Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "o.dhe"

نظم کے متعلقہ نتیجہ "o.dhe"

نظم

جب آدمی کے حال پہ آتی ہے مفلسی
کس کس طرح سے اس کو ستاتی ہے مفلسی
پیاسا تمام روز بٹھاتی ہے مفلسی
بھوکا تمام رات سلاتی ہے مفلسی
یہ دکھ وہ جانے جس پہ کہ آتی ہے مفلسی
کہیے تو اب حکیم کی سب سے بڑی ہے شاں
تعظیم جس کی کرتے ہیں تو اب اور خاں
مفلس ہوئے تو حضرت لقماں کیا ہے یاں
عیسیٰ بھی ہو تو کوئی نہیں پوچھتا میاں
حکمت حکیم کی بھی ڈوباتی ہے مفلسی
جو اہل فضل عالم و فاضل کہاتے ہیں
مفلس ہوئے تو کلمہ تلک بھول جاتے ہیں
وہ جو غریب غربا کے لڑکے پڑھاتے ہیں
ان کی تو عمر بھر نہیں جاتی ہے مفلسی
مفلس کرے جو آن کے محفل کے بیچ حال
سب جانیں روٹیوں کا یہ ڈالا ہے اس نے جال
گر گر پڑے تو کوئی نہ لیے اسے سنبھال
مفلس میں ہوویں لاکھ اگر علم اور کمال
سب خاک بیچ آ کے ملاتی ہے مفلسی
جب روٹیوں کے بٹنے کا آ کر پڑے شمار
مفلس کو دیویں ایک تونگر کو چار چار
گر اور مانگے وہ تو اسے جھڑکیں بار بار
مفلس کا حال آہ بیاں کیا کروں میں یار
مفلس کو اس جگہ بھی چباتی ہے مفلسی
مفلس کی کچھ نظر نہیں رہتی ہے آن پر
دیتا ہے اپنی جان وہ ایک ایک نان پر
ہر آن ٹوٹ پڑتا ہے روٹی کے خوان پر
جس طرح کتے لڑتے ہیں اک استخوان پر
ویسا ہی مفلسوں کو لڑاتی ہے مفلسی
کرتا نہیں حیا سے جو کوئی وہ کام آہ
مفلس کرے ہے اس کے تئیں انصرام آہ
سمجھے نہ کچھ حلال نہ جانے حرام آہ
کہتے ہیں جس کو شرم و حیا ننگ و نام آہ
وہ سب حیا و شرم اڑاتی ہے مفلسی
یہ مفلسی وہ شے ہے کہ جس گھر میں بھر گئی
پھر جتنے گھر تھے سب میں اسی گھر کے در گئی
زن بچے روتے ہیں گویا نانی گزر گئی
ہم سایہ پوچھتے ہیں کہ کیا دادی مر گئی
بن مردے گھر میں شور مچاتی ہے مفلسی
لازم ہے گر غمی میں کوئی شور غل مچائے
مفلس بغیر غم کے ہی کرتا ہے ہائے ہائے
مر جاوے گر کوئی تو کہاں سے اسے اٹھائے
اس مفلسی کی خواریاں کیا کیا کہوں میں ہائے
مردے کو بے کفن کے گڑاتی ہے مفلسی
کیا کیا مفلسی کی کہوں خواری پھکڑیاں
جھاڑو بغیر گھر میں بکھرتی ہیں جھکڑیاں
کونے میں جالے لپٹے ہیں چھپر میں مکڑیاں
پیسا نہ ہووے جن کے جلانے کو لکڑیاں
دریا میں ان کے مردے بہاتی ہے مفلسی
بی بی کی نتھ نہ لڑکوں کے ہاتھوں کڑے رہے
کپڑے میاں کے بنیے کے گھر میں پڑے رہے
جب کڑیاں بک گئیں تو کھنڈر میں پڑے رہے
زنجیر نے کواڑ نہ پتھر گڑے رہے
آخر کو اینٹ اینٹ کھداتی ہے مفلسی
نقاش پر بھی زور جب آ مفلسی کرے
سب رنگ دم میں کر دے مصور کے کرکرے
صورت بھی اس کی دیکھ کے منہ کھنچ رہے پرے
تصویر اور نقش میں کیا رنگ وہ بھرے
اس کے تو منہ کا رنگ اڑاتی ہے مفلسی
جب خوب رو پہ آن کے پڑتا ہے دن سیاہ
پھرتا ہے بوسے دیتا ہے ہر اک کو خواہ مخواہ
ہرگز کسی کے دل کو نہیں ہوتی اس کی چاہ
گر حسن ہو ہزار روپے کا تو اس کو آہ
کیا کوڑیوں کے مول بکاتی ہے مفلسی
اس خوب رو کو کون دے اب دام اور درم
جو کوڑی کوڑی بوسہ کو راضی ہو دم بہ دم
ٹوپی پرانی دو تو وہ جانے کلاہ جسم
کیوں کر نہ جی کو اس چمن حسن کے ہو غم
جس کی بہار مفت لٹاتی ہے مفلسی
عاشق کے حال پر بھی جب آ مفلسی پڑے
معشوق اپنے پاس نہ دے اس کو بیٹھنے
آوے جو رات کو تو نکالے وہیں اسے
اس ڈر سے یعنی رات و دھنا کہیں نہ دے
تہمت یہ عاشقوں کو لگاتی ہے مفلسی
کیسے ہی دھوم دھام کی رنڈی ہو خوش جمال
جب مفلسی ہو کان پڑے سر پہ اس کے جال
دیتے ہیں اس کے ناچ کو ٹھٹھے کے بیچ ڈال
ناچے ہے وہ تو فرش کے اوپر قدم سنبھال
اور اس کو انگلیوں پہ نچاتی ہے مفلسی
اس کا تو دل ٹھکانے نہیں بھاؤ کیا بتائے
جب ہو پھٹا دوپٹہ تو کاہے سے منہ چھپائے
لے شام سے وہ صبح تلک گو کہ ناچے گائے
اوروں کو آٹھ سات تو وہ دو ٹکے ہی پائے
اس لاج سے اسے بھی لجاتی ہے مفلسی
جس کسبی رنڈی کا ہو ہلاکت سے دل حزیں
رکھتا ہے اس کو جب کوئی آ کر تماش بیں
اک پون پیسے تک بھی وہ کرتی نہیں نہیں
یہ دکھ اسی سے پوچھئے اب آہ جس کے تئیں
صحبت میں ساری رات جگاتی ہے مفلسی
وہ تو یہ سمجھے دل میں کہ ڈھیلا جو پاؤں گی
دمڑی کے پان دمڑی کے مسی منگاؤں گی
باقی رہی چھدام سو پانی بھراؤں گی
پھر دل میں سوچتی ہے کہ کیا خاک کھاؤں گی
آخر چبینا اس کا بھناتی ہے مفلسی
جب مفلسی سے ہووے کلاونت کا دل اداس
پھرتا ہے لے طنبورے کو ہر گھر کے آس پاس
اک پاؤ سیر آنے کی دل میں لگا کے آس
گوری کا وقت ہووے تو گاتا ہے وہ ببھاس
یاں تک حواس اس کے اڑاتی ہے مفلسی
مفلس بیاہ بیٹی کا کرتا ہے بول بول
پیسا کہاں جو جا کے وہ لاوے جہیز مول
جورو کا وہ گلا کہ پھوٹا ہو جیسے ڈھول
گھر کی حلال خوری تلک کرتی ہے ٹھٹھول
ہیبت تمام اس کی اٹھاتی ہے مفلسی
بیٹے کا بیاہ ہو تو نہ بیاہی نہ ساتھی ہے
نے روشنی نہ باجے کی آواز آتی ہے
ماں پیچھے ایک میلی چدر اوڑھے جاتی ہے
بیٹا بنا ہے دولہا تو باوا براتی ہے
مفلس کی یہ برات چڑھاتی ہے مفلسی
گر بیاہ کر چلا ہے سحر کو تو یہ بلا
شہدار نانا ہیجڑا اور بھاٹ منڈ چڑھا
کھینچے ہوئے اسے چلے جاتے ہیں جا بہ جا
وہ آگے آگے لڑتا ہوا جاتا ہے چلا
اور پیچھے تھپڑیوں کو بجاتی ہے مفلسی
دروازے پر زنانے بجاتے ہیں تالیاں
اور گھر میں بیٹھی ڈومنی دیتی ہیں گالیاں
مالن گلے کی ہار ہو دوڑی لے ڈالیاں
سقا کھڑا سناتا ہے باتیں رزالیاں
یہ خواری یہ خرابی دکھاتی ہے مفلسی
کوئی شوم بے حیا کوئی بولا نکھٹو ہے
بیٹی نے جانا باپ تو میرا نکھٹو ہے
بیٹے پکارتے ہیں کہ بابا نکھٹو ہے
بی بی یہ دل میں کہتی ہے اچھا نکھٹو ہے
آخر نکھٹو نام دھراتی ہے مفلسی
مفلس کا درد دل میں کوئی ٹھانتا نہیں
مفلس کی بات کو بھی کوئی مانتا نہیں
ذات اور حسب نسب کو کوئی جانتا نہیں
صورت بھی اس کی پھر کوئی پہچانتا نہیں
یاں تک نظر سے اس کو گراتی ہے مفلسی
جس وقت مفلسی سے یہ آ کر ہوا تباہ
پھر کوئی اس کے حال پہ کرتا نہیں نگاہ
دالیدری کہے کوئی ٹھہرا دے رو سیاہ
جو باتیں عمر بھر نہ سنی ہوویں اس نے آہ
وہ باتیں اس کو آ کے سناتی ہیں مفلسی
چولہا توانا پانی کے مٹکے میں آبی ہے
پینے کو کچھ نہ کھانے کو اور نے رکابی ہے
مفلس کے ساتھ سب کے تئیں بے حجابی ہے
مفلس کی جورو سچ ہے کہ یاں سب کی بھابی ہے
عزت سب اس کے دل کی گنواتی ہے مفلسی
کیسا ہی آدمی ہو پر افلاس کے طفیل
کوئی گدھا کہے اسے ٹھہرا دے کوئی بیل
کپڑے پھٹے تمام بڑھے بال پھیل پھیل
منہ خشک دانت زرد بدن پر جما ہے میل
سب شکل قیدیوں کی بناتی ہے مفلسی
ہر آن دوستوں کی محبت گھٹاتی ہے
جو آشنا ہیں ان کی تو الفت گھٹاتی ہے
اپنے کی مہر غیر کی چاہت گھٹاتی ہے
شرم و حیا و عزت و حرمت گھٹاتی ہے
ہاں ناخن اور بال بڑھاتی ہے مفلسی
جب مفلسی ہوئی تو شرافت کہاں رہی
وہ قدر ذات کی وہ نجابت کہاں رہی
کپڑے پھٹے تو لوگوں میں عزت کہاں رہی
تعظیم اور تواضع کی بابت کہاں رہی
مجلس کی جوتیوں پہ بٹھاتی ہے مفلسی
مفلس کسی کا لڑکا جو لے پیار سے اٹھا
باپ اس کا دیکھے ہاتھ کا اور پاؤں کا کڑا
کہتا ہے کوئی جوتی نہ لیوے کہیں چرا
نٹ کھٹ اچکا چور دغاباز گٹھ کٹا
سو سو طرح کے عیب لگاتی ہے مفلسی
رکھتی نہیں کسی کی یہ غیرت کی آن کو
سب خاک میں ملاتی ہے حرمت کی شان کو
سو محنتوں میں اس کی کھپاتی ہے جان کو
چوری پہ آ کے ڈالے ہی مفلس کے دھیان کو
آخر ندان بھیک منگاتی ہے مفلسی
دنیا میں لے کے شاہ سے اے یار تا فقیر
خالق نہ مفلسی میں کسی کو کرے اسیر
اشراف کو بناتی ہے اک آن میں فقیر
کیا کیا میں مفلسی کی خرابی کہوں نظیرؔ
وہ جانے جس کے دل کو جلاتی ہے مفلسی

نظیر اکبرآبادی
نظم

اس نے اتنی کتابیں چاٹ ڈالیں
کہ اس کی عورت کے پیر کاغذ کی طرح ہو گئے
وہ روز کاغذ پہ اپنا چہرہ لکھتا اور گندہ ہوتا
اس کی عورت جو خاموشی کاڑھے بیٹھی تھی
کاغذوں کے بھونکنے پر سارتر کے پاس گئی
تم راںؔ بو اور فرائڈؔ سے بھی مل آئے ہو کیا
سیفوؔ میری سیفوؔ میرابائیؔ کی طرح مت بولو
میں سمجھ گئی اب اس کی آنکھیں
کیٹسؔ کی آنکھیں ہوئی جاتی ہیں
میں جو سوہنی کا گھڑا اٹھائے ہوئے تھی
اپنا نام لیلیٰ بتا چکی تھی
میں نے کہا
لیلیٰ مجمع کی باتیں میرے سامنے مت دہرایا کرو
تنہائی بھی کوئی چیز ہوتی ہے
شیکسپئیر کے ڈراموں سے چن چن کر اس نے ٹھمکے لگائے
مجھے تنہا دیکھ کر
سارتر فرائڈؔ کے کمرے میں چلا گیا
وہ اپنی تھیوری سے گر گر پڑتا
میں سمجھ گئی اس کی کتاب کتنی ہے
لیکن بہر حال سارتر تھا
اور کل کو مجمع میں بھی ملنا تھا
میں نے بھیڑ کی طرف اشارہ کیا تو بولا
اتنے سارے سارتروں سے مل کر تمہیں کیا کرنا ہے
اگر زیادہ ضد کرتی ہو تو اپنے وارث شاہؔ
ہیر سیال کے کمروں میں چلے چلتے ہیں
سارتر سے استعارہ ملتے ہی
میں نے ایک تنقیدی نشست رکھی
میں نے آدھا کمرہ بھی بڑی مشکل سے حاصل کیا تھا
سو پہلے آدھے فرائڈؔ کو بلایا
پھر آدھے راںؔ بو کو بلایا
آدھی آدھی بات پوچھنی شروع کی
جان ڈنؔ کیا کر رہا ہے
سیکنڈ ہینڈ شاعروں سے نجات چاہتا ہے
چوروں سے سخت نالاں ہے
دانتےؔ اس وقت کہاں ہے
وہ جہنم سے بھی فرار ہو چکا ہے
اس کو شبہ تھا
وہ خواجہ سراؤں سے زیادہ دیر مقابلہ نہیں کر سکتا
اپنے پس منظر میں
ایک کتا مسلسل بھونکنے کے لیے چھوڑ گیا ہے
اس کتے کی خصلت کیا ہے
بیاترؔچے کی یاد میں بھونک رہا ہے
تمہارا تصور کیا کہتا ہے
سارتروں کی تصور کے لحاظ سے
اب اس کا رخ گوئٹےؔ کے گھر کی طرف ہو گیا ہے

سارا شگفتہ
نظم

کتنے شراب پی کر ہو مست چھک رہے ہیں
مے کی گلابی آگے پیالے چھلک رہے ہیں
ہوتا ہے ناچ گھر گھر گھنگھرو جھنک رہے ہیں
پڑتا ہے مینہ جھڑا جھڑ طبلے کھڑک رہے ہیں
کیا کیا مچی ہیں یارو برسات کی بہاریں

نظیر اکبرآبادی
نظم

مری دہلیز پر بیٹھی ہوئی زانو پہ سر رکھے
یہ شب افسوس کرنے آئی ہے کہ میرے گھر پہ
آج ہی جو مر گیا ہے دن
وہ دن ہم زاد تھا اس کا
وہ آئی ہے کہ میرے گھر میں اس کو دفن کر کے
اک دیا دہلیز پر رکھ کر
نشانی چھوڑ دے کہ محو ہے یہ قبر
اس میں دوسرا آ کر نہیں لیٹے
میں شب کو کیسے بتلاؤں
بہت سے دن مرے آنگن میں یوں آدھے ادھورے سے
کفن اوڑھے پڑے ہیں کتنے سالوں سے
جنہیں میں آج تک دفنا نہیں پایا

گلزار
نظم

تم اپنے گھر
میں اپنے گھر
سارے دروازے بند کئے
بیٹھے ہیں کڑوے گھونٹ پئے
اوڑھے ہیں غصے کی چادر

جاوید اختر
نظم

چھٹپٹے کے غرفے میں
لمحے اب بھی ملتے ہیں
صبح کے دھندلکے میں
پھول اب بھی کھلتے ہیں
اب بھی کوہساروں پر
سر کشیدہ ہریالی
پتھروں کی دیواریں
توڑ کر نکلتی ہے
اب بھی آب زاروں پر
کشتیوں کی صورت میں
زیست کی توانائی
زاویے بدلتی ہے
اب بھی گھاس کے میداں
شبنمی ستاروں سے
میرے خاکداں پر بھی
آسماں سجاتے ہیں
اب بھی کھیت گندم کے
تیز دھوپ میں تپ کر
اس غریب دھرتی کو
زر فشاں بناتے ہیں
سائے اب بھی چلتے ہیں
سورج اب بھی ڈھلتا ہے
صبحیں اب بھی روشن ہیں
راتیں اب بھی کالی ہیں
ذہن اب بھی چٹیل ہیں
روحیں اب بھی بنجر ہیں
جسم اب بھی ننگے ہیں
ہاتھ اب بھی خالی ہیں
اب بھی سبز فصلوں میں
زندگی کے رکھوالے
زرد زرد چہروں پر
خاک اوڑھے رہتے ہیں
اب بھی ان کی تقدیریں
منقلب نہیں ہوتیں
منقلب نہیں ہوں گی
کہنے والے کہتے ہیں
گردشوں کی رعنائی
عام ہی نہیں ہوتی
اپنے روز اول کی
شام ہی نہیں ہوتی

احمد ندیم قاسمی
نظم

دور سنسان سے ساحل کے قریب
ایک جواں پیڑ کے پاس
عمر کے درد لیے، وقت کا مٹیالا دشالہ اوڑھے
بوڑھا سا پام کا اک پیڑ، کھڑا ہے کب سے
سیکڑوں سالوں کی تنہائی کے بعد
جھک کے کہتا ہے جواں پیڑ سے ''یار!
سرد سناٹا ہے!
تنہائی ہے! کچھ بات کرو!''

گلزار
نظم

جب ماہ اگھن کا ڈھلتا ہو تب دیکھ بہاریں جاڑے کی
اور ہنس ہنس پوس سنبھلتا ہو تب دیکھ بہاریں جاڑے کی
دن جلدی جلدی چلتا ہو تب دیکھ بہاریں جاڑے کی
اور پالا برف پگھلتا ہو تب دیکھ بہاریں جاڑے کی
چلا غم ٹھونک اچھلتا ہو تب دیکھ بہاریں جاڑے کی
تن ٹھوکر مار پچھاڑا ہو اور دل سے ہوتی ہو کشتی سی
تھر تھر کا زور اکھاڑا ہو بجتی ہو سب کی بتیسی
ہو شور پھپو ہو ہو کا اور دھوم ہو سی سی سی سی کی
کلے پہ کلا لگ لگ کر چلتی ہو منہ میں چکی سی
ہر دانت چنے سے دلتا ہو تب دیکھ بہاریں جاڑے کی
ہر ایک مکاں میں سردی نے آ باندھ دیا ہو یہ چکر
جو ہر دم کپ کپ ہوتی ہو ہر آن کڑاکڑ اور تھر تھر
پیٹھی ہو سردی رگ رگ میں اور برف پگھلتا ہو پتھر
جھڑ باندھ مہاوٹ پڑتی ہو اور تس پر لہریں لے لے کر
سناٹا باؤ کا چلتا ہو تب دیکھ بہاریں جاڑے کی
ہر چار طرف سے سردی ہو اور صحن کھلا ہو کوٹھے کا
اور تن میں نیمہ شبنم کا ہو جس میں خس کا عطر لگا
چھڑکاؤ ہوا ہو پانی کا اور خوب پلنگ بھی ہو بھیگا
ہاتھوں میں پیالہ شربت کا ہو آگے اک فراش کھڑا
فراش بھی پنکھا جھلتا ہو تب دیکھ بہاریں جاڑے کی
جب ایسی سردی ہو اے دل تب روز مزے کی گھاتیں ہوں
کچھ نرم بچھونے مخمل کے کچھ عیش کی لمبی راتیں ہوں
محبوب گلے سے لپٹا ہو اور کہنی، چٹکی، لاتیں ہوں
کچھ بوسے ملتے جاتے ہوں کچھ میٹھی میٹھی باتیں ہوں
دل عیش وطرب میں پلتا ہو تب دیکھ بہاریں جاڑے کی
ہو فرش بچھا غالیچوں کا اور پردے چھوٹے ہوں آ کر
اک گرم انگیٹھی جلتی ہو اور شمع ہو روشن اور تس پر
وہ دلبر، شوخ، پری، چنچل، ہے دھوم مچی جس کی گھر گھر
ریشم کی نرم نہالی پر سو ناز و ادا سے ہنس ہنس کر
پہلو کے بیچ مچلتا ہو تب دیکھ بہاریں جاڑے کی
ترکیب بنی ہو مجلس کی اور کافر ناچنے والے ہوں
منہ ان کے چاند کے ٹکڑے ہوں تن ان کے روئی کے گالے ہوں
پوشاکیں نازک رنگوں کی اور اوڑھے شال دو شالے ہوں
کچھ ناچ اور رنگ کی دھومیں ہوں عیش میں ہم متوالے ہوں
پیالے پر پیالہ چلتا ہو تب دیکھ بہاریں جاڑے کی
ہر ایک مکاں ہو خلوت کا اور عیش کی سب تیاری ہو
وہ جان کہ جس سے جی غش ہو سو ناز سے آ جھنکاری ہو
دل دیکھ نظیرؔ اس کی چھب کو ہر آن ادا پر واری ہو
سب عیش مہیا ہو آ کر جس جس ارمان کی باری ہو
جب سب ارمان نکلتا ہو تب دیکھ بہاریں جاڑے کی

نظیر اکبرآبادی
نظم

چلو تیسواں سال بھی بیت گیا
چلو مے چھلکائیں جشن کریں
چلو سر کو جھکائیں سجدے میں
اس عمر فرومایہ کا سفر
آدھے سے زیادہ ختم ہوا

شہریار
نظم

دکھ کا شب خوں روز ادھورا رہ جاتا ہے
اور شناخت کا لمحہ بیتتا جاتا ہے
میں اور میرا شہر محبت
تاریکی کی چادر اوڑھے
روشنی کی آہٹ پر کان لگائے کب سے بیٹھے ہیں
گھوڑوں کی ٹاپوں کو سنتے رہتے ہیں!
حد سماعت سے آگے جانے والی آوازوں کے ریشم سے
اپنی روئے سیاہ پہ تارے کاڑھتے رہتے ہیں
انگشتا نے اک اک کر کے چھلنی ہونے کو آئے
اب باری انگشت شہادت کی آنے والی ہے
صبح سے پہلے وہ کٹنے سے بچ جائے تو!

پروین شاکر
نظم

رات اوڑھے ہوئے آئی ہے فقیروں کا لباس
چاند کشکول گدائی کی طرح نادم ہے
ایک اک سانس کسی نام کے ساتھ آتی ہے
ایک اک لمحۂ آزاد نفس مجرم ہے

مصطفی زیدی
نظم

کبھی ہاتھوں سے اڑاتا ہوں، کبھی مارتا ہوں
وقت بے رنگ سے کیڑے کی طرح
دست و بازو پہ مرے
رینگتا رہتا ہے دن بھر
رات بوسیدہ رضائی کی طرح اوڑھے ہوئے
اور ناخونوں سے تاروں کو کھرچتے رہنا
چاند بھی ایک پھپھوندی لگی روٹی کی طرح سر پہ ٹنگا رہتا ہے
کیسے کاٹے کوئی بیماری میں بیکاری کے دن؟
الٹی لٹکی ہوئی بوتل سے اترتی ہوئی پھیکی بوندیں۔۔۔
دست و بازو میں مرے
رینگتی رہتی ہیں دن بھر
ایک بے رنگ سے کیڑے کی طرح!

گلزار
نظم

خدایا اب کے یہ کیسی بہار آئی
خدا سے کیا گلہ بھائی
خدا تو خیر کس نے اس کا عکس نقش پا دیکھا
نہ دیکھا تو بھی دیکھا اور دیکھا بھی تو کیا دیکھا
مگر توبہ مری توبہ یہ انساں بھی تو آخر اک تماشا ہے
یہ جس نے پچھلی ٹانگوں پر کھڑا ہونا بڑے جتنوں سے سیکھا ہے
ابھی کل تک جب اس کے ابروؤں تک موئے پیچاں تھے
ابھی کل تک جب اس کے ہونٹ محروم زنخداں تھے
ردائے صد زماں اوڑھے لرزتا کانپتا بیٹھا
ضمیر سنگ سے بس ایک چنگاری کا طالب تھا
مگر اب تو یہ اونچی ممٹیوں والے جلو خانوں میں بستہ ہے
ہمارے ہی لبوں سے مسکراہٹ چھین کر اب ہم پہ ہنستا ہے
خدا اس کا خدائی اس کی ہر شے اس کی ہم کیا ہیں
چمکتی موٹروں سے اڑنے والی دھول کا ناچیز ذرہ ہیں
ہماری ہی طرح جو پائمال سطوت میری و شاہی میں
لکھوکھا آب دیدہ پا پیادہ دل زدہ واماندہ راہی ہیں
جنہیں نظروں سے گم ہوتے ہوئے رستوں کی گم پیما لکیروں میں
دکھائی دے رہی ہیں آنے والی منزلوں کی دھندلی تصویریں
ضرور اک روز بدلے گا نظام قسمت آدم
بسے گی اک نئی دنیا سجے گا اک نیا عالم
شبستاں میں نئی شمعیں گلستاں میں نیا موسم
وہ رت اے ہم نفس جانے کب آئے گی
وہ فصل دیر رس جانے کب آئے گی
یہ نو نمبر کی بس جانے کب آئے گی

مجید امجد
نظم

قابل عزت ہیں اس دنیا کے محنت کش عوام
ملک کی دولت ہیں یہ، واجب ہے ان کا احترام
اس کے یہ ممبر ہیں لیبر یونین ہے جس کا نام
ان کی محنت کے دیے جائیں گے ان کو پورے دام
یہ نہیں ہوگا خفا ہو کر دہاڑی کاٹ دی
آدھے رستے لائے اور انجن سے گاڑی کاٹ دی

سید محمد جعفری
نظم

کروڑوں برس کی پرانی
کہن سال دنیا
یہ دنیا بھی کیا مسخری ہے
نئے سال کی شال اوڑھے
بہ صد طنز ہم سب سے یہ کہہ رہی ہے
کہ میں تو ''نئی'' ہوں
ہنسی آ رہی ہے

مخدومؔ محی الدین
نظم

طاقت ہو کسی میں تو مٹائے مری ہستی
ڈائن ہے مرا نام لقب فرقہ پرستی
میں نے بڑی چالاکی سے اک کام کیا ہے
پہلے ہی محبت کا گلا گھونٹ دیا ہے
میں فتنے اٹھا دیتی ہوں ہر اٹھتے قدم سے
اس دیش کے ٹکڑے بھی ہوئے میرے ہی دم سے
سرمایہ پرستوں نے جنم مجھ کو دیا ہے
مذہب کے تعصب نے مجھے گود لیا ہے
ہے ملک کی تقسیم لڑکپن کی کہانی
اس وقت تو بچپن تھا مرا اب ہے جوانی
گھبراتا ہے شیطاں مری تقریر کے فن سے
میں زہر اگلتی ہوں زباں بن کے دہن سے
درکار ہوا جب بھی مجھے خون زیادہ
میں آ گئی اوڑھے ہوئے مذہب کا لبادہ
میں دیش کی قتالہ ہوں اور سب سے بڑی ہوں
بچوں کی بھی گردن پہ چھری بن کے چلی ہوں
گولی کو سکھا دیتی ہوں چلنے کا قرینہ
میں چھید کے رکھ دیتی ہوں مظلوم کا سینہ
ہر سوکھے ہوئے ہونٹ سے لیتی ہوں تری میں
دم توڑنے والوں کی اڑاتی ہوں ہنسی میں
معصوموں کے ماں باپ کا سر میں نے لیا ہے
بچوں کو یتیمی کا لقب میں نے دیا ہے
ہندو کا لہو ہو کہ مسلماں کا لہو ہو
مطلب ہے لہو سے کسی انساں کا لہو ہو
مل جائے تو میں کس کا لہو پی نہیں سکتی
مجبور ہوں بے خون پیے جی نہیں سکتی
ہر فرقے کے لوگوں کا لہو چاٹ رہی ہوں
فصلوں کی طرح سب کے گلے کاٹ رہی ہوں
جس وقت جہاں چاہوں وہاں آگ لگا دوں
جس بستی کو چاہوں اسے ویرانہ بنا دوں
جس شہر کو پھونکا نہ مکیں تھے نہ مکاں تھا
اٹھتا ہوا کچھ دیر اگر تھا تو دھواں تھا
گلشن مرے ہاتھوں یوں ہی تاراج رہے گا
میں زندہ رہوں گی تو مرا راج رہے گا
طاقت ہو کسی میں تو مٹائے مری ہستی
ڈائن ہے مرا نام لقب فرقہ پرستی

نذیر بنارسی
نظم

چاند بھی کمبل اوڑھے نکلا تھا
ستارہ ٹھٹھر رہیں تھے
سردی بڑھ رہی تھی
ٹھنڈ سے بچنے کے لیے
مجھے بھی کچھ رشتہ جلانے پڑے

کمل اپادھیائے
نظم

اب گاڑھا پسینہ بننے والے
اوڑھے پھریں گے شال دو شالے
مفت نہ جھولیں جھولیں گی
پھولے ہوئے گال اب پچکیں گے
پچکی ہوئی توندیں پھولیں گی
سب عقلیں چوکڑی بھولیں گی
اب خوب ہنسے گا دیوانہ

حفیظ جالندھری
نظم

کیا اب رات ایسے ہی
گزر جائے گی
یہ رات ہی تو ہے
جو تحلیل ہو جاتی ہے ایک نقطے میں
اور گھومتی ہے
میرے گرد کالے بھنبھناتے ہوئے
بھونرے کی طرح
وہ میرے کانوں مری آنکھوں
میری گردن اور میرے روئیں روئیں میں
بھنبھناتی ہے
میری بغلوں کے بالوں سے الجھتی ہوئی
میرے جسم کے کونے کھدروں میں
گدگداتی ہوئی
یہ رات میرے اوپر پھیل جاتی ہے
اچانک
اوڑھ لیتی ہے مجھے
میرے جسم کی پور پور میں
ایک جل ترنگ چھیڑ دیتی ہے
میں نیند میں اٹھتی ہوں
مرا حلق خشک ہو رہا ہے
پانی کا ایک گلاس ٹھنڈا یخ
میرے ہونٹوں میرے حلق میرے سینے
کو تر کرتا ہوا
میرے جسم کی جل ترنگ میں مل جاتا ہے
میں دروازے پر دستک دیتی ہوں
تم سن رہے ہو
رات کی جل ترنگ میرے جسم سے
پھوٹ رہی ہے
دروازہ کھلتا ہے
میں تمہارے آدھے ننگے بدن کو
دبوچ لیتی ہوں
تمہاری ناف کے گڑھے میں
ناک کی نوک گھسیڑتی ہوں
تم مسکرا رہے ہو
رات کی شرارت میرے جسم پر
پھیلے ہوئے دیکھ کر
تم ہنستے
رات کونوں کھدروں میں پھیل رہی ہے
میں تمہارے کپڑے اتار دیتی ہوں
اور وہ کھیل کھیلتی ہوں
جو رات میرے ساتھ کھیل رہی تھی
میں تمہارے جسم کے گرد
اپنی زبان اپنے دانتوں اور ناخنوں کے ساتھ
بھنبھنانے لگتی ہوں
تم مسکرا رہے ہو
تمہاری مسکراہٹ
میرے جسم کی پوروں کو اور کھول رہی ہے
میں زخمی کر دیتی ہوں تمہیں
تم ہنس رہے ہو
رات کے پروں پہ سوار بھونرے کی طرح
مجھے بھنبھناتے دیکھ کر
تمہاری کشادہ آنکھوں کے کونے
پھیلنے لگتے ہیں
تمہارا جسم اکڑ جاتا ہے
نہیں آج تم
تم کھلکھلاتے ہو
میں تمہارے اکڑے ہوئے جسم پر
اپنی کھلی ہوئی پوروں کو رکھ دیتی ہوں
تمہارا جسم رات کے جھاگ سے بھر جاتا ہے
تم ہنستے ہو
ہنستے ہی رہتے ہو

عذرا عباس
نظم

یہ تعلیم گر مل بھی جائے تو کیا ہے
یہ اسکول ہے اک خرابوں کی دنیا
سوالوں کی بستی جوابوں کی دنیا
یہ پنسل یہ کاغذ کتابوں کی دنیا
یہ تعلیم گر مل بھی جائے تو کیا ہے
نہ انگلش ہی جانوں نہ سوشل ہی بھائے
نہ بایو ہی سمجھوں نہ ہندی ہی آئے
جو مرضی چلے تو کروں سب کو بائے
یہ تعلیم گر مل بھی جائے تو کیا ہے
مصیبت ہے کیسی سحر کی جگائی
سبھی لوگ سوتے ہیں اوڑھے رضائی
مگر میری قسمت میں ہے منہ دکھائی
یہ تعلیم گر مل بھی جائے تو کیا ہے
برا موڈ اس پر سوا من کا بستہ
اور اس پر جسے دیکھیے رعب کستا
یہاں میرا بچپن ہے ہر شے سے سستا
یہ تعلیم گر مل بھی جائے تو کیا ہے
ذرا دوست سے بات کر لیں تو آفت
کسی وقت چھپ کر گزر لیں تو آفت
اجازت کسی سے اگر لیں تو آفت
یہ تعلیم گر مل بھی جائے تو کیا ہے
نہ فلموں کی باتیں نہ کھیلوں کی باتیں
یہ بیکار کی پاس فیلوں کی باتیں
اصولوں کے قصے جھمیلوں کی باتیں
یہ تعلیم گر مل بھی جائے تو کیا ہے
یہ تعلیم گر مل بھی جائے تو کیا ہے
میرے سامنے سے ہٹا لو کتابیں
مرے ٹیچرو تم سنبھالو کتابیں
پرنسپل کے کاندھوں پہ ڈالو کتابیں

اسنی بدر
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے