کی تلاش کا نتیجه | موضو - نظم, صفحہ paudaa

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "paudaa"

نظم کے متعلقہ نتیجہ "paudaa"

نظم

یہ شاخسار کے جھولوں میں پینگ پڑتے ہوئے
یہ لاکھوں پتیوں کا ناچنا یہ رقص نبات
یہ بے خودئ مسرت یہ والہانہ رقص
یہ تال سم یہ چھما چھم کہ کان بجتے ہیں
ہوا کے دوش پہ کچھ اودی اودی شکلوں کی
نشے میں چور سی پرچھائیاں تھرکتی ہوئی
افق پہ ڈوبتے دن کی جھپکتی ہیں آنکھیں
خموش سوز دروں سے سلگ رہی ہے یہ شام!
مرے مکان کے آگے ہے ایک چوڑا صحن وسیع
کبھی وہ ہنستا نظر آتا ہے کبھی وہ اداس
اسی کے بیچ میں ہے ایک پیڑ پیپل کا
سنا ہے میں نے بزرگوں سے یہ کہ عمر اس کی
جو کچھ نہ ہوگی تو ہوگی قریب چھیانوے سال
چھڑی تھی ہند میں جب پہلی جنگ آزادی
جسے دبانے کے بعد اس کو غدر کہنے لگے
یہ اہل ہند بھی ہوتے ہیں کس قدر معصوم
وہ دار و گیر وہ آزادیٔ وطن کی جنگ
وطن سے تھی کہ غنیم وطن سے غداری
بپھر گئے تھے ہمارے وطن کے پیر و جواں
دیار ہند میں رن پڑ گیا تھا چار طرف
اسی زمانے میں کہتے ہیں میرے دادا نے
جب ارض ہند سنچی خون سے ''سپوتوں'' کے
میان صحن لگایا تھا لا کے اک پودا
جو آب و آتش و خاک و ہوا سے پلتا ہوا
خود اپنے قد سے بہ جوش نمو نکلتا ہوا
فسون روح بناتی رگوں میں چلتا ہوا
نگاہ شوق کے سانچوں میں روز ڈھلتا ہوا
سنا ہے راویوں سے دیدنی تھی اس کی اٹھان
ہر اک کے دیکھتے ہی دیکھتے چڑھا پروان
وہی ہے آج یہ چھتنار پیڑ پیپل کا
وہ ٹہنیوں کے کمنڈل لئے جٹادھاری
زمانہ دیکھے ہوئے ہے یہ پیڑ بچپن سے
رہی ہے اس کے لئے داخلی کشش مجھ میں
رہا ہوں دیکھتا چپ چاپ دیر تک اس کو
میں کھو گیا ہوں کئی بار اس نظارے میں
وہ اس کی گہری جڑیں تھیں کہ زندگی کی جڑیں؟
پس سکون شجر کوئی دل دھڑکتا تھا
میں دیکھتا تھا اسے ہستیٔ بشر کی طرح
کبھی اداس کبھی شادماں کبھی گمبھیر
فضا کا سرمئی رنگ اور ہو چلا گہرا
گھلا گھلا سا فلک ہے دھواں دھواں سی ہے شام
ہے جھٹپٹا کہ کوئی اژدہا ہے مائل خواب
سکوت شام میں درماندگی کا عالم ہے
رکی رکی سی کسی سوچ میں ہے موج صبا

فراق گورکھپوری

نظم

اے دل اے بندۂ وطن ہوشیار
خواب غفلت سے ہو ذرا بیدار
او شراب خودی کے متوالے
گھر کی چوکھٹ کے چومنے والے
نام ہے کیا اسی کا حب وطن
جس کی تجھ کو لگی ہوئی ہے لگن
کبھی بچوں کا دھیان آتا ہے
کبھی یاروں کا غم ستاتا ہے
یاد آتا ہے اپنا شہر کبھی
لو کبھی اہل شہر کی ہے لگی
نقش ہیں دل پہ کوچہ و بازار
پھرتے آنکھوں میں ہیں در و دیوار
کیا وطن کیا یہی محبت ہے
یہ بھی الفت میں کوئی الفت ہے
اس میں انساں سے کم نہیں ہیں درند
اس سے خالی نہیں چرند و پرند
ٹکڑے ہوتے ہیں سنگ غربت میں
سوکھ جاتے ہیں روکھ فرقت میں
جا کے کابل میں آم کا پودا
کبھی پروان چڑھ نہیں سکتا
آ کے کابل سے یاں بہی و انار
ہو نہیں سکتے بارور زنہار
مچھلی جب چھوٹتی ہے پانی سے
ہاتھ دھوتی ہے زندگانی سے
آگ سے جب ہوا سمندر دور
اس کو جینے کا پھر نہیں مقدور
گھوڑے جب کھیت سے بچھڑتے ہیں
جان کے لالے ان کے پڑتے ہیں
گائے، بھینس اونٹ ہو یا بکری
اپنے اپنے ٹھکانے خوش ہیں سبھی
کہیے حب وطن اسی کو اگر
ہم سے حیواں نہیں ہیں کچھ کم تر
ہے کوئی اپنی قوم کا ہمدرد
نوع انساں کا سمجھیں جس کو فرد
جس پہ اطلاق آدمی ہو صحیح
جس کو حیواں پہ دے سکیں ترجیح
قوم پر کوئی زد نہ دیکھ سکے
قوم کا حال بد نہ دیکھ سکے
قوم سے جان تک عزیز نہ ہو
قوم سے بڑھ کے کوئی چیز نہ ہو
سمجھے ان کی خوشی کو راحت جاں
واں جو نو روز ہو تو عید ہو یاں
رنج کو ان کے سمجھے مایۂ غم
واں اگر سوگ ہو تو یاں ماتم
بھول جائے سب اپنی قدر جلیل
دیکھ کر بھائیوں کو خوار و ذلیل
جب پڑے ان پہ گردش افلاک
اپنی آسائشوں پہ ڈال دے خاک

الطاف حسین حالی

نظم

مرے صحن میں ایک کمسن بنفشے کا پودا ہے
طیارہ کوئی کبھی اس کے سر پر سے گزرے
تو وہ مسکراتا ہے اور لہلہاتا ہے
گویا وہ طیارہ، اس کی محبت میں
عہد وفا کے کسی جبر طاقت ربا ہی سے گزرا!
وہ خوش اعتمادی سے کہتا ہے
لو دیکھو، کیسے اسی ایک رسی کے دونوں کناروں
سے ہم تم بندھے ہیں!
یہ رسی نہ ہو تو کہاں ہم میں تم میں
ہو پیدا یہ راہ وصال؟
مگر ہجر کے ان وسیلوں کو وہ دیکھ سکتا نہیں
جو سراسر ازل سے ابد تک تنے ہیں!
جہاں یہ زمانہ ہنوز زمانہ
فقط اک گرہ ہے!

ن م راشد

نظم

تھا تو سرسبز، وہ پودا تو ہرا تھا
اور تندرست تھیں شاخیں بھی
مگر اس کا کوئی قد نہ نکل پایا تھا
گو بہت سال وہ سینچا بھی گیا
میرے مالی کو شکایت تھی
کبھی پھول نہ آئے اس پر

گلزار

نظم

کھلی فضا میں صاف ہوا کے جیسا وہ
بارش کے پانی کے جیسا وہ
گہرا تھا مٹی سے رشتہ پیروں کا
اس رشتے کے بیچ نہ آئی چپل بھی
گھڑی نہ باندھی کبھی کلائی پر اس نے
سورج تارے وقت اسے بتلاتے تھے
اپنے بل پر اپنی دھن میں رہتا تھا
نہیں کسی سے گاؤں میں وہ ڈرتا تھا
نام کی خواہش تھی نہ اسے پہچان کی تھی
بس اپنے کاموں سے مطلب رکھتا تھا
وہ دانہ تھا وہ مٹی تھا
وہ پودا تھا وہ موسم تھا
وہ سچا خالص انسان تھا
جیسے آدم اور حوا تھے
وہ تنہا تھا
ایک بڑے سے گھر میں تنہا رہتا تھا
بھینسیں اس کے ساتھ تھیں
اس کی بات سمجھتی تھیں
وہ بھی ان کی ہی بھاشا میں ان سے باتیں کرتا تھا
گھر پر اکثر لگا کے تالا یوں ہی سا
کھلیانوں میں رہنے والا باپ مرا
کھیتوں کھیتوں بسنے والا باپ مرا
آم کی چھاؤں میں سونے والا باپ مرا
اب مٹی میں سوتا ہے
آم کے پیڑ کی خشک جڑوں میں روتا ہے

شکیل اعظمی

نظم

آ مرے اندر آ
پوتر مہران کے پانی
ٹھنڈے میٹھے مٹیالے پانی
مٹیالے جیون رنگ جل
دھو دے سارا کرودھ کپٹ
شہروں کی دشاؤں کا سب چھل
یوں سینچ مجھے کر دے میری مٹی جل تھل
ترے تل کی کالی چکنی مٹی سے
ماتھے پر تلک لگاؤں
ہاتھ جوڑ ڈنڈوت کروں
او من کے بھید سے گہرے
ہولے ہولے سانس کھینچتے
اوم سمان امر
او مہان ساگر
میں اتری تیرے ٹھنڈے جل میں کمر کمر
تیرے ٹھنڈے میٹھے مہربان پانی سے منہ دھو لوں
اور دھو لوں آنسو
کھارے آنسو
تیرے میٹھے پانی سے دھو لوں
او مہان مٹیالے ساگر آ
سن مری کتھا
میں بڑی ابھاگن بھاگ مرا
بے درد ہاتھ میں رہا سدا
ٹوٹا مرا مٹی سے ناطہ
کیسے ٹوٹا
اک آندھی بڑی بھیانک لال چڑیل
مجھے لے اڑی
اٹھا کر پٹکا اس نے کہاں سے کہاں!
تیرے چرنوں میں سیس جھکاتی ایک اکیلی جان
مرے ساتھ مرا کوئی میت نہیں
کوئی رنگ روپ' کوئی پریت نہیں
مری ان گڑھ پھیکی مرجھاتی بولی میں کوئی سنگیت نہیں
مری پیڑھیوں کے بیتے یگ میرے ساتھ نہیں
بس اک نردئی دھرم ہے
جس کا بھرم نہیں
وہ دھرم جو کہتا ہے مٹی مری بیرن ہے
جو مجھے سکھاتا ہے ساگر مرا دشمن ہے
ہاں' دور کہیں
آکاش کی اونچائی سے پرے
رہتا ہے خدا
اتنا روکھا
مٹی سے جوڑ نہیں جس کا
سب ناطے پریت اور بیر کے اس کی کارن میں کیسے جوڑوں
میں مٹی مرا جنم مٹی
میں مٹی کو کیسے چھوڑوں
او مٹیالے بلوان مہا ساگر
میں اکھڑی دھرتی سے
بھگوان مرا رس سوکھ گیا
پھر بھی سنتی ہوں اپنے لہو میں بیتے سمے کی نرم دھمک
وہ سمے جو میرے جنم سے پہلے بیت گیا
مرے کانوں میں
اک شور ہے جھرجھر بہتے ندی نالوں کا
اور کوئی مہک بڑی بے کل ہے
جو گونج بنی مری چھاتی سے ٹکراتی ہے
او مہان ساگر
جیونःرس دے
اپنے تل میں جل پودا بن کر جڑ لینے دے
سدا جیے
او مہان ساگر سندھو
تو سدا جیے
اور جئیں ترے پانی میں پھسلتی مچھلیاں
شانت سکھی یوں ہی
ترے پانی میں ناؤ کھیتے
ترے بالک سدا جئیں
او پالن ہار ہمارے
دھرتی کے رکھوالے
ان داتا
تری دھرتی
نرم رتیلی مہربان سندھ کی دھرتی
سدا جیے

فہمیدہ ریاض

نظم

اتفاقاً ایک پودا اور گھاس
باغ میں دونوں کھڑے ہیں پاس پاس
گھاس کہتی ہے کہ اے میرے رفیق
کیا انوکھا اس جہاں کا ہے طریق
ہے ہماری اور تمہاری ایک ذات
ایک قدرت سے ہے دونوں کی حیات
مٹی اور پانی ہوا اور روشنی
واسطے دونوں کے یکساں ہے بنی
تجھ پہ لیکن ہے عنایت کی نظر
پھینک دیتے ہیں مجھے جڑ کھود کر
سر اٹھانے کی مجھے فرصت نہیں
اور ہوا کھانے کی بھی رخصت نہیں
کون دیتا ہے مجھے یاں پھیلنے
کھا لیا گھوڑے گدھے یا بیل نے
تجھ پہ منہ ڈالے جو کوئی جانور
اس کی لی جاتی ہے ڈنڈے سے خبر
اولے پالے سے بچاتے ہیں تجھے
کیا ہی عزت سے بڑھاتے ہیں تجھے
چاہتے ہیں تجھ کو سب کرتے ہیں پیار
کچھ پتا اس کا بتا اے دوست دار
اس سے پودے نے کہا یوں سر ہلا
گھاس سب سچا ہے تیرا یہ گلہ
مجھ میں اور تجھ میں نہیں کچھ بھی تمیز
صرف سایہ اور میوہ ہے عزیز
فائدہ اک روز مجھ سے پائیں گے
سایہ میں بیٹھیں گے اور پھل کھائیں گے
ہے یہاں عزت کا سہرا اس کے سر
جس سے پہنچے نفع سب کو بیشتر

اسماعیل میرٹھی

نظم

کوئی اپنا کبھی جب دیکھ کر منہ موڑ لیتا ہے
کوئی پودا بنا پانی کے جب دم توڑ دیتا ہے

حنا رضوی

نظم

میں اک جوہی کا پودا ہوں
یہ بھی مجھ کو یاد نہیں ہے
میں اس راہ گزر پر کب سے
بس یوں ہی خاموش کھڑا ہوں

راہی معصوم رضا

نظم

نظر کو لبھاتے ہیں پودوں کے منظر
حسیں اور نازک ہیں پھولوں کے پیکر
ثمر ان کے بنتے ہیں سب کی غذائیں
یہ بنتے ہیں بیماریوں کی دوائیں
ہمیں ملتی ہے پودوں سے آکسیجن
اگاؤ انہیں دوستو آنگن آنگن
ہر اک پودا خارج کرے آبی ذرے
تنفس میں یہ کاربن جذب کر لے
حسین اور دل کش ہے پودوں کی دنیا
کرو روز بچو تم ان کا نظارہ
انہیں سے ہے قریوں میں لوگوں کو راحت
کہ پودوں سے شہروں کی بڑھتی ہے زینت
یہ بات آج حافظؔ کی اے بچو مانو
کہ مکتب کے آنگن میں پودے اگاؤ

حافظ کرناٹکی

نظم

ہاں اے مصاف ہستی! مت پوچھ مجھ سے کیا ہوں
اک عرصۂ بلا ہوں اک لقمۂ فنا ہوں
مجبوریوں نے ڈالا گردن میں میری پھندا
خود کردۂ وفا ہوں جاں دادۂ رضا ہوں
صیاد حادثے کا کرتا ہے میرا پیچھا
مرغ بریدہ پر ہوں صید شکستہ پا ہوں
ہے ذات میری مجمع ساری برائیوں کا
کہنے کو میں بڑا ہوں لیکن بہت برا ہوں
آزادیوں کی مجھ پر تہمت ہی ہے سراسر
میں قیدیٔ ہوس ہوں میں بندۂ ہوا ہوں
اک بات ہو بتاؤں اک درد ہو سناؤں
روؤں بھلا کہاں تک کب تک پڑا کراہوں
کم بخت دل کچھ ایسا میں ساتھ لے کے آیا
اک لمحہ جس کے ہاتھوں دنیا میں سکھ نہ پایا
جو جوش اس میں اٹھا حالات نے دبایا
جو شعلہ اس میں بھڑکا تقدیر نے بجھایا
امید کا یہ غنچہ کھلتے کبھی نہ دیکھا
یہ آرزو کا پودا پھلتا نظر نہ آیا
گو اس میں موجزن تھی قوم و وطن کی الفت
لیکن غرض نے اس کو کچھ اور ہی سکھایا
ہوتی نہیں رسائی امید کے افق تک
طول امل نے اس کو اک جال میں پھنسایا
کی رہبری خرد نے ہر چند رہنمائی
اس جہد پر بھی لیکن کھلتی نہیں سچائی
پایا نہ میں نے اب تک مقصد کا اپنے ساحل
کی بحر معرفت میں دن رات آشنائی
اس جستجو میں میں نے کی سیر طور و ایمن
پربت کو گھر بنایا جنگل سے لو لگائی
مندر کو جا کے دیکھا گرجا میں جا کے ڈھونڈا
مسجد کو چھان مارا اس کی نہ دید پائی
جوگی کا روپ دھارا بن میں کیا گزارا
تن پر بھبھوت مل کر دھونی بہت رمائی
جپ تپ میں عمر اپنی میں نے بسر کی اکثر
بن بن کے پیر راہب جا خانقاہ بسائی
صوفی بھی بن کے دیکھا اور رند بے ریا بھی
کر نعرۂ انا الحق اک کھلبلی مچائی
پھرتی ہیں ماری ماری مشتاق جلوہ آنکھیں
پر اک جھلک سے بڑھ کر دیتا نہیں دکھائی
اٹھ جا نظر سے میری ہاں اے حجاب ہستی
حسن ازل نہاں ہے زیر نقاب ہستی
یہ زندگیٔ انساں اک خواب ہے پریشاں
بیدارئ عدم ہے تعبیر خواب ہستی
دیکھیں اگر تو کیوں کر ہم جلوۂ معارف
تو ظلمت نظر ہے اے آفتاب ہستی
تسکیں کو زہر قاتل آب و ہوائے عالم
راحت کا دشمن جاں ہر انقلاب ہستی
اے تشنۂ حقیقت دھوکے میں تو نہ آنا
اک دام پر خطر ہے موج سراب ہستی
چاہے اگر رہائی پیش از فنا فنا ہو
پاداش جرم ہستی ہے یہ عذاب ہستی

غلام بھیک نیرنگ

نظم

پودا جو کل تھا اب شجر سایہ دار ہے
پاپا میاں کے باغ میں کیسی بہار ہے

سیدہ فرحت

نظم

گرچہ پودا ابھی ہوں چھوٹا سا
آرزو دل میں ہے مرے کیا کیا
آ ہی جائے گی رت جوانی کی
یعنی مجھ پر بھی شادمانی کی
ڈالی ڈالی مری ہری ہوگی
اور پھل پھول سے بھری ہوگی
فیض ہوگا جہاں میں عام مرا
خدمت خلق ہوگا کام مرا
ساری چڑیوں کو میں بلاؤں گا
خوب میوے انہیں کھلاؤں گا
گھونسلے مجھ پہ وہ بنائیں گی
راگ چھیڑیں گی چہچہائیں گی
جو بھی آئے گا ان کا کرنے شکار
میرے پتوں کی دیکھے گا دیوار
گرمیوں میں مسافر آئیں گے
میرے سایے میں چین پائیں گے
بچے آئیں گے جھولا جھولیں گے
گیت گا کے خوشی میں پھولیں گے
وہ چلائیں گے مجھ پہ جب پتھر
اس کے بدلے میں ان کو دوں گا ثمر
ایک خواہش ہے اور دل میں بڑی
کاش وہ بھی کرے خدا پوری
سوکھ جاؤں تو لکڑیوں سے مری
خوب صورت سی اک بنے کرسی
اس پہ بیٹھے فقط وہی لڑکا
جس کے سر میں ہو علم کا سودا
دل میں اپنے جو میں نے ٹھانی ہے
اس کی یہ مختصر کہانی ہے
میں بھی بچہ ہوں تم بھی بچے ہو
میں بھی سچا ہوں تم بھی سچے ہو
کیا بنایا ہے زندگی کا پلان
میں تو رکھتا ہوں تم سے نیک گمان
آج چھوٹے ہو کل جو ہوگے جواں
کون سے کام تم کرو گے یہاں

ظفر کمالی

نظم

محبت ایسا چشمہ ہے
جو سوکھا ہی نہیں کرتا
محبت ایسا پودا ہے
جو پت جھڑ میں بھی پھلتا ہے
محبت ایسا دریا ہے
کبھی بپھرا نہیں کرتا
محبت ایسا لمحہ ہے
جو ہمیشہ امر رہتا ہے
محبت ایسا جذبہ ہے
جو مر کر بھی نہیں مرتا
محبت ایسا سپنا ہے
جو کبھی پورا نہیں ہوتا
محبت ایسا بچہ ہے
کہ جس کی ضد کے آگے
ہر کوئی مجبور ہوتا ہے

امین کنجاہی

نظم

مجھے یقیں ہے کہ کل کے سورج کی مسکراہٹ
زمیں کے محروم باسیوں کو
نئی سحر کا پیام دے گی
لبوں کو اذن کلام دے گی
مجھے یقیں ہے وہ دن بھی آئے گا
جب عروس چمن کے قدموں کی دھیمی آہٹ سنائی دے گی
بہار لمحوں کی گنگناہٹ سنائی دے گی
طیور چہکیں گے بالیوں پر
گلاب مہکیں گے ڈالیوں پر
کبھی تو دیکھے گا سر اٹھا کر
چمن میں ننھا سا کوئی پودا
کبھی تو جھانکے گا بادلوں کا ہٹا کے گھونگھٹ
کہیں یہ چھوٹا سا اک ستارا
کبھی تو نکلے گا چاند پورا
یہ گھر یہ آنگن چمک اٹھے گا
ہر ایک چہرہ دمک اٹھے گا

فیروز ناطق خسرو

نظم

کبھی جب لفظ آزادی کا سچا ترجماں ہوگا
تو پھر یہ ہند خوابوں کا مرے ہندوستاں ہوگا
ابھر آئے گا خودداری کا جذبہ ملک والوں کا
فقط ایثار ہوگا مدعا ان خوش خیالوں کا
نہ ہوگی چور بازاری نہ عیاری نہ مکاری
نہ یہ باقی رہے گی رشوتوں کی گرم بازاری
حکومت کا جو ڈھانچہ ہے بدل جائے گا یہ یکسر
کہ اخراجات ہیں جو آج کل ہو جائیں گے کمتر
حکومت میں سبھی اہل ہنر کے قدرداں ہوں گے
جو جاہل ہیں وسائل سے نہ اپنے کامراں ہوں گے
نہ اتنے ٹیکس ہی ہوں گے کہ جن سے جان ہو دوبھر
خوشی سے ٹیکس سب دیں گے بچے گا اس قدر کھا کر
مرے ہندوستاں کے کھیت جب دیکھو ہرے ہوں گے
اناج اتنا مرے کھلیان غلے سے بھرے ہوں گے
مویشی اس قدر ہوں گے بہیں گی دودھ کی نہریں
مسرت کے سمندر میں اٹھیں گی ہر طرف لہریں
مشینوں کے لئے محتاج ہوں گے ہم نہ غیروں کے
ضرورت کا ہر اک ساماں بنے گا ملک میں اپنے
سہولت برق و ٹیلیفون کی ہوگی دیہاتوں میں
سڑک ہر گاؤں تک بن جائے گی پکی دیہاتوں میں
نکل آئیں گے کافی اس زمیں سے تیل کے چشمے
نہ ہم محتاج سونے کے رہیں گے اور نہ لوہے کے
نہ کوئی بے پڑھا لکھا نہ کوئی بے ہنر ہوگا
نہ اوروں کے لئے بیکار کوئی درد سر ہوگا
ہمارے ملک کو اک مرکز تعلیم پائیں گے
یہاں تعلیم لینے دوسرے ملکوں سے آئیں گے
جو بوڑھے ہوں گے اور محتاج انہیں سرکار پالے گی
یتیموں اور بیواؤں کو سینے سے لگا لے گی
حکومت اور پبلک کے بھلے کردار اگر ہوں گے
تو موسم اور دریا بھی رہیں گے ٹھیک ہی اپنے
ہمارے دم کا لوہا اہل قوت مان جائیں گے
جو ہیں کمزور ہر صورت میں حامی ہم کو پائیں گے
غرض یہ ہے وہ خوابوں کا مرے ہندوستاں ہوگا
نہ اک چہرے پہ جس میں فکر و وحشت کا نشاں ہوگا
نہ ہوگی بھوک کی لعنت نہ بیکاری نہ بیماری
نہ ہوگی بے ایمانی اور نہ عیاری نہ غداری
شجاعت اور جواں مردی کا پتلا ہوگا ہر انساں
محبت اور خدمت ہوگا ہر انسان کا ایماں
شفاؔ ممکن ہے ایسے دن نہ میری زیست میں آئیں
میں وہ پودا لگاؤں گا کہ نسلیں جس کا پھل کھائیں

پریم لال شفا دہلوی

نظم

اب ہماری طرف لپک رہے ہیں
اس کے منہ سے گرتا ہوا سفید جھاگ
زمین کو تری پہنچا چکا
اور اسی تر ہوتی زمین سے ایک نازک پودا
اوگ کر
بہت سارے پگھلتے ہوئے سوالوں
کے جواب
نا قابل یقین سچائی کے دوش پر
پٹریوں کے ہرے ہرے پتوں
کی خاموش چھاؤں میں پھسلتے جائیں گے

خالد غنی

نظم

میں نے تیری یاد کا لمحہ بویا تھا
خون پلایا تھا دھرتی کو
درد و غم کی کھاد بھی ڈالی
میرے آنسو کے سورج نے
ہجر کے پودے کو سینچا تھا
اور اب دیکھو
ہجر کا پودا پیڑ بنا تو
اس پر وصل کے پھول اور پھل آئے ہیں

محسن آفتاب کیلاپوری

نظم

گڑھو مت چاک پہ رکھ کے
کوئی کوزہ صراحی یا گھڑا پیالہ
تمہاری سوچ کے یہ نقش ہیں سارے
تمہاری خواہشوں کے رنگ بھر دل کش
ہمیں مٹی ہی رہنے دو
ہمیں کب چاہیے ایسی عطا
بخشی ہوئی صورت
ہمیں مٹی ہی رہنے دو
جو نم بارش سے ہو
زرخیز ہو فصلیں اگاتی ہو
ذرا سی بیج کو پودا بناتی ہو
کہ وہ پودا شجر بن کر
تمہاری رہ گزر کو چھاؤں دیتا ہے
وہی رستہ تمہاری منزلیں آسان کرتا ہے
ہمیں مٹی ہی رہنے دو
نمائش کے سجاوٹ کے
ہمیں سامان کیوں ہونا
نمو سے کیوں ہمیں محروم کرتے ہو
تمہارے پاؤں کے نیچے زمیں قائم رہے جاناں
ہمیں مٹی ہی رہنے دو

کہکشاں تبسم

نظم

مرغی نے اک دانہ پایا
جھٹ اپنے بچوں کو بلایا
بچوں نے جب دانہ دیکھا
ہر بچہ دانے پر لپکا
میں کھاؤں گا میں کھاؤں گا
مرغی بولی توبہ توبہ
آپس میں یہ جھگڑا کیسا
کوئی ایسی راہ نکالیں
سب جی بھر کر دانہ کھا لیں
آؤ مل کر مٹی کھودیں
مٹی میں یہ دانہ بو دیں
لو جی ہم نے بو دیا دانہ
پانی دیتے ہیں روزانہ
دانہ پھوٹا بن گیا پودا
نازک نازک پیارا پیارا
اک پودے میں جتنے تنکے
قدرت ہی نے اگائے گن کے
ہر تنکے پر اک اک بالی
کوئی تنکا بھی نہیں خالی
رحم کیا پھر میرے خدا نے
ہر تنکے میں بھر دئے دانے
سورج نے پودے کو سکھایا
بالی میں دانوں کو پکایا
صبح سویرے مرغی آئی
چھاج درانتی چھلنی لائی
کاٹا کوٹا پھٹکا چھانا
جمع کیا پھر اک اک دانہ
دانوں کا اک ڈھیر لگایا
پھر اپنے بچوں کو بلایا
آؤ پیارے بچو آؤ
اپنی محنت کا پھل کھاؤ
مل کر کھاؤ خوشی مناؤ
اپنے رب کے نغمے گاؤ
ہم بھی ایسی فصل اگائیں
ایک دانے کے سو سو پائیں
سب کے سب جی بھر کر کھائیں
اپنے رب کے نغمے گائیں

محمد اسحاق جلالپوری

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے