Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "maulaa-e-kul"

نظم کے متعلقہ نتیجہ "maulaa-e-kul"

نظم

عشق آباد فنائے کل ہے
گل کا حاصل وہی بوئے گل ہے

خورشید اکبر
نظم

اس سے کاش یہ کہہ سکتا میں
عالم کل تجھ سے کیا پردا
کذب مکمل ہے یہ کہانی
یہ سارا افسانہ جھوٹا

عزیز قیسی
نظم

اسی کے پاؤں تلے ہے بہشت کی چادر
اسی کی چاپ کی برکت سے سبزہ و گل ہیں
اسی کے حسن تمازت سے وحدت و کل ہیں

ندیم ناجد
نظم

میں آغاز ہستی سے حوا کی صورت
ہوں آدم کی خواہش کا اک شاخسانہ
زمیں کو بسانے کا بس اک بہانہ!
میں روز ابد نیکیوں کا صلہ ہوں
نہ جانے میں کیا ہوں
گلہ خالق کل سے کیسے کروں میں
اسی کی رضا ہوں

عارفہ شہزاد
نظم

چہرے پہ ان کے دبکی ہوئی ایک رات ہے
ان کے لئے یہ حاصل کل کائنات ہے
اس سے زیادہ لطف کی یہ واردات ہے
اے دل مگر یہ کان میں کہنے کی بات ہے
داڑھی بڑھا رہے ہیں سو ہیں وہ بھی آدمی

قاضی غلام محمد
نظم

زلف سیاہ سے ہاری رات
دل نے جبیں سے کھائی مات
آنکھوں سے میخانے ہارے
مے سے بھرے پیمانے ہارے
گال گلابی ناک سڈول
سرخ لبوں کے میٹھے بول
دانت سے موتی شرمندہ
چاند سے بڑھ کر تابندہ
مکھڑا جیسے نور کا تڑکا
ٹھنڈا ٹھنڈا پیارا پیارا
گردن لمبی سینا چوڑا
نور کا یا کافور کا دریا
بانہیں بھاری گول کلائی
طاقت اتنی جن میں سمائی
نور سے پر تھی پنڈلی ساری
بوجھل بوجھل بھاری بھاری
پاؤں جمائے قوم سنبھالے
کالی کملی اوڑھنے والے
رحمت کل محبوب خدا
محبوب خدا تھے حسن میں یکتا
جن کو محمد لوگ پکاریں
اسعدؔ ان پر جان کو واریں

اسعد قادری گورکھپوری
نظم

جہاں میں دانش و بینش کی ہے کس درجہ ارزانی
کوئی شے چھپ نہیں سکتی کہ یہ عالم ہے نورانی
کوئی دیکھے تو ہے باریک فطرت کا حجاب اتنا
نمایاں ہیں فرشتوں کے تبسم ہائے پنہانی
یہ دنیا دعوت دیدار ہے فرزند آدم کو
کہ ہر مستور کو بخشا گیا ہے ذوق عریانی
یہی فرزند آدم ہے کہ جس کے اشک خونیں سے
کیا ہے حضرت یزداں نے دریاؤں کو طوفانی
فلک کو کیا خبر یہ خاکداں کس کا نشیمن ہے
غرض انجم سے ہے کس کے شبستاں کی نگہبانی
اگر مقصود کل میں ہوں تو مجھ سے ماورا کیا ہے
مرے ہنگامہ ہائے نو بنو کی انتہا کیا ہے

علامہ اقبال
نظم

میرے حضور
حسن کو پوچھا
کہا
پرتو مرا
بے اعتنا و بے نیاز
رنگ اندھوں کے لئے
سربستہ راز
میں نے پوچھا
کیا ہے پھر سوز جگر
کہہ دیا
تاثیر کل آئینہ گر
جب کریدا
خلوت و جلوت کے کیا معنی ہوئے
روشنی پھوٹی کہ جلوت
میری بزم کائنات
بابت خلوت
نشان طور دیکھ
رنگ‌ و بے رنگی کی میں نے
سر جھکا کر بات کی
ایک موسم گونج اٹھا
دو راستے
میں نے پھر پوچھا
کہ اچھا تا کجا
ایک کوندا سا لپک اٹھا کہ بس
نادان تو اتنا نہ سمجھا
مجھ تلک
میں نے جھلا کر
پٹخنا چاہا کشکول ملال
لرزہ اک گویا ہوا
معلوم ہے مجھ کو ترا اگلا سوال
طیش مت کھا
ذات میری نور ہے
میں لبالب تجھ میں ہوں
گر مجھ سے تو معمور ہے

رشید اعجاز
نظم

اس نے کہا کہ دل میں جگہ دیجیے حضور
میں نے کہا مکان میسر نہیں ہے کیا
اس نے کہا کہ آپ کو دل دے چکا ہوں میں
میں نے کہا کہ جسم کو دل ایک چاہیے
اس نے کہا کہ دل میں رواں ہیں محبتیں
میں نے کہا کہ دل میں روانی ہے خون کی
اس نے کہا کہ راہ ترے دل سے دل کو ہے
میں نے کہا کہ راہ تو شریان دل کی ہے
اس نے کہا کہ دل کے قریب آنے دیجیے
میں نے کہا قریب ذرا رب کے جائیے
اس نے کہا کہ آج تو میں لاجواب ہوں
میں نے کہا کہ عشق حقیقی جواب ہے
اس نے کہا کہ رب تو مرے دل میں ہے بسا
میں نے کہا کہ پھر تو کسی کو نہ دل میں لا
اس نے بھی عشق کل کی حقیقت کو پا لیا
میں نے جو کھل کے عشق حقیقی بیاں کیا
دونوں ہی منزلوں کے نشاں تک پہنچ گئے

نازیہ نزی
نظم

تم نے کیا دیکھا یہاں کچھ بھی نہیں
ہم نے کیا پایا یہاں کچھ بھی نہیں
''بے کسی ہائے تمنا کہ نہ دنیا ہے نہ دیں''
''لا'' سے آغاز فسانے کا ہوا
''لا'' سے تہذیب زمانے کی ہوئی
''لا'' کی تفسیر نہیں ہے ممکن
''لا'' ہی سے عشق کا آغاز ہوا
عشق ہے ایک بلا
عشق سفاک و ہوس ناک دریدہ دامن
جس کے قدموں سے بپھرتے ہوئے دریا امڈے
جس کی آنکھوں سے دہکتے ہوئے ہیرے نکلے
جس کے ہاتھوں پہ چمکتے ہوئے مہتاب اترے
عشق وہ آگ کہ جو اور جلا دے جائے
عشق وہ خواب کہ جو نیند اڑا لے جائے
اس قدر سرکش و سفاک کہ بس
دشت کاشان سے دلی کا سفر
''نگہ جلوہ پرست اور نفس صدق گزیں''
اک ''ابھے چند'' مرے نامۂ اعمال میں ہے
عالم کل خواب میں ہے
سنگ مرمر کی اسی مسجد کے
سرخ زینوں پہ لہو بہتا ہے
آج بھی کل کی طرح ہنستا ہے
کفر مسجد میں بہاتا ہے لہو
عشق سجدے میں کہے ''شکر اللہ''
شاہ آباد بھی طوفان میں بہتا جائے
اور داراؔ ہے کسی سوچ میں غرق
مسند عدل سپہ سالار اور تخت میں ہم فکری ہے
ایک ہے ''ملا قوی''

فہیم شناس کاظمی
نظم

نئی رتوں کا مغنی نئی سحر کا نقیب
بجھے دلوں کا مسیحا وہ تیرگی کا رقیب
وہ اپنے عہد کا کیوپڈ وہ دیوتا فن کا
وہ سومنات محبت کا بت شکن کتنے
ہدف بنا کے چلے اور خود ہدف ٹھہرے
وہ اپنے عہد کا گوتم
وہ صلح کل کا سمندر وہ آشتی کا جہاں
دکھوں کی کاہکشائیں سجائے آنکھوں میں
رہ نجات کی مشعل جلائے آنکھوں میں
لبوں پہ خندۂ گل کی کرن دمکتی ہوئی
نظر سلگتی ہوئی
دئے جائے ہوئے گیان کے دھیان کے دیپ
شعور زیست کا وہ رہ گزر اجال گیا
ڈگر پہ فکر کی سورج نیا اچھال گیا
دیار حسن کا محرم
وہ سحر ساز سراپا وہ شخصیت کا جمال
کسی خیال کا پیکر کسی صنم کا خیال
ہے قحط لفظ و معانی کا مرحلہ درپیش
قلم کو رد روانی کا مسئلہ درپیش
طلسم دیدۂ بے دار کہہ نہیں سکتا
وہ انقلاب کا مطرب
نئی رتوں کا مغنی نئی سحر کا نقیب
جناب فیضؔ متاع حیات و حرف و ہنر
زباں پہ بارے خدایا یہ کس کا نام آیا
کہ میرے نطق نے بوسے مری زباں کے لئے

مسلم شمیم
نظم

وہ بے خبر ہے
کہ شاطر وقت کی نظر میں
کوئی اکائی
شجر حجر ہو کہ ذی نفس ہو
نظام کل سے الگ نہیں ہے
وہ یہ نہیں جانتی کہ ہستی کے کارخانے میں
اس کا ہونا نہ ہونا بے نام حادثہ ہے
اور اس کے حصے کا کل اثاثہ
وہ چند لمحے وہ چند سانسیں ہیں
جن میں وہ خواب دیکھتی ہے
سلیقۂ ذات سے چمن کو سنوارنے کا
بہار جاں کو نکھارنے کا
۲
بجا کہ ناپائیدار ہے یہ وجود میرا
میں غیر فانی حیات کے سلسلے میں
اک بیچ کی کڑی ہوں
رہین گردش بھی مرکز کائنات بھی ہوں
جو میں نے دیکھا ہے وہ مرے خوں میں رچ گیا ہے
جو میں نے سوچا ہے مجھ میں زندہ ہے
اور جو کچھ سنا ہے مجھ میں سما گیا ہے
ہوا کی صورت ہر ایک احساس
میری سانسوں میں جی رہا ہے
ہر ایک منظر مرے تصور میں بس گیا ہے
میں ذات محدود اپنی پہنائیوں میں
اک کائنات بھی ہوں
مری رگوں میں وہ جوشش جاوداں رواں ہے
جو شاخ میں پھول کی نمو ہے
جو بحر میں موج کی تڑپ ہے
پر کبوتر میں تاب پرواز ہے
ستاروں میں روشنی ہے
میں اپنے ہونے کے سب حوالوں میں رونما ہوں
میں جا بجا صورت صبا ہوں
غزال خوش چشم کی کلیوں میں کھیلتا ہوں
ہمکتے بچے کی مسکراہٹ ہوں
پیر شب خیز کی دعا ہوں
میں مہر میں ماہتاب میں ہوں
یہ کیسی چاہت ہے جس سے میں
ایک مستقل اضطراب میں ہوں
وہ کون سی منزل طلب تھی
کہ رانجھا رانجھا پکارتی ہیر
آپ ہی رانجھا ہو گئی تھی

ضیا جالندھری
نظم

اک مکمل زندگی ہے شاعر شیریں بیاں
محرم راز فنا ہے اور بقا کا ترجماں
اس کی ہستی کی ہے قیمت اک نگاہ التفات
ہیچ خودداری کے آگے ہیں زمین و آسماں
وہ کہیں مجبور مطلق ہے کہیں مختار کل
حسن کا بے دام بندہ ورنہ ہے شاہ جہاں
خم جبیں ہوتی ہے اس کی نقش‌ پائے دوست پر
اور جھک جاتے ہیں اس کے پاؤں پر دونوں جہاں
اس سے پوشیدہ نہیں ہیں رازہائے حسن و عشق
ترجماں ہے اہل الفت کا وہ سر دلبراں
پھول برساتا ہے اپنے دوستوں کی بزم میں
اور گراتا ہے صف اغیار پر یہ بجلیاں
اس کے نازک قلب میں ملتا ہے مظلوموں کا درد
بے کسوں کا ہے وہ حامی بے زبانوں کی زباں
فطرتاً آزاد بے خوف و خطر بے باک ہے
زندگی دیتی ہیں اس کو زندگی کی تلخیاں
دل کے طوفاں میں قلم اس کا ہے کشتی نوح کی
اور ہے اس کا تصور ایک بحر بیکراں
قلب اس کا ملک کے حالات کا آئینہ دار
قوم کے جذبات کی تشہیر ہے اس کا بیاں
دین ہے اس کا محبت اس کی دنیا شاعری
ہے تشدد کا مخالف حامئ امن و اماں
اے شفاؔ ان کو مگر شاعر نہ کہہ دینا کہیں
بزم میں لا کر جو پڑھتے ہیں کلام دیگراں

پریم لال شفا دہلوی
نظم

کل اذان صبح سے پہلے فضائے قدس میں
میں نے دیکھا کچھ شناسا صورتیں ہیں ہم نشیں
تھے حکیم شرق سے شیخ مجدد ہم کلام
گوش بر آواز سب دانش وران علم و دیں
بوالکلام آزاد سے غالبؔ تھے مصروف سخن
میرؔ و مومنؔ دور حاضر کی غزل پہ نکتہ چیں
اس سے کچھ ہٹ کر گلابی شاخچوں کی چھاؤں میں
تھے ولی اللہ کے فرزند نکتہ آفریں
ایستادہ سرو کے سائے میں تھے مولائے روم
جن کے فرمودات میں مضمر ہیں آیات مبیں
سوچ میں ڈوبے ہوئے تھے حالیٔؔ درویش خو
باندھ کر بیٹھے حلقہ شبلیٔؔ عہد آفریں
میں نے بڑھ کر مرشد اقبال سے یہ عرض کی
آپ کو ہم تیرہ بختوں کی خبر ہے یا نہیں
دل شکستہ ہو کے فرمایا مجھے معلوم ہے
بے ید بیضا ہے پیران حرم کی آستیں
سلطنت لے کر خدا و مصطفی کے نام پر
اب خدا و مصطفی کی راہ پر کوئی نہیں
ہے ابھی شہباز کی غیرت پر کرگس خندہ زن
''ہے وہی سرمایہ داری بندۂ مومن کا دیں''
اس سے بڑھ کر اور کیا فکر و عمل کا انقلاب
''پادشاہوں کی نہیں اللہ کی ہے یہ زمیں''
کون سمجھائے اندھیری رات کو آئین مہر
وائے بد بختی کہ خود مومن ہے محروم یقیں
خون دے کر خانۂ صیاد کو روشن کرو
جاؤ مشرق کے خراب آباد کو روشن کرو

شورش کاشمیری
نظم

میں کہ اک بنی آدم
عالم عناصر کا
اک خمیر تازہ دم
اک حیات مجھ میں ہے
کائنات مجھ میں ہے
میری سلطنت ہے سب
مجھ سے ہے جہاں قائم
میں ہوں گردش پیہم
رو میں ہے لہو ہر دم
کیا خبر لہو کیا ہے
ایک شورش ہستی
ایک داخلی طوفاں
ایک محشر دوراں
کیا خبر لہو کیا ہے
گردشیں ستاروں کی
گردش آسمانوں کی
گردشیں زمینوں کی
گردشیں زمانوں کی
کیا خبر لہو کیا ہے
یہ نظام کل جاری
یعنی حرکتیں ساری
سب لہو کی حرکت ہے
ہے لہو کے دم سے ہی
امن بھی، محبت بھی
جنگ بھی، عداوت بھی
شورش و بغاوت بھی
کیا خبر لہو کیا ہے
گردشیں لہو کی جب
مجھ میں شور کرتی ہیں
بے خودی کے نشے میں
جسم کا ہر اک خلیہ
رقص کرنے لگتا ہے
اور پھر یہ ہوتا ہے
خشکیوں کا ہر ذرہ
پانیوں کا ہر قطرہ
ایک بے بدن جذبہ
رقص کرنے لگتا ہے
اس جنوں کے عالم میں
زخم جاگ جاتے ہیں
درد چیخ اٹھتا ہے
اور پھر یہ ہوتا ہے
روح و دل کی وادی میں
نغمے گونج اٹھتے ہیں
نغمہ ہائے سحر انگیز
بے کراں فضاؤں میں
لا مکاں خلاؤں میں
سوز اور فغاں بن کر
میٹھی لے میں ڈھل ڈھل کر
جب بکھرنے لگتے ہیں
ایسے سحر عالم میں
ایک کیف و مستی کا
نشہ چھانے لگتا ہے
اور پھر یہ ہوتا ہے
کائنات کی ہر شے
گنگنانے لگتی ہے
اور پھر وہی نغمے
روح و دل کے چھالوں کو
تار، تار زخموں کو
نیم جاں کراہوں کو
لالہ زار داغوں کو
جاگتے پھپھولوں کو
مست لوریاں دے کر
خواب کے گلستاں میں
لاپتہ زمانے تک
یوں ہی چھوڑ دیتے ہیں
اصل میں وہی نغمے
درد کا مداوا ہیں!!

خالد مبشر
نظم

یہ سوجھی ہے کیا آپ کو شیخ صاحب
جو چپ سادھ لی آپ نے شیخ صاحب
لپیٹا تھا ناصر جب جب منہ سوچا میں نے
محبت ہی کمزور تھی آپ کی جو نہیں روک پائی اسے شیخ صاحب
سجیلا تھا گل آپ کے باغ کا سب سے وہ شیخ صاحب
گیا وہ گئی بزم یاراں کی رونق گئی اس کی خوشبو
ترنم سے خالی ہوئی شاعری گفتگو میں مزہ نہ رہا شیخ صاحب
مجھے علم تھا کہ چھپاتے ہیں غم آپ اپنا
مگر آپ کو میں بہت سخت جان جانتا تھا
بھئی عقل کل مانتا تھا
کہا آپ کا گو نہیں مانتا تھا
کہاں تو یہ دعویٰ کہ سو سال کی عمر ہوگی ہماری
کہاں اب یکایک بتائے بنا چل دیے آپ ناصر سے ملنے
اکیلے میں دل آپ کا بھی کہاں لگتا ہوگا
کتابیں خواہ قرآن ہی کیوں نہ ہو دوستی کا بدل تو نہیں شیخ صاحب
وفا کے تقاضے کیے آپ نے سارے پورے
مری واپسی کے رہے منتظر آخری سانس تک آپ تو شیخ صاحب
نہ توڑا کبھی یاد کا مجھ سے رشتہ
دھر میں جسے مل نہ پایا کبھی راستہ واپسی کا
بہت زور مارا کہ میں لوٹ آؤں
کروں آ کے آباد وہ باغ حکمت
چمکتے تھے جس میں مثال مہر آپ ہی شیخ صاحب
مسائل کے جنگل میں گم ہو گیا میں
سیاست کے کمبل کو جتنا بھی میں چھوڑتا وہ نہیں چھوڑتا تھا مجھے شیخ صاحب
مجھے اب چلا ہے پتا کہ محبت نہ کمزور تھی آپ کی شیخ صاحب
بلاوے پہ ناصر کے یوں چل دیے آپ اٹھ کر
محبت تھی کمزور میری
بلاتے رہے آپ برسوں مجھے میں نہ آیا
بہت دیر کر دی ہے آنے میں بے شک
مگر اب میں آیا کہ آیا
ذرا دو گھڑی انتظار اور غالب سے مل لوں
بہت کچھ ہے کہنا انہیں آپ سے شیخ صاحب
میں پیغام لے لوں
سکینہ سے مریم سے انور سے رخصت میں ہو لوں
گلے سے ابراہیمؔ کو میں لگا لوں
میں آیا کہ آیا خدا کی قسم شیخ صاحب

محمد حنیف رامے
نظم

ہائے وہ پہلی نظر وہ اس کی آنکھوں کے پیام
وہ لجا کر مسکرا کر دست نازک سے سلام
ہر نظر میں میکدے غلطاں وہ چنچل بانکپن
رنگ گلشن بھی تصدق یوں سراپا گل بدن
سر پہ جھومر پاؤں میں پازیب اک زہرہ خصال
اور مجسم کہکشاں اس کے دوپٹے کا جمال
برق کی تصویر کل شانوں پہ لرزاں چوٹیاں
مرمریں ہاتھوں میں اپنی دھن میں گاتی چوڑیاں
کان میں بندے سراپا آفتاب و ماہتاب
پردہ داری کیا کہوں رخ پر تجلی کی نقاب
چال میں آہو کی شوخی چال میں بدمستیاں
ہر قدم پر انقلاب‌ دہر کی رنگینیاں
ہر تکلم اک قیامت ہر تبسم برق ریز
اور جس کی سادگی بھی اک فسانہ حشر خیز
با تکلف با ادب صد ناز وہ جنت بدوش
ایک دن آئی مری پرسش کو وہ نکہت فروش
آنکھوں آنکھوں میں دیا پیغام عشق و بے خودی
زندگانی اک شراب تند بن کر رہ گئی
تھی وہ دزدیدہ نگاہ دلستاں میرے لئے
آ گیا تھا میرے گھر ہی گلستاں میرے لئے
جیسے مل جائے خدائی اس طرح مسرور تھا
گھر کی رونق کیا کہوں اس وقت کا اک طور تھا
وہ تحیر خیز وہ کافر نظارے الاماں
شوق محکم الاماں مبہم اشارے الاماں
میری جانب دیکھ کر ہنس ہنس کے شرماتی رہی
نکہت گیسو سے اک اک سانس مہکاتی رہی
نیچی نظروں سے وہ کچھ کہنا بہ عنوان حیا
آپ کب تشریف لائیں گے یہ اس کی التجا
کیا کہوں کیسے کہوں رہ رہ کے یہ سوچا کیا
جب نہ کچھ بھی بن پڑا تو درد میں ڈوبا کیا
یاس سے اٹھی نظر آنسو بہا کر رہ گئی
اور زبان حال آخر لڑکھڑا کر رہ گئی
الغرض ہونے لگی رخصت وہ جان آرزو
اشک برسانے لگا آخر جہان آرزو
اس کا جانا تھا کہ ویراں ہو گئی میری نظر
لے گئی ہم راہ اپنے رونق دیوار و در
کس قدر رنگین تھی فطرت کی نقاشی نہ پوچھ
شوخیاں کرتی ہوئی تاروں کی شہزادی نہ پوچھ

حسرتؔ جے پوری
نظم

کبھی یہ بھی خواہش پریشان کرتی ہے مجھ کو
کہ میں اپنے بھیتر کے میں کو نکالوں
مگر میرے میں کی تو صورت بہت ہی بری ہے
خباثت کا انبار جس میں نہاں ہے
صرافہ سے جس کی کراہت عیاں ہے
جبیں پر خطرناک سوچوں کے جنگل اگے ہیں
بھیانک ارادوں کے وحشی چھپے ہیں
نگاہوں میں جس کی ہوسناکیوں کے مناظر بھرے ہیں
مناظر بھی ایسے کہ جن میں
زنا ایسے لوگوں کے ہم راہ کرنے کو سوچا گیا ہے
بدن جن کے جنسی بلوغت کو پہنچے نہیں ہیں
یا وہ جو بلوغت کی ساری کشش کھو چکے ہیں
یا وہ جن سے کوئی مقدس سا رشتہ جڑا ہے
مرے میں کی صورت بری ہے
کہ دنداں درندوں کی صورت
کسی سہمے سمٹے کنوارے بدن میں گڑے ہیں
کہ ماتم کدے میں بھی آنکھیں کسی جسم کی برجیوں پر ٹکی ہیں
کہ بیوی بغل میں مگر ذہن میں اور ہی کوئی تن من کھلا ہے
کہ پگلی بھکارن کے تن اور اندھے بھکاری کے کشکول پر بھی نظر ہے
بری ہے بہت ہی بری ہے
کہ دل میں اعزا کی اموات کی خواہشیں بھی دبی ہیں
کئی بے گنہ گردنیں انگلیوں میں پھنسی ہیں
کہ لفظ عیادت میں بیمار کی موت کی بھی دعا ہے
بری ہے بری ہے
کہ احباب کی جیت پر دل دکھی ہے
کہ اولاد کی برتری سے چبھن ہے
کہ بھائی کے روشن جہاں سے جبیں پر شکن ہے
بری ہے بری ہے
کہ جو پالتا ہے اسی کی نفی ہے
کہ جو پوجتا ہے اسی سے دغا ہے
عجب اوبڑ کھابڑ سی میں کی زمیں ہے
کہ اس میں کہیں بھی توازن نہیں ہے
کسی بھی طرح کا تناسب نہیں ہے
جہاں چاہیے حوصلہ بزدلی ہے
جہاں راستی کی ضرورت کجی ہے
جہاں چاہیے امن غارت گری ہے
جہاں چاہیے قرب واں فاصلہ ہے
جہاں صلح کل چاہیے گرمیاں سردیاں ہیں
اگر میرے میں کی یہ صورت مرے خول کی باہر سطح پر آ گئی
تو زمانہ مجھے کیا کہے گا
یہی سوچ کر اپنی اس آرزو کے بدن میں
تبر بھونک دیتا ہوں اکثر
مگر یہ تمنا
کہ میں اپنے بھیتر کے میں کو نکالوں
مرے دل میں رہ رہ کے کیوں جاگتی ہے
سبب اس کا یہ تو نہیں ہے
کہ میں اپنے اندر کی شفاف مکروہ صورت دکھا کر
زمانے کی آنکھوں میں خود کو بڑا دیکھنا چاہتا ہوں
یا یہ کہ مسلسل شرافت کے ناٹک سے تنگ آ چکا ہوں
یا پھر یہ کہ اب
باہری شکل و صورت میں میری
کشش کوئی
باقی
نہیں ہے

غضنفر
نظم

بھلائی سب کی ہو جس سے وہ کام اس کا ہے
جہاں بھی جاؤ وہیں احترام اس کا ہے
اٹھائے سر کوئی کیا سر اٹھا نہیں سکتا
مقابلے کے لئے آگے آ نہیں سکتا
کسی سے اس کو محبت کسی سے الفت ہے
کسی کو اس کی ہے اس کو کسی کی حسرت ہے
وفا و لطف ترحم کی خاص عادت ہے
غرض کرم ہے مدارات ہے عنایت ہے
کسی کو دیکھ ہی سکتا نہیں ہے مشکل میں
یہ بات کیوں ہے کہ رکھتا ہے درد وہ دل میں
وہ رشک شمع ہدایات ہے انجمن کے لئے
وہ مثل‌ روح رواں عنصر بدن کے لئے
وہ ایک ساغر نو محفل کہن کے لئے
وہ خاص مصلح کل شیخ و برہمن کے لئے
لگن اسے ہے کہ سب مالک وطن ہو جائیں
قفس سے چھوٹ کے زینت دہ چمن ہو جائیں
جفا شعار سے ہوتا ہے بر سر پیکار
نہ پاس توپ نہ گولا نہ قبضے میں تلوار
زمانہ تابع ارشاد حکم پر تیار
وہ پاک شکل سے پیدا ہیں جوش کے آثار
کسی خیال سے چرخے کے بل پہ لڑتا ہے
کھڑی ہے فوج یہ تنہا مگر اکڑتا ہے
طرح طرح کے ستم دل پر اپنے سہتا ہے
ہزار کوئی کہے کچھ خموش رہتا ہے
کہاں شریک ہیں آنکھوں سے خون بہتا ہے
سنو سنو کہ یہ اک کہنے والا کہتا ہے
جو آبرو تمہیں رکھنی ہو جوش میں آؤ
رہو نہ بے خود و بیہوش ہوش میں آؤ
اسی کو گھیرے امیر و غریب رہتے ہیں
ندیم و مونس و یار و حبیب رہتے ہیں
ادب کے ساتھ ادب سے ادیب رہتے ہیں
نصیب ور ہیں وہ بڑے خوش نصیب رہتے ہیں
کوئی بتائے تو یوں دیکھ بھال کس کی ہے
جو اس سے بات کرے یہ مجال کس کی ہے
رفاہ عام سے رغبت ہے اور مطلب ہے
انوکھی بات نرالی روش نیا ڈھب ہے
یہی خیال تھا پہلے یہی خیال اب ہے
فقط ہے دین یہی بس یہی تو مذہب ہے
اگر بجا ہے تو بسملؔ کی عرض بھی سن لو
چمن ہے سامنے دو چار پھول تم چن لو

بسمل الہ آبادی
نظم

اے ہند کے باشندو آؤ اجڑا گلزار سجا ڈالیں
اب دور غلامی ختم ہوا اک تازہ جہاں کی بنا ڈالیں
اب ہند کی اصلی عید ہوئی جو آزادی کی دید ہوئی
پڑھ پڑھ کے نماز آزادی اب روٹھے ہوؤں کو منا ڈالیں
کشتی بھی نئی دریا بھی نیا ساحل بھی نیا ملاح بھی نئے
اب کر کے بھروسہ ہمت پر طوفان میں راہ بنا ڈالیں
ہیں رنج‌ و خصومت اک روڑا راہ آزادی میں اب بھی
ہم رنج پرانے دور کریں بچھڑوں کو گلے سے لگا ڈالیں
جو ملک تھا سونے کی چڑیا بندھن نے اسے پامال کیا
غربت کو یہاں سے دور کریں پھر دودھ کی نہریں بنا ڈالیں
پھر بوس سے یودھا پیدا ہوں جو ہند کی قسمت جاگ اٹھے
اک بار زمانے پر سکہ پھر مادر ہند بٹھا ڈالیں
اس بوڑھے ہمالہ پربت سے پھر نور کا چشمہ اہل اٹھے
اس میل و محبت کے جل سے ہر باشی کو نہلا ڈالیں
یہ ہند کی آزادی گویا کل مشرق کی آزادی ہے
پھر مشرق مشرق بن جائے جو ظلم کے دور مٹا ڈالیں
انورؔ کی دعا ہے اے مولا پھر ہند کی قسمت جاگ اٹھے
بچھڑے آپس میں مل جائیں ہم روٹھے ہوئے کو منا ڈالیں

کنول ڈبائیوی
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے