کی تلاش کا نتیجه | موضو - نظم, صفحہ gho.Daa

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "gho.Daa"

نظم کے متعلقہ نتیجہ "gho.Daa"

نظم

ہدف ہوں گے تمہارا کون تم کس کے ہدف ہوگے
نہ جانے وقت کی پیکار میں تم کس طرف ہوگے
ہے رن یہ زندگی اک رن جو برپا لمحہ لمحہ ہے
ہمیں اس رن میں کچھ بھی ہو کسی جانب تو ہونا ہے
سو ہم بھی اس نفس تک ہیں سپاہی ایک لشکر کے
ہزاروں سال سے جیتے چلے آئے ہیں مر مر کے
شہود اک فن ہے اور میری عداوت بے فنوں سے ہے
مری پیکار ازل سے
یہ خسروؔ میرؔ غالبؔ کا خرابہ بیچتا کیا ہے
ہمارا غالبؔ اعظم تھا چور آقائے بیدلؔ کا
سو رزق فخر اب ہم کھا رہے ہیں میرؔ بسمل کا
سدھارت بھی تھا شرمندہ کہ دو آبے کا باسی تھا
تمہیں معلوم ہے اردو جو ہے پالی سے نکلی ہے
وہ گویا اس کی ہی اک پر نمو ڈالی سے نکلی ہے

جون ایلیا

نظم

یہ بچہ کس کا بچہ ہے
یہ بچہ کیسا بچہ ہے
جو ریت پہ تنہا بیٹھا ہے
نا اس کے پیٹ میں روٹی ہے
نا اس کے تن پر کپڑا ہے
نا اس کے سر پر ٹوپی ہے
نا اس کے پیر میں جوتا ہے
نا اس کے پاس کھلونوں میں
کوئی بھالو ہے، کوئی گھوڑا ہے
نا اس کا جی بہلانے کو
کوئی لوری ہے، کوئی جھولا ہے
نا اس کی جیب میں دھیلا ہے
نا اس کے ہاتھ میں پیسا ہے
نا اس کے امی ابو ہیں
نا اس کی آپا خالا ہے

ابن انشا

نظم

لکڑی کی کاٹھی کاٹھی پہ گھوڑا
گھوڑے کی دم پہ جو مارا ہتھوڑا
دوڑا دوڑا دوڑا گھوڑا دم اٹھا کے دوڑا

گلزار

نظم

چھوٹی سی بلو
چھوٹا سا بستہ
ٹھونسا ہے جس میں
کاغذ کا دستہ
لکڑی کا گھوڑا
روئی کا بھالو
چورن کی شیشی
آلو کچالو
بلو کا بستہ
جن کی پٹاری
جب اس کو دیکھو
پہلے سے بھاری
لٹو بھی اس میں
رسی بھی اس میں
ڈنڈا بھی اس میں
گلی بھی اس میں
اے پیاری بلو
یہ تو بتاؤ
کیا کام کرنے
اسکول جاؤ
اردو نہ جانو
انگلش نہ جانو
کہتی ہو خود کو
بلقیس بانو
عمر کی اتنی
کچی نہیں ہو
چھ سال کی ہو
بچی نہیں ہو
باہر نکالو
لکڑی کا گھوڑا
یہ لٹو رسی
یہ گلی ڈنڈا
گڑیا کے جوتے
جمپر جرابیں
بستے میں رکھو
اپنی کتابیں
منہ نہ بناؤ
اسکول جاؤ
اے پیاری بلو
اے پیاری بلو

ابن انشا

نظم

اک لڑکی تھی چھوٹی سی
دبلی سی اور موٹی سی
ننھی سی اور منی سی
بالکل ہی تھن متھنی سی
اس کے بال تھے کالے سے
سیدھے گھنگریالے سے
منہ پر اس کے لالی سی
چٹی سی مٹیالی سی
اس کی ناک پکوڑی سی
نوکیلی سی چوڑی سی
آنکھیں کالی نیلی سی
سرخ سفید اور پیلی سی
کپڑے اس کے تھیلے سے
اجلے سے اور میلے سے
یہ لڑکی تھی بھولی سی
بی بی سی اور گولی سی
ہر دم کھیل تھا کام اس کا
شاداں بی بی نام تھا اس کا
ہنستی تھی اور روتی تھی
جاگتی تھی اور سوتی تھی
ہر دم اس کی اماں جان
کھینچا کرتی اس کے کان
کہتی تھیں مکتب کو جا
کھیلوں میں مت وقت گنوا
امی سب کچھ کہتی تھی
شاداں کھیلتی رہتی تھی
اک دن شاداں کھیل میں تھی
آئے اس کے ابا جی
وہ لاہور سے آئے تھے
چیزیں ویزیں لائے تھے
باکس میں تھیں یہ چیزیں سب
خیر تماشا دیکھو اب
ابا نے آتے ہی کہا
شاداں آ کچھ پڑھ کے سنا
گم تھی اک مدت سے کتاب
کیا دیتی اس وقت جواب
دو بہنیں تھیں شاداں کی
چھوٹی ننھی منی سی
نام تھا منجھلی کا سیماں
گڑیا سی ننھی ناداں
وہ بولی اے ابا جی
اب تو پڑھتی ہوں میں بھی
بلی ہے سی اے ٹی کیٹ
چوہا ہے آر اے ٹی ریٹ
منہ ماؤتھ ہے ناک ہے نوز
اور گلاب کا پھول ہے روز
میں نے ابا جی دیکھا
خوب سبق ہے یاد کیا
شاداں نے اس وقت کہا
میں نے ہی تو سکھایا تھا
لیکن ابا نے چپ چاپ
کھولا باکس کو اٹھ کر آپ
اس میں جو چیزیں نکلیں
ساری سیماں کو دے دیں
اک چینی کی گڑیا تھی
اک جادو کی پڑیا تھی
اک ننھی سی تھی موٹر
آپ ہی چلتی تھی فر فر
گیندوں کا اک جوڑا تھا
اک لکڑی کا گھوڑا تھا
اک سیٹی تھی اک باجا
ایک تھا مٹی کا راجا
شاداں کو کچھ بھی نہ ملا
یعنی کھیل کی پائی سزا
اب وہ غور سے پڑھتی ہے
پورے طور سے پڑھتی ہے

حفیظ جالندھری

نظم

اے مری امید میری جاں نواز
اے مری دل سوز میری کارساز
میری سپر اور مرے دل کی پناہ
درد و مصیبت میں مری تکیہ گاہ
عیش میں اور رنج میں میری شفیق
کوہ میں اور دشت میں میری رفیق
کاٹنے والی غم ایام کی
تھامنے والی دل ناکام کی
دل پہ پڑا آن کے جب کوئی دکھ
تیرے دلاسے سے ملا ہم کو سکھ
تو نے نہ چھوڑا کبھی غربت میں ساتھ
تو نے اٹھایا نہ کبھی سر سے ہاتھ
جی کو ہو کبھی اگر عسرت کا رنج
کھول دیے تو نے قناعت کے گنج
تجھ سے ہے محتاج کا دل بے ہراس
تجھ سے ہے بیمار کو جینے کی آس
خاطر رنجور کا درماں ہے تو
عاشق مہجور کا ایماں ہے تو
نوح کی کشتی کا سہارا تھی تو
چاہ میں یوسف کی دل آرا تھی تو
رام کے ہمراہ چڑھی رن میں تو
پانڈو کے بھی ساتھ پھری بن میں تو
تو نے سدا قیس کا بہلایا دل
تھام لیا جب کبھی گھبرایا دل
ہو گیا فرہاد کا قصہ تمام
پر ترے فقروں پہ رہا خوش مدام
تو نے ہی رانجھے کی یہ بندھوائی آس
ہیر تھی فرقت میں بھی گویا کہ پاس
ہوتی ہے تو پشت پہ ہمت کی جب
مشکلیں آساں نظر آتی ہیں سب
ہاتھ میں جب آ کے لیا تو نے ہات
سات سمندر سے گزرنا ہے بات
ساتھ ملا جس کو ترا دو قدم
کہتا ہے وہ یہ ہے عرب اور عجم
گھوڑے کی لی اپنے جہاں تو نے باگ
سامنے ہے تیرے گیا اور پراگ
عزم کو جب دیتی ہے تو میل جست
گنبد گردوں نظر آتا ہے پست
تو نے دیا آ کے ابھارا جہاں
سمجھے کہ مٹھی میں ہے سارا جہاں
ذرے کو خورشید میں دے کھپا
بندے کو اللہ سے دے تو ملا
دونوں جہاں کی ہے بندھی تجھ سے لڑ
دین کی تو اصل ہے دنیا کی جڑ
نیکیوں کی تجھ سے ہے قائم اساس
تو نہ ہو تو جائیں نہ نیکی کے پاس
دین کی تجھ بن کہیں پرسش نہ ہو
تو نہ ہو تو حق کی پرستش نہ ہو
خشک تھا بن تیرے درخت عمل
تو نے لگائے ہیں یہ سب پھول پھل
دل کو لبھاتی ہے کبھی بن کے حور
گاہ دکھاتی ہے شراب طہور
نام ہے سدرہ کبھی طوبیٰ ترا
روز نرالا ہے تماشا ترا
کوثر و تسنیم ہے یا سلسبیل
جلوے ہیں سب تیرے یہ بے قال و قیل
روپ ہیں ہر پنتھ میں تیرے الگ
ہے کہیں فردوس کہیں ہے سورگ
چھوٹ گئے سارے قریب اور بعید
ایک نہ چھوٹی تو نہ چھوٹی امید
تیرے ہی دم سے کٹے جو دن تھے سخت
تیرے ہی صدقے سے ملا تاج و تخت
خاکیوں کی تجھ سے ہے ہمت بلند
تو نہ ہو تو کام ہوں دنیا کے بند
تجھ سے ہی آباد ہے کون و مکاں
تو نہ ہو تو ہے بھی برہم جہاں
کوئی پڑتا پھرتا ہے بہر معاش
ہے کوئی اکسیر کو کرتا تلاش
اک تمنا میں ہے اولاد کی
ایک کو دل دار کی ہے لو لگی
ایک کو ہے دھن جو کچھ ہاتھ آئے
دھوم سے اولاد کی شادی رچائے
ایک کو کچھ آج اگر مل گیا
کل کی ہے یہ فکر کہ کھائیں گے کیا
قوم کی بہبود کا بھوکا ہے ایک
جن میں ہو ان کے لیے انجام نیک
ایک کو ہے تشنگیٔ قرب حق
جس نے کیا دل سے جگر تک ہے شق
جو ہے غرض اس کی نئی جستجو
لاکھ اگر دل ہیں تو لاکھ آرزو
تجھ سے ہیں دل سب کے مگر باغ باغ
گل کوئی ہونے نہیں پاتا چراغ
سب یہ سمجھتے ہیں کہ پائی مراد
کہتی ہے جب تو کہ اب آئی مراد
وعدہ ترا راست ہو یا ہو دروغ
تو نے دیے ہیں اسے کیا کیا فروغ
وعدے وفا کرتی ہے گو چند تو
رکھتی ہے ہر ایک کو خورسند تو
بھاتی ہے سب کو تری لیت و لعل
تو نے کہاں سیکھی ہے یہ آج کل
تلخ کو تو چاہے تو شیریں کرے
بزم عزا کو طرب آگیں کرے
آنے نہ دے رنج کو مفلس کے پاس
رکھے غنی اس کو رہے جس کے پاس
یاس کا پاتی ہے جو تو کچھ لگاؤ
سیکڑوں کرتی ہے اتار اور چڑھاؤ
آنے نہیں دیتی دلوں پر ہراس
ٹوٹنے دیتی نہیں طالب کی آس
جن کو میسر نہ ہو کملی پھٹی
خوش ہیں توقع پہ وہ زر بفت کی
چٹنی سے روٹی کا ہے جن کی بناؤ
بیٹھے پکاتے ہیں خیالی پلاؤ
پاؤں میں جوتی نہیں پر ہے یہ ذوق
گھوڑا جو سبزہ ہو تو نیلا ہو طوق
فیض کے کھولے ہیں جہاں تو نے باب
دیکھتے ہیں جھونپڑے محلوں کے خواب
تیرے کرشمے ہیں غضب دل فریب
دل میں نہیں چھوڑتے صبر و شکیب
تجھ سے مہوس نے جو شوریٰ لیا
پھونک دیا کان میں کیا جانے کیا
دل سے بھلایا زن و فرزند کو
لگ گیا گھن نخل برومند کو
کھانے سے پینے سے ہوا سرد جی
ایسی کچھ اکسیر کی ہے لو لگی
دین کی ہے فکر نہ دنیا سے کام
دھن ہے یہی رات دن اور صبح شام
دھونکنی ہے بیٹھ کے جب دھونکنا
شہہ کو سمجھتا ہے اک ادنیٰ گدا
پیسے کو جب تاؤ پہ دیتا ہے تاؤ
پوچھتا یاروں سے ہے سونے کا بھاؤ
کہتا ہے جب ہنستے ہیں سب دیکھ کر
رہ گئی اک آنچ کی باقی کسر
ہے اسی دھند میں وہ آسودہ حال
تو نے دیا عقل پہ پردہ سا ڈال
تول کر گر دیکھیے اس کی خوشی
کوئی خوشی اس کو نہ پہنچے کبھی
پھرتے ہیں محتاج کئی تیرہ بخت
جن کے پیروں میں تھا کبھی تاج و تخت
آج جو برتن ہیں تو کل گھر کرو
ملتی ہے مشکل سے انہیں نان جو
تیرے سوا خاک نہیں ان کے پاس
ساری خدائی میں ہے لے دے کے آس
پھولے سماتے نہیں اس آس پر
صاحب عالم انہیں کہیے اگر
کھاتے ہیں اس آس پہ قسمیں عجیب
جھوٹے کو ہو تخت نہ یارب نصیب
ہوتا ہے نومیدیوں کا جب ہجوم
آتی ہے حسرت کی گھٹا جھوم جھوم
لگتی ہے ہمت کی کمر ٹوٹنے
حوصلہ کا لگتا ہے جی چھوٹنے
ہوتی ہے بے صبری و طاقت میں جنگ
عرصۂ عالم نظر آتا ہے تنگ
جی میں یہ آتا ہے کہ سم کھائیے
پھاڑ کے یا کپڑے نکل جائیے
بیٹھنے لگتا ہے دل آوے کی طرح
یاس ڈراتی ہے چھلاوے کی طرح
ہوتا ہے شکوہ کبھی تقدیر کا
اڑتا ہے خاکہ کبھی تدبیر کا
ٹھنتی ہے گردوں سے لڑائی کبھی
ہوتی ہے قسمت کی ہنسائی کبھی
جاتا ہے قابو سے آخر دل نکل
کرتی ہے ان مشکلوں کو تو ہی حل
کان میں پہنچی تری آہٹ جو ہیں
رخت سفر یاس نے باندھا وہیں
ساتھ گئی یاس کے پژمردگی
ہو گئی کافور سب افسردگی
تجھ میں چھپا راحت جاں کا ہے بھید
چھوڑیو حالیؔ کا نہ ساتھ اے امید

الطاف حسین حالی

نظم

سالگرہ خرگوش منائے
جنگل کے سب ساتھی آئے
بھیڑ لگی ہے مہمانوں کی
کچھ اپنوں کچھ بیگانوں کی
شیر دہاڑیں مارتا آئے
ہاتھی بھی چنگھاڑتا آئے
کتا بھوں بھوں کرتا آیا
سانبھر چوکڑی بھرتا آیا
گائے جب رمبھاتی آئی
بکری کچھ شرماتی آئی
ناچتا گاتا آیا بھالو
ڈولتا آیا مینڈھا کالو
گھوڑا سرپٹ دوڑا آیا
بھینسوں کا اک جوڑا آیا
ہرنی آئی لومڑی آئی
بلی اپنے بچے لائی
ساتھ میں سب ہی لائے تحفے
سب خرگوش نے پائے تحفے
پھولوں کا گلدستہ لے کر
چیں چیں کرتا آیا بندر
کیک بنا کے لایا چیتا
اس نے دل خرگوش کا جیتا
کیک کٹا تو سارے خوش تھے
کیک بٹا تو سارے خوش تھے
اک دوجے سے گلے ملے سب
بھول کے شکوے اور گلے سب
بندر ناچے بھالو گائے
کالو مینڈھا ڈھول بجائے
سالگرہ کا جشن بپا ہے
جنگل جنگل شور ہوا ہے

حیدر بیابانی

نظم

ابا تو چلے گئے ہیں دفتر
امی کو بخار آ رہا ہے
چھمن تو گیا ہوا ہے بازار
جمن کھانا پکا رہا ہے
زیبن کو اسی کا تازہ بچہ
پکا گانا سنا رہا ہے
امجد صوفے پر کوئلے سے
کالا طوطا بنا رہا ہے
اسلم دادی کی لے کے تصویر
اس کی مونچھیں اگا رہا ہے
توقیر بلیڈ کے کمالات
قالین پہ آزما رہا ہے
چھ سات تپائیاں ملا کر
اکبر گاڑی چلا رہا ہے
تسنیم بنی ہوئی ہے گھوڑا
جو میز پہ بھاگا جا رہا ہے
اخترؔ پردے کی جھالروں سے
بلی کو دلہن بنا رہا ہے
ننھا اقبال لیٹے لیٹے
ندی نالے بہا رہا ہے
سنتے ہیں کہ عنقریب ان کا
ایک اور بھی بھائی آ رہا ہے

احمد ندیم قاسمی

نظم

پڑھنا لکھنا سکھائے
اچھی راہ بتائے
بد سے ہمیں بچائے
اچھا بچہ بنائے
بھیا پیارا پیارا
گھنٹی خوب بجائے
بستہ بھی لٹکائے
مکتب لے کر جائے
جلدی سے پہنچائے
رکشا پیارا پیارا
پھولوں پر اترائے
خوشبو بھی بکھرائے
گھر آنگن مہکائے
ہریالی بھی لائے
گملا پیارا پیارا
بھیا لے کر جائے
سرکس بھی دکھلائے
لڈو بھی کھلوائے
جو چاہو مل جائے
میلہ پیارا پیارا
جب جب یہ لہرائے
سب کی شان بڑھائے
جس کے ہاتھ یہ آئے
آگے بڑھتا جائے
جھنڈا پیارا پیارا
تاریکی میں آئے
بستر تک پہنچائے
لوری بھی سنوائے
سپنے بھی دکھلائے
سونا پیارا پیارا
سب کو مار بھگائے
جو دیکھے ڈر جائے
الٹی شامت لائے
دشمن کوئی آئے
ڈنڈا پیارا پیارا
بارش میں کام آئے
باہر لے کر جائے
خود تو بھیگا جائے
لیکن ہمیں بچائے
چھاتا پیارا پیارا
جگ مگ روپ دکھائے
چندا ریجھا جائے
رستہ بھی بتلائے
لیکن ہاتھ نہ آئے
تارا پیارا پیارا
تل کر منا کھائے
خاگینہ بنوائے
سالن میں پک جائے
منی کو للچائے
انڈا پیارا پیارا
جب یہ موسم آئے
صحت خوب بنائے
ڈھیروں کپڑے لائے
پھر بھی دور نہ جائے
جاڑا پیارا پیارا
کھانا جب بھی آئے
آگے بڑھ کر لائے
ہم کو سب کھلوائے
خود بھوکا رہ جائے
چمچہ پیارا پیارا
بازاروں میں نکلے
ہاتھ میں سب کے لٹکے
جو کچھ بھی یہ دیکھے
اپنے پیٹ میں رکھے
تھیلا پیارا پیارا
میٹھا میٹھا کھاؤ
منا بولے لاؤ
جلدی سے پکواؤ
سارا چٹ کر جاؤ
حلوہ پیارا پیارا
چاہے کوئی بلائے
سب کی گود میں جائے
دیکھے تو للچائے
ٹافی بسکٹ چائے
ننھا پیارا پیارا
پانی ٹھنڈا کر دے
سر پہ کٹورا رکھے
دوڑے آئیں پیارے
جو چاہے وہ پی لے
مٹکا پیارا پیارا
صورت رنگ برنگی
حالت بھی ہے اچھی
بستر کا ہے ساتھی
عادت میں ہے نرمی
تکیہ پیارا پیارا
گرمی دور بھگائے
ٹھنڈا موسم لائے
تھوڑی بجلی کھائے
بہتر کام بنائے
پنکھا پیارا پیارا
چم چم چمکا جائے
بجلی سا لہرائے
جلدی جلدی آئے
ساتھ میں چلتا جائے
جوتا پیارا پیارا
سب سے پہلے جاگے
پیڑ پہ چڑھ کے بیٹھے
دیواروں پر بھاگے
ککڑوں ککڑوں چیخے
مرغا پیارا پیارا
گھر میں دوڑ لگائے
باہر بھاگ کے جائے
بلی پر غرائے
ننھے کو بہلائے
کتا پیارا پیارا
پیٹھ پہ ہمیں بٹھائے
سرپٹ دوڑ کے جائے
منزل پر پہنچائے
تب جا کر سستائے
گھوڑا پیارا پیارا
جلدی سے اٹھ جائے
چیخے اور چلائے
دانہ پتے کھائے
پھر بھوکا رہ جائے
بکرا پیارا پیارا
پنجرے میں پر تولے
ٹھمک ٹھمک کر ڈولے
جب بھی منہ کو کھولے
میٹھی بولی بولے
طوطا پیارے پیارا
روئی کو لپٹائے
دھاگا بنتا جائے
ہاتھوں میں بل کھائے
بل کھا کر لہرائے
تکلا پیارا پیارا
چوروں سے لڑ جائے
ڈاکو سے ٹکرائے
جو بھی چابی لائے
اس کے بس میں آئے
تالا پیارا پیارا
سڑکیں بھی دکھلائے
گلیوں میں لے جائے
کون کدھر کو جائے
بھید یہ سب بتلائے
نقشہ پیارا پیارا
کلیوں پر منڈ لائے
پھولوں سے بتلائے
ناچے جھومے گائے
مستی میں لہرائے
بھونرا پیارا پیارا
شب کو منہ دکھلائے
سورج سے شرمائے
بادل میں چھپ جائے
رات ہوتے ہی آئے
چندا پیارا پیارا
جھیل کے پاس ہی بیٹھے
چھوٹی مچھلی پکڑے
ہنس ہو کوئی جیسے
موتی کھانے آئے
بگلا پیارا پیارا
آنکھوں سے لگ جائے
راحت ہی پہنچائے
کالے کالے شیشے
ابر کے ٹکڑوں جیسے
چشمہ پیارا پیارا
میرا ہمدم ساتھی
ایسا نہ ہوگا کوئی
صورت بھی ہے پیاری
سیرت بھی ہے اچھی
بستہ پیارا پیارا
وقت پہ سو کر اٹھے
وقت پہ اپنے کھیلے
وقت پہ پڑھنے جائے
اول نمبر آئے
بچہ پیارا پیارا

عادل اسیر دہلوی

نظم

تانگے کا ایک گھوڑا
لنگڑا تھا تھوڑا تھوڑا
پوچھا جو میں نے اس سے
کیا پاؤں میں ہے پھوڑا
بولا یہ ظلم مجھ پر
اک آدمی نے توڑا
پہلے تو اس نے مجھ کو
تانگے میں لا کے جوڑا
پھر اس کو خوب بھر کر
بولا کہ چل منوڑا
جب میں کھسک نہ پایا
لہرایا اس نے کوڑا
مارا مجھے تڑاتڑ
پھر دم کو بھی مروڑا
میں بلبلا کے بھاگا
بس بن گیا بھگوڑا
خود بھی گرا پھسل کر
ایک اک کا سر بھی پھوڑا
اس دن سے آج تک میں
لنگڑا ہوں تھوڑا تھوڑا
یہ داستاں سنا کر
بولا وہ ہنہنا کر
میں نے تو منو بھائی
طبیعت ہے سادہ پائی
خود اپنے منہ سے اپنی
کرتا نہیں بڑائی
قرآن پاک نے بھی
میری قسم ہے کھائی
گر تیسواں سپارہ
تم نے پڑھا ہو بھائی
والعادیات ضبحاً میں
بات ہے یہ آئی
انساں تو اپنے رب سے
کرتا ہے بے وفائی
بس مال و زر کے پیچھے
ہے زندگی گنوائی
گھوڑوں نے مالکوں پر
ہے جان بھی لٹائی
ہم لوگ ہنستے گاتے
ہر بوجھ ہیں اٹھاتے
ہیں جانور ہمیشہ
انساں کے کام آتے
ماحول کی کشش بھی
ہم لوگ ہیں بڑھاتے
دل کش پرند پیارے
شاخوں پہ چہچہاتے
سارے نمازیوں کو
ہر صبح ہیں جگاتے
پھر خود بھی اپنے رب کی
حمد و ثنا ہیں گاتے
سو سو طرح تمہارا
ہم دل بھی ہیں لبھاتے
کچھ ایسے ہیں کہ جن سے
تم ہو دوا بناتے
کچھ اون تم کو دے کر
سردی سے ہیں بچاتے
کچھ دودھ تم کو دیتے
کچھ گوشت ہیں کھلاتے
گر جانور نہ ہوتے
تم گھی کدھر سے لاتے
مکھن پنیر انڈے
آخر کہاں سے کھاتے
بس کیا کہوں کہ کیا کیا
ہیں فائدے اٹھاتے
پھر بھی ہیں لوگ ہم کو
ہر طرح سے ستاتے
یہ بات کہتے کہتے
دکھڑا یہ سب سناتے
ایسا وہ بلبلایا
میں کچھ بھی کہہ نہ پایا

احمد حاطب صدیقی

نظم

مجھ سے پیار کرتا ہے تو کتنا پیار کرتا ہے
وہ بازو کھولتا ہے اور زمین و آسماں
ان میں چھپا کر مجھ سے کہتا ہے
بہت کرتا ہوں اتنا ڈھیر سا اتنا بہت کرتا ہوں
گھوڑا رک گیا
میرا کبوتر اڑ گیا
چڑیا جو دانہ کھا گئی
وہ میں بھی کھاؤں گا
گلہری سو نہ جائے اور بندر
ان کو میں بسکٹ کھلاؤں گا
مجھے طوطا دکھاؤ
سبز چونچ اور سرخ طوطا
ریچھ کتا بھیڑیا بلی کا بچہ
ان کی تصویریں کہاں ہیں
آج ان کے پاس جاوں گا
انہیں میں ان کی تصویریں دکھاؤں گا

بلراج کومل

نظم

رات کو نیند نہ آئے گی تو لوری کون سنائے گا
گھوڑا بن کر کون چلے گا پیٹھ پہ کون بٹھائے گا
گھوڑا بننا کیا مشکل ہے ہم خود ہی بن جائیں گے
لوری تیری چال بہت ہے باجے پر بجوائیں گے
ماما جی کے راکٹ پر ہم چاند کی سیر کو جائیں گے

ساحر لدھیانوی

نظم

سانپ کے بدلے بھینس کے آگے چوہیا بین بجائے گی
اب کے عید پہ بوڑھی گھوڑی لال لگام لگائے گی

جمیل عثمان

نظم

سنڈے کے دن ہم سب کھیلیں
لطف ذرا چھٹی کا لے لیں
ڈولی لاؤ گھوڑا لاؤ
گڈا لاؤ گڑیا لاؤ
ان دونوں کی کر دیں شادی
آ جائیں باراتی ہادی
کچھ دعوت نامے چھپوا لو
کچھ مہمانوں کو بلوا لو
گڈے کا صحرا لے آؤ
گڑئیے کا گجرا لے آؤ
گڈے کا صافہ بھی لانا
گڑئیے کا لہنگا بھی لانا
ہلدی پیسے گی نذرانہ
مہندی پیسے گی فرزانہ
سارا گھر آنگن سجوا دو
در پر شہنائی بجوا دو
کچی بریانی پکوا لو
شاہی ٹکڑے بھی بنوا لو
شربت اور کافی بھی رکھنا
مصری اور ٹافی بھی رکھنا
گڈا گڑیا جب ہیں راضی
نجمی بن جائے گا قاضی
دھوم دھام سے ہوگی شادی
یاد کرے گی کیا شہزادی
ہندوستانی ساز بجیں گے
گیت فراغؔ انکل لکھ دیں گے

فراغ روہوی

نظم

استاد
وہ بادل کا اک پارہ ہے
کیا پیارا ہے
تم دیکھتے ہو
شاگرد
بے شک بے شک
ہم دیکھتے ہیں
یہ بادل کا اک پارہ ہے
سر جی سر جی
ہم دیکھتے ہیں
یہ بادل کتنا پیارا ہے
استاد
تم اس کو نظر جما دیکھو
تعمیر دکھائی دیتی ہے
دیکھو دیکھو
اک اونٹ دکھائی دیتا ہے
گڑ گیہوں کے بھاری بورے
اف کتنا بوجھ اٹھائے ہوئے
لمبی گردن لہرائے ہوئے
شاگرد
جی دیکھ لیا
سر جی سر جی
یہ اونٹ ہے بوجھ اٹھائے ہوئے
بے شک بے شک
یہ اونٹ ہے بوجھ اٹھائے ہوئے
کچھ چارہ دانہ کھائے ہوئے
استاد
لو اونٹ سے اک گیدڑ نکلا
بھورا بھورا
گیدڑ پورا
نٹ کھٹ نٹ کھٹ
دوڑے سرپٹ
کیوں دیکھ لیا
شاگرد
جی دیکھ لیا
سر دیکھ لیا
دم بھی دیکھی
بے شک بے شک
نٹ کھٹ نٹ کھٹ
استاد
گیدڑ بھی کہاں
یہ گھوڑا ہے
دیکھو تو کیسے دوڑا ہے
دم چھوٹی گردن موٹی ہے
شاگرد
بے شک بے شک
یہ گھوڑا ہے
بالکل بالکل
یہ گھوڑا ہے یہ گھوڑا ہے

سید ضمیر جعفری

نظم

بلی کو سمجھانے آئے
چوہے کئی ہزار
بلی نے اک بات نہ مانی
روئے زار و زار
سنو گپ شپ سنو گپ شپ
ناؤ میں ندی ڈوب چلی
ہاتھی کو چیونٹی نے پیٹا
مینڈک شور مچائے
اونٹ نے آ کر ڈھول بجایا
مچھلی گانا گائے
سنو گپ شپ سنو گپ شپ
ناؤ میں ندی ڈوب چلی
آدھی رات کو چاند اور سورج
بادل کے گھر آئے
بجلی نے دروازہ کھولا
دونوں ہی گھبرائے
سنو گپ شپ سنو گپ شپ
ناؤ میں ندی ڈوب چلی
شیر اور بکری مل کر بیٹھے
گھوڑا گھاس نہ کھائے
تینوں اپنی ضد کے پورے
کون کسے سمجھائے
سنو گپ شپ سنو گپ شپ
ناؤ میں ندی ڈوب چلی

صوفی غلام مصطفےٰ تبسم

نظم

گونج اٹھی ساری وادی زخمی گھوڑے کی ٹاپوں سے
ٹاپوں کی آواز پہاڑوں سے ٹکرائی بکھری
دھوپ کسی اونچی چوٹی سے گرتے پڑتے اتری
بڑے بڑے پتھروں کے نیچے سایوں نے حرکت کی
اڑتے گدھ کی آنکھوں میں تصویر بنی حیرت کی
ریت چمکتی ریت، ریت اور پتھر اور اک گھوڑا
گھوڑے پر اک لاش، لاش کو لے کر گھوڑا دوڑا
حیرت کی تصویر گری چکراتے گدھ کی آنکھوں سے
گونج اٹھی ساری وادی زخمی گھوڑے کی ٹاپوں سے

محمد علوی

نظم

بنایا ہے ہم نے یہ لکڑی کا گھوڑا
سڑا سڑ سڑا سڑ لگاتے ہیں کوڑا
یہ کرتا نہیں بھول کر بھی کبھی ہٹ
جدھر چاہا پھیرا جدھر چاہا موڑا
یہ کھاتا نہیں ٹھوکریں راستے میں
بلا سے اگر ہو کوئی اینٹ روڑا
نہ یہ مارتا ہے دولتی کسی کے
کسی کا نہیں اس نے منہ ہاتھ توڑا
نہ اس نے کبھی مجھ کو اب تک گرایا
نہ بھاگا نہ ہرگز مرا ساتھ چھوڑا
نہیں گھاس دانے کی بھی اس کو حاجت
ہوا کھا کے جیتا ہے میرا یہ گھوڑا
کمر اس کی لگتی نہیں بیٹھنے سے
نکلتا نہیں ہے کوئی پھنسی پھوڑا
میں چڑھتا ہوں روز اس پہ کپڑے بدل کر
نیا میرا گھوڑا نیا میرا جوڑا
چلا چل مرے گھوڑے سیدھا چلا چل
بہت چل چکا اب تو رستہ ہے تھوڑا

نامعلوم

نظم

نجمی فہمی عظمیٰ رعنا
آؤ دیکھیں چڑیا خانہ
جن کے نام سنا کرتے ہو
آج انہیں نزدیک سے دیکھو
ایک سے ایک پرندے دیکھو
آدم خور درندے دیکھو
مور سروں پر تاج سجائے
ناچ رہے ہیں پر پھیلائے
بلبل دیکھو طوطا دیکھو
کوئل دیکھو مینا دیکھو
خوش آواز پپیہا دیکھو
حد حد اور گوریا دیکھو
بھونرا دیکھو تتلی دیکھو
شیر کی خالہ بلی دیکھو
زیبرا گھوڑا ٹٹو خچر
باز کبوتر کوا تیتر
وہ دیکھو خرگوش گلہری
بارہ سنگھا اور وہ ہرنی
بن مانس اور بھالو بھی ہے
نیولا اور کنگارو بھی ہے
بندر کی نقالی دیکھو
پیٹ رہے ہیں تالی دیکھو
دو دو ہاتھی جھوم رہے ہیں
دور گدھے بھی گھوم رہے ہیں
شیروں کا غرانا دیکھو
تندوے کا بل کھانا دیکھو
وہ دیکھو افریقی گینڈا
اور یہ ہندوستانی چیتا
پھن کاڑھے اک ناگن بھی ہے
لومڑی اک مکارن بھی ہے
بزدل گیدڑ لکڑ بگھا
کون بنے گا لیڈر اس کا
دل کش طائر آبی دیکھو
کیسی ہے مرغابی دیکھو
مچھلی کو لہراتے دیکھو
مینڈک کو ٹراتے دیکھو
ایک مگرمچھ جاگ رہا ہے
دیکھ کے کچھوا بھاگ رہا ہے
آج فراغؔ انکل نے دیکھا
کلکتے کا چڑیا خانہ

فراغ روہوی

نظم

نیند میں مرا منا
روز مسکراتا ہے
چسکیاں سی بھرتا ہے
اور کھلکھلاتا ہے
نیند میں مرا منا
خواب دیکھتا ہوگا
دودھ کی کئی نہریں
خواب میں بہی ہوں گی
ننھے ننھے پودوں پر
ٹافیاں لگی ہوں گی
کیک کے مکاں ہوں گے
جن کی چھت پہ مکھن کی
برف جم رہی ہوگی
چاند ہنس رہا ہوگا
چاندنی کھلی ہوگی
ننھی منی چڑیائیں
نیلی پیلی گڑیائیں
رقص کر رہی ہوں گی
ایک ٹانگ کا مرغا
بانگ دے رہا ہوگا
پچھلے پاؤں پر بھالو
ناچنے لگا ہوگا
کاٹھ کا حسیں گھوڑا
ہنہنا رہا ہوگا
جس پہ بیٹھ کر منا
مسکرا رہا ہوگا
اور اس کی اماں کی
پیار سے بھری آنکھیں
ایک ایک کونے سے
اس کو دیکھتی ہوں گی
نیند میں مرا منا
روز مسکراتا ہے
چسکیاں سی بھرتا ہے
اور کھلکھلاتا ہے
نیند میں مرا منا
چونک چونک پڑتا ہے
ہڑبڑا سا جاتا ہے
اور رونے لگتا ہے
نیند میں مرا منا
خواب دیکھتا ہوگا
اک گھنا گھنا جنگل
خواب میں رہا ہوگا
اونچے اونچے پیڑوں کی
پھیلی پھیلی شاخوں پر
سانپ رینگتے ہوں گے
سبز سبز پتوں کے
نرم نرم بستر پر
شیر اونگھتے ہوں گے
ہاتھیوں کے دل کے دل
لمبی لمبی سونڈوں سے
گھاس کھا رہے ہوں گے
جھاڑیوں میں چھپ چھپ کر
کالے کالے بن مانس
تیر پھینکتے ہوں گے
ہاں انہی درندوں میں
ہو نہ ہو مرا منا
گھر کے رہ گیا ہوگا
اور اس کی اماں کی
خوف سے بھری آنکھیں
ایک ایک کونے سے
اس کو دیکھتی ہوں گی
نیند میں مرا منا
چونک چونک پڑتا ہے
ہڑبڑا سا جاتا ہے
اور رونے لگتا ہے
جاگ کر مرا منا
مجھ کو پاس پاتا ہے
میری گود میں آ کر
رونا بھول جاتا ہے

محمد علوی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے