہے
شرافت اور حیا پہ
سنگ باری ہوتی ہے
اے خالق کائنات
تو نے اپنے کلام میں زمین کا دکھ بیان کیا ہے
جو ان گنت مظالم اپنے اوپر جھیلتی ہے
اس زمین کی خاموشی کی قسم
سارے ظالم اپنی دشت اپنی سفاکیوں کا کھیل رچاتے رچاتے
ایک دن زمین کے اندر چلے جاتے ہیں
اے خدائے عظیم
یہ زمین میرا بچھونا
میں نے اس کی خامشی کو اپنے سینے میں اتارا
تیرے عطا کیے ہوئے حوصلے نے
میرے قدم اکھڑنے نہیں دیئے
ورنہ
کسی ڈرل مشین کی طرح
جملے دل میں سوراخ کرتے گئے
تشنج زدہ چہروں پر ہنسی تب دکھائی دی
جب آنکھوں سے خواب چھین لیے گئے
اے میرے پروردگار
ہمیں ایک ایسا معاشرہ دیا گیا
جہاں ہمارے پھیپڑوں پہ پاؤں رکھ کے حکمرانی کرنے والے
ہماری سانس کے چلنے رکنے کا تماشا دیکھتے ہیں
تماشہ بینوں کی آنکھوں اس انت کی منتظر ہوتی ہیں
کہ جب ان سے زندہ رہنے کی بھیک مانگی جائے
اے میرے معبود
میں نے ایسے ہی کگار پہ
تیری برتری طلب کی
اے میرے دکھوں کے رازداں
تو واقف ہے
جب میرے ارد گرد گریۂ وحشت طاری تھا
اور مجھے بتایا جا رہا تھا
کہ سرطان میرے باپ کو کھا رہا ہے
وہ وقت تھا کہ نہ کوئی حرف تسلی کام آ سکتا تھا نہ کوئی امید باقی رہ گئی تھی
میری آنکھیں خشک تھیں
میرے سارے آنسو میرے اندر گرتے گئے
وہ وقت تھا میرے معبود
جب تو نے میرے قلب کو غم سے لبریز کر کے
میری تربیت کی تھی
مجھے باور ہوا
کہ آنے والے وقت میں قدم قدم پہ
مجھے سرطان کا سامان کرنا ہوگا
فقروں میں قہقہوں میں
اس شیطان کو کنکری کون مارے
جو تاریک دلوں کے منا میں بیٹھا ہے
میرے مولا
میں کسی معجزے کی منتظر نہیں
بس اتنی ہمت دے مجھے
کہ تیرگی کے مقابل
روشنی کو ہمیشگی دے دوں

انجلا ہمیش
نظم

یہ میں ہوں میں
جیسے آپ آپ ہیں
میں پیدا ہوتے ہی الجھن میں ہوں
اگر میں عشق ہوں تو فنا کیوں نہیں ہو جاتی
میں سمندر کی بیتاب لہر ہوں تو بہہ کیوں نہیں جاتی
میں رقص جنوں میں ہوں تو دیوانگی سر کیوں نہیں چڑھتی
بے چین روح ہوں تو جسم سے نجات کیوں نہیں پاتی
میں ڈرتی ہوں انسانی اشکال میں گھومتے بھیڑیوں سے
میں نفرت کی آگ میں جلے ہوئے دلوں سے خوف کھاتی ہوں
مجھے صحرا سے ڈر لگتا ہے
ویرانوں سے بھاگ آئی ہوں
زیست کی تمام تر رنگینیوں اور ان کی حقیقتوں سے آگاہی ہے
ہجوم دوستاں کے سرور میں بچکانہ کائنات بناتی ہوں
کبھی آئینہ رو نظر آتی ہوں
کبھی ہنستی ہوں خود اپنی نادانی پر
کبھی بے سبب اداس بہت ہوتی ہوں
کبھی سوچتی بے تحاشا ہوں
کبھی لکھتی ہوں ایسے کہ ہر لفظ روح کا درد اگل دیتا ہے
اور کبھی تمام کے تمام الفاظ کھو جاتے ہیں
بناوٹ اور دکھاوے ان کو نگل جاتے ہیں
میں کبھی بنجر ہوں اور کبھی جنم کو جنم دیتی ہوں
میں جذبوں خوابوں اور دعاؤں کو بہت سنبھال کے رکھتی ہوں
اور ان سے دھاگے لے کر خود کو بنتی ہوں
میں روشنی نہیں مگر میں تاریکی بھی نہیں
ایک شام کا سا ملگجا ہوں کبھی
تو کبھی دن کا دھندلکا ہوں
ایسی بہتی ہوئی ندی ہوں
جس کے کنارے کئی گیت
کئی نغمے مدھر تانوں میں لپٹے اترتے ہیں
میں زندگی کے سمندر کی تمام لہروں کو چھوتی ہوں
اور موتی موتی کہانیوں میں ٹانک دیتی ہوں
سچے سلمیٰ اور روپہلے گوٹے کی طرح
میں خواب جیتی ہوں
میں حقیقت کو پینٹ کرتی ہوں کہ میں حقیقت ہوں
اپنے ارد گرد ہر اچھی بری حقیقت کا حصہ ہوں
میں سر تا پا موم ہوں
ہر عام عورت کی طرح مجھے جو بنا دو میں بن جاتی ہوں
ہر ماحول میں ڈھل جاتی ہوں
مجھے برا سمجھا جائے تو بھی اچھا
اور اچھا سمجھا جائے تو بھی کیا برا
!!!
یہ میں ہوں میں

مریم تسلیم کیانی
نظم

میں تیرے بہتر ساتھیوں میں نہیں تھا
مجھے تو عشق نے منتخب کیا تھا
ایک وحشت ناک بھیڑ تھی میرے ارد گرد
مگر میں اس بھیڑ میں ہوتے ہوئے بھی
کسی وحشت کا حصہ نہ تھا
میں تو تنہا تھا
اہل حکم کے نزدیک تو ایک باغی تھا
اور وہ تمام ہجوم جو فقط ہجوم تھا
بے چہرہ بے کردار بے ذہن فقط ہجوم
جو اپنی غلط ضرورتوں کی خاطر
وہی کہتے جو اہل حکم کہتے وہی سنتے جو انہیں سنایا جاتا
وہی دیکھتے جو انہیں دکھا جاتا
سوئے حسین ابن علی
تم باغی ٹھہرے
میں اس ہجوم کا حصہ نہیں تھا
مگر تم تک آنے کے لئے مجھے اس ہجوم سے گزرنا تھا
تمہارے سچ کو جاننے کے لئے
میں نے کتنے ہی جھوٹ سنے
میں باطل کے راستوں کو عبور کر کے
حق تک پہنچا
میں تیرے بہتر ساتھیوں میں نہیں تھا
مگر مشیت کو منظور تھا کہ حسین حر سے ملے
کہ تاریخ کو باور ہو
اہل عشق کے فیصلے
خدا کے فیصلے ہوتے ہیں
جس نے زمانے کی قسم کھا کر
خسارے کا مفہوم سمجھایا
اور میں نے جوم غلط کے درمیان
اس مفہوم کو پا لیا
میں تیرے بہتر ساتھیوں میں نہیں تھا
حسین میں تیرا حر تھا

انجلا ہمیش
نظم

ویران گھر میں گلاب کے رنگ
اور موتیا کی خوشبو کا اضطراب بکھر گیا
جس نے ہماری پر سکون خاموشی
کو ریزہ ریزہ کر دیا
آؤ آج پھر ہم
تم اور میں
اپنے پیروں کے ارد گرد
ہلکی ہلکی لکیروں کے دائرے کھینچے لیں
یہ لکیریں شاید کبھی دیوار بن جائیں
اور ہم پھر اپنے اپنے گھروں میں
سکون کی نیند سو سکیں

ہربنس مکھیہ
نظم

میری آزادی واقع ہو چکی
میں اس کا محل وقوع
تبدیل کرنا چاہتا ہوں
اسے اپنے ارد گرد
بسانا چاہتا ہوں

سید کاشف رضا
نظم

یہ گھر بہت عظیم تھا
یہ گھر بہت حسین تھا
کہ اس کے ارد گرد دور دور تک
کوئی مکان اس سے بڑھ کے تھا نہیں
مگر یہاں کا چکھ عجب رواج تھا
تھے بن بلائے اجنبی
کہ جن کا گھر پہ راج تھا
سجے سجائے کمرے ان کے شب کدے
وہ سبز لان پھول کی کیاریاں
وسیع صحن و سائباں
تھے ان کے واسطے مگر
خود اپنے گھر میں اجنبی
مکین چوکھٹوں پہ
راتیں اپنی کاٹتے رہے
سڑک گلی کی خاک چھانتے رہے
وہ بن بلائے اجنبی
گدیلے بستروں پہ
لذت شب و سحر میں مست مست تھے

ظہیر صدیقی
نظم

ایک کے بعد ایک کئی موتیں مر کر
اب میں زندہ ہو گیا ہوں
ایک میں ہی نہیں
یہاں میرے ارد گرد
اور بہت سے
کئی بار
موت کا ذائقے چکھ چکے ہیں
کچھ ایسے بھی ہیں
جو ایک بار مرنے کے بعد
دوبارہ زندہ نہ ہو سکے

سعید الدین
نظم

ایک عمر دراز چہرہ
پیس میکر سے دھڑکتا ہوا دل
آنکھ کی دھندلاتی روشنی
زندگی کی چمک
پورے کنبے کا جغرافیہ
اپنے ارد گرد سمیٹے
زندگی کی شام کو
یادوں میں لپیٹے
عمر کی لکیروں میں
تجربے کی چمک
کسی فرشتے کی طرح
ایک بزرگ کا سایہ
گھر میں ٹہلتا ہے
اپنے دھیمے قدموں سے
چہل قدمی کرتے ہوئے
سب کی خبر رکھتا
بس دعا ہے یہی
اس دعا کے ہاتھ
سب کے سر پر رہے
کاش ہر بزرگ کا مان
ہر گھر میں رہے

خدیجہ خان
نظم

یہ میں تمہیں دیکھ رہی ہوں
یا.....
یہ میرے ارد گرد تمہاری پرچھائیاں ہیں
یا.....
یہ تم اقرار کی ریت پر میرا نام لکھ رہے ہو
یا.....
یہ تم چنار کے سوکھے پتوں سے میرے لیے آگ روشن کر رہے ہو
یا.....
یہ تم میری آنکھوں کو خواب دے رہے ہو
یا.....
سنو، میں جس روز یا..... کے بعد کے خیالوں کو
نظم کرنے کے قابل ہو جاؤں گی
خود کو شاعر سمجھنے لگوں گی!

شبنم عشائی
نظم

یہ جو بیمار سوچیں سوچنے والوں کا ٹولا ہے
یہ ظالم ہے
کسی مظلوم کے جو ارد گرد ایسے کھڑے
تصویر کھنچواتا ہے ظالم ہے

فرح شاہد
نظم

بہت سنبھال کے رکھیں ہیں
ہم نے ان وقتوں کی یادیں
جو ہمیں مغموم رکھتے تھے
جو اپنے اپنے وقتوں میں
ہم پر مسلط رہے
ان دنوں میں مصروفیت کے باوجود
ہم زندگی کو ایسے دیکھ رہے تھے
جیسے
خود سے کہہ رہے ہوں
ہم نہیں لڑنا چاہتے ان کے ان ارادوں سے
جو ہمیں ملیامیٹ کرنا چاہتے ہیں
ہم جانتے تھے
ان کے ارادوں کے سامنے ہمارے ارادے
ان کا منہ توڑ جواب دے سکتے ہیں
لیکن ہماری خاموشی نے ان کو بڑھاوا دیا
یہ ہمارے ارد گرد اداسی کا دائرہ
تنگ کرتے رہے
یہاں تک کہ ہم اس اداسی کے عادی ہو گئے
لوگ کہتے ہیں
ہم اس وقت ہمیشہ حالت جنگ میں نظر آتے تھے
جھیلے ہوئے دنوں کو ہم آج بھی نہیں بھولے
بہت سینت کر رکھی ہیں ہم نے ان وقتوں کی یادیں
اپنے اثاثے میں
اپنے پرانے صندوق میں
یہ شاید
جب ہم پر کوئی جرم عائد ہو رہا ہو
یہ ہماری حمایت میں پرانے صندوق سے باہر آ جائیں

عذرا عباس
نظم

نیند کے تعاقب میں
دور دور تک لا حاصل
دیر سے بھٹکتا ہوں
نیلی آنکھوں والی
جنگلی بلی
بار بار دم ہلاتی ہے
میری چارپائی کے نیچے
نیم روشن لیمپ کے ارد گرد
کیڑوں پر جھپٹتی چھپکلی
بے خبر ہے اپنے انت سے
کتنا غیر متوقع ہوگا
مل جانا اننت سے

چندر بھان خیال
نظم

آخر وہ
کس کی غلطی تھی
اس بوڑھے کی
کنڈکٹر کی
یا پھر اس بس کے ڈرائیور کی
جس کی بھی ہو
لیکن اس میں
میرا تو کوئی دوش نہیں تھا
میں تو باقی
سب لوگوں کی طرح
مسافر تھا اس بس کا
جس کے نیچے
کہیں اچانک سے
وہ بوڑھا آ جاتا ہے
اس کو
بس کے
نیچے آتے بھی تو نہ دیکھا تھا میں نے
وہ تو بس کے
بریک سے میری
نیند کھلی اور
شور سماعت سے ٹکرایا
تب کھڑکی سے جھانکا تھا میں
ادھر ادھر
بکھری
سبزی کے
ارد گرد
وہ دھار
لہو کی
سانپ سریکھا
رینگ رہی تھی
اور گلے میں
شاید اس کے
چیخ کہیں پر پھنسی ہوئی تھی
اس منظر میں
سیٹ سے اپنی
ہل تک نہ پایا تھا میں تو
ہل کر بھی
اب ہونا کیا تھا
آخر میں کر کیا سکتا تھا
پھر کیوں
مجھ کو
نیند نہیں آتی اس دن سے
کھانا کھانے
بیٹھتا ہوں تو
اس بوڑھے کا
کربناک وہ
لہو اگلنے والا چہرہ
سامنے میرے آ جاتا ہے
اور پھر
اس کے بعد
نوالہ
مرے گلے سے
الٹی بن باہر آتا ہے
اور
مانس کو
پھاڑ کے
باہر نکلی
اس بوڑھے کی ہڈی
میرے دل میں دھنس جاتی ہیں
کیوں ناکردہ جرم کا یہ احساس مرے اندر بیٹھا ہے
کیا اس کو میں نے مارا ہے
اس کی موت مری غلطی ہے
تھوڑا بھی
حساس نہیں ہوتا ہے کوئی
لوگوں کو
احساس نہیں ہوتا ہے کوئی
مجھ سے سب
بس یہ کہتے ہیں
لوگ تو
مرتے ہی رہتے ہیں
کون بھلا پروا کرتا ہے
تم ہی
خود کو قید کیے ہو اس منظر میں
اس منظر سے
باہر آؤ
مٹی ڈالو
دھواں اڑاؤ
لیکن
میں کیسے
سمجھاؤں
کہ اس کا
آسیب مرے
خوابوں میں آ کر
روز یہی کہتا رہتا ہے
مجھ پر یہ احساں کروا دو
گھر پر میرے
بیوی بچہ
بھوکے ہوں گے
ان تک وہ سبزی بھجوا دو

سراج فیصل خان
نظم

مرے وجود کا مکان
خار دار تار کا حصار جس کے ارد گرد
آدمی کا خون پینے والی زرد جھاڑیوں کے خار دار ہات ہیں
مری زمیں کے ارد گرد
کہکشاں کے خار دار دائروں کا رقص ہے
زمیں سے آسمان تک
وجود اپنے ان گنت حواس کا گناہ ہے
شعور و لمس و لذت و مقام کے سراب ہیں
میں پوچھتا ہوں سنگ میں گداز پنبہ ڈھونڈنے سے کیا ملا
یہ زندگی یہی تو ہے
کہ ریزہ ریزہ جمع کی ہوئی متاع زیست کو
ہوائے تند پھینک آئے دشت بے سواد میں
مری نظر کے سامنے
نہ جانے کتنے جسم تھے کہ ٹوٹ کر بکھر گئے
میں ایسے ہولناک تجربوں کے بعد بار بار
خود کو یوں سنبھالتا ہوں جیسے اپنے ہات سے
میں گر کے ٹوٹ جاؤں گا
مرا بدن اذیتوں کا خوان ہے
کبھی میں برف کی سلوں کی ہوں غذا
کبھی میں تیرگی کا رزق ہوں
کبھی مرے لئے ہے نوک دار خنجروں کا تخت خواب
اور آج ان اذیتوں کے درمیاں
مرا وجود جیسے مجھ کو چھوڑ کر چلا گیا
میں برگ سبز تھا جسے
خزاں کا ہات شاخ تر سے توڑ کر چلا گیا
میں ایک سمت فلسفے کے ان گنت نکات کی پناہ ہوں
اور ایک سمت آگہی کے جبر کی کراہ ہوں
مسابقت کے دور میں وہ ساعتیں بھی آ گئیں
کہ حسن اور عشق میں متاع اور مشتری کا رمز جاگنے لگا
نہ عشق اتنا بے خبر
نہ حسن اتنا معتبر
کہ بے دلیل قضیۂ وفا کی داد دے سکے
یہ کائنات بے حسی کی اک بسیط شکل ہے
نہ زندگی کا کچھ اثر
نہ موت سے کوئی خطر
اب ایسی کائنات میں
اس ایک ریزۂ وجود کے حواس کیا کریں
اب ایسے سرد جسم کی برہنگی کو دیکھ کر
خلوص و مہر و لطف کے حسیں لباس کیا کریں

سحر انصاری
نظم

اونچے مکانوں کی دیواروں پر ہری بھری پھولوں کی بیل
سرمئی بادلوں کے گھونگھٹ سے میری چھوٹی کھڑکی کی طرف
دیکھتی ہے
پرسیوایڈرس ٹی وی پر فلم چل رہی ہے
میں کس کے تعاقب میں اپنی طرف بھاگ رہی ہوں
میں کولہو کا بیل ہوں
روز ایک دائرہ اپنے ارد گرد کھینچتی ہوں اور اس دائرے
کے آگے ایک اور دائرہ پھر ایک اور
یوں آگے ہی آگے دائرے ہی دائرے
زندگی کا سفر دائروں سے لکھا گیا
صبح دوپہر شام آنسو کی روٹی دکھ کا سالن اور
سرد آہوں کا پانی
برساتوں کی شامیں نرمل کومل دل کو یوں دہلاتی ہیں
جیسے آتش دان کی قریب سوئی بلی انجانے قدموں سے چونک جائے
یہ بھی ایک دائرہ ہے
اس دائرے کے اندر ہمارے ہتھیار زمین پر پڑتے ہیں
اور ہم ہاتھ اٹھائے آسمانی آواز پر
آگے ہی آگے بے سمت چلتے جا رہے ہیں
دائرے بنتے جا رہے ہیں

شائستہ حبیب
نظم

میرے ارد گرد اک حصار ہے
اک حصار جس کے گیر و دار میں
بے اماں غبار میں
میرا جسم میری ذات
تار تار ہے

اکبر حیدرآبادی
نظم

چار برس کے
میلے کچلے
دبلے پتلے لڑکے میں تھی
غضب کی پھرتی
چوراہے پر ایک طرف کی ہری لائٹ سے
دوسری سمت کی لال لائٹ تک
بجلی کی تیزی سے وہ آتا جاتا تھا
جو مل جائے اس کے آگے
پھیلاتا تھا اپنی ہتھیلی
جس میں
خوشحالی اور لمبے جیون کی
ریکھائیں تھیں
چوراہے تک ہی محدود تھی اس کی دنیا
جس کو اس نے نہیں چنا تھا
ٹریفک لائٹ کے ارد گرد تھا اس کا جیون
وہ بھی اس نے نہیں چنا تھا
ٹوٹے پل کے نیچے اس کا جنم ہوا تھا
وہ بھی اس نے نہیں چنا تھا
کل شب
ٹریفک لائٹ کو توڑنے والے ٹرک سے دب کر
موت ہو گئی اس کی
وہ بھی اس نے نہیں چنی تھی

سبودھ لال ساقی
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے