Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",Ar0d"

Nazm MATCHES FOR ",ar0d"

Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

hamal-sara

un ke andar tanhaa.ii kaa zahr utartaa chalaa gayaa
(aur zamaana
ird-gard se
parchhaa.ii.n kii tarah guzartaa chalaa gayaa)
sog me.n hai.n,
tiryaaq maa.ngtii hai.n....
ek janam tak
andhii guu.ngii bahrii ban ke
apne hii ghar me.n be-daKHl,
be-qadrii ke saKHii-hasan me.n dafn rahii.n
aaj na.e aafaaq maa.ngtii hai.n
daadii amaa.n talaaq maa.ngtii hai.n

Saqi Faruqi
Nazm

suraj ki pahli kiran

sun ai havaa-e-be-dilii
abhii to chashm-e-tar me.n un kii suurate.n
ravaa.n-davaa.n hai.n jin ke saa.ns kii mahak
me.n jaa chukii bahaar kaa nikhaar hai
ki jin ke KHvaab kii chamak palak palak
bikhartii aarzuu me.n paa.edaar hai
abhii to un kii KHaak ko zamiin bhii nahii.n milii
sun ai havaa-e-be-dilii
agarche is dayaar me.n har-ek-suu
ka.ii ruto.n kii gum-shuda bahaar kaa fishaar hai
Gubaar-e-intizaar hai
magar ye zard ghaaTiyaa.n ye kaarvaan-e-be-nishaa.n
safar kii intihaa nahii.n
dhu.aa.n dhu.aa.n hai.n jism-o-jaa.n magar zabaa.n hai gul-fishaa.n
ki dil abhii miraa nahii.n
nazar me.n hai vo fasl-e-gul jo ab talak nahii.n khilii
sun ai havaa-e-be-dilii
hame.n usii zamiin se rifaaqat-e-yaqiin hai
milegii kisht-e-aarzuu
ki raushnii kii justujuu me.n raushnii kaa raaz hai
hamaare ird-gird kii har ek shai savaal hai
un u.ngliyo.n kii por por saahab-e-kamaal hai
alvidaa.a alvidaa.a ai be-dilii
ki ye hamaarii dostii kaa nuqta-e-zavaal hai

Amjad Islam Amjad
Nazm

KHuda se kalam

KHudaa-e-bartar
terii vahdaaniyat kii qasam
jab bhii tere aage sar-ba-sujuud hu.ii
to niyyat kii
ki zamiin ke un tamaam KHudaa.o.n ko radd kartii huu.n
jo apne ohdo.n ke aage
mujhe jhukaane par ba-zid rahe
ai hamesha rahne vaalii zaat
jab ko.ii jism-e-KHaakii taaqat ke nashe me.n
kisii kamzor ko kuchaltaa hai
tab guzartaa vaqt is par bahut ha.nstaa hai
ai raaziq-e-rahiim
ham aise nizaam ko bhog rahe hai.n
jahaa.n ek kii baqaa duusre kii bhuuk par qaabiz hone me.n hai
tuu ki vaaqif hai dilo.n ke bhed se
aise haalaat aa jaate hai.n ki
sach gosha-nashiin ho jaataa hai
sharaafat aur hayaa pe
sa.ng-baarii hotii hai
ai KHaaliq-e-kaa.enaat
tuu ne apne kalaam me.n zamiin kaa dukh bayaan kiyaa hai
jo an-ginat mazaalim apne uupar jheltii hai
is zamiin kii KHaamoshii kii qasam
saare zaalim apnii dasht apnii saffaakiyo.n kaa khel rachaate rachaate
ek din zamiin ke andar chale jaate hai.n
ai KHudaa-e-aziim
ye zamiin meraa bichhaunaa
mai.n ne us kii KHaamushii ko apne siine me.n utaaraa
tere ataa kiye hu.e hausle ne
mere qadam ukha.Dne nahii.n diye
varna
kisii drill-machine kii tarah
jumle dil me.n suuraaKH karte ga.e
tashannuj-zada chehro.n par ha.nsii tab dikhaa.ii dii
jab aa.nkho.n se KHvaab chhiin liye ga.e
ai mere parvardigaar
hame.n ek aisaa mu.aashra diyaa gayaa
jahaa.n hamaare phep.Do.n pe paa.nv rakh ke hukmaraanii karne vaale
hamaarii saa.ns ke chalne rukne kaa tamaashaa dekhte hai.n
tashaama-biino.n kii aa.nkho.n us ant kii muntazir hotii hai.n
ki jab in se zinda rahne kii bhiik maa.ngii jaa.e
ai mere ma.abuud
mai.n ne aise hii kagaar pe
terii bartarii talab kii
ai mere dukho.n ke raaz-daa.n
tuu vaaqif hai
jab mere ird-gird girya-e-vahshat taarii thaa
aur mujhe bataayaa jaa rahaa thaa
ki sartaan mere baap ko khaa rahaa hai
vo vaqt thaa ki na ko.ii harf-e-tasallii kaam aa saktaa thaa na ko.ii ummiid baaqii rah ga.ii thii
merii aa.nkhe.n KHushk thii.n
mere saare aa.nsuu mere andar girte ga.e
vo vaqt thaa mere ma.abuud
jab tuu ne mere qalb ko Gam se labrez kar ke
merii tarbiyat kii thii
mujhe baavar hu.aa
ki aane vaale vaqt me.n qadam qadam pe
mujhe sartaan kaa saamaan karnaa hogaa
fiqro.n me.n qahqaho.n me.n
us shaitaan ko ka.nkarii kaun maare
jo taariik dilo.n ke minaa me.n baiThaa hai
mere maulaa
mai.n kisii mo.ajize kii muntazir nahii.n
bas itnii himmat de mujhe
ki tiirgii ke muqaabil
raushnii ko hameshgii de duu.n

Injila Hamesh
Nazm

taaruf

ye mai.n huu.n mai.n
jaise aap aap hai.n
mai.n paidaa hote hii uljhan me.n huu.n
agar mai.n ishq huu.n to fanaa kyuu.n nahii.n ho jaatii
mai.n samundar kii betaab lahr huu.n to bah kyuu.n nahii.n jaatii
mai.n raqs-e-junuu.n me.n huu.n to diivaangii sar kyuu.n nahii.n cha.Dhtii
bechain ruuh huu.n to jism se najaat kyuu.n nahii.n paatii
mai.n Dartii huu.n insaanii ashkaal me.n ghuumte bhe.Diyo.n se
mai.n nafrat kii aag me.n jale hu.e dilo.n se KHauf khaatii huu.n
mujhe sahraa se Dar lagtaa hai
viiraano.n se bhaag aa.ii huu.n
ziist kii tamaam-tar ra.ngiiniyo.n aur un kii haqiiqato.n se aagaahii hai
hujuum-e-dostaa.n ke suruur me.n bachkaana kaa.enaat banaatii huu.n
kabhii aa.iina-ruu nazar aatii huu.n
kabhii ha.nstii huu.n KHud apnii naadaanii par
kabhii be-sabab udaas bahut hotii huu.n
kabhii sochtii be-tahaashaa huu.n
kabhii likhtii huu.n aise ki har lafz ruuh kaa dard ugal detaa hai
aur kabhii tamaam ke tamaam alfaaz kho jaate hai.n
banaavaT aur dikhaave un ko nigal jaate hai.n
mai.n kabhii banjar huu.n aur kabhii janm ko janm detii huu.n
mai.n jazbo.n KHvaabo.n aur du.aa.o.n ko bahut sambhaal ke rakhtii huu.n
aur un se dhaage le kar KHud ko buntii huu.n
mai.n raushnii nahii.n magar mai.n taariikii bhii nahii.n
ek shaam kaa saa malgajaa huu.n kabhii
to kabhii din kaa dhu.ndlakaa huu.n
aisii bahtii hu.ii nadii huu.n
jis ke kinaare ka.ii giit
ka.ii naGme madhur taano.n me.n lipTe utarte hai.n
mai.n zindagii ke samundar kii tamaam lahro.n ko chhuutii huu.n
aur motii motii kahaaniyo.n me.n tonic detii huu.n
sachche salmaa aur rupahle goTe kii tarah
mai.n KHvaab jiitii huu.n
mai.n haqiiqat ko painT kartii huu.n ki mai.n haqiiqat huu.n
apne ird-gard har achchhii burii haqiiqat kaa hissa huu.n
mai.n sar-taa-paa mom huu.n
har aam aurat kii tarah mujhe jo banaa do mai.n bin jaatii huu.n
har maahaul me.n Dhal jaatii huu.n
mujhe buraa samjhaa jaa.e to bhii achchhaa
aur achchhaa samjhaa jaa.e to bhii kyaa buraa
!!!
ye mai.n huu.n mai.n

Maryam Tasleem Kiyani
Nazm

ek kahani ishq ki

mai.n tere bahattar saathiyo.n me.n nahii.n thaa
mujhe to ishq ne muntaKHab kiyaa thaa
ek vahshat-naak bhii.D thii mere ird-gird
magar mai.n is bhii.D me.n hote hu.e bhii
kisii vahshat kaa hissa na thaa
mai.n to tanhaa thaa
ahl-e-hakam ke nazdiik to ek baaGii thaa
aur vo tamaam hujuum jo faqat hujuum thaa
be-chehra be-kirdaar be-zehn faqat hujuum
jo apnii Galat zaruurato.n kii KHaatir
vahii kahte jo ahl-e-hakam kahte vahii sunte jo unhe.n sunaayaa jaataa
vahii dekhte jo unhe.n dikhaa jaataa
suu-e-husain-ibn-e-alii
tum baaGii Thahre
mai.n is hujuum kaa hissa nahii.n thaa
magar tum tak aane ke liye mujhe is hujuum se guzarnaa thaa
tumhaare sach ko jaan.ne ke liye
mai.n ne kitne hii jhuuT sune
mai.n baatil ke raasto.n ko ubuur kar ke
haq tak pahu.nchaa
mai.n tere behtar saathiyo.n me.n nahii.n thaa
magar mashiyyat ko manzuur thaa ki husain hur se mile
ki taariiKH ko baavar ho
ahl-e-ishq ke faisle
KHudaa ke faisle hote hai.n
jis ne zamaane kii qasam khaa kar
KHasaare kaa mafhuum samjhaayaa
aur mai.n ne juum-e-Galat ke darmiyaan
is mafhuum ko paa liyaa
mai.n tere bahattar saathiyo.n me.n nahii.n thaa
husain mai.n teraa hur thaa

Injila Hamesh
Nazm

sukun

viiraan ghar me.n gulaab ke ra.ng
aur motiyaa kii KHushbuu kaa iztiraab bikhar gayaa
jis ne hamaarii pur-sukuun KHaamoshii
ko reza reza kar diyaa
aa.o aaj phir ham
tum aur mai.n
apne pairo.n ke ird-gird
halkii halkii lakiiro.n ke daa.ere khii.nche le.n
ye lakiire.n shaayad kabhii diivaar ban jaa.e.n
aur ham phir apne apne gharo.n me.n
sukuun kii nii.nd so sakii.n

Harbans Mukhia
Nazm

aazadi ka mahall-e-waqu-1

merii aazaadii vaaq.e ho chukii
mai.n us kaa mahall-e-vaquu
tabdiil karnaa chaahtaa huu.n
use apne ird-gard
basaanaa chaahtaa huu.n

Syed Kashif Raza
Nazm

makin hi ajib hain

ye ghar bahut aziim thaa
ye ghar bahut hasiin thaa
ki us ke ird-gird duur duur tak
ko.ii makaan us se ba.Dh ke thaa nahii.n
magar yahaa.n kaa chakh ajab rivaaj thaa
the bin-bulaa.e ajnabii
ki jin kaa ghar pe raaj thaa
saje sajaa.e kamre un ke shab-kade
vo sabz lawn phuul kii kiyaariyaa.n
vasii.a sahn-o-saa.ibaa.n
the un ke vaaste magar
KHud apne ghar me.n ajnabii
makiin chaukhaTo.n pe
raate.n apnii kaaTte rahe
sa.Dak galii kii KHaak chhaante rahe
vo bin-bulaa.e ajnabii
gadele bistarao.n pe
lazzat-e-shab-o-sahar me.n mast mast the

Zaheer Siddiqui
Nazm

nazm

ek ke baa'd ek ka.ii maute.n mar kar
ab mai.n zinda ho gayaa huu.n
ek mai.n hii nahii.n
yahaa.n mere ird-gard
aur bahut se
ka.ii baar
maut kaa zaa.iqe chakh chuke hai.n
kuchh aise bhii hai.n
jo ek baar marne ke ba.ad
dobaara zinda na ho sake

Saeeduddin
Nazm

buzurgwar

ek umr-e-daraaz chehra
Pacemaker se dha.Daktaa hu.aa dil
aa.nkh kii dhu.ndlaatii raushnii
zindagii kii chamak
puure kumbe kaa juGraafiya
apne ird-gird sameTe
zindagii kii shaam ko
yaado.n me.n lapeTe
umr kii lakiiro.n me.n
tajribe kii chamak
kisii farishte kii tarah
ek buzurg kaa saaya
ghar me.n Tahaltaa hai
apne dhiime qadmo.n se
chahal-qadmii karte hu.e
sab kii KHabar rakhtaa
bas du.aa hai yahii
is du.aa ke haath
sab ke sar par rahe
kaash har buzurg kaa maan
har ghar me.n rahe

Khadija Khan
Nazm

nazm

ye mai.n tumhe.n dekh rahii huu.n
yaa.....
ye mere ird-gird tumhaarii parchhaa.iyaa.n hai.n
yaa.....
ye tum iqraar kii ret par meraa naam likh rahe ho
yaa.....
ye tum chiinaar ke suukhe patto.n se mere liye aag raushan kar rahe ho
ya.....
ye tum merii aa.ankho.n ko KHvaab de rahe ho
yaa.....
suno, mai.n jis roz yaa..... ke baa'd ke KHayaalo.n ko
nazm karne ke qaabil ho jaa.uu.ngii
KHud ko shaa.er samajhne laguu.ngii!

Shabnam Ashai
Nazm

tamashai bhi zalim hain

ye jo biimaar soche.n sochne vaalo.n kaa Tolaa hai
ye zaalim hai
kisii mazluum ke jo ird-gird aise kha.De
tasviir khi.nchvaataa hai zaalim hai

Farah Shahid
Nazm

yaaden

bahut sambhaal ke rakkhe.n hai.n
ham ne un vaqto.n kii yaade.n
jo hame.n maGmuum rakhte the
jo apne apne vaqto.n me.n
ham par musallat rahe
un dino.n me.n masruufiyat ke baavajuud
ham zindagii ko aise dekh rahe the
jaise
KHud se kah rahe ho.n
ham nahii.n la.Dnaa chaahte un ke in iraado.n se
jo hame.n maliyaameT karnaa chaahte hai.n
ham jaante the
un ke iraado.n ke saamne hamaare iraade
un kaa mu.nh-to.D javaab de sakte hai.n
lekin hamaarii KHaamoshii ne un ko ba.Dhaavaa diyaa
ye hamaare ird-gard udaasii kaa daa.era
ta.ng karte rahe
yahaa.n tak ki ham is udaasii ke aadii ho ga.e
log kahte hai.n
ham us vaqt hamesha haalat-e-ja.ng me.n nazar aate the
jhele hu.e dino.n ko ham aaj bhii nahii.n bhuule
bahut sai.nt kar rakhii hai.n ham ne un vaqto.n kii yaade.n
apne asaase me.n
apne puraane sanduuq me.n
ye shaayad
jab ham par ko.ii jurm aa.ed ho rahaa ho
ye hamaarii himaayat me.n puraane sanduuq se baahar aa jaa.e.n

Azra Abbas
Nazm

nind ke taaqub mein

nii.nd ke ta.aaqub me.n
duur duur tak laa-haasil
der se bhaTaktaa huu.n
niilii aa.nkho.n vaalii
ja.ngalii billii
baar baar dum hilaatii hai
merii chaarpaa.ii ke niiche
niim raushan lamp ke ird-gird
kii.Do.n par jhapaTtii chhipkalii
be-KHabar hai apne ant se
kitnaa Gair-mutavaqqe hogaa
mil jaanaa anant se

Chandrabhan Khayal
Nazm

hassas

aaKHir vo
kis kii Galatii thii
us buu.Dhe kii
conductor kii
yaa phir us bus ke driver kii
jis kii bhii ho
lekin is me.n
meraa to ko.ii dosh nahii.n thaa
mai.n to baaqii
sab logo.n kii tarah
musaafir thaa us bas kaa
jis ke niiche
kahii.n achaanak se
vo buu.Dhaa aa jaataa hai
us ko
bus ke
niiche aate bhii to na dekhaa thaa mai.n ne
vo to bus ke
brake se merii
nii.nd khulii aur
shor samaa.at se Takraayaa
tab khi.Dkii se jhaa.nkaa thaa mai.n
idhar udhar
bikhrii
sabzii ke
ird-gird
vo dhaar
lahuu kii
saa.np surekhaa
re.ng rahii thii
aur gale me.n
shaayad us ke
chiiKH kahii.n par pha.nsii hu.ii thii
is manzar me.n
seat se apnii
hil tak na paayaa thaa mai.n to
hil kar bhii
ab honaa kyaa thaa
aaKHir mai.n kar kyaa saktaa thaa
phir kyo.n
mujh ko
nii.nd nahii.n aatii us din se
khaanaa khaane
baiThtaa huu.n to
us buu.Dhe kaa
karbnaak vo
lahuu ugalne vaalaa chehra
saamne mere aa jaataa hai
aur phir
us ke baa'd
nivaala
mire gale se
ulTii ban baahar aataa hai
aur
maa.ns ko
phaa.D ke
baahar niklii
us buu.Dhe kii haDDii
mere dil me.n dha.ns jaatii hai.n
kyo.n naa-karda jurm kaa ye ehsaas mire andar baiThaa hai
kyaa us ko mai.n ne maaraa hai
us kii maut mirii Galatii hai
tho.Daa bhii
hassaas nahii.n hotaa hai ko.ii
logo.n ko
ehsaas nahii.n hotaa hai ko.ii
mujh se sab
bas ye kahte hai.n
log to
marte hii rahte hai.n
kaun bhalaa parvaa kartaa hai
tum hii
KHud ko qaid kiye ho us manzar me.n
us manzar se
baahar aa.o
miTTii Daalo
dhu.aa.n u.Daa.o
lekin
mai.n kaise
samjhaa.uu.n
ki us kaa
aaseb mire
KHvaabo.n me.n aa kar
roz yahii kahtaa rahtaa hai
mujh par ye ehsaa.n karvaa do
ghar par mere
biivii bachche
bhuuke ho.nge
un tak vo sabzii bhijvaa do

Siraj Faisal Khan
Nazm

reza-e-wajud

mire vajuud kaa makaan
KHaar-daar taar kaa hisaar jis ke ird-gird
aadmii kaa KHuun piine vaalii zard jhaa.Diyo.n ke KHaar-daar haat hai.n
mirii zamii.n ke ird-gird
kahkashaa.n ke KHaar-daar daa.ero.n kaa raqs hai
zamii.n se aasmaan tak
vajuud apne an-ginat havaas kaa gunaah hai
shu.uur-o-lams-o-lazzat-o-maqaam ke saraab hai.n
mai.n puuchhtaa huu.n sang me.n gudaaz pamba Dhuu.nDne se kyaa milaa
ye zindagii yahii to hai
ki reza reza jam.a kii hu.ii mataa-e-ziist ko
havaa-e-tund phe.nk aa.e dasht-e-be-savaad me.n
mirii nazar ke saamne
na jaane kitne jism the ki TuuT kar bikhar ga.e
mai.n aise haul-naak tajrabo.n ke baa'd baar baar
KHud ko yuu.n sa.nbhaaltaa huu.n jaise apne haat se
mai.n gir ke TuuT jaa.uu.ngaa
miraa badan aziyyato.n kaa KHvaan hai
kabhii mai.n barf kii silo.n kii huu.n Gizaa
kabhii mai.n tiirgii kaa rizq huu.n
kabhii mire liye hai nok-daar KHanjaro.n kaa TaKHt-e-KHvaab
aur aaj un aziyyato.n ke darmiyaa.n
miraa vajuud jaise mujh ko chho.D kar chalaa gayaa
mai.n barg-e-sabz thaa jise
KHizaa.n kaa haat shaaKH-e-tar se to.D kar chalaa gayaa
mai.n ek samt falsafe ke an-ginat nikaat kii panaah huu.n
aur ek samt aagahii ke jabr kii karaah huu.n
musaabqat ke daur me.n vo saa.ate.n bhii aa ga.ii.n
ki husn aur ishq me.n mataa.a aur mushtarii kaa ramz jaagne lagaa
na ishq itnaa be-KHabar
na husn itnaa mo'atabar
ki be-daliil qaziya-e-vafaa kii daad de sake
ye kaa.enaat be-hisii kii ik basiit shakl hai
na zindagii kaa kuchh asar
na maut se ko.ii KHatar
ab aisii kaa.enaat me.n
is ek reza-e-vajuud ke havaas kyaa kare.n
ab aise sard jism kii barahnagii ko dekh kar
KHuluus-o-mehr-o-lutf ke hasii.n libaas kyaa kare.n

Sahar Ansari
Nazm

daere

uu.nche makaano.n kii diivaaro.n par harii bharii phuulo.n kii bel
surma.ii baadalo.n ke ghu.nghaT se merii chhoTii khi.Dkii kii taraf
dekhtii hai
persuaders T.v par film chal rahii hai
mai.n kis ke ta.aaqub me.n apnii taraf bhaag rahii huu.n
mai.n kolhuu kaa bail huu.n
roz ek daa.era apne ird-gird khii.nchtii huu.n aur is daa.ere
ke aage ek aur daa.era phir ek aur
yuu.n aage hii aage daa.ere hii daa.ere
zindagii kaa safar daa.ero.n se likhaa gayaa
subah dopahar shaam aa.nsuu kii roTii dukh kaa saalan aur
sard aaho.n kaa paanii
barsaato.n kii shaame.n nirmal komal dil ko yuu.n dahlaatii hai.n
jaise aatish-daan kii qariib so.ii billii an-jaane qadmo.n se chau.nk jaa.e
ye bhii ek daa.era hai
is daa.ere ke andar hamaare hathiyaar zamiin par pa.Dte hai.n
aur ham haath uThaa.e aasmaanii aavaaz par
aage hii aage be-samt chalte jaa rahe hai.n
daa.ere bante jaa rahe hai.n

Shaista Habeeb
Nazm

hisar-andar-hisar

mere ird-gard ik hisaar hai
ik hisaar jis ke giir-o-daar mai.n
be-amaa.n Gubaar me.n
meraa jism merii zaat
taar taar hai

Akbar Hyderabadi
Nazm

chunaw

chaar baras ke
maile kuchle
duble-patle la.Dke me.n thii
Gazab kii phurtii
chauraahe par ek taraf kii harii light se
duusrii samt kii laal light tak
bijlii kii tezii se vo aataa jaataa thaa
jo mil jaa.e us ke aage
phailaataa thaa apnii hathelii
jis me.n
KHush-haalii aur lambe jiivan kii
rekhaa.e.n thii.n
chauraahe tak hii mahduud thii us kii duniyaa
jis ko us ne nahii.n chunaa thaa
traffic light ke ird-gard thaa us kaa jiivan
vo bhii us ne nahii.n chunaa thaa
TuuTe pul ke niiche us kaa janam hu.aa thaa
vo bhii us ne nahii.n chunaa thaa
kal shab
traffic light ko to.Dne vaale Truck se dab kar
maut ho ga.ii us kii
vo bhii us ne nahii.n chunii thii

Subodh Lal Saqi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now