کی تلاش کا نتیجه | موضو - نظم, صفحہ aahaTe.n

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "aahaTe.n"

نظم کے متعلقہ نتیجہ "aahaTe.n"

نظم

یہ کون مسکراہٹوں کا کارواں لئے ہوئے
شباب شعر و رنگ و نور کا دھواں لئے ہوئے
دھواں کہ برق حسن کا مہکتا شعلہ ہے کوئی
چٹیلی زندگی کی شادمانیاں لئے ہوئے
لبوں سے پنکھڑی گلاب کی حیات مانگے ہے
کنول سی آنکھ سو نگاہ مہرباں لئے ہوئے
قدم قدم پہ دے اٹھی ہے لو زمین رہگزر
ادا ادا میں بے شمار بجلیاں لئے ہوئے
نکلتے بیٹھتے دنوں کی آہٹیں نگاہ میں
رسیلے ہونٹ فصل گل کی داستاں لئے ہوئے
خطوط رخ میں جلوہ گر وفا کے نقش سر بسر
دل غنی میں کل حساب دوستاں لئے ہوئے
وہ مسکراتی آنکھیں جن میں رقص کرتی ہے بہار
شفق کی گل کی بجلیوں کی شوخیاں لئے ہوئے
ادائے حسن برق پاش شعلہ زن نظارہ سوز
فضائے حسن اودی اودی بجلیاں لئے ہوئے
جگانے والے نغمۂ سحر لبوں پہ موجزن
نگاہیں نیند لانے والی لوریاں لئے ہوئے
وہ نرگس سیاہ نیم باز مے کدہ بہ دوش
ہزار مست راتوں کی جوانیاں لئے ہوئے
تغافل و خمار اور بے خودی کی اوٹ میں
نگاہیں اک جہاں کی ہوشیاریاں لئے ہوئے
ہری بھری رگوں میں وہ چہکتا بولتا لہو
وہ سوچتا ہوا بدن خود اک جہاں لئے ہوئے
ز فرق تا قدم تمام چہرہ جسم نازنیں
لطیف جگمگاہٹوں کا کارواں لئے ہوئے
تبسمش تکلمے تکلمش ترنمے
نفس نفس میں تھرتھراتا ساز جاں لئے ہوئے
جبین نور جس پہ پڑ رہی ہے نرم چھوٹ سی
خود اپنی جگمگاہٹوں کی کہکشاں لئے ہوئے
''ستارہ بار و مہ چکاں و خورفشاں'' جمال یار
جہان نور کارواں بہ کارواں لئے ہوئے
وہ زلف خم بہ خم شمیم مست سے دھواں دھواں
وہ رخ چمن چمن بہار جاوداں لئے ہوئے
بہ مستیٔ جمال کائنات، خواب کائنات
بہ گردش نگاہ دور آسماں لئے ہوئے
یہ کون آ گیا مرے قریب عضو عضو میں
جوانیاں، جوانیوں کی آندھیاں لئے ہوئے
یہ کون آنکھ پڑ رہی ہے مجھ پر اتنے پیار سے
وہ بھولی سی وہ یاد سی کہانیاں لئے ہوئے
یہ کس کی مہکی مہکی سانسیں تازہ کر گئیں دماغ
شبوں کے راز نور مہ کی نرمیاں لئے ہوئے
یہ کن نگاہوں نے مرے گلے میں باہیں ڈال دیں
جہان بھر کے دکھ سے درد سے اماں لئے ہوئے
نگاہ یار دے گئی مجھے سکون بے کراں
وہ بے کہی وفاؤں کی گواہیاں لئے ہوئے
مجھے جگا رہا ہے موت کی غنودگی سے کون
نگاہوں میں سہاگ رات کا سماں لئے ہوئے
مری فسردہ اور بجھی ہوئی جبیں کو چھو لیا
یہ کس نگاہ کی کرن نے ساز جاں لئے ہوئے
ستے سے چہرے پر حیات رسمساتی مسکراتی
نہ جانے کب کے آنسوؤں کی داستاں لئے ہوئے
تبسم سحر ہے اسپتال کی اداس شام
یہ کون آ گیا نشاط بے کراں لئے ہوئے
ترے نہ آنے تک اگرچہ مہرباں تھا اک جہاں
میں رو کے رہ گیا ہوں سو غم نہاں لئے ہوئے
زمین مسکرا اٹھی یہ شام جگمگا اٹھی
بہار لہلہا اٹھی شمیم جاں لئے ہوئے
فضائے اسپتال ہے کہ رنگ و بو کی کروٹیں
ترے جمال لالہ گوں کی داستاں لئے ہوئے
فراقؔ آج پچھلی رات کیوں نہ مر رہوں کہ اب
حیات ایسی شامیں ہوگی پھر کہاں لئے ہوئے
(۲)
مگر نہیں کچھ اور مصلحت تھی اس کے آنے میں
جمال و دید یار تھے نیا جہاں لئے ہوئے
اسی نئے جہاں میں آدمی بنیں گے آدمی
جبیں پہ شاہکار دہر کا نشاں لئے ہوئے
اسی نئے جہاں میں آدمی بنیں گے دیوتا
طہارتوں کا فرق پاک پر نشاں لئے ہوئے
خدائی آدمی کی ہوگی اس نئے جہان پر
ستاروں کے ہیں دل یہ پیش گوئیاں لئے ہوئے
سلگتے دل شرر فشاں و شعلہ بار برق پاش
گزرتے دن حیات نو کی سرخیاں لئے ہوئے
تمام قول اور قسم نگاہ ناز یار تھی
طلوع زندگیٔ نو کی داستاں لئے ہوئے
نیا جنم ہوا مرا کہ زندگی نئی ملی
جیوں گا شام دید کی نشانیاں لئے ہوئے
نہ دیکھا آنکھ اٹھا کے عہد نو کے پردہ داروں نے
گزر گیا زمانہ یاد رفتگاں لئے ہوئے
ہم انقلابیوں نے یہ جہاں بچا لیا مگر
ابھی ہے اک جہاں وہ بدگمانیاں لئے ہوئے

فراق گورکھپوری

نظم

آسماں کے چہرے پر بے شمار آنکھیں ہیں
بے شمار آنکھوں میں بے حساب منظر ہیں
منظروں کے آئینے اپنے اپنے چہروں کو خود ہی دیکھ سکتے ہیں
خود ہی جان سکتے ہیں اپنی بے نوائی کو
وسعتوں کی چادر پر سلوٹیں بہت سی ہیں
اس خموش دنیا میں آہٹیں بہت سی ہیں
آتی جاتی لہروں کا ازدحام رہتا ہے
وقت ایک خنجر ہے
بے نیام رہتا ہے
یہ عجیب دنیا ہے جس میں کچھ نہیں ملتا
پھر بھی ایک لمحے میں بے شمار تاریخیں
یوں بدلتی رہتی ہیں
جیسے خشک پتوں کا ڈھیر اڑتا پھرتا ہے
بے کنار سمتوں میں
بے شمار سمتوں میں بے شمار آنکھیں ہیں
کچھ نہیں ہے تکنے کو اور ہزار آنکھیں ہیں
راستوں کے دھاگے سے ہر طرف لٹکتے ہیں
خاک کے جزیرے سے
ہر طرف بھٹکتے ہیں
پھر بھی آسمانوں پر رات کے اندھیرے میں
صبح کے سویرے ہیں
یہ عجب معمہ ہے
جس طرف بھی ہم دیکھیں
ٹوٹتے ہوئے لمحے بھاگتے ہوئے رستے جاگتے ہوئے منظر
آئنوں کے اندر بھی آئنوں کے باہر بھی
ایک شور برپا ہے
جس کو ہم نہیں سنتے
اور وہ ہم سے کہتا ہے
تم بھی میرے جیسے ہو
میں بھی مٹنے والا ہوں تم بھی مٹنے والے ہو
آسماں کے چہرے پر بے شمار آنکھیں ہیں
بے شمار آنکھوں میں بے حساب منظر ہیں
منظروں کے آئینے
رنگ رنگ آئینے کے جواب منظر ہیں
منظروں کے اندر بھی صد ہزار منظر ہیں
وہ بھی مٹنے والے ہیں
ہم بھی مٹنے والے ہیں

شہزاد احمد

نظم

پھر وہی بڑھتے ہوئے رکتے ہوئے قدموں کی چاپ
پھر وہی سہمی ہوئی سمٹی ہوئی سرگوشیاں
پھر وہی بہکی ہوئی مہکی ہوئی سی آہٹیں
پھر وہی گاتی سی لہراتی سی کچھ مدہوشیاں

قتیل شفائی

نظم

زندگی کی نرم نرم آہٹیں
بے سبب یوں ہی مسکراہٹیں

محبوب خزاں

نظم

خزاں کی آہٹیں سن رہی ہو
میرا جسم بجھ رہا ہے
میری سانسوں کے پھول پتے
مرجھا رہے ہیں

مصحف اقبال توصیفی

نظم

سوچتا ہوں کہ ترے پیار کے بدلے مجھ کو
کیا ملا درد و غم و رنج و مصیبت کے سوا
اک تڑپ ایک کسک ایک خلش ہے پیہم
ایک لمحہ بھی سکوں کا نہ مرے پاس رہا
اور تو اجنبی آغوش کی زینت بن کر
اک چمکتی ہوئی فردوس میں جا بیٹھی ہے
رقص کرتے ہیں نئے خواب نگاہوں میں تری
دل سے ماضی کے سبھی نقش مٹا بیٹھی ہے
میری محبوب مرے دل کے سیہ خانے میں
جھلملاتی ہیں تری یاد کی شمعیں اب بھی
آہٹیں تیری تصور میں بسی ہیں اب تک
تیرے جلووں سے سجی ہیں مری نظریں اب بھی
میری تخیل کے خوابیدہ دریچوں سے ابھی
تیری پائل کے چھنکنے کی صدا آتی ہے
میرے احساس پہ لہراتی ہیں زلفیں تیری
جب کبھی جھوم کے ساون کی گھٹا آتی ہے
میں نے ہر چند تجھے بھولنا چاہا لیکن
پھر بھی آنکھوں میں ترے خواب مچل جاتے ہیں
اب تلک بھی مری فکروں کے تراشیدہ خطوط
جانے کیوں تیرے خد و خال میں ڈھل جاتے ہیں
اب یہ سوچا ہے کہ پھر دل میں سمو لوں گا تجھے
جذب کر لوں گا نگاہوں میں ترے نقش حسیں
کیونکہ شاید مری تخلیق مرے فن کا سہاگ
تجھ سے ہے تیری قسم تیرے سوا کچھ بھی نہیں

شاہد اختر

نظم

وہ جس کی آہٹیں
سماعتوں کے کنج میں نہاں تھیں
جس کا عکس
جلوہ ریز تھا
بصارتوں کی جھیل میں
وہ کیا فقط صبا کا سرمگیں خرام تھا
کہ شاخ گل کا سایۂ خفیف تھا
کہ موج آب پر کرن کا ارتعاش تھا
جو ایک پل میں سامنے سے یوں گزر گیا
کہ وہ سبھی جو منتظر تھے
آنکھ ملتے رہ گئے

زاہدہ زیدی

نظم

یہاں کیا ہے برہنہ تیرگی ہے
خلا ہے آہٹیں ہیں تشنگی ہے
یہاں جس کے لیے آئے تھے وہ شے
کسی قیمت پہ بھی ملتی نہیں ہے
جو اپنے ساتھ ہم لائے تھے وہ بھی
یہیں کھو جائے گا گر کی نہ جلدی
چلو جلدی چلو اپنے مکاں کے
کواڑوں کی جبیں پر ثبت ہوگی
کوئی دستک ابھی بیتے دنوں کی

شہریار

نظم

ادھر کئی دنوں سے
دور دور تک بھی نیند کا پتہ نہیں
کسیلے کڑوے ذائقے
ٹپک رہے ہیں آنکھ سے
کئی پہر گزر چکے
طویل کالی رات کے
میں سن رہا ہوں دیر سے
ہزاروں بار کی سنی سنائی دستکیں
کبھی شناسا آہٹیں
کبھی نشیلی سرسراہٹیں

آشفتہ چنگیزی

نظم

رات کے فرش پر
موت کی آہٹیں
پھر کوئی در کھلا
کون اس گھر کے پہرے پہ مامور تھا
کس کے بالوں کی لٹ
کس کے کانوں کے در
کس کے ہاتھوں کا زر، سرخ دہلیز پر قاصدوں کو ملا؟
کوئی پہرے پہ ہو تو گواہی ملے
یہ شکستہ شجر
یہ شکستہ شجر جس کے پاؤں میں خود اپنے سائے کی موہوم زنجیر ہے
یہ شکستہ شجر تو محافظ نہیں
یہ شکستہ شجر تو سپاہی نہیں
شب سے ڈرتا ہوں میں
ایک تصویر بے رنگ ہے سامنے جس سے ڈرتا ہوں میں
ایک صورت کہ جس کے خد و خال کی میری صبح ہنر
سے شناسائی ہے
اس سے ڈرتا ہوں میں
ایک شعلہ کہ اب تک خس جاں میں تھا، اس کا سرکش شرر
کاغذوں میں، مکانوں میں، باغوں میں ہے
اس کی مانوس حدت سے ڈرتا ہوں میں
ایک آواز کہسار تفریق پر جو صف آرا ہیں وہ اپنے بھائی نہیں
اس صدا رو بہ صحرا سے ڈرتا ہوں میں
شب سے ڈرتا ہوں میں

اختر حسین جعفری

نظم

نیند پالکی اتری رات دور جنگل میں
خواب خواب منظر تھا دھیرے دھیرے بہتی تھی
سمفنی ہواؤں کی رات چاند بادل میں
چاندنی کی بانہوں میں جھیل والتز کرتی تھی
دھیمی دھیمی سی خوشبو ساتھ ساتھ چلتی تھی
کنج میں درختوں کے بے خودی کے عالم میں مست ڈار ہرنوں کی
بیلے رقص کرتی تھی
ہرنیوں کی آنکھوں میں مشک سی مہکتی تھی
کالے پیرہن پہنے با وقار پیڑوں نے وائلن سنبھالے تھے
جھومتے ہوئے پتے تالیاں بجاتے تھے
گنگناتی بیلوں پر پھول کسمساتے تھے
جگنوؤں کی جھلمل سے راج ہنس سوتے سے جاگ جاگ اٹھتے تھے
آہٹیں پرندوں کی اپنے شب بسیروں میں پائلیں بجاتی تھیں
اپنے بند کمرے میں آنکھ جو کھلی دیکھا
شہر کی کثافت سے مضمحل سا سورج پھر
ایک اور نئے دن کی دھول لے کے آیا تھا
ٹی وی والے کمرے میں صبح کا خبر نامہ اطلاع دیتا تھا
ایک اور جنگل کو کاٹ کر نکالیں گے راستہ ترقی کا

عذرا نقوی

نظم

یہ صدائیں کیسی ہیں
جن کی گونج سے میرے
کان سنسناتے ہیں
کس کی سسکیاں ہیں یہ
زندگی کی یا تم ہو
موت تو نہیں نا یہ
موت گر نہیں ہے یہ
آہٹیں ہیں پھر کس کی
کیوں گھٹن کا پہرہ ہے
کیا مجھے جنم دے کر
تم نے موت بانٹی ہے

میمونہ عباس خان

نظم

(سچے لوگوں کے نام)
عجیب ماں ہو
تم اپنے بچوں کو مارتی ہو
تو اس خطا پر
کہ وہ حکومت کی وحشتوں کے خلاف نکلے
جلوس کے ساتھ جا رہے تھے
تم اب پریشان ہو رہی ہو
میں آنے والی گھڑی کے بارے میں سوچتا ہوں
جب ایک موسم کئی کئی سال تک رہے گا
تم اپنے ہاتھوں سے مرے شانے ہلا ہلا کر کہو گی
باہر نکل کے ان کافروں کو روکو
جو اپنے جسموں میں اندھا ہیجان بھر کے
سڑکوں پہ چیختے ہیں
رب موسم!
جولائی سر پہ ہے اور کہرا
ہمارے جسموں میں
اور فصلوں کے رونگٹوں میں اتر رہا ہے
ہمیں جولائی میں جنوری کی فضائیں منظور کس طرح ہوں
ہمارے ذہنوں میں
رت کی تبدیلیوں کے خاکے بنے ہوئے ہیں
اب تم پریشان ہو رہی ہو
میں گزرے وقتوں کی آہٹیں سن رہا ہوں
جب میں نے یہ کہا تھا
کہ بچے تم پہ گئے تو آرام سے رہیں گے
مگر جو ورثے میں میری سوچیں ملیں
تو وعدہ کرو یہ شکوہ نہیں کرو گی
کہ میرے بچے
جنہیں کئی ماہ میں نے اپنا لہو دیا تھا
وہ اس لہو کو
اجاڑ سڑکوں کے منہ پہ ملنے پہ تل گئے ہیں

وحید احمد

نظم

مجھے اڑتے پرندے اچھے لگتے ہیں
مجھے ان کی اڑانوں سے
نئے آتے ہوئے سب موسموں کی آہٹیں محسوس ہوتی ہیں
مجھے ان کی اڑانیں
بارشیں اور پھول کھلنے کی بشارت دینے آتی ہیں
مجھے ان کی اڑانیں
زندگی کے راستوں پر حوصلوں کا درس دیتی ہیں
مرے ہاتھوں نے حرفوں کے گلابوں کو
انہی سے لکھنا سیکھا ہے

محمود ثنا

نظم

موت میری سکھی
میرے ہی سنگ آنگن میں کھیلی بڑھی
میری پوشاک میرے دوپٹے پہ وہ اپنے ہی پیارے ہاتھوں سے
چاند اور تارے اگاتی رہی
زندگانی سے مجھ کو لڑاتی رہی
موت میری سکھی
میرے ہی سنگ کھانے کے لقمے بھرے
میں بھری چاند راتوں میں مٹی کی کوری صراحی سے
پانی پلاتی رہی
سردیوں کی ٹھٹھرتی سیاہ رات میں
اور سفیدے سے لبریز کہرے بھرے
دن کو اپنے کھلے بازوؤں میں بلاتی رہی
موت میری سکھی
میری تنہائیوں کی کڑی دھوپ میں
چھاؤں بن کر مرے ساتھ چلتی رہی
موت میری سکھی میری نبضوں کی وہ راز داں
میرے آنسوؤں کی سب آہٹیں اس کے ہاتھوں سے لکھی گئیں
نفرتوں اور محبت کی سب پرچیاں میرے دامن میں گرتی رہیں
موت میری سکھی ان کو چنتی رہی
آج میری سکھی موت میری سکھی
مجھ سے ہی روٹھ کے میرے گھر سے چلی
میں وداعی کے سب گیت ہونٹوں میں بھینچے
اسے دیکھتی ہی رہی
مجھے چھوڑ کر یوں نہ جاؤ
تمہارے بنا میرے آنگن کا تنہا شجر
سوکھتے سوکھتے ایک دن اس زمین پر بکھر جائے گا
اور معصوم چڑیاں بنا موت مر جائیں گی
زندگی سے جو ناتا ہے کٹ جائے گا
موت میری سکھی
آؤ پھر مجھ کو اوڑھو مجھے پہن لو
آؤ پھر مجھ کو اپنے گلے سے لگا لو
محبت سے پھر آسماں پر اٹھا لو
چلی آؤ میری سکھی
موت میری سکھی

شائستہ حبیب

نظم

وہ ایک شب سفید گلابوں والے تالاب کے بالکل نزدیک
شب بھر بادلوں کی ہلکی اور تیز آہٹیں
اور شب بھر
ہونٹ ہونٹوں پر
سانس سانسوں پر
اور جسم جسم کی سفید گلابی چھتوں پر

تبسم کاشمیری

نظم

کہ شاید بہت دور آگے کو
اس بحر کے ماورا
زمرد جڑے ساحلوں نے سنا ہو سلام عید کا
دھوپ کے جشن آہٹیں
نغمۂ گرم خورشید کا

شفیق فاطمہ شعریٰ

نظم

ہم اپنے منظر سے بچھڑے
آنکھوں میں اس کا عکس لئے بھٹک رہے ہیں
کوئی نئی رت ہمیں پناہ دینے لگتی ہے
تو اچانک۔۔۔
بے دعا لمحوں کو کچھ نیا سوجھتا ہے
اور سارا منظر بدل جاتا ہے
جہاں پر اسرار آہٹیں
ہمیں خوف کے جنگل میں چھوڑ آتی ہیں
بے منظری روز ہم سے شکوہ کرتی ہے
صبح جاگتے ہیں
تو ہمارے چہروں پر شام ہونے لگتی ہے
اجنبیت کی دھند ہمارا سایہ چھین چکی ہے
ہماری اپنی ذات میں فاصلے اتنے گہرے ہو گئے
کہ ہم خود اپنی ہی دسترس سے باہر ہو چکے
ہم اس منظر میں نہیں دفنائے جا سکتے
جس میں ہم نے جنم لیا تھا
ہم ایک مدت سے
آنکھوں کی گٹھڑی میں اپنے خواب باندھے
وقت کی دہلیز پر کھڑے چیخ رہے ہیں
لیکن ہماری آواز کسی اور منظر میں رہ گئی ہے
بے صوت پکار پر آسمان اشک بار ہوتا ہے
تو ہماری فصلوں میں بھوک چپکے سے گھس جاتی ہے

منیر احمد فردوس

نظم

نیم کی شاخوں کے پیچھے اف یہ کوندے کی لپک
اور اڑتے ابر پاروں کی گرج
تیز رو آندھی کے قدموں کی یہ بھاری آہٹیں
تیز بارش کے ہیں آثار مہیب
بھیگ جائے گا کوئی
بند دروازے کو اب تو کھول دینا چاہئے
جانے پھر یہ کون اپنی سخت بانہوں میں
جکڑتا ہے مجھے
جانے کیوں رک رک گئے میرے عزائم کے قدم
کون ہے اس حجلۂ تاریک میں میرے سوا
جانتا ہوں مشرقی رخ پر تپائی کے قریب
شام کو جلتا رہا آہستہ بوسیدہ چراغ
اب وہاں تک جا سکوں گا کس طرح
سائبانوں سے پگھلتی بے کراں ظلمت کی رو
بڑھ گئی ہے توڑ کر سارے حدود
چیخ کر کس کو پکاروں کس کو میں آواز دوں
نیم کی لرزیدہ شاخوں میں گرجتا ہے افق
شور بڑھتا جا رہا ہے کیا کروں
اور وہ دستک کی دھیمی سی صدا
غالباً تا حشر ابھرے گی نہیں
کیا بھیانک رات ہے

دانش فرازی

نظم

وہ جس کی آہٹیں سماعتوں کے کنج میں نہاں تھیں
جس کا عکس
جلوہ ریز تھا
بصارتوں کی جھیل میں
وہ کیا فقط صفا کا سرمگیں خرام تھا
کہ شاخ گل کا سایۂ خفیف تھا
کہ موج آب پر کرن کا ارتعاش تھا
جو ایک پل میں سامنے سے یوں گزر گیا
کہ وہ سبھی جو منتظر تھے
آنکھ ملتے رہ گئے

زاہدہ زیدی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے