Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "paudaa"

Nazm MATCHES FOR "paudaa"

Nazm

jugnu

ye shaaKH-saar ke jhuulo.n me.n pe.ng pa.Dte hu.e
ye laakho.n pattiyo.n kaa naachnaa ye raqs-e-nabaat
ye be-KHudii-e-musarrat ye vaalihaana raqs
ye taal-sam ye chhamaa-chham ki kaan bajte hai.n
havaa ke dosh pe kuchh uudii uudii shaklo.n kii
nashe me.n chuur sii parchhaa.iyaa.n thiraktii hu.ii
ufuq pe Duubte din kii jhapaktii hai.n aa.nkhe.n
KHamosh soz-e-daruu.n se sulag rahii hai ye shaam!
mire makaan ke aage hai ek chau.Daa sahn vasii.a
kabhii vo ha.nstaa nazar aataa hai kabhii vo udaas
isii ke biich me.n hai ek pe.D piipal kaa
sunaa hai mai.n ne buzurgo.n se ye ki umr us kii
jo kuchh na hogii to hogii qariib chhiyaanve saal
chhi.Dii thii hind me.n jab pahlii ja.ng-e-aazaadii
jise dabaane ke baa'd us ko Gadr kahne lage
ye ahl-e-hind bhii hote hai.n kis qadar ma.asuum
vo daar-o-giir vo aazaadii-e-vatan kii ja.ng
vatan se thii ki Ganiim-e-vatan se Gaddaarii
biphar ga.e the hamaare vatan ke piir o javaa.n
dayaar-e-hind me.n ran pa.D gayaa thaa chaar taraf
usii zamaane me.n kahte hai.n mere daadaa ne
jab arz-e-hind si.nchii KHuun se ''sapuuto.n'' ke
miyaan-e-sahn lagaayaa thaa laa ke ik paudaa
jo aab-o-aatish-o-KHaak-o-havaa se paltaa hu.aa
KHud apne qad se ba-josh-e-numuu nikaltaa hu.aa
fusuun-e-ruuh banaatii rago.n me.n chaltaa hu.aa
nigaah-e-shauq ke saa.ncho.n me.n roz Dhaltaa hu.aa
sunaa hai raaviyo.n se diidanii thii us kii uThaan
har ik ke dekhte hii dekhte cha.Dhaa parvaan
vahii hai aaj ye chhitnaar pe.D piipal kaa
vo Tahniyo.n ke kamanDal liye jaTaadhaarii
zamaana dekhe hu.e hai ye pe.D bachpan se
rahii hai is ke liye daaKHlii kashish mujh me.n
rahaa huu.n dekhtaa chup-chaap der tak us ko
mai.n kho gayaa huu.n ka.ii baar is nazaare me.n
vo us kii gahrii ja.De.n thii.n ki zindagii kii ja.De.n?
pas-e-sukuun-e-shajar ko.ii dil dha.Daktaa thaa
mai.n dekhtaa thaa use hastii-e-bashar kii tarah
kabhii udaas kabhii shaadmaa.n kabhii gambhiir
fazaa kaa surma.ii rang aur ho chalaa gahraa
ghulaa ghulaa saa falak hai dhu.aa.n dhu.aa.n sii hai shaam
hai jhuTpuTaa ki ko.ii azhdahaa hai maa.il-e-KHvaab
sukuut-e-shaam me.n darmaandagii kaa aalam hai
rukii rukii sii kisii soch me.n hai mauj-e-sabaa

Firaq Gorakhpuri
Nazm

hubb-e-watan

ai dil ai banda-e-vatan hoshiyaar
KHvaab-e-Gaflat se ho zaraa bedaar
o sharaab-e-KHudii ke matvaale
ghar kii chaukhaT ke chuumne vaale
naam hai kyaa isii kaa hubb-e-vatan
jis kii tujh ko lagii hu.ii hai lagan
kabhii bachcho.n kaa dhyaan aataa hai
kabhii yaaro.n kaa Gam sataataa hai
yaad aataa hai apnaa shahr kabhii
lau kabhii ahl-e-shahr kii hai lagii
naqsh hai.n dil pe kuucha-o-baazaar
phirte aa.nkho.n me.n hai.n dar-o-diivaar
kyaa vatan kyaa yahii mohabbat hai
ye bhii ulfat me.n ko.ii ulfat hai
is me.n insaa.n se kam nahii.n hai.n darind
is se KHaalii nahii.n chairnd o parind
Tuk.De hote hai.n sang Gurbat me.n
suukh jaate hai.n ruukh furqat me.n
jaa ke kaabul me.n aam kaa paudaa
kabhii parvaan cha.Dh nahii.n saktaa
aa ke kaabul se yaa.n bihii-o-anaar
ho nahii.n sakte baarvar zinhaar
machhlii jab chhuuTtii hai paanii se
haath dhotii hai zindagaanii se
aag se jab hu.aa samundar duur
us ko jiine kaa phir nahii.n maqduur
gho.De jab khet se bichha.Dte hai.n
jaan ke laale un ke pa.Dte hai.n
gaa.e, bhai.ns uu.nT ho yaa bakrii
apne apne Thikaane KHush hai.n sabhii
kahiye hubb-e-vatan isii ko agar
ham se haivaa.n nahii.n hai.n kuchh kam-tar
hai ko.ii apnii qaum kaa hamdard
nau-e-insaa.n kaa samjhe.n jis ko fard
jis pe itlaaq-e-aadmii ho sahiih
jis ko haivaa.n pe de sake.n tarjiih
qaum par ko.ii zad na dekh sake
qaum kaa haal-e-bad na dekh sake
qaum se jaan tak aziiz na ho
qaum se ba.Dh ke ko.ii chiiz na ho
samjhe un kii KHushii ko raahat-e-jaa.n
vaa.n jo nau-roz ho to iid ho yaa.n
ra.nj ko un ke samjhe maaya-e-Gam
vaa.n agar sog ho to yaa.n maatam
bhuul jaa.e sab apnii qadr-e-jaliil
dekh kar bhaa.iyo.n ko KHvaar-o-zaliil
jab pa.De un pe gardish-e-aflaak
apnii aasaa.isho.n pe Daal de KHaak

Altaf Hussain Hali
Nazm

zamana KHuda hai

mere sehan me.n ek kam-sin banafshe kaa paudaa hai
tayyaara ko.ii kabhii us ke sar par se guzre
to vo muskuraataa hai aur lahlahaataa hai
goyaa vo tayyaara, us kii mohabbat me.n
ahd-e-vafaa ke kisii jabr-e-taaqat-rubaa hii se guzraa!
vo KHush-emtimaadii se kahtaa hai
lo dekho, kaise isii ek rassii ke dono.n kinaaro.n
se ham tum ba.ndhe hai.n!
ye rassii na ho to kahaa.n ham me.n tum me.n
ho paidaa ye raah-e-visaal?
magar hijr ke in vasiilo.n ko vo dekh saktaa nahii.n
jo saraasar azal se abad tak tane hai.n!
jahaa.n ye zamaana hanuuz-e-zamaana
faqat ik girah hai!

Noon Meem Rashid
Nazm

shaKHen

thaa to sarsabz, vo paudaa to haraa thaa
aur tandurust thii.n shaaKHe.n bhii
magar us kaa ko.ii qad na nikal paayaa thaa
go bahut saal vo sii.nchaa bhii gayaa
mere maalii ko shikaayat thii
kabhii phuul na aa.e us par

Gulzar
Nazm

mera bap

khulii fazaa me.n saaf havaa ke jaisaa vo
baarish ke paanii ke jaisaa vo
gahraa thaa miTTii se rishta pairo.n kaa
us rishte ke biich na aa.ii chappal bhii
gha.Dii na baa.ndhii kabhii kalaa.ii par us ne
suuraj-taare vaqt use batlaate the
apne bal par apnii dhun me.n rahtaa thaa
nahii.n kisii se gaa.nv me.n vo Dartaa thaa
naam kii KHvaahish thii na use pahchaan kii thii
bas apne kaamo.n se matlab rakhtaa thaa
vo daana thaa vo miTTii thaa
vo paudaa thaa vo mausam thaa
vo sachchaa KHaalis insaan thaa
jaise aadam aur havvaa the
vo tanhaa thaa
ek ba.De se ghar me.n tanhaa rahtaa thaa
bhai.nse.n us ke saath thii.n
us kii baat samajhtii thii.n
vo bhii un kii hii bhaashaa me.n un se baate.n kartaa thaa
ghar par aksar lagaa ke taalaa yuu.nhii saa
khaliyaano.n me.n rahne vaalaa baap miraa
kheto.n kheto.n basne vaalaa baap miraa
aam kii chhaa.nv me.n sone vaalaa baap miraa
ab miTTii me.n sotaa hai
aam ke pe.D kii KHushk ja.Do.n me.n rotaa hai

Shakeel Azmi
Nazm

jap

aa mere andar aa
pavitra mahraan ke paanii
ThanDe miiThe maTyaale paanii
maTiyaale jiivan rang jal
dho de saaraa krodh kapaT
shahro.n kii dishaa.o.n kaa sab chhal
yuu.n sii.nch mujhe kar de merii miTTii jal-thal
tire tal kii kaalii chiknii miTTii se
maathe par tilak lagaa.uu.n
haath jo.D Da.nDvat karuu.n
o man ke bhed se gahre
haule haule saa.ns khii.nchte
om samaan amar
o mahaan saagar
mai.n utrii tere ThanDe jal me.n kamar kamar
tere ThanDe miiThe mehrbaan paanii se mu.nh dho luu.n
aur dho luu.n aa.nsuu
khaare aa.nsuu
tere miiThe paanii se dho luu.n
o mahaan maTiyaale saagar aa
sun mirii kathaa
mai.n ba.Dii abhaagan bhaag meraa
bedard haath me.n rahaa sadaa
TuuTaa meraa miTTii se naata
kaise TuuTaa
ik aa.ndhii ba.Dii bhayaanak laal chu.Dail
mujhe le u.Dii
uThaa kar paTkaa us ne kahaa.n se kahaa.n
tere charno.n me.n siis jhukaatii ek akelii jaan
mere saath meraa ko.ii miit nahii.n
ko.ii rang ruup ko.ii priit nahii.n
mirii an-ga.Dh phiikii murjhaatii bolii me.n ko.ii sa.ngiit nahii.n
mirii pii.Dhiyo.n ke biite yug mere saath nahii.n
bas ik nirda.ii dharam hai
jis kaa bharam nahii.n
vo dharam jo kahtaa hai miTTii mirii bairan hai
jo mujhe sikhaataa hai saagar meraa dushman hai
haa.n duur kahii.n
aakaash kii uu.nchaa.ii se pare
rahtaa hai KHudaa
itnaa ruukhaa
miTTii se jo.D nahii.n jis kaa
sab naate priit aur bair ke us kii kaaran mai.n kaise jo.Duu.n
mai.n miTTii meraa janam miTTii
mai.n miTTii ko kaise chho.Duu.n
o maTiyaale balvaan mahaa-saagar
mai.n ukh.Dii dhartii se
bhagvaan miraa ras suukh gayaa
phir bhii suntii huu.n apne lahuu me.n biite samay kii narm dhamak
vo samay jo mere janam se pahle biit gayaa
mere kaano.n me.n
ik shor hai jhar-jhar bahte naddii naalo.n kaa
aur ko.ii mahak ba.Dii be-kal hai
jo guu.nj banii mirii chhaatii se Takraatii hai
o mahaan saagar
jiivan-ras de
apne tal me.n jal-paudaa ban kar ja.D lene de
sadaa jiye
o mahaan saagar sindhuu
tuu sadaa jiye
aur ji.e.n tire paanii me.n phisaltii machhliyaa.n
shaant sukhii yuu.nhii
tire paanii me.n naav khete
tire baalak sadaa ji.e.n
o paalan-haar hamaare
dhartii ke rakhvaale
ann-daataa
tirii dhartii
narm retiilii mehrbaan sindh kii dhartii
sadaa jiye

Fahmida Riaz
Nazm

ek pauda aur ghas

ittifaaqan ek paudaa aur ghaas
baaG me.n dono.n kha.De hai.n paas paas
ghaas kahtii hai ki ai mere rafiiq
kyaa anokhaa is jahaa.n kaa hai tariiq
hai hamaarii aur tumhaarii ek zaat
ek qudarat se hai dono.n kii hayaat
miTTii aur paanii havaa aur raushnii
vaaste dono.n ke yaksaa.n hai banii
tujh pe lekin hai inaayat kii nazar
phe.nk dete hai.n mujhe ja.D khod kar
sar uThaane kii mujhe fursat nahii.n
aur havaa khaane kii bhii ruKHsat nahii.n
kaun detaa hai mujhe yaa.n phailne
khaa liyaa gho.De gad.he yaa bail ne
tujh pe mu.nh Daale jo ko.ii jaanvar
us kii lii jaatii hai DanDe se KHabar
ole paale se bachaate hai.n tujhe
kyaa hii izzat se ba.Dhaate hai.n tujhe
chaahte hai.n tujh ko sab karte hai.n pyaar
kuchh pataa us kaa bataa ai dost-daar
us se paude ne kahaa yuu.n sar hilaa
ghaas sab sachchaa hai teraa ye gila
mujh me.n aur tujh me.n nahii.n kuchh bhii tamiiz
sirf saaya aur meva hai aziiz
faa.eda ik roz mujh se paa.e.nge
saa.e me.n baiThe.nge aur phal khaa.e.nge
hai yahaa.n izzat kaa sahraa us ke sar
jis se pahu.nche naf.a sab ko besh-tar

Ismail Merathi
Nazm

mujhe achchha nahin lagta

ko.ii apnaa kabhii jab dekh kar mu.nh mo.D letaa hai
ko.ii paudaa binaa paanii ke jab dam to.D detaa hai

Hina Rizvi
Nazm

juhi ka pauda

mai.n ik juuhii kaa paudaa huu.n
ye bhii mujh ko yaad nahii.n hai
mai.n is raahguzar par kab se
bas yuu.n hii KHaamosh kha.Daa huu.n

Rahi Masoom Raza
Nazm

paude

nazar ko lubhaate hai.n paudo.n ke manzar
hasii.n aur naazuk hai.n phuulo.n ke paikar
samar un ke bante hai.n sab kii Gizaa.e.n
ye bante hai.n biimaariyo.n kii davaa.e.n
hame.n miltii hai paudo.n se oxigen
ugaa.o inhe.n dosto aa.ngan aa.ngan
har ik paudaa KHaarij kare aabii zarre
tanaffus me.n ye carbon jazb kar le
hasiin aur dilkash hai paudo.n kii duniyaa
karo roz bachcho tum in kaa nazaara
inhii.n se hai qariyo.n me.n logo.n ko raahat
ki paudo.n se shahro.n kii ba.Dhtii hai ziinat
ye baat aaj 'haafiz' kii ai bachcho maano
ki maktab ke aa.ngan me.n paude ugaa.o

Hafiz Karnataki
Nazm

insan ki fariyaad

haa.n ai masaaf-e-hastii! mat puuchh mujh se kyaa huu.n
ik arsa-e-balaa huu.n ik luqma-e-fanaa huu.n
majbuuriyo.n ne Daalaa gardan me.n merii phandaa
KHud-karda-e-vafaa huu.n jaa.n-daada-e-razaa huu.n
sayyaad haadse kaa kartaa hai meraa piichhaa
murG-e-buriida-par huu.n said-e-shikasta-paa huu.n
hai zaat merii majma.a saarii buraa.iyo.n kaa
kahne ko mai.n ba.Daa huu.n lekin bahut buraa huu.n
aazaadiyo.n kii mujh par tohmat hii hai saraasar
mai.n qaidii-e-havas huu.n mai.n banda-e-havaa huu.n
ik baat ho bataa.uu.n ik dard ho sunaa.uu.n
ro.uu.n bhalaa kahaa.n tak kab tak pa.Daa karaahuu.n
kam-baKHt dil kuchh aisaa mai.n saath le ke aayaa
ik lamha jis ke haatho.n duniyaa me.n sukh na paayaa
jo josh is me.n uTThaa haalaat ne dabaayaa
jo sho.ala is me.n bha.Dkaa taqdiir ne bujhaayaa
ummiid kaa ye Guncha khilte kabhii na dekhaa
ye aarzuu kaa paudaa phaltaa nazar na aayaa
go is me.n maujzan thii qaum o vatan kii ulfat
lekin Garaz ne is ko kuchh aur hii sikhaayaa
hotii nahii.n rasaa.ii ummiid ke ufuq tak
tuul-e-amal ne is ko ik jaal me.n pha.nsaayaa
kii rahbarii KHirad ne har-chand rahnumaa.ii
is juhd par bhii lekin khultii nahii.n sachchaa.ii
paayaa na mai.n ne ab tak maqsad kaa apne saahil
kii bahr-e-ma.arfat me.n din raat aashnaa.ii
is justujuu me.n mai.n ne kii sair-e-tuur-o-aiman
parbat ko ghar banaayaa jangal se lau lagaa.ii
mandir ko jaa ke dekhaa girjaa me.n jaa ke Dhuu.nDaa
masjid ko chhaan maaraa us kii na diid paa.ii
jogii kaa ruup dhaaraa ban me.n kiyaa guzaaraa
tan par bhabhuut mal kar dhuunii bahut ramaa.ii
jap tap me.n umr apnii mai.n ne basar kii aksar
ban ban ke piir-e-raahib jaa KHaanqaah basaa.ii
suufii bhii ban ke dekhaa aur rind-e-be-riyaa bhii
kar naara-e-anaa-al-haq ik khalbalii machaa.ii
phirtii hai.n maarii maarii mushtaaq-e-jalva aa.nkhe.n
par ik jhalak se ba.Dh kar detaa nahii.n dikhaa.ii
uTh jaa nazar se merii haa.n ai hijaab-e-hastii
husn-e-azal nihaa.n hai zer-e-naqaab-e-hastii
ye zindagii-e-insaa.n ik KHvaab hai pareshaa.n
bedaarii-e-adam hai ta.abiir-e-KHvaab-e-hastii
dekhe.n agar to kyuu.n-kar ham jalva-e-ma.aarif
tuu zulmat-e-nazar hai ai aaftaab-e-hastii
taskii.n ko zahr-e-qaatil aab-o-havaa-e-aalam
raahat kaa dushman-e-jaa.n har inqalaab-e-hastii
ai tishna-e-haqiiqat dhoke me.n tuu na aanaa
ik daam-e-pur-KHatar hai mauj-e-saraab-e-hastii
chaahe agar rihaa.ii pesh-az-fanaa fanaa ho
paadaash-e-jurm-e-hastii hai ye azaab-e-hastii

Ghulam Bhik Nairang
Nazm

papa miyan

paudaa jo kal thaa ab shajar-e-saaya-daar hai
paapaa miyaa.n ke baaG me.n kaisii bahaar hai

Syeda Farhat
Nazm

nanha pauda

garche paudaa abhii hu.n chhoTaa saa
aarzuu dil me.n hai mire kyaa kyaa
aa hii jaa.egii rut javaanii kii
ya.anii mujh par bhii shaadmaanii kii
Daalii Daalii mirii harii hogii
aur phal phuul se bharii hogii
faiz hogaa jahaa.n me.n aam miraa
KHidmat-e-KHalq hogaa kaam miraa
saarii chi.Diyo.n ko mai.n bulaa.uu.ngaa
KHuub meve unhe.n khilaa.uu.ngaa
gho.nsle mujh pe vo banaa.e.ngii
raag chhe.De.ngii chahchahaa.e.ngii
jo bhii aa.egaa un kaa karne shikaar
mere patto.n kii dekhegaa diivaar
garmiyo.n me.n musaafir aa.e.nge
mere saa.e me.n chain paa.e.nge
bachche aa.e.nge jhuulaa jhuule.nge
giit gaa ke KHushii me.n phuule.nge
vo chalaa.e.nge mujh pe jab patthar
is ke badle mai.n in ko duu.ngaa samar
ek KHvaahish hai aur dil me.n ba.Dii
kaash vo bhii kare KHudaa puurii
suukh jaa.uu.n to lak.Diyo.n se mirii
KHuubsuurat sii ik bane kursii
us pe baiThe faqat vahii la.Dkaa
jis ke sar me.n ho ilm kaa saudaa
dil me.n apne jo mai.n ne Thaanii hai
us kii ye muKHtasar kahaanii hai
mai.n bhii bachcha huu.n tum bhii bachche ho
mai.n bhii sachchaa huu.n tum bhii sachche ho
kyaa banaayaa hai zindagii kaa plaan
mai.n to rakhtaa huu.n tum se nek gumaan
aaj chhoTe ho kal jo hoge javaa.n
kaun se kaam tum karoge yahaa.n

Zafar Kamali
Nazm

mohabbat

mohabbat aisaa chashma hai
jo suukhaa hii nahii.n kartaa
mohabbat aisaa paudaa hai
jo patjha.D me.n bhii phaltaa hai
mohabbat aisaa dariyaa hai
kabhii biphraa nahii.n kartaa
mohabbat aisaa lamha hai
jo hamesha amar rahtaa hai
mohabbat aisaa jazba hai
jo mar kar bhii nahii.n martaa
mohabbat aisaa sapnaa hai
jo kabhii puuraa nahii.n hotaa
mohabbat aisaa bachcha hai
ki jis kii zid ke aage
har ko.ii majbuur hotaa hai

Amin Kunjahi
Nazm

ye raat hogi tawil kitni

mujhe yaqii.n hai ki kal ke suuraj kii muskuraahaT
zamii.n ke mahruum baasiyo.n ko
na.ii sahar kaa payaam degii
labo.n ko izn-e-kalaam degii
mujhe yaqii.n hai vo din bhii aa.egaa
jab uruus-e-chaman ke qadmo.n kii dhiimii aahaT sunaa.ii degii
bahaar lamho.n kii gungunaahaT sunaa.ii degii
tuyuur chahke.nge baaliyo.n par
gulaab mahke.nge Daaliyo.n par
kabhii to dekhegaa sar uThaa kar
chaman me.n nanhaa saa ko.ii paudaa
kabhii to jhaa.nkegaa baadalo.n kaa haTaa ke ghu.nghaT
kahii.n ye chhoTaa saa ik sitaaraa
kabhii to niklegaa chaa.nd puuraa
ye ghar ye aa.ngan chamak uThegaa
har ek chehra damak uThegaa

Firoz Natiq Khusro
Nazm

mere KHwabon ka hindostan

kabhii jab lafz-e-aazaadii kaa sachchaa tarjumaa.n hogaa
to phir ye hind KHvaabo.n kaa mire hindostaa.n hogaa
ubhar aa.egaa KHuddaarii kaa jazba mulk vaalo.n kaa
faqat iisaar hogaa mudda.aa in KHush-KHayaalo.n kaa
na hogii chor-baazaarii na ayyaarii na makkaarii
na ye baaqii rahegii rishvato.n kii garm-baazaarii
hukuumat kaa jo Dhaa.ncha hai badal jaa.egaa ye yaksar
ki iKHraajaat hai.n jo aaj-kal ho jaa.e.nge kamtar
hukuumat me.n sabhii ahl-e-hunar ke qadr-daa.n ho.nge
jo jaahil hai.n vasaa.il se na apne kaamraa.n ho.nge
na itne tax hii ho.nge ki jin se jaan ho duubhar
KHushii se tax sab de.nge bachegaa is qadr khaa kar
mire hindostaa.n ke khet jab dekho hare ho.nge
anaaj itnaa mire khaliyaan Galle se bhare ho.nge
maveshii is qadar ho.nge bahe.ngii duudh kii nahre.n
masarrat ke samundar me.n uThe.ngii har taraf lahre.n
mashiino.n ke liye muhtaaj ho.nge ham na Gairo.n ke
zaruurat kaa har ik saamaa.n banegaa mulk me.n apne
suhuulat barq-o-telephone kii hogii dehaato.n me.n
sa.Dak har gaa.nv tak ban jaa.egii pakkii dehaato.n me.n
nikal aa.e.nge kaafii is zamii.n se tel ke chashme
na ham muhtaaj sone ke rahe.nge aur na lohe ke
na ko.ii be-pa.Dhaa-likhaa na ko.ii be-hunar hogaa
na auro.n ke liye be-kaar ko.ii dard-e-sar hogaa
hamaare mulk ko ik markaz-e-ta.aliim paa.e.nge
yahaa.n ta.aliim lene duusre mulko.n se aa.e.nge
jo buu.Dhe ho.nge aur mohtaaj unhe.n sarkaar paalegii
yatiimo.n aur bevaa.o.n ko siine se lagaa legii
hukuumat aur public ke bhale kirdaar agar ho.nge
to mausam aur dariyaa bhii rahe.nge Thiik hii apne
hamaare dam kaa lohaa ahal-e-quvvat maan jaa.e.nge
jo hai.n kamzor har suurat me.n haamii ham ko paa.e.nge
Garaz ye hai vo KHvaabo.n kaa mire hindostaa.n hogaa
na ik chehre pe jis me.n fikr-o-vahshat kaa nishaa.n hogaa
na hogii bhuuk kii la.anat na bekaarii na biimaarii
na hogii be-iimaanii aur na ayyaarii na Gaddaarii
shujaa.at aur javaa.n-mardii kaa putlaa hogaa har insaa.n
mohabbat aur KHidmat hogaa har insaan kaa iimaa.n
'shifaa' mumkin hai aise din na merii ziist me.n aa.e.n
mai.n vo paudaa lagaa.uu.ngaa ki nasle.n jis kaa phal khaa.e.n

Prem Lal Shifa Dehlvi
Nazm

nili qindil

ab hamaarii taraf lapak rahe hai.n
us ke mu.nh se girtaa hu.aa safed jhaag
zamiin ko tarii pahu.nchaa chukaa
aur isii tar hotii zamiin se ek naazuk paudaa
uug kar
bahut saare pighalte hu.e savaalo.n
ke javaab
naa-qaabil-e-yaqiin sachchaa.ii ke dosh par
pTriyo.n ke hare hare patto.n
kii KHaamosh chhaa.nv me.n phisalte jaa.e.nge

Khalid Ghani
Nazm

wasl

mai.n ne terii yaad kaa lamha boyaa thaa
KHuun pilaayaa thaa dhartii ko
dard-o-Gam kii khaad bhii Daalii
mere aa.nsuu ke suuraj ne
hijr ke paude ko sii.nchaa thaa
aur ab dekho
hijr kaa paudaa pe.D banaa to
us par vasl ke phuul aur phal aa.e hai.n

Mohsin Aftab Kelapuri
Nazm

hamein miTTi hi rahne do

ga.Dho mat chaak pe rakh ke
ko.ii kuuza suraahii yaa gha.Daa pyaala
tumhaarii soch ke ye naqsh hai.n saare
tumhaarii KHvaahisho.n ke rang bhar dilkash
hame.n miTTii hii rahne do
hame.n kab chaahiye aisii ataa
baKHshii hu.ii suurat
hame.n miTTii hii rahne do
jo nam baarish se ho
zarKHez ho fasle.n ugaatii ho
zaraa sii biij ko paudaa banaatii ho
ki vo paudaa shajar ban kar
tumhaarii rahguzar ko chhaa.nv detaa hai
vahii rasta tumhaarii manzile.n aasaan kartaa hai
hame.n miTTii hii rahne do
numaa.ish ke sajaavaT ke
hame.n saamaan kyuu.n honaa
numuu se kyuu.n hame.n mahruum karte ho
tumhaare paa.nv ke niiche zamii.n qaa.em rahe jaanaa.n
hame.n miTTii hii rahne do

Kahkashan Tabassum
Nazm

ek ke badle sau sau paen

murGii ne ik daana paayaa
jhaT apne bachcho.n ko bulaayaa
bachcho.n ne jab daana dekhaa
har bachcha daane par lapkaa
mai.n khaa.uu.ngaa mai.n khaa.uu.ngaa
murGii bolii tauba tauba
aapas me.n ye jhag.Daa kaisaa
ko.ii aisii raah nikaale.n
sab jii bhar kar daana khaa le.n
aa.o mil kar miTTii khode.n
miTTii me.n ye daana bo de.n
lo jii ham ne bo diyaa daana
paanii dete hai.n rozaana
daana phuuTaa ban gayaa paudaa
naazuk naazuk pyaaraa pyaaraa
ik paude me.n jitne tinke
qudrat hii ne ugaa.e gin ke
har tinke par ik ik baalii
ko.ii tinkaa bhii nahii.n KHaalii
rahm kiyaa phir mere KHudaa ne
har tinke me.n bhar diye daane
suuraj ne paude ko sukhaayaa
baalii me.n daano.n ko pakaayaa
sub.h savere murGii aa.ii
chhaaj daraa.ntii chhalnii laa.ii
kaaTaa kuuTaa phaTkaa chhaanaa
jam.a kiyaa phir ik ik daana
daano.n kaa ik Dher lagaayaa
phir apne bachcho.n ko bulaayaa
aa.o pyaare bachcho aa.o
apnii mehnat kaa phal khaa.o
mil kar khaa.o KHushii manaa.o
apne rab ke naGme gaa.o
ham bhii aisii fasl ugaa.e.n
ek daane ke sau sau paa.e.n
sab ke sab jii bhar kar khaa.e.n
apne rab ke naGme gaa.e.n

Mohammad Ishaq Jalalpuri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now