کی تلاش کا نتیجه | موضو - نظم, صفحہ da.ave-daar

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "da.ave-daar"

نظم کے متعلقہ نتیجہ "da.ave-daar"

نظم

کوئی فکر مند کلاہ کا
کوئی دعوے دار قبا کا ہے
وہی اہل دل بھی ہیں زیب تن
جو لباس اہل ریا کا ہے

احمد فراز

نظم

آسماں پر نکل رہا مہتاب
دن کے دفتر پہ لگ رہا تالا
گھونسلوں کو پرندے لوٹ رہے
زینہ زینہ اندھیرا بڑھتا ہوا
اور میں ہوں قطار میں اب تک
بجلی پانی
نہ روزگار کوئی
گھر کا راشن نہ کوئی دعوے دار
عہد در عہد
پار کرتا ہوا
وادیٔ درد سے گزرتا ہوا
بطن سے والدہ کی ہوتے ہوئے
کوکھ میں آ گیا ہوں بیٹی کی
اے خدا
میرا جنم کب ہوگا

وی سدھاکر راؤ

نظم

آؤ اپنے دل میں درد لا دوا پیدا کریں
شدت غم میں مسرت کا مزا پیدا کریں

منشاء الرحمن خاں منشاء

نظم

کچھ برس اس پار کا قصہ ہے
دوستوں کی بزم میں اک دن بڑے دعوے
سے میں نے کہہ دیا تھا
دراصل وہ اندر سے بے ترتیب ہوتے ہیں
ٹوٹے پھوٹے ہوتے ہیں
اپنے گھروں میں جو ہر اک شے کو سلیقہ سے سجا رکھتے ہیں
شکستہ چیز ہو کوئی
فوراً اٹھا کر پھینک دیتے ہیں
اور آج میں محسوس کرتا ہوں
ادھر کچھ دن سے مجھ میں بھی
چیزوں کو سلیقہ سے سجائے رکھنے کی تحریک پیدا ہو رہی ہے

جبّار جمیل

نظم

جو شمع علم مغرب سید نے کی تھی روشن
بکھری ہوئی ہیں جس کی کرنیں ہر انجمن میں
اس شمع علم و فن کی کچھ منتشر شعاعیں
یاران بزم تم ہو اس گوشۂ دکن میں
لیکن یہ یاد رکھو سچی شعاع وہ ہے
آنکھوں کا نور بن کر پھیلے جو مرد و زن میں
جو شمع سے نکل کر دنیا کو جگمگا دے
جو روح تازہ پھونکے ہر پیکر کہن میں
ماحول کے اثر سے آئے نہ فرق لازم
گلزار کی کرن اور کہسار کی کرن میں
اور یہ نہیں تو پھر تم مٹی کا وہ دیا ہو
افسردہ نور جس کا محدود ہو لگن میں
سیدؔ نے نسبتوں کے دعوے تو سچ ہیں لیکن
اک پہلوئے عمل بھی درکار ہے سخن میں

فانی بدایونی

نظم

شاہی درباروں کے در سے فوجی پہرے ختم ہوئے ہیں
ذاتی جاگیروں کے حق اور مہمل دعوے ختم ہوئے ہیں

ساحر لدھیانوی

نظم

اس طرف اب رخ تعلق ہے
جہاں سود و زیان ذات نہیں
ڈر نہیں نیند ٹوٹ جانے کا
پاس وعدہ کی احتیاط نہیں
مجھ کو جس بات سے مکرنا تھا
اس کے دعوے میں اب وہ بات نہیں
بھر چکا جام شرط وصل جسے
صبح تک، آنسوؤں سے بھرنا تھا
ترک وعدہ کہ ترک خواب تھا وہ
کام سب ہو چکا جو کرنا تھا

اختر حسین جعفری

نظم

یوں تو پہلے بھی مرے واسطے کب
کون سی رات تھی جب درد کی سوغات نہ تھی
یاد
تخئیل کی پیچیدہ سرنگوں سے گزر کر ہر شب
یوں ہی ہولے سے
دبے پاؤں چلی آتی تھی
اور سوئے ہوئے زخموں کو جگا کر میرے
میری ہستی کے در و بام ہلا جاتی تھی
آج پھر درد کا طوفان ہے شب ہے میں ہوں
اور میں خود کو اندھیروں میں گھرا پاتا ہوں
میں کہ اپنے کو سمیٹوں جتنا
آج کی شب ہے کہ بکھرا ہی چلا جاتا ہوں
ایک مدت ہوئی ٹوٹا تھا مرا دل سو کوئی بات نہ تھی
آج ٹوٹا ہے بھروسہ میرا

ڈاکٹر عبدالله

نظم

جانے کتنوں نے مجھ پر وشواس کیا اور داؤ لگائے
بازی جیتے
جشن منائے
کتنے جاکی میری پیٹھ پہ بیٹھ کے
مجھ کو ایڑ لگا کے
تیز بھگا کے
اول آئے
میڈل جیتے تمغے پائے

ڈاکٹر عبدالله

نظم

بیچاری کے آرام کی صورت ہی کہاں ہے
بیوہ کی جوانی بھی عجب آفت جاں ہے
ممکن ہے کہ پیری میں سکوں پا سکے ورنہ
جب تک وہ جواں ہے غم شوہر بھی جواں ہے
ممتا سے ہے مجبور کہ اولاد کی خاطر
جیتی ہے مگر جینا بہ ہر رنگ گراں ہے
خوں گشتگیٔ دل کی دوا ہو نہیں سکتی
کیا خاک تھمے خوں کہ جو آنکھوں سے رواں ہے
بے لوث محبت کا صلہ دائمی فرقت
اے صاحب انصاف یہ انصاف کہاں ہے
دل ٹوٹ تو سکتا ہے مگر جڑ نہیں سکتا
اب یہ بھی عجب سلسلہ شیشہ گراں ہے
فریاد کرے بھی تو کرے کس سے کہ آخر
فریاد کی قیمت نہ یہاں ہے نہ وہاں ہے
یہ ملگجی چادر یہ لبادہ شکن آلود
اللہ نہ کرے تو کہیں بیوہ تو نہیں ہے
بھر آئی ہوئی آنکھوں میں ٹھہرے ہوئے آنسو
یہ نیچی نظر واجب سجدہ تو نہیں ہے
اس درد مجسم کو بھی تو گھور رہا ہے
شعلہ کہیں دوزخ کا ارادہ تو نہیں ہے
منزل کا نشاں کھو گئے گم کردہ رہی سے
یہ راستہ فردوس کا جادہ تو نہیں ہے

دوارکا داس شعلہ

نظم

گہرے گہرے گڑھے ہیں اور گڑھوں
میں
گلتا ہوا انسانی ماس ہے بچا کھچا
اور چاروں جانب
اینٹیں پتھر سریا ٹوٹے ہوئے
دروازے کھڑکیاں کتا بلی چیل
اور ڈرے ڈرے کچھ لوگ
ادھر ادھر سے جھانکتے ہیں
ادھر ادھر چھپ جاتے ہیں
بم گرتا ہے

جاوید انور

نظم

تم کو کیا معلوم محبت کیا ہوتی ہے
تم کو کیا معلوم جدائی کی شب کیسے کٹتی ہے
اور دن کتنے ویراں ہوتے ہیں
تم کو کیا ہے
تم تو اپنی بیویوں سے بھی
ڈرے ڈرے
شرمندہ شرمندہ ہم بستری کرتے ہو
تم کو کیا معلوم ہے
شاعری
پورا مرد اور پوری عورت مانگتی ہے

حسن عباس رضا

نظم

اٹھاؤ ہاتھ کہ دست دعا بلند کریں
ہماری عمر کا اک اور دن تمام ہوا
خدا کا شکر بجا لائیں آج کے دن بھی
نہ کوئی واقعہ گزرا نہ ایسا کام ہوا
زباں سے کلمۂ حق راست کچھ کہا جاتا
ضمیر جاگتا اور اپنا امتحاں ہوتا
خدا کا شکر بجا لائیں آج کا دن بھی
اسی طرح سے کٹا منہ اندھیرے اٹھ بیٹھے
پیالی چائے کی پی خبریں دیکھیں ناشتہ پر
ثبوت بیٹھے بصیرت کا اپنی دیتے رہے
بخیر و خوبی پلٹ آئے جیسے شام ہوئی
اور اگلے روز کا موہوم خوف دل میں لیے
ڈرے ڈرے سے ذرا بال پڑ نہ جائے کہیں
لیے دیے یونہی بستر میں جا کے لیٹ گئے

اختر الایمان

نظم

ہمارے اندر
بہت سی قدریں بہت سے احساس مشترک ہیں
ازل ہمارا لکھا گیا خاک کی صدا سے
وجود آب رواں کا پیکر
ہوا سے ہے رشتۂ صداقت
ہے آگ سے خون میں تمازت
نہ تم مکمل نہ ہم مکمل
ادھورے تم بھی ادھورے ہم بھی
کبھی یقیں ہیں کبھی گماں ہیں
کہیں زباں ہیں کہیں بیاں ہیں
شکستہ لمحوں کے پاسباں ہیں
بجھے بجھے سے ڈرے ڈرے سے
گناہ سانسوں میں پالتے ہیں
زمیں پہ پانی اچھالتے ہیں
سکون احساس کی طلب میں
کھڑے ہیں صحرائے روز و شب میں
ہیں ایک جیسی ہماری خوشیاں ہمارے آنسو
ہماری رنگت ہماری خوشبو
ہماری تہہ میں ہیں ایک جیسے کئی شعور نظر کے پہلو

نصیر پرواز

نظم

اگر وہ پل مجھے اک بار مل جائے تو میں پوچھوں
کہ یہ سودا مرے سر میں سمایا کس لئے تو نے
یہ درد لا دوا دل میں جگایا کس لئے تو نے
خرد ادراک عقل‌ و فہم سب بیگار ہوں جیسے
فراست دور بینی آگہی بے کار ہوں جیسے
حوالے استعارے مشورے دشوار ہوں جیسے
دلائل فلسفے منطق ذہن پر بار ہوں جیسے
بصیرت ہوشیاری علم سب خاموش تصویریں
نہ کوئی مشورہ اچھا نہ دانش‌‌ مند تدبیریں
مسلسل بے کلی دیوانگی ہے خود فراموشی
فقط اک بے خودی آٹھوں پہر پر کیف مدہوشی
نظر ہر شکل میں ڈھونڈے اسی دل دار کی صورت
ہر اک آواز جیسے صاحب آواز کی مورت
سماعت پر نظر پر سوچ پر آسیب چھایا ہے
ہر آہٹ پر تمنا پوچھتی ہے کون آیا ہے

سلمان انصاری

نظم

ایک رو پہلی سی چوٹی پر
جگ مگ جگ مگ جاگ رہا ہے آس محل
اونچی اونچی رنگ رنگیلی دیواریں ہیں
چاروں جانب ہر پتھر پر
مانی اور بہزاد سے بڑھ کر
نئے انوکھے نقش بنے ہیں
دیواریں ہیں کتنی انوکھی
جن میں لاکھوں طاق بنے ہیں
ان طاقوں میں میری آنکھیں
لرزاں لرزاں دیپک بن کر
ہر دم جلتی رہتی ہیں
اور یہ میرے نرمل آنسو
ڈرے ڈرے سے سہمے سہمے چہرے بن کر
جانے کس کو جھانکتے ہیں اور چھپ جاتے ہیں
بڑے بڑے آسیب زدہ ان کمروں میں
بھولی بسری یادیں اس کی
دبے دبے پاؤں چلتی ہیں
جن کی آہٹ روح کے سونے دالانوں تک
چیخیں بن کر آتی ہے
جانے کب سے آس محل سے
میں آنکھیں اور آنسو بن کر
ویراں ویراں سونا سونا
اندھا رستہ دیکھ رہا ہوں

راشد حسن رانا

نظم

وہ غالب کل بھی تھا اور آج بھی کل بھی وہی غالب
نہیں ہے ہونے والا دوسرا اب کوئی بھی غالبؔ
وہ کل کی شاعری ہو آج کی ہو یا کبھی کی ہو
ہے غالب ہر زمانے میں تمہاری شاعری غالبؔ
تمہارے شعر میں مفہوم و معنی کا جہاں پنہاں
ہے بحر‌ بیکراں سچ مچ تمہاری گفتنی غالبؔ
کوئی بھی شعر فطرت سے الگ ہو کر نہیں لکھا
حقیقت پر تمہاری شاعری مبنی رہی غالبؔ
تمہاری گل فشانی تھی خزاں کے دور میں جاری
کٹی کتنی مصیبت میں تمہاری زندگی غالب
کئی بیٹوں کی پے در پے جدائی بھی سہی تم نے
تمہارے صبر و ضبط نفس کے قائل سبھی غالب
تمہارا لہجہ بھی انداز بھی اسلوب بھی بے مثل
تمہاری جیسی میں ڈھونڈوں کہاں سے شاعری غالبؔ
لطافت کا فصاحت کا بلاغت کا ہے تو موجد
تو لفظوں کا اشاروں کا کنایوں کا دھنی غالبؔ
دوائے درد دل کے تم نہ منت کش ہوئے چونکہ
تمہارے عشق میں تم پر رہی اپنی خودی غالب
ہے فریادی تمہارا نقش ہر فریاد پر بھاری
صداؤں پر تمہاری ہے صدائے دائمی غالبؔ
مرے بت خانہ میں تو گاڑو کعبے میں برہمن کو
جنون عشق ایسا کون اب پائے کبھی غالبؔ
تمہاری شاعری کی دھوم ہے سارے زمانے میں
بہادر شاہ کی محفل میں بھی سب پر رہی غالب
ہیں بالاتر تمہارے شعر کتنے عام ذہنوں سے
مگر ہوتی رہی الفاظ کی جادوگری غالب
تمہاری نظروں سے کوئی نہ صورت بچ سکی غالبؔ
تمہارے ذوق کی وجدانی و ندرت کا کیا کہنا
کہ زخموں کے نمک پلکوں سے چنتے تھے کبھی غالبؔ
اٹھایا سنگ تھا تو کیوں نہیں پھینکا تھا مجنوں پر
لڑکپن ہی سے تم پر فکر کیوں سر کی رہی غالبؔ
نہ چھوٹی مے کبھی چکر نہ کوئے یار کا چھوٹا
مگر چھوٹا نہیں ہاتھوں سے دامان خودی غالبؔ
ہزاروں شاعروں نے کتنے دیوان اپنے چھپوائے
مگر اک دھاک بس دیوان غالبؔ کی رہی غالب
تصور آج غالبؔ کا حسنؔ کے ذہن پر غالب
بہ نام مرزا غالبؔ سب پہ یہ محفل ہوئی غالب

حسن نواب حسن

نظم

(۱)
اے سب سے اول اور آخر
جہاں تہاں، حاضر اور ناظر
اے سب داناؤں سے دانا
سارے تواناؤں سے توانا
اے بالا، ہر بالاتر سے
چاند سے سورج سے امبر سے
اے سمجھے بوجھے بن سوجھے
جانے پہچانے بن بوجھے
سب سے انوکھے سب سے نرالے
آنکھ سے اوجھل دل کے اجالے
اے اندھوں کی آنکھ کے تارے
اے لنگڑے لولوں کے سہارے
ناتیوں سے چھوٹوں کے ناتی
ساتھیوں سے بچھڑوں کے ساتھی
ناؤ جہاں کی کھینے والے
دکھ میں تسلی دینے والے
جب اب تب تجھ سا نہیں کوئی
تجھ سے ہیں سب تجھ سا نہیں کوئی
جوت ہے تیری جل اور تھل میں
باس ہے تیری پھول اور پھل میں
ہر دل میں ہے تیرا بسیرا
تو پاس اور گھر دور ہے تیرا
راہ تری دشوار اور سکڑی
نام ترا رہ گیر کی لکڑی
تو ہے ٹھکانا مسکینوں کا
تو ہے سہارا غمگینوں کا
تو ہے اکیلوں کا رکھوالا
تو ہے اندھیرے گھر کا اجالا
لاگو اچھے اور برے کا
خواہاں کھوٹے اور کھرے کا
بید نراسے بیماروں کا
گاہک مندے بازاروں کا
سوچ میں دل بہلانے والے
بپتا میں یاد آنے والے
(۲)
اے بے وارث گھروں کے وارث
بے بازو بے پروں کے وارث
بے آسوں کی آس ہے تو ہی
جاگتے سوتے پاس ہے تو ہی
بس والے ہیں یا بے بس ہیں
تو نہیں جن کا وہ بے کس ہیں
ساتھی جن کا دھیان ہے تیرا
دسرایت کی وہاں نہیں پروا
دل میں ہے جن کے تیری بڑائی
گنتے ہیں وہ پربت کو رائی
بیکس کا غم خوار ہے تو ہی
بری بنی کا یار ہے تو ہی
دکھیا دکھی یتیم اور بیوہ
تیرے ہی ہاتھ ان سب کا ہے کھیوا
تو ہی مرض دے تو ہی دوا دے
تو ہی دوا دارو میں شفا دے
تو ہی پلائے زہر کے پیالے
تو ہی پھر امرت زہر میں ڈالے
تو ہی دلوں میں آگ لگائے
تو ہی دلوں کی لگی بجھائے
چمکارے چمکار کے مارے
مارے مار کے پھر چمکارے
پیار کا تیرے پوچھنا کیا ہے
مار میں بھی اک تیری مزا ہے
(۳)
اے رحمت اور ہیبت والے
شفقت اور دباغت والے
اے اٹکل اور دھیان سے باہر
جان سے اور پہچان سے باہر
عقل سے کوئی پا نہیں سکتا
بھید ترے حکموں میں ہیں کیا کیا
ایک کو تو نے شاد کیا ہے
ایک کے دل کو داغ دیا ہے
اس سے نہ تیرا پیار کچھ ایسا
اس سے نہ تو بیزار کچھ ایسا
ہر دم تیری آن نئی ہے
جب دیکھو تب شان نئی ہے
یہاں پچھوا ہے وہاں پروا ہے
گھر گھر تیرا حکم نیا ہے
پھول کہیں کملائے ہوئے ہیں
اور کہیں پھل آئے ہوئے ہیں
کھیتی ایک کی ہے لہراتی
ایک کا ہر دم خون سکھاتی
ایک پڑے ہیں دھن کو ڈبوئے
ایک ہیں گھوڑے بیچ کے سوئے
ایک نے جب سے ہوش سنبھالا
رنج سے اس کو پڑا نہ پالا
ایک نے اس جنجال میں آ کر
چین نہ دیکھا آنکھ اٹھا کر
مینہ کہیں دولت کا ہے برستا
ہے کوئی پانی تک کو ترستا
ایک کو مرنے تک نہیں دیتے
ایک اکتا گیا لیتے لیتے
حال غرض دنیا کا یہی ہے
غم پہلے اور بعد خوشی ہے
رنج کا ہے دنیا کے گلا کیا
تحفہ یہی لے دے کے ہے یاں کا
یہاں نہیں بنتی رنج سہے بن
رنج نہیں سب ایک سے لیکن
ایک سے یہاں رنج ایک ہے بالا
ایک سے ہے درد ایک نرالا
گھاؤ ہے گو ناسور کی صورت
پر اسے کیا ناسور سے نسبت
تپ وہی دق کی شکل ہے لیکن
دق نہیں رہتی جان لیے بن
دق ہو وہ یا ناسور ہو کچھ ہو
دے نہ جو اب امید کسی کو
روز کا غم کیوں کر سہے کوئی
آس نہ جب باقی رہے کوئی
تو ہی کر انصاف اے مرے مولا
کون ہے جو بے آس ہے جیتا
گو کہ بہت بندے ہیں پر ارماں
کم ہیں مگر مایوس ہیں جو یاں
خواہ دکھی ہے خواہ سکھی ہے
جو ہے اک امید اس کو بندھی ہے
کھیتیاں جن کی کھڑی ہیں سوکھی
آس وہ باندھے بیٹھے ہیں مینہ کی
گھٹا جن کی اساڑی میں ہے
ساونی کی امید نہیں ہے
ڈوب چکی ہے ان کی اگیتی
دیتی ہے ڈھارس ان کو پچھیتی
ایک ہے اس امید پہ جیتا
اب ہوئی بیٹی اب ہوا بیٹا
ایک کو جو اولاد ملی ہے
اس کو امنگ شادیوں کی ہے
رنج ہے یا قسمت میں خوشی ہے
کچھ ہے مگر اک آس بندھی ہے
غم نہیں ان کو غمگیں ہیں
جو دل ناامید نہیں ہیں
کال میں کچھ سختی نہیں ایسی
کال میں ہے جب آس سمیں کی
سہل ہے موجوں سے چھٹکارا
جب کہ نظر آتا ہے کنارا
پر نہیں اٹھ سکتی وہ مصیبت
آئے گی جس کے بعد نہ راحت
شاد ہو اس رہ گیر کا کیا دل؟
مر کے کٹے گی جس کی منزل
ان اجڑوں کو کل پڑے کیوں کر
گھر نہ بسے گا جن کا جنم بھر
ان بچھڑوں کا کیا ہے ٹھکانا؟
جن کو نہ ملنے دے گا زمانہ
اب یہ بلا ٹلتی نہیں ٹالی
مجھ پہ ہے جو تقدیر نے ڈالی
آئیں بہت دنیا میں بہاریں
عیش کی گھر گھر پڑیں پکاریں
پڑے بہت باغوں میں جھولے
ڈھاک بہت جنگل میں پھولے
گئیں اور آئیں چاندنی راتیں
برسیں کھلیں بہت برساتیں
پر نہ کھلی ہرگز نہ کھلے گی
وہ جو کلی مرجھائی تھی دل کی
آس ہی کا بس نام ہے دنیا
جب نہ رہی یہی تو رہا کیا؟
ایسے بدیسی کا نہیں غم کچھ
جس کو نہ ہو ملنے کی قسم کچھ
رونا ان بن باسیوں کا ہے
دیس نکالا جن کو ملا ہے
حکم سے تیرے پر نہیں چارہ
کڑوی میٹھی سب ہے گوارا
زور ہے کیا پتے کا ہوا پر
چاہے جدھر لے جائے اڑا کر
تنکا اک اور سات سمندر
جائے کہاں موجوں سے نکل کر
قسمت ہی میں جب تھی جدائی
پھر ٹلتی کس طرح یہ آئی؟
آج کی بگڑی ہو تو بنے بھی
ازل کی بگڑی خاک بنے گی
تو جو چاہے وہ نہیں ٹلتا
بندے کا یاں بس نہیں چلتا
مارے اور نہ دے تو رونے
تھپکے اور نہ دے تو سونے
ٹھہرے بن آتی ہے نہ بھاگے
تیری زبردستی کے آگے
تجھ سے کہیں گر بھاگنا چاہیں
بند ہیں چاروں کھونٹ کی راہیں
تو مارے اور خواہ نوازے
پڑی ہوئی ہوں میں تیرے دروازے
تجھ کو اپنا جانتی ہوں میں
تجھ سے نہیں تو کس سے کہوں میں
ماں ہی سدا بچہ کو مارے
اور بچہ ماں ماں ہی پکارے
(۴)
اے مرے زور اور قدرت والے
حکمت اور حکومت والے
میں لونڈی تیری دکھیارے
دروازے کی تیری بھکاری
موت کی خواہاں جان کی دشمن
جان اپنی ہے آپ اجیرن
اپنے پرائے کی دھتکاری
میکے اور سسرال پہ بھاری
سہہ کے بہت آزار چلی ہوں
دنیا سے بیزار چلی ہوں
دل پر میرے داغ ہیں جتنے
منہ میں بول نہیں ہیں اتنے
دکھ دل کا کچھ کہہ نہیں سکتی
اس کے سوا کچھ کہہ نہیں سکتی
تجھ پہ ہے روشن سب دکھ دل کا
تجھ سے حقیقت اپنی کہوں کیا
بیاہ کے دم پائی تھی نہ لینے
لینے کے یاں پڑ گئے دینے
خوشی میں بھی دکھ ساتھ نہ آیا
غم کے سوا کچھ ہات نہ آیا
ایک خوشی نے غم یہ دکھائے
ایک ہنسی نے گل ہی کھلائے
کیسا تھا یہ بیاہ نناواں
جوں ہی پڑا اس کا پرچھاواں
چین سے رہنے دیا نہ جی کو
کر دیا ملیامیٹ خوشی کو
رو نہیں سکتی تنگ ہوں یاں تک
اور روؤں تو روؤں کہاں تک
ہنس ہنس دل بہلاؤں کیوں کر
اوسوں پیاس بجھاؤں کیوں کر
ایک کا کچھ جینا نہیں ہوتا
ایک نہ ہنستا بھلا نہ روتا
لیٹے گر سونے کے بہانے
پائنتی کل ہے اور نہ سرہانے
جاگیے تو بھی بن نہیں پڑتی
جاگنے کی آخر کوئی حد بھی
اب کل ہم کو پڑے گی مر کر
گور ہے سونی سیج سے بہتر
بات سے نفرت کام سے وحشت
ٹوٹی آس اور بجھی طبیعت
آبادی جنگل کا نمونہ
دنیا سونی اور گھر سونا
دن ہے بھیانک اور رات ڈرانی
یوں گزری ساری یہ جوانی
بہنیں اور بہنیلیاں میری
ساتھ کی جو تھیں کھیلیاں میری
مل نہ سکیں جی کھول کے مجھ سے
خوش نہ ہوئیں ہنس بول کے مجھ سے
جب آئیں رو دھو کے گئیں وہ
جب گئیں بے کل ہو کے گئیں وہ
کوئی نہیں دل کا بہلاوا
آ نہیں چکتا میرا بلاوا
آٹھ پہر کا ہے یہ جلاپا
کاٹوں گی کس طرح رنڈاپا
تھک گئی دکھ سہتے سہتے
تھم گئے آنسو بہتے بہتے
آگ کھلی دل کی نہ کسی پر
گھل گئی جان اندر ہی اندر
دیکھ کے چپ جانا نہ کسی نے
جان کو پھونکا دل کی لگی نے
دبی تھی بھوبھل میں چنگاری
لی نہ کسی نے خبر ہماری
قوم میں وہ خوشیاں بیاہوں کی
شہر میں وہ دھوئیں ساہوں کی
تہواروں کا آئے دن آنا
اور سب کا تہوار منانا
وہ چیت اور پھاگن کی ہوائیں
وہ ساون بھادوں کی گھٹائیں
وہ گرمی کی چاندنی راتیں
وہ ارمان بھری برساتیں
کس سے کہوں کس طور سے کاٹیں
خیر کٹیں جس طور سے کاٹیں
چاؤ کے اور خوشیوں کے سمے سب
آتے ہیں خوش کل جان کو ہو جب
رنج میں ہیں سامان خوشی کے
اور جلانے والے ہی کے
گھر برکھا اور پیا بدیسی
آئیو برکھا کہیں نہ ایسی
دن یہ جوانی کے کٹے ایسے
باغ میں پنچھی قید ہو جیسے
رت گئی ساری سر ٹکراتے
اڑ نہ سکے پر ہوتے سارے
کسی نے ہوگی کچھ کل پائی
مجھے تو شادی راس نہ آئی
آس بندھی لیکن نہ ملا کچھ
پھول آیا اور پھل نہ لگا کچھ
رہ گیا دے کر چاند دکھائی
چاند ہوا پر عید نہ آئی
پھل کی خاطر برچھی کھائی
پھل نہ ملا اور جان گنوائی
ریت میں ذرے دیکھ چمکتے
دوڑ پڑی میں جھیل سمجھ کے
چاروں کھونٹ نظر دوڑائی
پر پانی کی بوند نہ پائی

الطاف حسین حالی

نظم

نظامیؔ دور زمانہ امیر خسروؔ کا
در نظام ٹھکانہ امیر خسرو کا
امیر زندہ ہے صدیوں سے اپنے نغموں میں
فضا میں گونجے ترانہ امیر خسرو کا

جمیل احمد جائسی

نظم

گھر میں کچھ بھی نہیں تاریک سی خوشبو کے سوا
کچھ چمکتا نہیں اب خوف کے جگنو کے سوا
دم کہسار میں ڈھونڈا تو نہ نکلا کچھ بھی
برف پر چھڑکی ہوئی خون کی خوشبو کے سوا
اس کا چھپنا تھا کہ آنکھوں میں مری کچھ نہ رہا
سرمئی سبز منور رم آہو کے سوا

شمس الرحمن فاروقی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے