Search result for "maulaa-e-kul" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "maulaa-e-kul"

Nazm MATCHES FOR "maulaa-e-kul"

Nazm

wahi bu-e-gul hai

ishq aabaad fanaa-e-kul hai
gul kaa haasil vahii buu-e-gul hai

Khursheed Akbar

Nazm

confession

us se kaash ye kah saktaa mai.n
aalam-e-kul tujh se kyaa pardaa
kizb-e-mukammal hai ye kahaanii
ye saaraa afsaana jhuuTaa

Aziz Qaisi

Nazm

makin nahin koi

isii ke paa.nv tale hai bahisht kii chaadar
isii kii chaap kii barkat se sabza-o-gul hai.n
isii ke husn-e-tamaazat se vahdat-o-kul hai.n

Nadeem Najid

Nazm

wo kya maslahat thi

mai.n aaGaaz-e-hastii se havvaa kii suurat
huu.n aadam kii KHvaahish kaa ik shaaKHsaana
zamii.n ko basaane kaa bas ik bahaana!
mai.n roz-e-abad nekiyo.n kaa sila huu.n
na jaane mai.n kyaa huu.n
gila KHaaliq-e-kul se kaise karuu.n mai.n
usii kii razaa huu.n

Arifa Shahzad

Nazm

aadmi

chehre pe in ke dubkii hu.ii ek raat hai
in ke liye ye haasil-e-kul-kaa.enaat hai
is se ziyaada lutf kii ye vaardaat hai
ai dil magar ye kaan me.n kahne kii baat hai
daa.Dhii ba.Dhaa rahe hai.n so hai.n vo bhii aadmii

Qazi Ghulam Mohammad

Nazm

sarapa

zulf-e-siyaah se haarii raat
dil ne jabii.n se khaa.ii maat
aa.nkho.n se maiKHaane haare
mai se bhare paimaane haare
gaal gulaabii naak suDaul
surKH labo.n ke miiThe bol
daa.nt se motii sharminda
chaa.nd se ba.Dh kar taabinda
mukh.Daa jaise nuur kaa ta.Dkaa
ThanDaa ThanDaa pyaaraa pyaaraa
gardan lambii siinaa chau.Daa
nuur kaa yaa kaafuur kaa dariyaa
baa.nhe.n bhaarii gol kalaa.ii
taaqat itnii jin me.n samaa.ii
nuur se pur thii pinDlii saarii
bojhal-bojhal bhaarii-bhaarii
paa.nv jamaa.e qaum sa.nbhaale
kaalii kamlii o.Dhne vaale
rahmat-e-kul mahbuub-e-KHudaa
mahbuub-e-KHudaa the husn me.n yaktaa
jin ko mohammad log pukaare.n
'as'ad' un par jaan ko vaare.n

Asad Qadri Gorakhpuri

Nazm

hazrat-e-insan

jahaa.n me.n daanish o biinish kii hai kis darja arzaanii
ko.ii shai chhup nahii.n saktii ki ye aalam hai nuuraanii
ko.ii dekhe to hai baariik fitrat kaa hijaab itnaa
numaayaa.n hai.n farishto.n ke tabassum-haa-e-pinhaanii
ye duniyaa daavat-e-diidaar hai farzand-e-aadam ko
ki har mastuur ko baKHshaa gayaa hai zauq-e-uryaanii
yahii farzand-e-aadam hai ki jis ke ashk-e-KHuunii.n se
kiyaa hai hazrat-e-yazdaa.n ne dariyaa.o.n ko tuufaanii
falak ko kyaa KHabar ye KHaak-daa.n kis kaa nasheman hai
Garaz anjum se hai kis ke shabistaa.n kii nigahbaanii
agar maqsuud-e-kul mai.n huu.n to mujh se maavaraa kyaa hai
mire ha.ngaama-haa-e-nau-ba-nau kii intihaa kyaa hai

Allama Iqbal

Nazm

ek mukalima

mere huzuur
husn ko puuchhaa
kahaa
partav miraa
be-etinaa-o-be-niyaaz
rang andho.n ke liye
sar-basta raaz
mai.n ne puuchhaa
kyaa hai phir soz-e-jigar
kah diyaa
taasiir-e-kul aa.iina-gar
jab kuredaa
KHalvat-o-jalvat ke kyaa ma.anii hu.e
raushnii phuuTii ki jalvat
merii bazm-e-kaa.enaat
baabat-e-KHalvat
nishaan-e-tuur dekh
rang-o-be-rangii kii mai.n ne
sar jhukaa kar baat kii
ek mausam guu.nj uThaa
do raaste
mai.n ne phir puuchhaa
ki achchhaa taa-kujaa
ek kau.ndaa saa lapak uThaa ki bas
naadaan tuu itnaa na samjhaa
mujh talak
mai.n ne jhallaa kar
paTaKHnaa chaahaa kashkol-e-malaal
larza ik goyaa hu.aa
maaluum hai mujh ko tiraa aglaa savaal
taish mat khaa
zaat merii nuur hai
mai.n labaalab tujh me.n huu.n
gar mujh se tuu maamuur hai

Rasheed Ejaz

Nazm

manzil

us ne kahaa ki dil me.n jagah diijiye huzuur
mai.n ne kahaa makaan mayassar nahii.n hai kyaa
us ne kahaa ki aap ko dil de chukaa huu.n mai.n
mai.n ne kahaa ki jism ko dil ek chaahiye
us ne kahaa ki dil me.n ravaa.n hai.n mohabbate.n
mai.n ne kahaa ki dil me.n ravaanii hai KHuun kii
us ne kahaa ki raah tire dil se dil ko hai
mai.n ne kahaa ki raah to shiryaan dil kii hai
us ne kahaa ki dil ke qariib aane diijiye
mai.n ne kahaa qariib zaraa rab ke jaa.iye
us ne kahaa ki aaj to mai.n laa-javaab huu.n
mai.n ne kahaa ki 'ishq-e-haqiiqii javaab hai
us ne kahaa ki rab to mire dil me.n hai basaa
mai.n ne kahaa ki phir to kisii ko na dil me.n laa
us ne bhii 'ishq-e-kul kii haqiiqat ko paa liyaa
mai.n ne jo khul ke 'ishq-e-haqiiqii bayaa.n kiyaa
dono.n hii manzilo.n ke nishaa.n tak pahu.nch ga.e

Nazia Nazi

Nazm

la bhi hai ek guman

tum ne kyaa dekhaa yahaa.n kuchh bhii nahii.n
ham ne kyaa paayaa yahaa.n kuchh bhii nahii.n
''be-kasii haa.e tamannaa ki na duniyaa hai na dii.n''
''laa'' se aaGaaz fasaane kaa hu.aa
''laa'' se tahziib zamaane kii hu.ii
''laa'' kii tafsiir nahii.n hai mumkin
''laa'' hii se ishq kaa aaGaaz hu.aa
ishq hai ek balaa
ishq saffaak o havasnaak dariida-daaman
jis ke qadmo.n se bipharte hu.e dariyaa umDe
jis kii aa.nkho.n se dahakte hu.e hiire nikle
jis ke haatho.n pe chamakte hu.e mahtaab utre
ishq vo aag ki jo aur jilaa de jaa.e
ishq vo KHvaab ki jo nii.nd u.Daa le jaa.e
is qadar sarkash o saffaak ki bas
dasht-e-kaashaan se dillii kaa safar
''nigah-e-jalva-parast aur nafas-e-sidq-guzii.n''
ik ''ubhai-chand mire naama-e-a.amaal me.n hai
aalam-e-kul KHvaab me.n hai
sa.ng-e-marmar kii usii masjid ke
surKH ziino.n pe lahuu bahtaa hai
aaj bhii kal kii tarah ha.nstaa hai
kufr masjid me.n bahaataa hai lahuu
ishq sajde me.n kahe ''shukr-allaah''
shaahabaad bhii tuufaan me.n bahtaa jaa.e
aur 'daaraa' hai kisii soch me.n Garq
masnad-e-adl sipah-saalaar aur taKHt me.n ham-fikrii hai
ek hai ''mullaa-qavii''

Faheem Shanas Kazmi

Nazm

wo inqalab ka mutrib

na.ii ruto.n kaa muGannii na.ii sahar kaa naqiib
bujhe dilo.n kaa masiihaa vo tiirgii kaa raqiib
vo apne ahd kaa cupid vo devtaa fan kaa
vo somnaat-e-mohabbat kaa but-shikan kitne
hadaf banaa ke chale aur KHud hadaf Thahre
vo apne ahd kaa gautam
vo sulh-e-kul kaa samundar vo aashtii kaa jahaa.n
dukho.n kii kaahkashaa.e.n sajaa.e aa.nkho.n me.n
rah-e-najaat kii mash.al jalaa.e aa.nkho.n me.n
labo.n pe KHanda-e-gul kii kiran damaktii hu.ii
nazar sulagtii hu.ii
diye jaa.e hu.e gyaan ke dhiyaan ke diip
shu.uur-e-ziist kaa vo rahguzar ujaal gayaa
Dagar pe fikr kii suuraj nayaa uchhaal gayaa
dayaar-e-husn kaa mahram
vo sahar-saaz saraapaa vo shaKHsiyat kaa jamaal
kisii KHayaal kaa paikar kisii sanam kaa KHayaal
hai qaht-e-lafz-o-ma.aanii kaa marhala darpesh
qalam ko radd-e-ravaanii kaa mas.ala darpesh
tilism-e-diida-e-bedaar kah nahii.n saktaa
vo inqalaab kaa mutrib
na.ii ruto.n kaa muGannii na.ii sahar kaa naqiib
janaab-e-'faiz' mataa.a-e-hayaat-o-harf-o-hunar
zabaa.n pe baare KHudaayaa ye kis kaa naam aaya
ki mere nutq ne bose mirii zabaa.n ke liye

Muslim Shameem

Nazm

hum

vo be-KHabar hai
ki shaatir-e-vaqt kii nazar me.n
ko.ii ikaa.ii
shajar hajar ho ki zii-nafas ho
nizaam-e-kul se alag nahii.n hai
vo ye nahii.n jaantii ki hastii ke kaar-KHaane me.n
us kaa honaa na honaa be-naam haadisa hai
aur us ke hisse kaa kul asaasa
vo chand lamhe vo chand saa.nse.n hai.n
jin me.n vo KHvaab dekhtii hai
saliiqa-e-zaat se chaman ko sa.nvaarne kaa
bahaar-e-jaa.n ko nikhaarne kaa
2
bajaa ki naa-paa.edaar hai ye vajuud meraa
mai.n Gair-faanii hayaat ke silsile me.n
ik biich kii ka.Dii huu.n
rahiin-e-gardish bhii markaz-e-kaa.enaat bhii huu.n
jo mai.n ne dekhaa hai vo mire KHuu.n me.n rach gayaa hai
jo mai.n ne sochaa hai mujh me.n zinda hai
aur jo kuchh sunaa hai mujh me.n samaa gayaa hai
havaa kii suurat har ek ehsaas
merii saa.nso.n me.n jii rahaa hai
har ek manzar mire tasavvur me.n bas gayaa hai
mai.n zaat-e-mahduud apnii pahnaa.iyo.n me.n
ik kaa.enaat bhii huu.n
mirii rago.n me.n vo joshash-e-jaavedaa.n ravaa.n hai
jo shaaKH me.n phuul kii numuu hai
jo bahr me.n mauj kii ta.Dap hai
par-e-kabuutar me.n taab-e-parvaaz hai
sitaaro.n me.n raushnii hai
mai.n apne hone ke sab havaalo.n me.n ruunumaa huu.n
mai.n jaa-ba-jaa suurat-e-sabaa huu.n
Gazaal-e-KHush-chashm kii kaliyo.n me.n kheltaa huu.n
humakte bachche kii muskuraahaT huu.n
piir-e-shab-KHez kii du.aa huu.n
mai.n mehr me.n maahtaab me.n huu.n
ye kaisii chaahat hai jis se mai.n
ek mustaqil iztiraab me.n huu.n
vo kaun sii manzil talab thii
ki raa.njhaa raa.njhaa pukaartii hiir
aap hii raa.njhaa ho ga.ii thii

Zia Jalandhari

Nazm

shair

ik mukammal zindagii hai shaa.ir-e-shiirii.n-bayaa.n
mahram-e-raaz-e-fanaa hai aur baqaa kaa tarjumaa.n
us kii hastii kii hai qiimat ik nigaah-e-iltifaat
hech KHuddaarii ke aage hai.n zamiin-o-aasmaa.n
vo kahii.n majbuur-e-mutlaq hai kahii.n muKHtaar-e-kul
husn kaa be-daam banda varna hai shaah-e-jahaa.n
KHam jabii.n hotii hai us kii naqsh-e-paa-e-dost par
aur jhuk jaate hai.n us ke paa.nv par dono.n jahaa.n
us se poshiida nahii.n hai.n raaz-haa-e-husn-o-ishq
tarjumaa.n hai ahl-e-ulfat kaa vo sirr-e-dil-baraa.n
phuul barsaataa hai apne dosto.n kii bazm me.n
aur giraataa hai saf-e-aGyaar par ye bijliyaa.n
us ke naazuk qalb me.n miltaa hai mazluumo.n kaa dard
be-kaso.n kaa hai vo haamii be-zabaano.n kii zabaa.n
fitratan aazaad be-KHauf-o-KHatar bebaak hai
zindagii detii hai.n us ko zindagii kii talKHiyaa.n
dil ke tuufaa.n me.n qalam us kaa hai kashtii nuuh kii
aur hai us kaa tasavvur ek bahr-e-be-karaa.n
qalb us kaa mulk ke haalaat kaa aa.iina-daar
qaum ke jazbaat kii tash.hiir hai us kaa bayaa.n
diin hai us kaa mohabbat us kii duniyaa shaa.erii
hai tashaddud kaa muKHaalif haami-e-amn-o-amaa.n
ai 'shifaa' un ko magar shaa.ir na kah denaa kahii.n
bazm me.n laa kar jo pa.Dhte hai.n kalaam-e-diigaraa.n

Prem Lal Shifa Dehlvi

Nazm

iqbaal se ham-kalami

kal azaan-e-sub.h se pahle fazaa-e-quds me.n
mai.n ne dekhaa kuchh shanaasaa suurate.n hai.n ham-nashii.n
the hakiim-e-sharq se shaiKH-e-mujaddid ham-kalaam
gosh-bar-aavaaz sab daanish-varaan-e-ilm-o-dii.n
bul-kalaam-'aazaad' se 'Gaalib' the masruuf-e-suKHan
'miir' o 'momin' daur-e-haazir kii Gazal pe nukta-chii.n
is se kuchh haT kar gulaabii shaaKH-cho.n kii chhaa.nv me.n
the valiiullaah ke farzand nukta-aafrii.n
iistaada sarv ke saa.e me.n the maulaa-e-ruum
jin ke farmuudaat me.n muzmar hai.n aayaat-e-mubii.n
soch me.n Duube hu.e the 'haalii'-e-darvesh-KHuu
baa.ndh kar baiThe halqa shiblii-e-ahd-aafrii.n
mai.n ne ba.Dh kar murshid-e-iqbaal se ye arz kii
aap ko ham tiira-baKHto.n kii KHabar hai yaa nahii.n
dil-shikasta ho ke farmaayaa mujhe ma.aluum hai
be-yad-e-baizaa hai piiraan-e-haram kii aastii.n
saltanat le kar KHudaa o mustafaa ke naam par
ab KHudaa o mustafaa kii raah par ko.ii nahii.n
hai abhii shahbaaz kii Gairat par kargas KHanda-zan
''hai vahii sarmaaya-daarii banda-e-momin kaa dii.n''
is se ba.Dh kar aur kyaa fikr o amal kaa inqalaab
''paadshaaho.n kii nahii.n allaah kii hai ye zamii.n''
kaun samjhaa.e a.ndherii raat ko aa.iin-e-mahr
vaa.e bad-baKHtii ki KHud momin hai mahruum-e-yaqii.n
KHuun de kar KHaana-e-sayyaad ko raushan karo
jaa.o mashriq ke KHaraab-aabaad ko raushan karo

Shorish kashmiri

Nazm

main ki ek bani-adam

mai.n ki ik banii-aadam
aalam-e-anaasir kaa
ik KHamiir-e-taaza-dam
ik hayaat mujh me.n hai
kaa.enaat mujh me.n hai
merii saltanat hai sab
mujh se hai jahaa.n qaa.em
mai.n huu.n gardish-e-paiham
rau me.n hai lahuu har dam
kyaa KHabar lahuu kyaa hai
ek shorish-e-hastii
ek daaKHlii tuufaa.n
ek mahshar-e-dauraa.n
kyaa KHabar lahuu kyaa hai
gardishe.n sitaaro.n kii
gardish aasmaano.n kii
gardishe.n zamiino.n kii
gardishe.n zamaano.n kii
kyaa KHabar lahuu kyaa hai
ye nizaam-e-kul jaarii
ya.anii harkate.n saarii
sab lahuu kii harakat hai
hai lahuu ke dam se hii
amn bhii, mohabbat bhii
ja.ng bhii, adaavat bhii
shorish o baGaavat bhii
kyaa KHabar lahuu kyaa hai
gardishe.n lahuu kii jab
mujh me.n shor kartii hai.n
be-KHudii ke nashshe me.n
jism kaa har ik KHaliya
raqs karne lagtaa hai
aur phir ye hotaa hai
KHushkiyo.n kaa har zarra
paaniyo.n kaa har qatra
ek be-badan jazba
raqs karne lagtaa hai
is jinno.n ke aalam me.n
zaKHm jaag jaate hai.n
dard chiiKH uThtaa hai
aur phir ye hotaa hai
ruuh-o-dil kii vaadii me.n
naGme guu.nj uThte hai.n
naGma-haa-e-sehr-a.ngez
be-karaa.n fazaa.o.n me.n
laa-makaa.n KHalaa.o.n me.n
soz aur fuGaa.n ban kar
miiThii lai me.n Dhal Dhal kar
jab bikharne lagte hai.n
aise sehr-aalam me.n
ek kaif-o-mastii kaa
nashsha chhaane lagtaa hai
aur phir ye hotaa hai
kaa.enaat kii har shai
gungunaane lagtii hai
aur phir vahii naGme
ruuh-o-dil ke chhaalo.n ko
taar, taar zaKHmo.n ko
niim-jaa.n karaaho.n ko
laala-zaar daaGo.n ko
jaagte phaphuulo.n ko
mast loriyaa.n de kar
KHvaab ke gulistaa.n me.n
laapata zamaane tak
yuu.n hii chho.D dete hai.n
asl me.n vahii naGme
dard kaa mudaavaa hai.n!!

Khalid Mubashshir

Nazm

shaiKH salahuddin

ye suujhii hai kyaa aap ko shaiKH saahab
jo chup saadh lii aap ne shaiKH saahab
lapeTaa thaa naasir jab jab mu.nh sochaa mai.n ne
mohabbat hii kamzor thii aap kii jo nahii.n rok paa.ii use shaiKH saahab
sajiilaa thaa gul aap ke baaG kaa sab se vo shaiKH saahab
gayaa vo ga.ii bazm-e-yaaraa.n kii raunaq ga.ii us kii KHushbuu
tarannum se KHaalii hu.ii shaa.irii guftuguu me.n maza na rahaa shaiKH saahab
mujhe ilm thaa ki chhupaate hai.n Gam aap apnaa
magar aap ko mai.n bahut saKHt-jaan jaantaa thaa
bha.ii aql-e-kul maantaa thaa
kahaa aap kaa go nahii.n maantaa thaa
kahaa.n to ye da.avaa ki sau saal kii umr hogii hamaarii
kahaa.n ab yakaayak bataa.e binaa chal diye aap naasir se milne
akele me.n dil aap kaa bhii kahaa.n lagtaa hogaa
kitaabe.n KHvaah qur.aan hii kyuu.n na ho dostii kaa badal to nahii.n shaiKH saahab
vafaa ke taqaaze kiye aap ne saare puure
mirii vaapsii ke rahe muntazir aaKHirii saa.ns tak aap to shaiKH saahab
na to.Daa kabhii yaad kaa mujh se rishta
dhar me.n jise mil na paayaa kabhii raasta vaapsii kaa
bahut zor maaraa ki mai.n lauT aa.uu.n
karuu.n aa ke aabaad vo baaG-e-hikmat
chamakte the jis me.n misaal-e-mehr aap hii shaiKH saahab
masaa.il ke jangal me.n gum ho gayaa mai.n
siyaasat ke kambal ko jitnaa bhii mai.n chho.Dtaa vo nahii.n chho.Dtaa thaa mujhe shaiKH saahab
mujhe ab chalaa hai pataa ki mohabbat na kamzor thii aap kii shaiKH saahab
bulaave pe naasir ke yuu.n chal diye aap uTh kar
mohabbat thii kamzor merii
bulaate rahe aap barso.n mujhe mai.n na aayaa
bahut der kar dii hai aane me.n be-shak
magar ab me.n aayaa ki aayaa
zaraa do gha.Dii intizaar aur Gaalib se mil luu.n
bahut kuchh hai kahnaa unhe.n aap se shaiKH saahab
mai.n paiGaam le luu.n
sakiina se mariyam se anvar se ruKHsat me.n ho luu.n
gale se ibraahiim ko mai.n lagaa luu.n
mai.n aayaa ki aayaa KHudaa kii qasam shaiKH saahab

Mohammad Haneef Rame

Nazm

pahli nazar

haa.e vo pahlii nazar vo us kii aa.nkho.n ke payaam
vo lajaa kar muskuraa kar dast-e-naazuk se salaam
har nazar me.n mai-kade Galtaa.n vo chanchal baa.nkpan
rang-e-gulshan bhii tasadduq yuu.n saraapaa gul-badan
sar pe jhuumar paa.nv me.n paazeb ik zohra-KHisaal
aur mujassam kahkashaa.n us ke dupaTTe kaa jamaal
barq kii tasviir-e-kul shaano.n pe larzaa.n choTiyaa.n
marmarii.n haatho.n me.n apnii dhun me.n gaatii chuu.Diyaa.n
kaan me.n bunde saraapaa aaftab-o-maahtaab
parda-daarii kyaa kahuu.n ruKH par tajallii kii naqaab
chaal me.n aahuu kii shoKHii chaal me.n badmastiyaa.n
har qadam par inqalaab-e-dahr kii rangiiniyaa.n
har takallum ik qayaamat har tabassum barq-rez
aur jis kii saadgii bhii ik fasaana hashr-KHez
baa-takalluf baa-adab sad-naaz vo jannat-badosh
ek din aa.ii mirii pursish ko vo nik.hat-farosh
aa.nkho.n aa.nkho.n me.n diyaa paiGaam-e-ishq-o-be-KHudii
zindagaanii ik sharaab-e-tund ban kar rah ga.ii
thii vo duzdiida nigaah-e-dil-sitaa.n mere liye
aa gayaa thaa mere ghar hii gulsitaa.n mere liye
jaise mil jaa.e KHudaa.ii is tarah masruur thaa
ghar kii raunaq kyaa kahuu.n us vaqt kaa ik tuur thaa
vo tahayyur-KHez vo kaafir nazaare al-amaa.n
shauq-e-mohkam al-amaa.n mub.ham ishaare al-amaa.n
merii jaanib dekh kar ha.ns ha.ns ke sharmaatii rahii
nik.hat-e-gesuu se ik ik saa.ns mahkaatii rahii
niichii nazro.n se vo kuchh kahnaa ba-unvaan-e-hayaa
aap kab tashriif laa.e.nge ye us kii iltijaa
kyaa kahuu.n kaise kahuu.n rah rah ke ye sochaa kiyaa
jab na kuchh bhii ban pa.Daa to dard me.n Duubaa kiyaa
yaas se uTThii nazar aa.nsuu bahaa kar rah ga.ii
aur zabaan-e-haal aaKHir la.Dkha.Daa kar rah ga.ii
al-Garaz hone lagii ruKHsat vo jaan-e-aarzuu
ashk barsaane lagaa aaKHir jahaan-e-aarzuu
us kaa jaanaa thaa ki viiraa.n ho ga.ii merii nazar
le ga.ii hamraah apne raunaq-e-diivaar-o-dar
kis qadar rangiin thii fitrat kii naqqaashii na puuchh
shoKHiyaa.n kartii hu.ii taaro.n kii shahzaadii na puuchh

Hasrat Jaipuri

Nazm

nae aadmi ka confession

kabhii ye bhii KHvaahish pareshaan kartii hai mujh ko
ki mai.n apne bhiitar ke mai.n ko nikaaluu.n
magar mere mai.n kii to suurat bahut hii burii hai
KHabaasat kaa ambaar jis me.n nihaa.n hai
saraafa se jis kii karaahat ayaa.n hai
jabii.n par KHatarnaak socho.n ke jangal uge hai.n
bhayaanak iraado.n ke vahshii chhupe hai.n
nigaaho.n me.n jis kii havasnaakiyo.n ke manaazir bhare hai.n
manaazir bhii aise ki jin me.n
zinaa aise logo.n ke hamraah karne ko sochaa gayaa hai
badan jin ke jinsii buluuGat ko pahu.nche nahii.n hai.n
yaa vo jo buluuGat kii saarii kashish kho chuke hai.n
yaa vo jin se ko.ii muqaddas saa rishta ju.Daa hai
mire mai.n kii suurat burii hai
ki dandaa.n darindo.n kii suurat
kisii sahme simTe ku.nvaare badan me.n ga.De hai.n
ki maatam-kade me.n bhii aa.nkhe.n kisii jism kii burjiyo.n par Tikii hai.n
ki biivii baGal me.n magar zehn me.n aur hii ko.ii tan-man khilaa hai
ki paglii bhikaaran ke tan aur andhe bhikaarii ke kashkol par bhii nazar hai
burii hai bahut hii burii hai
ki dil me.n a.izzaa kii amvaat kii KHvaahishe.n bhii dabii hai.n
ka.ii be-gunah gardane.n u.ngliyo.n me.n pha.nsii hai.n
ki lafz-e-ayaadat me.n biimaar kii maut kii bhii du.aa hai
burii hai burii hai
ki ahbaab kii jiit par dil dukhii hai
ki aulaad kii bartarii se chubhan hai
ki bhaa.ii ke raushan jahaa.n se jabii.n par shikan hai
burii hai burii hai
ki jo paaltaa hai usii kii nafii hai
ki jo puujtaa hai usii se daGaa hai
ajab uuba.D-khaaba.D sii mai.n kii zamii.n hai
ki us me.n kahii.n bhii tavaazun nahii.n hai
kisii bhii tarah kaa tanaasub nahii.n hai
jahaa.n chaahiye hausla buzdilii hai
jahaa.n raastii kii zaruurat kajii hai
jahaa.n chaahiye aman Gaarat-garii hai
jahaa.n chaahiye qurb vaa.n faasla hai
jahaa.n sulh-e-kul chaahiye garmiyaa.n sardiyaa.n hai.n
agar mere mai.n kii ye suurat mire KHol kii baahar sat.h par aa ga.ii
to zamaana mujhe kyaa kahegaa
yahii soch kar apnii is aarzuu ke badan me.n
tabar bhau.nk detaa huu.n aksar
magar ye tamannaa
ki mai.n apne bhiitar ke mai.n ko nikaaluu.n
mire dil me.n rah rah ke kyuu.n jaagtii hai
sabab us kaa ye to nahii.n hai
ki mai.n apne andar kii shaffaaf makruuh suurat dikhaa kar
zamaane kii aa.nkho.n me.n KHud ko ba.Daa dekhnaa chaahtaa huu.n
yaa ye ki musalsal sharaafat ke naaTak se ta.ng aa chukaa huu.n
yaa phir ye ki ab
baaharii shakl-o-suurat me.n merii
kashish ko.ii
baaqii
nahii.n hai

Ghazanfar

Nazm

mahatma-gandhi

bhalaa.ii sab kii ho jis se vo kaam us kaa hai
jahaa.n bhii jaa.o vahii.n ehtiraam us kaa hai
uThaa.e sar ko.ii kyaa sar uThaa nahii.n saktaa
muqaable ke liye aage aa nahii.n saktaa
kisii se us ko mohabbat kisii se ulfat hai
kisii ko us kii hai us ko kisii kii hasrat hai
vafaa-o-lutf tarahhum kii KHaas aadat hai
Garaz karam hai mudaaraat hai inaayat hai
kisii ko dekh hii saktaa nahii.n hai mushkil me.n
ye baat kyuu.n hai ki rakhtaa hai dard vo dil me.n
vo rashk-e-sham-e-hidaayaat hai anjuman ke liye
vo misl-e-ruuh-e-ravaa.n unsur-e-badan ke liye
vo ek saaGar-e-nau mahfil-e-kuhan ke liye
vo KHaas maslah-e-kul shaiKH-o-barahman ke liye
lagan use hai ki sab maalik-e-vatan ho jaa.e.n
qafas se chhuuT ke ziinat-dah-e-chaman ho jaa.e.n
jafaa-shi.aar se hotaa hai bar-sar-e-paikaar
na paas top na golaa na qabze me.n talvaar
zamaana taaba-e-irshaad hukm par tayyaar
vo paak shakl se paidaa hai.n josh ke aasaar
kisii KHayaal se charKHe ke bal pe la.Dtaa hai
kha.Dii hai fauj ye tanhaa magar aka.Dtaa hai
tarah tarah ke sitam dil par apne sahtaa hai
hazaar ko.ii kahe kuchh KHamosh rahtaa hai
kahaa.n shariik hai.n aa.nkho.n se KHuun bahtaa hai
suno suno ki ye ik kahne vaalaa kahtaa hai
jo aabruu tumhe.n rakhnii ho josh me.n aa.o
raho na be-KHud-o-be-hosh hosh me.n aa.o
usii ko ghere amiir-o-Gariib rahte hai.n
nadiim-o-muunish-o-yaar-o-habiib rahte hai.n
adab ke saath adab se adiib rahte hai.n
nasiib-var hai.n vo ba.De KHush-nasiib rahte hai.n
ko.ii bataa.e to yuu.n dekh-bhaal kis kii hai
jo us se baat kare ye majaal kis kii hai
rifaah-e-aam se raGbat hai aur matlab hai
anokhii baat niraalii ravish nayaa Dhab hai
yahii KHayaal thaa pahle yahii KHayaal ab hai
faqat hai diin yahii bas yahii to maz.hab hai
agar bajaa hai to 'bismil' kii arz bhii sun lo
chaman hai saamne do-chaar phuul tum chun lo

Bismil Allahabadi

Nazm

pahla jashn-e-azadi

ai hind ke baashindo aa.o uj.Daa gulzaar sajaa Daale.n
ab daur-e-Gulaamii KHatm hu.aa ik taaza jahaa.n kii binaa Daale.n
ab hind kii aslii iid hu.ii jo aazaadii kii diid hu.ii
pa.Dh pa.Dh ke namaaz-e-aazaadii ab ruuThe hu.o.n ko manaa Daale.n
kashtii bhii na.ii dariyaa bhii nayaa saahil bhii nayaa mallaah bhii na.e
ab kar ke bharosa himmat par tuufaan me.n raah banaa Daale.n
hai.n ranj-o-KHusuumat ik ro.Daa raah-e-aazaadii me.n ab bhii
ham ranj puraane duur kare.n bichh.Do.n ko gale se lagaa Daale.n
jo mulk thaa sone kii chi.Diyaa bandhan ne use paamaal kiyaa
Gurbat ko yahaa.n se duur kare.n phir duudh kii nahre.n banaa Daale.n
phir bos se yodhdhaa paidaa ho.n jo hind kii qismat jaag uThe
ik baar zamaane par sikka phir maadar-e-hind biThaa Daale.n
is buu.Dhe himaala parbat se phir nuur kaa chashma-e-ahl uThe
is mel-o-mohabbat ke jal se har baashii ko nahlaa Daale.n
ye hind kii aazaadii goyaa kul mashriq kii aazaadii hai
phir mashriq mashriq ban jaa.e jo zulm ke daur miTaa Daale.n
'anvar' kii du.aa hai ai maulaa phir hind kii qismat jaag uThe
bichh.De aapas me.n mil jaa.e.n ham ruuThe hu.e ko manaa Daale.n

kanval Dibaivi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now