کی تلاش کا نتیجه | موضو - نظم, صفحہ hasad

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "hasad"

نظم کے متعلقہ نتیجہ "hasad"

نظم

مدتوں میں اک اندھے کنویں میں اسیر
سر پٹکتا رہا گڑگڑاتا رہا
روشنی چاہیئے، چاندنی چاہیئے، زندگی چاہیئے
روشنی پیار کی، چاندنی یار کی، زندگی دار کی
اپنی آواز سنتا رہا رات دن
دھیرے دھیرے یقیں دل کو آتا رہا
سونے سنسار میں
بے وفا یار میں
دامن دار میں
روشنی بھی نہیں
چاندنی بھی نہیں
زندگی بھی نہیں
زندگی ایک رات
واہمہ کائنات
آدمی بے بساط
لوگ کوتاہ قد
شہر شہر حسد
گاؤں ان سے بھی بد
ان اندھیروں نے جب پیس ڈالا مجھے
پھر اچانک کنویں نے اچھالا مجھے
اپنے سینے سے باہر نکالا مجھے
سیکڑوں مصر تھے سامنے
سیکڑوں اس کے بازار تھے
ایک بوڑھی زلیخا نہیں
جانے کتنے خریدار تھے
بڑھتا جاتا تھا یوسف کا مول
لوگ بکنے کو تیار تھے

کیفی اعظمی

نظم

فریادئی جفائے ایام ہو رہا ہوں
پامال جور بخت ناکام ہو رہا ہوں
سرگشتۂ خیال انجام ہو رہا ہوں
بستی کی لڑکیوں میں بدنام ہو رہا ہوں
بد نام ہو رہا ہوں
سلمیٰ سے دل لگا کر
بستی کی لڑکیوں میں بدنام ہو رہا ہوں
سلمیٰ سے دل لگا کر سلمیٰ سے دل لگا کر
اس حوروش کے غم میں دنیا و دیں گنوا کر
ہوش و حواس کھو کر صبر و سکوں لٹا کر
بیٹھے بٹھائے دل میں غم کی خلش بسا کر
ہر چیز کو بھلا کر
سلمیٰ سے دل لگا کر
بستی کی لڑکیوں میں بدنام ہو رہا ہوں
کہتی ہیں سب یہ کس کی تڑپا گئی ہے صورت
سلمیٰ کی شاید اس کے من بھا گئی ہے صورت
اور اس کے غم میں اتنی مرجھا گئی ہے صورت
مرجھا گئی ہے صورت کمھلا گئی ہے صورت
سنولا گئی ہے صورت
سلمیٰ سے دل لگا کر
بستی کی لڑکیوں میں بدنام ہو رہا ہوں
پنگھٹ پہ جب کہ ساری ہوتی ہیں جمع آ کر
گاگر کو اپنی رکھ کر، گھونگھٹ اٹھا اٹھا کر
یہ قصہ چھیڑتی ہیں مجھ کو بتا بتا کر
سلمیٰ سے باتیں کرتے دیکھا ہے اس کو جا کر
ہم نے نظر بچا کر
سلمیٰ سے دل لگا کر
بستی کی لڑکیوں میں بدنام ہو رہا ہوں
راتوں کو گیت گانے جب مل کر آتی ہیں سب
تالاب کے کنارے دھومیں مچاتی ہیں سب
جنگل کی چاندنی میں منگل مناتی ہیں سب
تو میرے اور سلمیٰ کے گیت گاتی ہیں سب
اور ہنستی جاتی ہیں سب
سلمیٰ سے دل لگا کر
بستی کی لڑکیوں میں بدنام ہو رہا ہوں
کھیتوں سے لوٹتی ہیں جب دن چھپے مکاں کو
تب راستے میں باہم وہ میری داستاں کو
دہرا کے چھیڑتی ہیں سلمیٰ کو میری جاں کو
اور وہ حیا کی ماری سی لیتی ہے زباں کو
کہ چھیڑے اس بیاں کو
سلمیٰ سے دل لگا کر
بستی کی لڑکیوں میں بدنام ہو رہا ہوں
کہتی ہے رحم کھا کر یوں ایک ماہ طلعت
یہ شہری نوجواں تھا کس درجہ خوبصورت
آنکھوں میں بس رہی ہے اب بھی وہ پہلی رنگت
دو دن میں آہ کیا ہے کیا ہو گئی ہے حالت
اللہ تیری قدرت
سلمیٰ سے دل لگا کر
بستی کی لڑکیوں میں بدنام ہو رہا ہوں
اس شمع رو کا جب سے پروانہ بن گیا ہوں
بستی کی لڑکیوں میں افسانہ بن گیا ہوں
ہر ماہ وش کے لب کا پیمانہ بن گیا ہوں
دیوانہ ہو رہا ہوں دیوانہ بن گیا ہوں
دیوانہ بن گیا ہوں
سلمیٰ سے دل لگا کر
بستی کی لڑکیوں میں بدنام ہو رہا ہوں
ان کی زباں پہ میری جتنی کہانیاں ہیں
کیا جانیں یہ کہ دل کی سب مہربانیاں ہیں
کمسن ہیں بے خبر ہیں اٹھتی جوانیاں ہیں
کیا سمجھیں غم کے ہاتھوں کیوں سر گرانیاں ہیں
کیوں خوں فشانیاں ہیں
سلمیٰ سے دل لگا کر
بستی کی لڑکیوں میں بدنام ہو رہا ہوں
ہر اک کے رحم کا یوں اظہار ہو رہا ہے
بے چارے کو یہ کیسا آزار ہو رہا ہے
دیکھے تو کوئی جانے بیمار ہو رہا ہے
کس درجہ زندگی سے بیزار ہو رہا ہے
ناچار ہو رہا ہے
سلمیٰ سے دل لگا کر
بستی کی لڑکیوں میں بدنام ہو رہا ہوں
اک پوچھتی ہے آ کر تم بے قرار کیوں ہو
کچھ تو ہمیں بتاؤ یوں دل فگار کیوں ہو
کیا روگ ہے کہو تو تم اشک بار کیوں ہو
دیوانے کیوں ہوئے ہو دیوانہ وار کیوں ہو
با حال زار کیوں ہو
سلمیٰ سے دل لگا کر
بستی کی لڑکیوں میں بدنام ہو رہا ہوں
جاؤں شکار کو گر باہمرہان صحرا
کھیتوں سے گھورتی ہیں یوں دختران صحرا
بجلی کی روشنی کو جیسے میان صحرا
تاریک شب میں دیکھیں کچھ آہوان صحرا
حیرت کشان صحرا
سلمیٰ سے دل لگا کر
بستی کی لڑکیوں میں بدنام ہو رہا ہوں
اک شوخ چھیڑتی ہے اس طرح پاس آ کر
دیکھو وہ جا رہی ہے سلمیٰ نظر بچا کر
شرما کے مسکرا کر آنچل سے منہ چھپا کر
جاؤ نا پیچھے پیچھے دو باتیں کر لو جا کر
کھیتوں میں چھپ چھپا کر
سلمیٰ سے دل لگا کر
بستی کی لڑکیوں میں بدنام ہو رہا ہوں
گویا ہمیں حسد سے کچھ نازنین نگاہیں
سلمیٰ کی بھا گئی ہیں کیوں دل نشیں نگاہیں
ان سے زیادہ دل کش ہیں یہ حسیں نگاہیں
القصہ ایک دل ہے سو خشمگیں نگاہیں
شوق آفریں نگاہیں
سلمیٰ سے دل لگا کر
بستی کی لڑکیوں میں بدنام ہو رہا ہوں
اک شوخ تازہ دارد سسرال سے گھر آ کر
سکھیوں سے پوچھتی ہے جس دم مجھے بتا کر
یہ کون ہے تو ظالم کہتی ہیں مسکرا کر
تم اس کا حال پوچھو سلمیٰ کے دل سے جا کر
یہ گیت اسے سنا کر
سلمیٰ سے دل لگا کر
بستی کی لڑکیوں میں بدنام ہو رہا ہوں

اختر شیرانی

نظم

دوزخی دشت نفرتوں کے
بے درد نفرتوں کے
کرچیاں دیدۂ حسد کی
خس و خاشاک رنجشوں کے
اتنی سنسان شاہراہیں
اتنی گنجان قتل گاہیں
جن سے آئے ہیں ہم گزر کر
آبلہ بن کے ہر قدم پر
یوں پاؤں کٹ گئے ہیں
رستے سمٹ گئے ہیں
مخملیں اپنے بادلوں کی
آج پاؤں تلے بچھا دے
شافئ کرب رہ رواں ہو
اے شام مہرباں ہو
اے مہ شب نگاراں
اے رفیق دل فگاراں
اس شام ہم زباں ہو
اے شام مہرباں ہو
اے شام مہرباں ہو
اے شام شہریاراں
ہم پہ مہرباں ہو

فیض احمد فیض

نظم

شاعری ہی نہیں کچھ باعث عزت مجھ کو
اور بہت کچھ حسد و رشک کے اسباب میں ہے
مجھ کو حاصل ہے وہ معیار شب و روز کہ جو
اس کے محبوب کے ہاتوں میں نہیں خواب میں ہے

مصطفی زیدی

نظم

طبیعت جو اندر سے جھنجھلا رہی ہے
تو باہر سے آواز یہ آ رہی ہے
کہ اے فاضل درس گاہ حماقت
حجابات دانش اٹھا کر بھی دیکھو
شرافت کے پیچھے جگر ہو گیا خوں
شرافت سے پیچھا چھڑا کر بھی دیکھو
ازل سے محبت خودی کا ہے زنداں
اب اس سے ذرا باہر آ کر بھی دیکھو
مروت نے پہنائی ہیں بیڑیاں جو
ذرا ان کا لوہا گھلا کر بھی دیکھو
تصور کی وادی میں بھٹکو گے کب تک
کبھی شہر امکاں میں جا کر بھی دیکھو
غرض مظہریؔ اس دیار جنوں میں
ملا، کچھ نہ کھونے سے پا کر بھی دیکھو
سنا مشورہ تیرا اے صوت غیبی
ضلالت کی سرحد میں آ کر بھی دیکھا
رذالت کی گردن میں بانہیں بھی ڈالیں
شرافت سے پیچھا چھڑا کر بھی دیکھا
حمیت کا گھونٹا گلا رفتہ رفتہ
محبت کو پھانسی چڑھا کر بھی دیکھا
کف مور سے اس کا لقمہ بھی چھینا
حق اہل خدمت چرا کر بھی دیکھا
شعور و خرد کو غرور و حسد کو
سلا کر بھی دیکھا جگا کر بھی
پھرے کو بہ کو عقل کی رہبری میں
غرض یہ کہ کھو کر بھی، پا کر بھی دیکھا
نہ کھونے سے حاصل، نہ پانے سے حاصل
جسے سود کہتے ہیں وہ بھی زیاں ہے
یہی بس کہ تقدیر عقل و جنوں ہے
یہی خشت تعمیر کون و مکاں ہے
محبت جہنم ہے، نفرت جہنم
جدھر جائیں اک آگ شعلہ فشاں ہے
دیار وفا یا دیار ہوس ہو
نہ راحت یہاں ہے نہ راحت وہاں ہے
شرافت بھی غمگیں رذالت بھی غمگیں
بس اب منہ نہ کھلوا خدا درمیاں ہے
سمک سے سما تک تپش ہی تپش ہے
فضا سے خلا تک فغاں ہی فغاں ہے
خودی پاؤں پکڑے ہے جائیں کہاں ہم
تصور کی جنت بنائیں کہاں ہم

جمیلؔ مظہری

نظم

اے یار غیاب مجید امجدؔ
خاموش شکار رشک و حسد
بے تشہیری کے صید زبوں
کب جھنگ میں آ کر تجھ سے کہوں
لے وہ سچ واپس آیا ہے
جو جس کا حق ہو ایک نہ ایک دن اس نے پورا پایا ہے

جمیل الدین عالی

نظم

یا خدا ہم کو آدمیت دے
ملک اور قوم کی محبت دے
کر عطا اس قدر تمیز ہمیں
کہ ہو اپنا وطن عزیز ہمیں
اس کی خدمت کو فخر جانیں ہم
اس کی ہر بات دل سے مانیں ہم
پھوٹ اور افتراق کھو دیں ہم
پاپ کی ناؤ کو ڈبو دیں ہم
حسد و کینہ و خصومت و شر
کر دیں ان میں سے سب کو ملک بدر
ایک ہو جائیں سب خواص و عوام
نہ رہے غیریت کا ملک ہیں نام
صلح و امن اماں ہو چار طرف
عافیت حکمراں ہو چار طرف
اتحاد عمل سے ہوں سب کام
کوئی دانا رہے نہ بندۂ دام
ملک ہو غیر کے اثر سے پاک
خرمن جور و معصیت ہو خاک
ہو یہ ویرانہ غیرت گل زار
پھر سے آئے وطن میں تازہ بہار
پٹا اترے گلے سے لعنت کا
ختم ہو دور فقر و ذلت کا

احمق پھپھوندوی

نظم

ہر کینہ حسد سے دور تھا میں
ہر عادت بد سے دور تھا میں
معصوم طبیعت تھی میری
شیطان کی زد سے دور تھا میں

شمیم شہزاد

نظم

یہ ہر شب سوچ کر سوتا ہوں آنے والی صبحوں میں
گلوں سے پتیوں سے اوس کی بوندیں چرانی ہیں
شہہ آکاش کی نظریں نما کرنوں سے پہلے جاگ جانا ہے
صبائے عنبریں کے لمس کو محسوس کرنا ہے
لباس سبز میں ملبوس الھڑ پتیوں کی باتیں سننی ہیں
حسیں دوشیزہ کی مسکان سی کلیوں سے دو اک بات کر لوں گا
مگر کچھ کر نہیں پاتا کہ راحت روکے رکھتی ہے
کوئی افسانہ پڑھنا ہو کسی کی شاعری پہ بات کرنی ہو
کسی تخلیق سے پہلے خیال و فکر کو آزاد رکھنا ہو
کسی سارق کسی شاطر کسی کم فہم سے سچائی کہنی ہو
بڑی معصوم شکلوں میں چھپے عیار کو مکار کو شیشہ دکھانا ہو
فقیہ وقت امیر شہر کا قزاق سے ملعون سے رشتہ بتانا ہو
مگر یہ کر نہیں سکتا مصلحت خاموش رکھتی ہے
حریم مے کدے میں خانقاہوں مٹھ مدرسوں میں
برہمن شیخ سے پیر مغاں سے ساقیوں سے اور واعظ سے
یہ اکثر سوچتا ہوں جا کے کہہ دوں میں
ریا و کبر تہی اخلاص اور بد اطواری سے تیرے
جہاں میں عشق اخوت علم اور اخلاق مرتے ہیں
مگر میں کہہ نہیں سکتا عقیدت باز رکھتی ہے
تعصب خود پسندی بغض سے کبر و حسد سے
بساط ذہن و دل کو چاہتا ہوں پاک کر لوں
زر و املاک کی خواہش سے اپنے آپ کو آزاد کر لوں
کہ جب جب سعی کرتا ہوں ہوس انکار کرتی ہے
مگر ایقان ہے میرا ہمارے عہد کے بچے
مرے کذب و ریا کو مکر کو اور بے ایمانی کو
نفاق و بد قماشی کو مرے ظاہر کو باطن کو
ہویدا کر کے چھوڑیں گے علی الاعلان کہہ دیں گے
کہ میرے باپ ایسے تھے مرے استاذ ایسے تھے
سو ان کی بات سے اعمال سے شرمندہ ہوں میں بھی
یہ کہنے سے انہیں عزت نہ روکے گی
نہ ان کو خوف روکے گا
انہیں کچھ بھی نہ روکے گا
چلن بدلا ہوا ہوگا
ہماری ساری عزت ساری ذلت دوسروں کے حق کی پامالی
کتاب حق کے پنوں پر بہت واضح لکھی ہوں گی

ابوبکر عباد

نظم

مجھ سے کیا ہو گئی خطا بھائی
کیوں ستاتا ہے یہ بتا بھائی
بیج کیوں نفرتوں کے بوتا ہے
دوستوں کو نہ ورغلا بھائی
چھوڑ دے بغض اور حسد بالکل
اپنے دل کو نہ گھن لگا بھائی
بد گمانی نہ دل میں پیدا کر
بد کلامی سے باز آ بھائی
گنگناتا ہے گیت فلموں کے
نعت پڑھ اور حمد گا بھائی
خوب محنت سے پڑھ سبق اپنا
وقت پر مدرسے کو جا بھائی
سب کی خوشیوں میں ہو شریک سدا
دکھ میں ہر اک کے کام آ بھائی

مرتضیٰ ساحل تسلیمی

نظم

یہ دلی ہے
یہ پہلی بار پانڈو نے بسائی تھی
اسے دیکھا تو دریودھن حسد سے کھول اٹھا تھا
یہیں وہ شیر دل چوہان رہتا تھا
جسے آواز پر اپنا نشانہ داغنے کا کشف آتا تھا
نظام‌‌ الدین سے روحانیت کا درس لے کر
وجد خسرو نے اسی کے گیت گائے تھے
ہمایوں نے اسی کی خاک میں خود کو ملایا تھا
اسی کے دل کی نازک دھڑکنوں کو میرؔ و غالبؔ نے زباں دی تھی
یہ اپنی ذات میں اک مختصر ہندوستاں یعنی
یہ روہیلوں کی نادر شاہ کی روندی ہوئی دلی
اک ایسا شہر ہے جو بارہا اجڑا مگر جس نے
کبھی اپنی ادائے دلنوازی کو نہیں چھوڑا
اسے تخریب کے ہر وار نے تعمیر کا عرفان بخشا ہے
یہاں ہر ظلم کرنے والا آخر منہ کی کھاتا ہے
یہ ہر وقت ایک البیلی دلہن کی مثل
اپنی مانگ میں سندور بھر کر منتظر رہتی ہے ہر آزردہ خاطر کی
یہاں ہر صاحب دل آ کے جانا بھول جاتا ہے

بلراج کومل

نظم

دھرم و جاتی واد کے جھگڑے مٹا کر ایک بار
آؤ ہم مل کر محبت سے گلے سب سے ملیں
بغض و کینہ اور حسد شیطانیت کی دین ہے
ہم اسے ہولی کی اگنی میں جلا کر پھونک دیں
ہے یہ رنگا رنگ کا تیوہار ہم سب کے لئے
تاکہ روشن ہوں ہر اک دل میں محبت کے دیے
ہولی سچائی کا انجمؔ دینے آئی ہے پیام
اسمرن کرتا رہے پرہلاد کا ہر کوئی نام

حبیب احمد انجم دتیاوی

نظم

میری دانست میں ہم جنس ہیں ہولی اور عید
دونوں ہیں لطف و مسرت کے لیے روز سعید
عام ہے آج ملاقات نہیں فرق کا کام
وا ہے آغوش محبت نہ سہی دید و شنید
فضل باری سے جو کل شام ہوئی چاند کی دید
آ گئی ہاتھ حقیقت میں مسرت کی کلید
دید اقدس سے ہوئی عین خوشی کی تولید
غیب سے دل کو ہوئی جذب وفا کی تاکید
آج ہوتی ہے نئے سر سے وفا کی تجدید
یہ ملن عید کا ہے قفل محبت کی کلید
آج ہوتی ہے حسد بغض و جفا کی تردید
اس لئے اہل وطن سب کو مبارک ہو عید
یہ حقیقت ہے کہ ہے آج کا دن روز سعید
دل سے دل ملتا ہے ہوتی ہے وفا کی تجدید
یہ نظارہ بھی ملاقات کا ہے قابل دید
لطف در لطف ہے ہر لطف ہے اک لطف مزید

رنگیشور دیال سکسینہ صوفی

نظم

مٹ جائیں ملک سے بغض و حسد اور دل میں وطن کی عزت ہو
دامن میں فضاؤں کے ہر جا اک امن و سکوں کی ثروت ہو

لالہ انوپ چند آفتاب پانی پتی

نظم

اے پیاری پیاری چڑیا
صورت مجھے دکھا جا
بھولی سی تیری صورت
دل میں بسی ہے مورت
ننھی سی چونچ تیری
کیسی بھلی ہے لگتی
اک راگ تو سنا جا
اے بھولی بھالی چڑیا
شاخوں پہ بیٹھی بیٹھی
آنند سے چہکتی
کس کو ہے یاد کرتی
دم کس کا تو ہے بھرتی
دنیا کے نیک و بد سے
کینے سے اور حسد سے
تجھ کو نہیں خبر کیا
اے بھولی بھالی چڑیا
پتوں پہ چہچہانا
اور دل کو یوں لبھانا
اڑنا یہ ڈالی ڈالی
کب لطف سے ہے خالی
کیا پاک زندگی ہے
کیا شانتی خوشی ہے
بھاتا ہے راگ تیرا
اے بھولی بھالی چڑیا
کیا میٹھی راگنی ہے
کیا شکل موہنی ہے
تیری یہ چوں چوں پیاری
اور پھرنا کیاری کیاری
تیرا پھدکنا ہر دم
اور بولنا گجر دم
تجھ سے ہے گھر سہانا
اے بھولی بھالی چڑیا
وہ صبح کا جھمکڑا
مل جل کے اور وہ گانا
وہ شام کا بسیرا
دل کو بھلا ہے لگتا
چھت میں وہ گھونسلہ ہے
وہ بھی بہت بھلا ہے
ہر ڈھنگ تیرا پیارا
اے بھولی بھالی چڑیا
نادان بچے تو کیا
جانے گا اس کا کہنا
چڑیا جو بولتی ہے
اور موتی رولتی ہے
مخلوق ہے خدا کی
ہستی ہے یہ وفا کی
کرتی ہے ذکر رب کا
یہ بھولی بھالی چڑیا

سید فضل ستار

نظم

راحت ترے ہی درس سے پاتا ہے کل جہاں
سر تیری عظمتوں پہ جھکاتا ہے آسماں
گونجا یہیں سے امن و اماں کا پیام ہے
اس واسطے جہاں میں ترا احترام ہے
جو تیری محفلوں سے اٹھی وہ صدا ہے یہ
دنیا بنے بہشت ترا مدعا ہے یہ
فتنے کا شر کا بغض و حسد کا غنیم ہے
تو بھی عظیم قوم بھی تیری عظیم ہے
عالم بصد خلوص جھکائے نہ کیوں جبیں
تہذیب و علم و فن کا ہے گہوارۂ حسیں
شعلوں کو سرد کرنے کے ساماں کئے ہوئے
سب اہل دل ہیں ایک ہی جذبہ لئے ہوئے
پیغام ہے کہ آتش نفرت میں مت جلو
ظلمت میں شمع انس فروزاں کئے چلو
ہر دم بقائے دہر پہ چشم بشر رہے
ماضی و حال و فردا پہ گہری نظر رہے
دل دل سے ملتفت ہو محبت دو چند ہو
انسان کا وقار جہاں میں بلند ہو
در در کی خاک کوئی کہیں چھانتا نہ ہو
غربت ہے چیز کیا یہ کوئی جانتا نہ ہو
چہرے پہ رنگ آئے یہ غنچہ کھلا رہے
گلشن حیات انساں کا پھولا پھلا رہے
آگاہ ما و تو سے کسی کی زباں نہ ہو
تفریق رنگ و نسل کا نام و نشاں نہ ہو
دنیا سے دور جنگ و جدل کا دھواں رہے
گھر میں گلی میں گاؤں میں امن و اماں رہے
روشن جمالؔ دہر میں بھارت کا نام ہے
ہر لب پہ آج میرے وطن کا پیام ہے

جمال بھارتی

نظم

اولیں ذائقۂ خوں سے تھی لب تلخ وہ خاک
جس پہ میں ٹوٹی ہوئی شاخ کے مانند گرا
کن شراروں کی دہک دیدۂ قابیل میں تھی
وہ حسد تھا کہ ہوس طیش کہ نفرت کیا تھا
اور پھر میرے بدن میرے لہو میں اترا
اولیں بے بسیٔ کرب فنا کا ادراک

ضیا جالندھری

نظم

تلخیٔ کام و دہن دنیا سے جو مجھ کو ملی
جھلکیاں اس کی نہ آئیں کچھ مری تحریر میں
ظلمت بغض و حسد چھائی رہی ہر سو مگر
خود کو چمکایا ہے میں نے پیار کی تنویر میں
گھر کے یوں نفرت میں بھی الفت كا ہوں نقش جمیل
جیسے گوتم بدھ کی مورت سایۂ شمشیر میں

اختر بستوی

نظم

دیس کے بچو پیارے بچو
سب کی آنکھ کے تارے بچو
تم سے شان وطن کی پیارے
تم ہو آن وطن کی پیارے
تم ہی دیس کے رکھوالے ہو
تم دھرتی کے اجیالے ہو
ہر سو آج اندھیرا دیکھو
بغض و حسد کا ڈیرا دیکھو
بھائی بھائی سے لڑتا ہے
ہائے یہ کیسا دن آیا ہے
نفرت کی اک آگ لگی ہے
دھرتی غم سے ڈول رہی ہے
آؤ تم بھی دیپ جلاؤ
اندھیارے کو دور بھگاؤ
گیت کچھ ایسے مل کر گاؤ
پیار کی دل میں جوت جلاؤ

سید مظفر عالم ضیا عظیم آبادی

نظم

آ
کہ اس دل میں تیرے لیے ہے بہت سی جگہ
یہ تو دونوں کو معلوم ہے
آرزوؤں کی کثرت سے تنگی کا مارا ہوا
حسرتوں سے پریشان ہے
اس کی بوسیدگی کے گواہ
محبت وفا دشمنی بغض کینہ حسد
یہ جہاں مختصر
اور تو عز و جل
پھر بھی اتنا یقیں کر ہی سکتا ہے تو
یہ وہ گھر ہے کہ جس میں اگر تو براجے
یہ تیرا بنے
اور تب تک رہے گا بسیرا ترا
جب تلک تو اسے
اپنے رہنے کے قابل سمجھتا رہے!

شہناز نبی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے