کی تلاش کا نتیجه | موضو - نظم, صفحہ vaa.iz

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "vaa.iz"

نظم کے متعلقہ نتیجہ "vaa.iz"

نظم

دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں

علامہ اقبال

نظم

سچ کہہ دوں اے برہمن گر تو برا نہ مانے
تیرے صنم کدوں کے بت ہو گئے پرانے
اپنوں سے بیر رکھنا تو نے بتوں سے سیکھا
جنگ و جدل سکھایا واعظ کو بھی خدا نے
تنگ آ کے میں نے آخر دیر و حرم کو چھوڑا
واعظ کا وعظ چھوڑا چھوڑے ترے فسانے
پتھر کی مورتوں میں سمجھا ہے تو خدا ہے
خاک وطن کا مجھ کو ہر ذرہ دیوتا ہے

علامہ اقبال

نظم

وہ چائے کی پیالی پہ یاروں کے جلسے
وہ سردی کی راتیں وہ زلفوں کے قصے
کبھی تذکرے حسن شعلہ رخاں کے
محبت ہوئی تھی کسی کو کسی سے
ہر اک دل وہاں تھا نظر کا نشانہ
بہت یاد آتا ہے گزرا زمانہ
بہت اپنا انداز تھا لاابالی
کبھی تھے جلالی کبھی تھے جمالی
کبھی بات میں بات یوں ہی نکالی
سر راہ کوئی قیامت اٹھا لی
کسی کو لڑانا کسی کو بچانا
بہت یاد آتا ہے گزرا زمانہ
کبھی سچی باتوں کو جھوٹا بتایا
کبھی جھوٹی باتوں کو سچ کر دکھایا
کبھی راز دل کہہ کے اس کو چھپایا
کبھی دوستوں میں یوں ہی کچھ اڑایا
بتا کر چھپانا چھپا کر بتانا
بہت یاد آتا ہے گزرا زمانہ
کبھی بزم احباب میں شعلہ افشاں
کبھی یونین میں تھے شمشیر براں
کبھی بزم واعظ میں تھے پا بہ جولاں
بدلتے تھے ہر روز تقدیر دوراں
جہاں جیسی ڈفلی وہاں ویسا گانا
بہت یاد آتا ہے گزرا زمانہ
زمانہ تھا وہ ایک حیوانیت کا
وہ دور ملامت تھا شیطانیت کا
ہمیں درد تھا ایک انسانیت کا
اٹھائے علم ہم تھے حقانیت کا
بڑھے جا رہے تھے مگر باغیانہ
بہت یاد آتا ہے گزرا زمانہ
مقابل میں آئے جسارت تھی کس کو
کوئی روک دے بڑھ کے ہمت تھی کس کو
پکارے کوئی ہم کو طاقت تھی کس کو
کہ ہر بوالہوس کو تھے ہم تازیانہ
بہت یاد آتا ہے گزرا زمانہ
خیالات پر شوق کا سلسلہ تھا
بدل دیں زمانے کو وہ حوصلہ تھا
ہر اک دل میں پیدا نیا ولولہ تھا
ہر اک گام احباب کا قافلہ تھا
ادھر دعویٰ کرنا ادھر کر دکھانا
بہت یاد آتا ہے گزرا زمانہ
وہ شہہ راہ میرس کے پر پیچ چکر
وہ شمشاد بلڈنگ پہ اک شور محشر
وہ مبہم سی باتیں وہ پوشیدہ نشتر
وہ بے فکر دنیا وہ لفظوں کے دفتر
کہ جن کا سرا تھا نہ کوئی ٹھکانہ
بہت یاد آتا ہے گزرا زمانہ
کسی کو ہوئی تھی کسی سے محبت
کوئی کر رہا تھا کسی کی شکایت
غرض روز ڈھاتی تھی تازہ قیامت
کسی کی شباہت کسی کی ملامت
کسی کی تسلی کسی کا ستانا
بہت یاد آتا ہے گزرا زمانہ
کوئی غم زدہ تھا کوئی ہنس رہا تھا
کوئی حسن ناہید پر مر مٹا تھا
کوئی چشم نرگس کا بیمار سا تھا
کوئی بس یوں ہی تاکتا جھانکتا تھا
کبھی چوٹ کھانا کبھی مسکرانا
بہت یاد آتا ہے گزرا زمانہ
وہ ہر جنوری میں نمائش کے چرچے
وہ پر شوق آنکھیں وہ حیران جلوے
وہ چکر پہ چکر تھے بارہ دری کے
وہ حسرت کہ سو بار مل کر بھی ملتے
ہزاروں بہانوں کا وہ اک بہانا
بہت یاد آتا ہے گزرا زمانہ
وہ رخ آفتابی پہ ابرو ہلالی
وہ تمثال سیمیں وہ حسن مثالی
شگوفوں میں کھیلی گلابوں میں پالی
وہ خود اک ادا تھی ادا بھی نرالی
نگاہیں بچا کر نگاہیں ملا کر
بہت یاد آتا ہے گزرا زمانہ
وہ ہرچند مجھ کو نہیں جانتی تھی
مگر میری نظروں کو پہچانتی تھی
اگرچہ مرے دل میں وہ بس گئی تھی
مگر بات بس دل کی دل میں رہی تھی
مگر آج احباب سے کیا چھپانا
بہت یاد آتا ہے گزرا زمانہ
وہ اک شام برسات کی دن ڈھلا تھا
ابھی رات آئی نہ تھی جھٹپٹا تھا
وہ باد بہاری سے اک گل کھلا تھا
دھڑکتے ہوئے دل سے اک دل ملا تھا
نظر سن رہی تھی نظر کا فسانہ
بہت یاد آتا ہے گزرا زمانہ
جوانی اداؤں میں بل کھا رہی تھی
کہانی نگاہوں میں لہرا رہی تھی
محبت محبت کو سمجھا رہی تھی
وہ چشم تمنا جھکی جا رہی تھی
قیامت سے پہلے قیامت وہ ڈھانا
بہت یاد آتا ہے گزرا زمانہ
ہمیں بیتی باتیں جو یاد آ رہی تھیں
وہ مخمور نظریں جو شرما رہی تھیں
بہت عقل سادہ کو بہکا رہی تھیں
بڑی بے نیازی سے فرما رہی تھیں
انہیں یاد رکھنا ہمیں بھول جانا
بہت یاد آتا ہے گزرا زمانہ
اب وہ امنگیں نہ دل میں مرادیں
اب رہ گئیں چند ماضی کی یادیں
یہ جی چاہتا ہے انہیں بھی بھلا دیں
غم زندگی کو کہاں تک دعا دیں
حقیقت بھی اب بن گئی ہے فسانہ
بہت یاد آتا ہے گزرا زمانہ
علی گڑھ ہے بڑھ کر ہمیں کل جہاں سے
ہمیں عشق ہے اپنی اردو زباں سے
ہمیں پیار ہے اپنے نام و نشاں سے
یہاں آ گئے ہم نہ جانے کہاں سے
قسم دے کے ہم کو کسی کا بلانا
بہت یاد آتا ہے گزرا زمانہ
محبت سے یکسر ہے انجان دنیا
یہ ویران بستی پریشان دنیا
کمال خرد سے یہ حیران دنیا
خود اپنے کیے پر پشیمان دنیا
کہاں لے کے آیا ہمیں آب و دانہ
بہت یاد آتا ہے گزرا زمانہ

عابد اللہ غٓازی

نظم

اگر کوئی واعظ اپنے منبر سے
نخوت آمیز لحظے میں یہ کہے
کہ تم تو کبھی سمجھ ہی نہیں سکو گے
کہ اس قدر ہے یہ بات گہری
تو کوئی پوچھے
جو میں نہ سمجھا
تو کون سمجھائے گا
اور جس کو کبھی نہ کوئی سمجھ سکے
ایسی بات تو پھر فضول ٹھہری

جاوید اختر

نظم

سید سے آج حضرت واعظ نے یہ کہا
چرچا ہے جا بجا ترے حال تباہ کا
سمجھا ہے تو نے نیچر و تدبیر کو خدا
دل میں ذرا اثر نہ رہا لا الہ کا
ہو تجھ سے ترک صوم و صلوٰۃ و زکوٰۃ و حج
کچھ ڈر نہیں جناب رسالت پناہ کا
شیطان نے دکھا کے جمال عروس دہر
بندہ بنا دیا ہے تجھے حب جاہ کا
اس نے دیا جواب کہ مذہب ہو یا رواج
راحت میں جو مخل ہو وہ کانٹا ہے راہ کا
افسوس ہے کہ آپ ہیں دنیا سے بے خبر
کیا جانیے جو رنگ ہے شام و پگاہ کا
یورپ کا پیش آئے اگر آپ کو سفر
گزرے نظر سے حال رعایا و شاہ کا
وہ آب و تاب و شوکت ایوان خسروی
وہ محکموں کی شان وہ جلوہ سپاہ کا
آئے نظر علوم جدیدہ کی روشنی
جس سے خجل ہو نور رخ مہر و ماہ کا
دعوت کسی امیر کے گھر میں ہو آپ کی
کمسن مسوں سے ذکر ہو الفت کا چاہ کا
نوخیز دل فریب گل اندام نازنیں
عارض پہ جن کے بار ہو دامن نگاہ کا
رکئے اگر تو ہنس کے کہے اک بت حسیں
سن مولوی یہ بات نہیں ہے گناہ کا
اس وقت قبلہ جھک کے کروں آپ کو سلام
پھر نام بھی حضور جو لیں خانقاہ کا
پتلون و کوٹ و بنگلہ و بسکٹ کی دھن بندھے
سودا جناب کو بھی ہو ترکی کلاہ کا
منبر پہ یوں تو بیٹھ کے گوشے میں اے جناب
سب جانتے ہیں وعظ ثواب و گناہ کا

اکبر الہ آبادی

نظم

اک مولوی صاحب سے کہا میں نے کہ کیا آپ
کچھ حالت یورپ سے خبردار نہیں ہیں
آمادۂ اسلام ہیں لندن میں ہزاروں
ہر چند ابھی مائل اظہار نہیں ہیں
تقلید کے پھندوں سے ہوئے جاتے ہیں آزاد
وہ لوگ بھی جو داخل اصرار نہیں ہیں
جو نام سے اسلام کے ہو جاتے ہیں برہم
ان میں بھی تعصب کے وہ آثار نہیں ہیں
افسوس مگر یہ ہے کہ واعظ نہیں پیدا
یا ہیں تو بقول آپ کے دیں دار نہیں ہیں
کیا آپ کے زمرے میں کسی کو نہیں یہ درد
کیا آپ بھی اس کے لئے تیار نہیں ہیں
جھلا کے کہا یہ کہ یہ کیا سوئے ادب ہے
کہتے ہو وہ باتیں جو سزاوار نہیں ہیں
کرتے ہیں شب و روز مسلمانوں کی تکفیر
بیٹھے ہوئے کچھ ہم بھی تو بے کار نہیں ہیں

شبلی نعمانی

نظم

سڑک مسافت کی عجلتوں میں
گھرے ہوئے سب مسافروں کو
بہ‌ غور فرصت سے دیکھتی ہے
کسی کے چہرے پہ سرخ وحشت چمک رہی ہے
کسی کے چہرے سے زرد حیرت چھلک رہی ہے
کسی کی آنکھیں ہری بھری ہیں
کبیر حد سے ابھر رہا ہے
صغیر قد سے گزر رہا ہے
کسی کا ٹائر کسی کے پہیے کو کھا رہا ہے
کسی کا جوتا کسی کی چپل چبا رہا ہے
کسی کے پیروں میں آ رہا ہے کسی کا بچہ
کسی کا بچہ کسی کے شانے پہ جا رہا ہے
کوئی ٹھکانے پہ کوئی کھانے پہ جا رہا ہے
حبیب دست رقیب تھامے
غریب خانے پہ جا رہا ہے
امیر پنجرہ بنا رہا ہے
غلام کرتب دکھا رہا ہے
اور اپنے بیٹے کے ساتھ چھت پر
امین کنڈا لگا رہا ہے
نظام ٹانگہ چلا رہا ہے
کسی کلائی پہ جگمگاتی ہوئی گھڑی ہے
مگر ابھی وہ رکی ہوئی ہے
کسی کے چہرے پہ بارہ بجنے میں پانچ سیکنڈ رہ گئے ہیں
کسی کی ہاتھی نما پراڈو
سڑک سے ایسے گزر رہی ہے
سوائے اس کے کہیں بھی جیسے کوئی نہیں ہو
کسی کی مونچھیں جھکی ہوئی ہیں
کسی کی بانچھیں کھلی ہوئی ہیں
کسی کی ٹیکسی کسی کی فوکسی ملی ہوئی ہیں
کسی کے لب اور کسی کی آنکھیں سلی ہوئی ہیں
کسی کے کپڑے پھٹے ہوئے ہیں
کسی کی پگڑی چمک رہی ہے
کسی کی رنگت کسی کی ٹوپی اڑی ہوئی ہے
شریف نظریں اٹھا اٹھا کر
کمان جسموں پہ اپنی وحشت کے تیر کب سے چلا رہا ہے
نظیر نظریں چرا رہا ہے
نفیس اپنے کلف کی شکنوں کو رو رہا ہے
حکیم اپنے مطب کے شیشوں کو دھو رہا ہے
کسی کی آنکھوں کے دھندلے شیشوں میں اس کے ماضی کی جھلکیاں ہیں
کسی کی آنکھوں میں آنے والے حسین لمحوں کی مستیاں ہیں
کسی کی آنکھوں میں رت جگوں کی کچھ ارغوانی سی ڈوریاں ہیں
کسی کے کاندھے پہ اس کے خوابوں کی بوریاں ہیں
کباڑ خانے پہ باسی ٹکڑوں کی اور کتابوں کی بوریاں ہیں
بزرگ برگد کے نیچے بوڑھا کھڑا ہوا ہے
اور اس کے ہاتھوں میں ٹیپ لپٹی ہوئی چھڑی ہے
پولیس کی گاڑی پکٹ لگا کر
سڑک پہ ترچھی کھڑی ہوئی ہے
اور ایک مزدور اپنا دامن اٹھائے بے بس کھڑا ہوا ہے
اور اک سپاہی کہ اس کے نیفے میں انگلیوں کو گھما رہا ہے
وہیں پہ شاہد سیاہ چشمہ لگا کے خود کو چھپا رہا ہے
نیوز چینل کی چھوٹی گاڑی بڑی خبر کی تلاش میں ہے
دو سبزی والے بھی اپنی پھیری لگا رہے ہیں
تو پھول والے کے سر پہ پھولوں کی ٹوکری ہے
کسی کی آنکھوں میں نوکری ہے
کسی کی آنکھوں میں چھوکری ہے
وقار سر کو جھکا رہا ہے
فراز کھائی میں جا رہا ہے
تو گیلی سگریٹ کے کش لگا کر
نواب رکشا چلا رہا ہے
سلیم کنی گھما رہا ہے
وکیل وردی میں جا رہا ہے
ضمیر بغلیں بجا رہا ہے
اور ایک واعظ بتا رہا ہے
خدا کو ناراض کرنے والے جہنمی ہیں
خدا کو راضی کرو خدارا
خدا کو راضی کرو خدارا
اور اس کے آگے نصیر اکمل کمال شاداب غلام سارے
نظر جھکائے کھڑے ہوئے ہیں
کہ چشم بینا اگر کہیں ہے
تو سمجھو پاتال تک گڑھی ہے
کسی کو اے سی خریدنا ہے
کسی کو پی سی خریدنا ہے
کسی کی بس اور کسی کی بی سی نکل رہی ہے
عقیلہ خالہ کے دونوں ہاتھوں میں آٹھ تھیلے لٹک رہے ہیں
اور آتے جاتے سبھی مسافر
انہیں مسلسل کھٹک رہے ہیں
ضیا اندھیرے میں جا رہا ہے
گلاب کچرا جلا رہا ہے
عظیم مکھی اڑا رہا ہے
کلیم گٹکا چبا رہا ہے
تو گھنٹہ پیکج پہ جانے کب سے
فہیم گپیں لڑا رہا ہے
سبق مساوات کا سکھانے
وزیر گاڑی میں جا رہا ہے
ثنا ندا کو نئے لطیفے سنا رہی ہے
حنا ہتھیلی کو تکتے تکتے پرانے رستے سے آ رہی ہے
اور اپنی بھاوج کا ہاتھ تھامے
زبیدہ چیک اپ کو جا رہی ہے
وہ اپنی نظریں کبھی ادھر کو کبھی ادھر کو گھما رہی ہے
مگر کوئی شے اسے مسلسل بلا رہی رہی ہے
عجیب عجلت عجیب وحشت عجیب غفلت کا ماجرا ہے
کہوں میں کس سے مرے خدایا یہ کیسی خلقت کا ماجرا ہے
کہ اپنی مستی میں مست ہو کر
یہ سب مسافر گزر رہے
نئے مسافر ابھر رہے ہیں
سڑک جہاں تھی وہیں کھڑی ہے
مگر حقیقت بہت بڑی ہے
سڑک پہ بلی مری پڑی ہے

عمران شمشاد نرمی

نظم

یہ ہر شب سوچ کر سوتا ہوں آنے والی صبحوں میں
گلوں سے پتیوں سے اوس کی بوندیں چرانی ہیں
شہہ آکاش کی نظریں نما کرنوں سے پہلے جاگ جانا ہے
صبائے عنبریں کے لمس کو محسوس کرنا ہے
لباس سبز میں ملبوس الھڑ پتیوں کی باتیں سننی ہیں
حسیں دوشیزہ کی مسکان سی کلیوں سے دو اک بات کر لوں گا
مگر کچھ کر نہیں پاتا کہ راحت روکے رکھتی ہے
کوئی افسانہ پڑھنا ہو کسی کی شاعری پہ بات کرنی ہو
کسی تخلیق سے پہلے خیال و فکر کو آزاد رکھنا ہو
کسی سارق کسی شاطر کسی کم فہم سے سچائی کہنی ہو
بڑی معصوم شکلوں میں چھپے عیار کو مکار کو شیشہ دکھانا ہو
فقیہ وقت امیر شہر کا قزاق سے ملعون سے رشتہ بتانا ہو
مگر یہ کر نہیں سکتا مصلحت خاموش رکھتی ہے
حریم مے کدے میں خانقاہوں مٹھ مدرسوں میں
برہمن شیخ سے پیر مغاں سے ساقیوں سے اور واعظ سے
یہ اکثر سوچتا ہوں جا کے کہہ دوں میں
ریا و کبر تہی اخلاص اور بد اطواری سے تیرے
جہاں میں عشق اخوت علم اور اخلاق مرتے ہیں
مگر میں کہہ نہیں سکتا عقیدت باز رکھتی ہے
تعصب خود پسندی بغض سے کبر و حسد سے
بساط ذہن و دل کو چاہتا ہوں پاک کر لوں
زر و املاک کی خواہش سے اپنے آپ کو آزاد کر لوں
کہ جب جب سعی کرتا ہوں ہوس انکار کرتی ہے
مگر ایقان ہے میرا ہمارے عہد کے بچے
مرے کذب و ریا کو مکر کو اور بے ایمانی کو
نفاق و بد قماشی کو مرے ظاہر کو باطن کو
ہویدا کر کے چھوڑیں گے علی الاعلان کہہ دیں گے
کہ میرے باپ ایسے تھے مرے استاذ ایسے تھے
سو ان کی بات سے اعمال سے شرمندہ ہوں میں بھی
یہ کہنے سے انہیں عزت نہ روکے گی
نہ ان کو خوف روکے گا
انہیں کچھ بھی نہ روکے گا
چلن بدلا ہوا ہوگا
ہماری ساری عزت ساری ذلت دوسروں کے حق کی پامالی
کتاب حق کے پنوں پر بہت واضح لکھی ہوں گی

ابوبکر عباد

نظم

بشر رموز مقدر تلاش کرتا ہے
قضاوقدر کا محور تلاش کرتا ہے
فقیہ شہر صنم‌ خانۂ سیاست میں
صراط دین کا رہبر تلاش کرتا ہے
خدا کو چھوڑ کے جمہور کا ہوس پیشہ
سکون قلب فلک پر تلاش کرتا ہے
مذاق‌ عدل سے بیگانہ ہے مگر انسان
فساد خانہ میں یاور تلاش کرتا ہے
پئے نجات وطن میں بہ فیض آزادی
شریف آدمی خنجر تلاش کرتا ہے
فضائے دہر میں تخریب کا علمبردار
حیات ساز‌ پیمبر تلاش کرتا ہے
تراشتا ہے براہیم عصر صد اصنام
چراغ طور پر آذر تلاش کرتا ہے
برہنہ ظلمت‌ تہذیب میں تن مریم
مسیح وقت کی چادر تلاش کرتا ہے
صنم کدے میں تفلسف کے تیرہ دل واعظ
اویس و خالد و بوذرؓ تلاش کرتا ہے
علاج خاطر ملت کا پاسبان حرم
لعین وقت کے در پر تلاش کرتا ہے
خلوص دین کو بعد از خرابئ‌ بسیار
زمانہ آج مکرر تلاش کرتا ہے
تن شیوخ بظاہر گلیم پوش سہی
ضمیر شاہد‌ و ساغر تلاش کرتا ہے
دعا اسیری کی کرتا ہے صاحب قرآں
مفر غلامی سے کافر تلاش کرتا ہے
مذاق فقر ہے رحمت اثر زمانے میں
عذاب کنز تونگر تلاش کرتا ہے
جہان شر میں پیہم یزید کا لشکر
حسین‌ عصر کو گھر گھر تلاش کرتا ہے
سنور تو سکتی ہے ملت کی ناصحا تقدیر
لہو زمانے کا تیور تلاش کرتا ہے
میان بحر صدف میں گہر تو ہے لیکن
خطر پسند شناور تلاش کرتا ہے
زمانہ بطن‌ جہنم میں ایک مدت سے
نشاط و کیف برابر تلاش کرتا ہے
گناہ گار ہے ببیاکؔ بے نوا لیکن
نبیؐ کا گنبد‌ اخضر تلاش کرتا ہے

بیباک بھوجپوری

نظم

جن ثوابوں کے بھروسے پہ ہے زندہ واعظ
ہمیں شاید وہ گناہوں کے عذابوں میں ملیں

غوث خواہ مخواہ حیدرآبادی

نظم

رند یہ کہہ رہا تھا واعظ سے
کون ہے مجھ کو روکنے والا

دھرم پال عاقل

نظم

کس سے کہئے دل کی بات
اپنی عزت اپنے ہات
تم بن سونے ہیں یوں دن
جیسے بول رہی ہو رات
کیسی شادی کیسا غم
اپنے اپنے محسوسات
عشق ہے یہ کچھ کھیل نہیں
کس کی مات اور کیسی مات
دیکھ چکا ہوں حشر کا دن
کاٹ چکا ہوں ہجر کی رات
ہر الزام مجھے تسلیم
اپنے دل پر رکھئے ہات
لوٹے ہیں راتوں کے دن
چمکی ہے ساقی برسات
واعظ کا مذہب فاروقؔ
جیسا موقع ویسی بات

شمیم فاروق بانس پاری

نظم

جس کسی نے ان دنوں کوئی دوا ایجاد کی
بس یہ سمجھو اس نے اک بستی نئی آباد کی
پھوڑ کر سر جیل میں بے چارہ مجنوں مر گیا
اور صدائیں ہر طرف ہیں یار زندہ باد کی
کیا بتاؤں اے طبیبو عشق کی تم کو تپش
بس سمجھ لو جیسے گرمی تیر اور خورداد کی
لیجئے آئے ہیں مجنوں مجھ کو دینے درس عشق
آپ کی صورت تو دیکھو ہت ترے استاد کی
قرض تو بے شک لیا پر ہم نے کس کس سے لیا
یاد کچھ آتا نہیں یہ کیفیت ہے یاد کی
قیس آخر مر گیا سوز درون عشق سے
کھا گئی افسوس اس پودے کو گرمی کھاد کی
دیکھنا آخر سر بازار رسوا کر دیا
روز واعظ تم دعا مانگا کرو اولاد کی
مادر گیتی نے عصمتؔ کچھ مری پروا نہ کی
ساس کرتی ہے خوشامد کہتے ہیں داماد کی

عصمت اللہ عصمت بیگ

نظم

ان عقل کے بندوں میں آشفتہ سری کیوں ہے
یہ تنگ دلی کیوں ہے یہ کم نظری کیوں ہے
اسرار اگر سمجھے دنیا کی ہر اک شے کے
خود اپنی حقیقت سے یہ بے خبری کیوں ہے
سو جلوے ہیں نظروں سے مانند نظر پنہاں
دعوائے جہاں بینی اے دیدہ وری کیوں ہے
حل جن کا عمل سے ہے پیکار و جدل سے ہے
ان زندہ مسائل پر بحث نظری کیوں ہے
جو خود کسی پہلو سے کاسہ ہے گدائی کا
ایسے در دولت پر دریوزہ گری کیوں ہے
تو دیکھ ترے دل میں ہے سوز طلب کتنا
مت پوچھ دعاؤں میں یہ بے اثری کیوں ہے
کیا نذر قفس کر دی پرواز کی طاقت بھی
حاصل ہے جب آزادی بے بال و پری کیوں ہے
اے گل جو بہار آئی ہے وقت خود آرائی
یہ رنگ جنوں کیسا یہ جامہ دری کیوں ہے
واعظ کو جو عادت ہے پیچیدہ بیانی کی
حیراں ہے کہ رندوں کی ہر بات کھری کیوں ہے
ہے کون جو یہ پوچھے اس حسن خود آرا سے
ہے جب کہ گریز اتنا پھر جلوہ گری کیوں ہے
ملتا ہے اسے پانی اشکوں کی روانی سے
معلوم ہوا کھیتی زخموں کی ہری کیوں ہے
الفت کو اسدؔ کتنا آسان سمجھتا تھا
اب نالۂ شب کیوں ہے آہ سحری کیوں ہے

اسد ملتانی

نظم

دیتا ہے خبر انجام کہ ساقی رات گزرنے والی ہے
اور دن کا ہے پیغام کہ ساقی رات گزرنے والی ہے
میں تیری ہر کل جانتا ہوں کیا کل کل کل کل کرتا ہے
اب چھوڑ یہ کاف اور لام کہ ساقی رات گزرنے والی ہے
ایڈوانس میں پیسے دے دینا توہین رندی و مستی ہے
بل بھیج کے لینا دام کہ ساقی رات گزرنے والی ہے
گر ایک ہی بوتل باقی ہے اور پینے والے اتنے ہیں
کر بوتل کو نیلام کہ ساقی رات گزرنے والی ہے
پیسوں کی تو بالکل فکر نہ کر تنخواہ ملی اور میں نے دئے
لا اب تو پلا اک جام کہ ساقی رات گزرنے والی ہے
جو بھنگ پلائی تھی تو نے اس بھنگ کا نشہ کھل نہ سکا
کچھ مصری اور بادام کہ ساقی رات گزرنے والی ہے
سنتا ہوں کہ بادل اٹھے ہیں اور اولے پڑنے والے ہیں
اب جلد بلا حجام کہ ساقی رات گزرنے والی ہے
رندوں کو غرض ہے پینے سے وہسکی نہ سہی ٹھرا ہی سہی
چل جائے گا یوں بھی کام کہ ساقی رات گزرنے والی ہے
تو تھوڑی تھوڑی سب کو پلا ورنہ ترے سر آ جائے گا
کنجوسی کا الزام کہ ساقی رات گزرنے والی ہے
زاہد کو پلا واعظ کو پلا ملا کو پلا مفتی کو پلا
سب لکھ لے ہمارے نام کہ ساقی رات گزرنے والی ہے

ظریف جبلپوری

نظم

واعظ
اپنے چہرے پہ نباتات اگا لوں تو چلوں
عطر کچھ مل لوں ذرا خود کو سجا لوں تو چلوں
مرغ بریانی دہی قورمہ کھا لوں تو چلوں
اور پھولا ہوا یہ پیٹ چھپا لوں تو چلوں

قاضی غلام محمد

نظم

فرحت دل راحت جاں عیش پیہم کے لئے
عید آئی بن کے راحت سارے عالم کے لئے
خشک اب انگور کے شربت سے تر ہونے لگے
ہاتھ سب کے بڑھ رہے ہیں ساغر جم کے لئے
آج جی بھر کر پلانا اور پینا چاہئے
تیس دن ترسے ہیں اک اک قطرۂ یم کے لئے
دوستوں کو ہر طرف سامان راحت ہے نصیب
غم ہے دشمن کے لئے دشمن بنا غم کے لئے
بے تکلف طفل شوخ و شیخ شیب و مرد و زن
آج مشغول طرب ہیں لطف باہم کے لئے
مجلس وعظ آج تو ہوتی نظر آتی نہیں
حضرت واعظ عبث کوشاں ہیں کورم کے لئے
کل ہمیں مل جائے گا گر حوض کوثر ہی کہیں
آج کیوں پیاسے رہیں ہم عیش مبہم کے لئے
عید کے دن چاہئے شکر خدا ذکر رسول
وقت کیوں ضائع کریں ہم زیر اور بم کے لئے
آئیے سن لیجئے ہے آج دنیائے سخن
گوش بر آواز ان اشعار ملہم کے لئے

نواب سید حکیم احمد نقوی بدایونی

نظم

کرتی ہے صاف اشارہ تصویر گوکھلے کی
پچھتائے کی جنہوں نے تحقیر گوکھلے کی
سرگوشیاں کرے گی اک روز آسماں سے
ہاں ہاں یہاں ادھوری تنویر گوکھلے کی
تعلیم ابتدائی ہو کر رہے گی لازم
روشن کرے گی آنکھیں تنویر گوکھلے کی
ایفریقا میں نہ ہوگا فرق سپید و اسود
لائے گی رنگ خونیں تقریر گوکھلے کی
حب وطن کو جزو ایماں کہا گیا ہے
واعظ سمجھ کے کیجو تکفیر گوکھلے کی
اے معترض حصار باطل ہو لاکھ محکم
کر لے گی پر صداقت تسخیر گوکھلے کی
مت آزما کہ حق نے گرتوں کو کیسے تھاما
من جرب المجرب حلت بہ الندامہ

زاہدہ خاتون شروانیا

نظم

سچی باتوں سے کھڑے سرکار کے ہوتے ہیں کان
دھیرے دھیرے بولئے دیوار کے ہوتے ہیں کان
دیجئے مجھ کو سزا پیغامبر کا کیا قصور
گرم کیوں اس مجرم گفتار کے ہوتے ہیں کان
باغ میں غنچہ جو چٹکا میں خوشی سے پھول اٹھا
آشنا کتنے صدائے یار کے ہوتے ہیں کان
میکدے میں کیوں نہ خالی جائے پھر واعظ کی بات
جب بھرے پہلے سے ہر مے خوار کے ہوتے ہیں کان
داغ سینے کے نہ دکھلا نالۂ پر شور کر
منہ پہ آنکھوں کی جگہ سرکار کے ہوتے ہیں کان
پوچھتا فاروقؔ شیخ مدرسہ ملتا اگر
بند کیا ہر صاحب دستار کے ہوتے ہیں کان

شمیم فاروق بانس پاری

نظم

جب رکھتے ہو تم ابروئے خم دار وغیرہ
کیوں باندھے پڑے پھرتے ہو تلوار وغیرہ
تھے کل تو ہزاروں سر بازار وغیرہ
اور اب تو نظر آتے ہیں دو چار وغیرہ
ہے بخل کا جن لوگوں کو آزار وغیرہ
ہے راس انہیں شربت دینار وغیرہ
جس روز سے کپڑے پہ مقرر ہوا راشن
ڈھونڈے سے بھی ملتی نہیں شلوار وغیرہ
تھی پھس پھسی تقریر تو لیڈر کی وہ لیکن
اس پر بھی اسے مل گئے کچھ ہار وغیرہ
سچ یہ ہے کہ انسان پہ جب وقت ہے پڑتا
دشمن کو بھی کہہ لیتا ہے سرکار وغیرہ
جب میں نے غزل ان کو سنائی تو وہ بولے
کیوں شعر میں تو لاتا ہے ہر بار وغیرہ
واعظ کی گل افشانی کا بس ہے یہ خلاصہ
سو بار چنانچہ ہے تو سو بار وغیرہ
غیروں کی وہ حالت ہے کہ بس دم ہی نکل جائے
ننگی نظر آ جائے جو تلوار وغیرہ
آتے ہی مرے بزم کا ہے رنگ بدلتا
اٹھ اٹھ کے کھسک جاتے ہیں اغیار وغیرہ
سر پھوڑنے کو میرا بہت دل تو ہے چاہتا
لیکن کہیں ملتی نہیں دیوار وغیرہ
واللہ سمجھ میں مری کچھ بھی نہیں آتا
جب پڑھتا ہوں غالب کے میں اشعار وغیرہ
مدت سے مری ان کی نہیں خط و کتابت
ہاں بھولے سے چل جاتے ہیں کچھ تار وغیرہ
تشہیر دواؤں کی ہے اور فلموں کی تعریف
ان سے ہی بھرے رہتے ہیں اخبار وغیرہ
عصمتؔ کو نہیں ملتا کبھی لفظ جو موزوں
لے آتا ہے اشعار میں بیکار وغیرہ

عصمت اللہ عصمت بیگ

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے